MATHIU 27
27
Jisu Aphan Pilat Along Kepon
(Mar 15.1; Luk 23.1-2; Jon 18.28-32)
1Adapprang kurusar akethe atum lapen akesar atum kedo an Jisu aphan kepathiji abidi chingvailo, 2lapen latum alangliphan kok ingnangsi Pilat govornor along ponsi hodai damlo.
Judas Iskariot Kethi
(Akam 1.18-19)
3Ansi Jisu aphan kepathiji ahukum pipo pu chinisi Jisu aphan hotur arideng kehodai abang, Judas aning chiruisi hala rup atangka thomkep kurusar akethe lapen akesar atum along vangthulo, lapen 4alangli pulo, “Ne pap klem tang-lo.” Latum alang-liphan thaksi pulo, “Nelitum la thangta chinine. Lake nangli kam methang.” 5Judas la rup atangka Kardomhemthepi arlo vartekang chorsi damjuilo lapen chekokthat damlo.
6Kurusar akethe atum la rup atangka humsi pulo, “Laso atangka Kardomhemthepi atangka apuru arlo kebiji aron ave, pima lake vi anamlo.” 7Ansi latum chingvaidetsi kechinine amonit atum aphan kepipji adim aphan longle ahormu kethip abang alongle labangso atangka pen namdet-lo. 8Lasi pini arni anta labangso alongle emo aphan “Vi alongle” pusi pulo. 9Ansi Jeremiah montri kethan alam chekok-lo, atheke alangli pulo, “Manene a-Israel atum inut amonit aphan anam pathik-lo, halabangso kepathiktang anam,#Zeka 11.12-13 10rup atangka thomkep ensi halatum neli Hemphu nephan hukum nekepi asonthotsi longle ahormu kethip abang alongle anam pidamlo.”#Zeka 11.12-13
Pilat Jisu Aphan Karju
(Mar 15.2-5; Luk 23.3-5; Jon 18.33-38)
11Govornor angno Jisu arjaptherlo, lapen alangli Jisu aphan arjusi pulo, “Jihudi atum arecho pu nangli heloma?” Jisu thaksi pulo, “Nangli la putang-lo.” 12Lapen kurusar akethe atum lapen akesar atum alangliphan adai ketin ahut alangli thangta chethak dundedet-lo. 13Ansi Pilat alangliphan pulo, “Latum nangliphan lapu-an adai tinlo setta nangli thangta arjulongledetma?” 14Bonta Jisu ethenatta thak dundedet-lo, lasi govornor ke manghuhak-lo.
Jisu Aphan Kepathiji Ahukum Kepi
(Mar 15.6-15; Luk 23.13-25; Jon 18.39—19.16)
15Kejok Achojun a-Meipi aphong-tinta armu atum aning kehang aling phatek kedo atum angbong pen inut aphan kepajokji aron do. 16Halabangso ahut inut kehingnopik, amen keklangdong abang do; alangli menke Jisu Barabbas puhelo. 17Ansi armu atum kechingrumpet ahut Pilat halatum aphan pulo, “Neli nanglitum aphan komat abang aphansi pajok nangjima? Jisu Barabbas aphanma, mate Jisu Khristo pu abang aphanma?” 18Pima Jihudi atum angbong keja atum alangliphan kelang un-e pensi hodailo pu alangli chini pamelo. 19Pilat kangsai anghoi kangni ahut apiso alangliphan birta losi pulo, “La dhoromi abang aphan nang thangta klemri, pima alangli pen apot tove nemang along ne sungpik-lo.” 20Bonta Barabbas aphan pajok nangji lapen Jisu aphan pathi nangji pu kepahangjojisi kurusar akethe atum lapen akesar atum armu atum aphan chorung-lo. 21Ansi Pilat armu atum aphan arjulo, “La bang hini angbong ne komat abang aphansi pajok nangjima? Nanglitum aning kehang komat abangma?” Latum thaksi pulo, “Barabbas.”
22Pilat halatum aphan arjulo, “Tangte Khristo pu a-Jisu aphan ne kopisi klem nangpo?” Latum kadokave thaksi pulo, “Alangliphan thengparpan athak pathinon.” 23Ansi Pilat thaksi pulo, “Kopi akehingno akamsi alangli klem tang-loma?”
Anke latum an sose ase kethe pen hangjosi pulo, “Thengparpan athak pathinon.”
24Pilat la thangnat ale thek longle detsi, bonta la alar ansose kehuriseiji angring thek longsi alangli armu atum angno lang ensi, ari chersamsi pulo, “Labangso amonit avi kepabu apot ke neli dai thangta ave! Lake nanglitum akamlo.”#Keth 21.6-9 25Kedo an arat atum thaksi pulo, “La alangli vi adai nelitum lapen nelitum asomar atum aphuthak padonang.” 26Ansi alangli halatum aphan ajok Barabbas aphan lophlot-lo, lapen Jisu aphan champre abu pen pachoksi thengparpan athak kepathiji aphan latum aphan hodailo.
Chedanbang Atum Jisu Aphan Kangnekchoi
(Mar 15.16-20; Jon 19.2-3)
27Ansi Pilat aron-aso atum Jisu aphan govornor ahem arlo ponlo lapen asong isi aron-aso alangli dung do dunlo. 28Latum alangli pe phloksi ake-er ape pindeng-lo. 29Ingsu avaikang arhetsi alangli phu athak kup-lo, lapen ari ar-e pri achin pa-otsi, alangli ingno akengphu patongruisi alangliphan pinremlo, lapen hangjosi pulo, “Kardom, Jihudi atum arecho!” 30Latum alangliphan ingthok-lo lapen hala achin pensi aphu along thengbomlo. 31Latum alangliphan pinremdetsi, hala ake-er ape phloksi amethang ape pindeng-lo, lapen thengparpan athak kepathijisi alangliphan ponlo.
Jisu Aphan Thengparpan Athak Kepathi
(Mar 15.21-32; Luk 23.26-43; Jon 19.17-27)
32Latum tovar kedambom ahut Kireni arongsopi amonit, Simon pu abang aphan chetong-lo, lapen latum alangliphan Jisu athengparpan kepa-ponji aphan sodak ahukum pilo. 33Ansi latum ha Golgotha, atheke “Phu bongkok adim” nanglelo, lapen 34latum Jisu aphan akehodak ason pen kepangvui adrakha ahorlang kepajunjisi alangliphan pilo, bonta Jisu la chomatsi junjedet-lo.#Lun 69.21 35Latum alangliphan thengparpan athak sak-lo, lapen khadot pathusi alangli pe chethak-lo.#Lun 22.18 36Labangso tangdet aphi latum hadak ingniphrongsi alangliphan honding-lo. 37Alangliphan adai ketin alamthe, atheke “LABANGSO ABANG KE JISU, JIHUDI ATUM ARECHO,” pu alamthe toksi ha angsong, alangli athak tardong-lo. 38Banghini akanghupi atum aphan Jisu ar-e anat inut lapen arvi anat inut aphan thengparpan athak sak-lo. 39Tovar kevang kedam atum aphu chehejuksi alangliphan pinremsi pulo,#Lun 22.7; 109.25 40“O Kardom ahem kephrira nithom angbong kekim kepatangthek abang, nangli jongsi Arnam a-Sopo tangte nangli methang chepajok-ra thengparpan pen nanghirnon.”#Mat 26.61; Jon 2.19 41Lapuson thak-thaksi kurusar akethe atum, aron thekser atum lapen akesar atum do-anta alangliphan pinremsi pulo, 42“Alangli bang kaprek atum aphan ke pajokthek bonta amethang ke chepajok thekthe! Israel a-Recho alangli helo, kalima? Alangli jongsi non amat thengparpan pen nanghir asonte nelitum alangliphan kroiji apot-lo. 43Alangli Arnam aphan chikilo lapen Arnam a-Sopo pusi chekrong-lo. Tangte ili lang lonang, non alangliphan Arnam pajokjima, pajokjema!”#Lun 22.8 44Alangli penpen thengparpan athak kesak rap-rap akanghu atumta lasonthotsi alangliphan pinremlo.
Jisu Kethi
(Mar 15.33-41; Luk 23.44-49; Jon 19.28-30)
45Nerlo chitim pen ha baji kethom apor an det adang ingtingkuk-lo. 46Lapen baji kethom anbak ahut Jisu ase kethe pen hangsersi pulo, “Eli, Eli lama sabakthani,” atheke, “Ne Arnam, ne Arnam, kopi athesi nang nephan obup-loma?”#Lun 22.1 47Hadak karjapphrong, manene atum la arjulongsi pulo, “Labangso abang Elijah aphansi kehang-lo.” 48Lapen hala mamat halatum angbong pen inut abang katvirsi tula endamlo lapen la drakha ahor akethor along nimsi, lapen arpik ehong pen krongdongsi alangliphan kepajunjisi pilo.#Lun 69.21 49Bonta akaprek atum pulo, “Thalang, inghongsinang, alangliphan kepajokji aphan Elijah vangjine vangvene, lale langdun sinang!” 50Jisu puthot ase kethe pen hangsersi achethe chevung-lo.
51Chini iktha, kardomhemthepi along kebeng ape athak pen ha aber an chingsekdak-lo, lapen arlonghei-heita inghang-lo,#Keba 26.31-33 52lapen tipit hei hei ta chingpudang-lo, lapen kethitang akangthir atum ake-ongpita thursi reng-lo, 53lapen latum tipit che-olo, lapen Jisu kethi pen thurdet aphi latum Rongsopi Kangthir angbong lutdamsi ake-ongpi atum aphan cheklangdamlo.
54Chedanbang bang pharo ahemphu lapen Jisu along kehondun atum chikli kevang lapen keplangtang akam hei hei thek-longsi jasemet pherelo lapen pulo, “Chenamlo, labangso abang ke Arnam a-Sopolo!”
55Hadak achar pen kelangdun arlosomar atum ake-ong pi dolo. Halatum Jisu aphan keru kethaijisi Galili adet pen alangli phi phi dunlo.#Luk 8.2-3 56Halatum angbong Megdala arong a-Meri, Jems lapen Joseph apei Meri lapen Jebedi asopo atum apeita dolo.#Luk 8.2-3
Jisu Aphan Kebidam
(Mar 15.42-47; Luk 23.50-56; Jon 19.38-42)
57Arni kangsam apor Arimathea asor Joseph pu inut keplang-o abang vang-lo. Alanglita inut Jisu asangholo. 58Alangli Pilat along damsi Jisu abang arpum hangdamlo. Ansi Pilat Joseph aphan hukum pilo. 59Joseph la abang arpum ensi linen ape akemirak pen perlo. 60Lapen alangli methang keroktang atipit kemi along pa-i-damlo, lapen tipit amahang along arlong akethe pakong-long tekangthipsi alangli damjuilo. 61Hadak Megdala a-Meri lapen akaprek a-Meri abang ingniphrongsi thiri anat langphrong-lo.
62Puthot arni, lake kesang arnilo. Kurusar akethe atum lapen Pharisi atum Pilat along damsi pulo, 63“Hemphu, labangso kechobei abang kereng ahut keningjetekang, atheke ‘Ne nithom aphi thurthuji’ pu alam nelitum chemathadam-thulo.#Mat 16.21; 17.23; 20.19; Mar 8.31; Mar 9.31; 10.33-34; Luk 9.22; 18.31-33 64Tangte nithom arni anta athikpet-le tipit kehonji ahukum pitha. Lapu kalite asangho atum vangsi alangli bang arpum inghu pondetji, lapen alangli kethitang atum angbong pen thurtang-lo pusi rat atum aphan thanji tahai. Lapulote aphrang apar la hingno muchotpo.” 65Pilat halatum aphan pulo, “Keton atum aphan ponnon, Damra latum paton damnon.” 66Latum damlo, lapen tipit kepathirjisi arlong along asap theng-lo, lapen keton atum aphan pahonlo.
Currently Selected:
MATHIU 27: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.