MATHIU 28
28
Jisu Kethi Pen Kethur
(Mar 16.1-10; Luk 24.1-12; Jon 20.1-10)
1Sabbath arni aphi hithi arui aphrang arni, the-ang prinprele apor Megdala asor a-Meri lapen akaprek a-Meri ha tipit langdamlo. 2Lapen chini iktha, chikli vang-lo, lapen Hemphu apherangke sining pen nanghirsi halabangso a-arlong pakong-longsi terek-lo, lapen labangso athak ingnilunlo. 3Alangli arje sining kebirlak ason lapen ape ar-e kelok asonsi lok kling-lo. 4Alangliphan pheresi hadak keton atum a-ok klemhurlo, lapen latum kethitang atum asonsi cheplang-lo. 5Hala pherangke arlosomar atum aphan pulo, “Nangtum thangta phereri. Pima ne chinilo, hala thengparpan athak kepathitang a-Jisu aphansi nangtum rilo. 6Alangli ladak avelo. Keputang asonthotsi alangli thurtang-lo. Ladak vang-ra alangliphan kepa-i adim nanglangtha. 7Nangtum dam serak-ra alangli sangho atum aphan alangli kethitang atum angbong pen thurtang-lo, lapen alanglitum aphrang ha Galili adet dam patenolo, hadak nanglitum alangliphan thek dam longji pura thandam non.” 8Latum kephere pen lapen aning arongpik pen thiri pen dam serak-rak-lo, lapen katsi asangho atum aphan kethandamjisi damlo. 9Lapen chini iktha, Jisu latum pen chetongsi pulo, “Kardom!” Latum alanglidung an vangsi akeng otsi alangliphan ardomlo. 10Ansi Jisu latum aphan pulo, “Phereri, damra ne korte atum aphan ha Galili dam nangji pura than damnon, lapen hadak latum nephan thek longpo.”
Keton Atum Kethan Alam
11Arlosomar atum tovar kedambom ahut thiri along keton penang aron-aso atum ha rongsopi damsi kurusar atum aphan keplangtang alamjir than damlo. 12Ansi kurusar akethe atum lapen akesar atum do-an chingrumsi bidi rilo, lapen rup atangka ake-ongpi ensi chedanbang atum aphan pisi pulo, 13“Asangho atum ajo amat vangsi netum amek kejang aphi la inghu pondet-lo pule rat atum aphan thannon. 14Labangso alam jongsi govornor arjulong-lote netum alangliphan pakroi thekpo, lapen nangtum akesung pen jokpo.” 15Ansi latum rup atangka dengsi latum kethan ateng klemlo, lapen labangso alam pini arni anta Jihudi atum angbong pachethanglang.
Jisu Asangho Atum Aphan Kecheklang
(Mar 16.14-18; Luk 24.36-49; Jon 20.19-23; Akam 1.6-8)
16Jisu latum aphan keputang asonthotsi bang kre isi asangho atum ha Galili damsi inglong arlu damlo.#Mat 26.32; Mar 14.28 17Latum alangliphan thek long-lok pen ardomkhrup-lo, bonta latum angbong mane atum ke la kroithip thedet-lo. 18Ansi Jisu latum adung vangsi latum aphan pulo, “Sining athak lapen Pirthe athak kadokave ajakong nephan nepitang-lo. 19Lahelo nangtum damra pirthe adang akhei kedo-an aphan sangho paplangra Po lapen Sopo lapen Karjong Kangthir amen pen halatum aphan baptisom pinon,#Akam 1.8 20lapen Ne nangtum aphan nangkethan alam kedo-an kepakroijile halatum aphan than petnon; lapen chininon, Ne nangtum along labangso apirthe kejut anta nangdo dunverji.”
Currently Selected:
MATHIU 28: KARBIBSI
Highlight
Share
Compare
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
