MATHIU 3
3
Jon Baptist Lapen Alangli Kepachethang Alam
(Mar 1.1-8; Luk 3.1-18; Jon 1.19-28)
1Halabangso ahut Jon Baptist Judia adet kejejangtang ajo cheklangsi pachethangsi pulo, 2“Nangtum aning chiruinon, pima sining arat tebok-het-lo.”#Mat 4.17; Mar 1.15 3Pima Isaiah montri alangli lamjirsi pudamlo, atheke alangli pulo.
“Komane abang kejejangtang ajo hangkongsi pulo,
‘Nangtum Hemphu atovar sikpinon;
alangli kedamji aphan tovar ban anta pakengpinon!’ ”#Isa 40.3
4Jon ape ke ka-ut angmi pensi thak-lo, lapen ok-reng pensi avam chekok-lo, lapen alangli kecho ahormu ke longvur lapen nampi apijo alang helo.#2 Rec 1.8 5Ansi Jerusalem lapen Judia adet adang an lapen Jordan akung arei kedo atum an alangli long damlo, 6lapen amethang methang apap hei hei chekobirbomsi alangli rideng pen Jordan alangroi along baptisom enlo.
7Bonta Pharisi lapen Saduki ake-ongpi atum baptisom ke-enji aphan alangli dung kevang thek longsi Jon halatum aphan pulo, “O pherui akhei, kevangji dokdok Arnam aning kethi pen kekatji aphan matsi nangtum aphan nangpareloma?#Mat 12.34; 23.33 8Athikpet aning kecherui a-ot athe pathenon, 9lapen nangtum methang kejokji aphan ‘Abraham ke netum apolo’ puke nangtum matharinon; pima ne nangtum aphan nangpulang, Arnam labangso a-arlong hei hei aphan Abraham asomar pinchongthek.#Jon 8.33 10Lapen non mamat thengpi hei hei akeng-risi acho bitekang-lo, lapen athe keme kepathethe athengpi an pivekpo lapen me phrindutpo.#Mat 7.19 11Ahok-lo, ning kecherui angthek aphan ne nangtum aphan lang pen baptisom pibomlo, bonta nephi kevangji abang ke nepar ajakong themulo. Alangli keng-op keponpiji anta ne-ot ave. Labangso abang nangtum aphan Karjong Kangthir lapen me pensi baptisom nangpiji. 12Alangli aso hongthrok akongvek otdongsido, lapen alangli methang ajimtim pangthei-etpo, lapen sok ke puru along chethappo, bonta aphe-e ke kemepmepin ame along phrindutpo.”
Jisu Baptisom Ke-en
(Mar 1.9-11; Luk 3.21-22)
13Ansi Jisu Jon Baptist arideng baptisom ke-enjisi Galili adet pen ha Jordan alangroi along damsi alangli long vang-lo. 14Bonta Jon alangliphan kekhangji mathasi pulo, “Ne ke nang ridengsi baptisom ke-en nangji abangle, pisi nelong vang-loma?” 15Bonta Jisu thaksi alangliphan pulo, “Non ke lapusonle paplangnang. Pima dhoromi ason an kepaplengji aphan ili lapuson ke athikpet akamlo.” Ansi Jon ta alam kroidunlo. 16Lapen Jisu baptisom endet pen mamat lang along pen kora arlu damphit-lo. Lapen chini iktha, sining chingpudang-lo, lapen Arnam a-Karjong vothung ason nanghirlo, lapen alangli phuthak kanghu chethek long-lo. 17Lapen chini iktha, sining pen ase vangsi pulo, “La ke ne-Sopo, ne kechinghon abang-lo. Laphan ne ning dok-lo.”#Kech 22.2; Lun 2.7; Isa 42.1; Mat 12.18; 17.5; Mar 1.11; Luk 9.35
Currently Selected:
MATHIU 3: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.