MATHIU 21

Jisu Anong Kethe Pen Jerusalem Kelutdam

(Mar 11.1-11; Luk 19.28-40; Jon 12.12-19)

1Jisu lapen asangho atum Jerusalem leji dokdok ahut Oliv anglong arei kedo Bethphage arong vang-lo. Ansi Jisu asangho bang hini atum aphan toisi pulo, 2“Nangtum aphrang kengdet arong damnon, lapen nangtum kele pen ejon agadha aphan kekokdong lapen la aso aphan thek longpo. La phlok dam-jok-ra nelong vannon. 3Mane jongsi nangtum aphan kopine alam pulote, ‘Hemphu latum aphan nangji’ pule punon lapen hala mamat alangli nangtum aphan nang-lo dunpo.”

4Arnam amontri keputang alam kepachekokjisi la plang-lo. Atheke alangli pulo,

5“Zaion arongsopi aphan thantha,

Langtha, nang recho nanglong vang-lo!

Alangli ke asotdut,

lapen mar kepon agadha lapen aso athak ardonlo.”#Zeka 9.9

6Ansi asangho atum Jisu kethan asonthotsi klemlo: 7latum gadha lapen aso vanlo lapen amethang ape latum athak limlo lapen Jisu la athak ardonlo. 8Lapen armu ake-ongpi atum amethang kechingthang ape a-ri tovar athak limlo, lapen akaprek atum thengplum chorsi tovar athak limlo. 9Lapen alangli phrang kedam lapen alangli phi kedun atum hangjosi pulo,

“Hosana! David a-Sopo!

Hemphu amen pen kevang abang ahirjume atheng!

Hosana! Kangtuinei a-Bang!”#Lun 118.25,26

10Jisu Jerusalem nanglesi rong isi a-armu hangjosi pulo, “Labangso abang komat-lo?” 11Armu atum thaksi pulo, “Labangso abang ke Galili adet, Nazareth amontri, Jisu lo.”

Jisu Kardomhemthepi Kepangthir

(Mar 11.15-19; Luk 19.45-48; Jon 2.13-22)

12Jisu Kardomhemthepi lutdamsi hadak kejor lapen kenam atum an aphan ingtan phlung-lo, lapen tangka kelar atum ahongplang lapen vothung kejor atum anghoi tharlepi-et-lo, 13lapen alangli halatum aphan pulo, “Nehem aphan ke Kardomhem pusi pupo pusi Arnam pulo, lake hastro along tok-lo, bonta nangtum ke la dokait angthor pinchongtang-lo!”#Isa 56.7; Jer 7.11

14Amek kave lapen akeng ketekok atum Kardomhemthepi arlo Jisu adung vang-lo, lapen alangli halatum aphan pamelo. 15Bonta kurusar kethe atum lapen aron thekser atum alangli keklemtang akemanghumeme akam hei hei lapen osomar atum Kardomhemthepi arlo hangjosi, “David a-Sopo anong pathenon!” pu kepu thek-longsi aning oi-lak-lo. 16“Nangli latum kepu alam arjulong-loma? Lasi latum alangliphan pulo, ‘Osomar lapen oso thi-i atum kero kepachok-limji aphan nangtum halatum aphan thantang-lo,’ pu alam nangtum hastro along porhehepin langma?”#Lun 8.2

17Jisu halatum pen chekaksi rong-sopi pen barlo, lapen Bethani arongsopi damsi ajo hadak dokok-lo.

Jisu Thebo Arong Aphan Ahirjuno Kepi

(Mar 11.12-14,20-24)

18Puthot arni, adapprang Jisu rong-sopi nangkechevoi ahut an ingchirlo. 19Alangli tovar akung thebo arong thek long si adung damlo. Bonta arvo pen apar thangta thek longledetsi alangli la aphan pulo, “Non pen apara nang kaiketa athe pathethedetji,” Hala mamat thebo arong chekedulo.

20Asangho atum la thek longsi, manghuphrongsi pulo, “Thebo arong kopisi la an akeprap pen chekedu loma?” 21Jisu latum aphan thaksi pulo, “Chenamsi ne nangtum aphan nangpulang, nangtum jongsi nangning bibera kroite la thebo arong aphan keklem ason thakthak anchot kali, bonta nangtum inglong aphanta ‘Thurra nang methang amat talo along chevar damnon’ pusi nangtum pudetji, lapen la plangdetji.#Mat 17.20; 1 Kor 13.2 22Lapen nangtum kekroi pen ardomlote nangtum kehang alingta longji.”

Jisu Konat Pensi Ajakong Kelong

(Mar 11.27-33; Luk 20.1-8)

23Jisu kardom ahem thepi arlo lutdamlo, lapen alangli kethanbom ahut kurusar kethe atum lapen akesar atum alangli long vangsi pulo, “Nangli kopuson ajakong kelongsi lahei hei klem bomloma, lapen matsi nangliphan labangso ajakong nanglipi loma?”

24Jisu thaksi halatum aphan pulo, “Neli nanglitum aphan eson alam nang arjulang, nanglitum jongsi neliphan thak-lo tangte nelita kopuson ajakong kelongsi lahei hei klemloma, lake nanglitum aphan thanpo. 25Jon baptisom kepiji ajakong konat pensi kelongma? Sining pen ma, mate monit pen ma?” Ansi halatum angbong lam chedanseisi pulo, “Etum jongsi ‘Sining pen’ pule pulote alangli etum aphan pupo, ‘Tangte nanglitum kopi apotsi alangliphan kroikredet-loma?’ 26Bonta etum jongsi ‘Monit pen’ pu pulote, etum armu atum aphan pherelo; pima kadokave atum Jon aphan Arnam amontri pusi puhurlo.” 27Ansi latum Jisu aphan thaksi pulo, “Nelitum chinine.” Lapen alangli halatum aphan pulo, “Nelita kopuson ajakong kelongsi lahei hei klemloma, lake nanglitum aphan nangthanthedetpo.”

Sopo Banghini Alamjir

28“Nanglitum kopisi mathalo? Inut amonit asopo banghini dolo. Alangli akleng along damsi pulo, ‘Po pini nang damra ha drakha aberi arlo kam klemdamtha.’ 29Alangli thaksi pulo, ‘Ne damde;’ bonta aphi aning chiruithusi la damlo. 30Lapen alangli akebi abang along damsi lapusonthot pudamlo, lapen alangli thaksi pulo, ‘Ne dampo,’ bonta alangli damdedet-lo. 31Latum banghini angbong komat abangsi apo aning kehang ason klemloma?” Latum thaksi pulo, “Akleng abang.” Ansi Jisu halatum aphan pulo, “Chenamsi ne nangtum aphan nangpulang, midu kerung atum lapen akhat kave arlosomar atum nanglitum aphrang Arnam Arat lutdampo. 32Pima nanglitum aphan ahok atovar nang-kepaklangjisi Jon Baptist vang-lo, bonta nanglitum alangliphan kroikredet-lo, bonta midu kerung lapen akhat kave arlosomar atum alangliphan kroilo; lapen nanglitum ke la thek-long-lo setta aphi ning chiruiredet-lo lapen kroikredet-lo.#Luk 3.12; 7.29-30

Drakha Aberi Alamlir

(Mar 12.1-12; Luk 20.9-19)

33“Akaprek alamlir arjutha. Inut ahem ahemphu dolo; alangli drakha arong e-lo lapen la ingpaichenlo. Drakha alang aphan alonghong rok-lo lapen ahemtap kimlo lapen sai ketiki atum aphan pektekangsi adet kaprek damjuilo. 34Drakha athe kelikji apor nanglesi alangli kelong nangji athe kepa-en damji aphan aban atum aphan ketiki atum along nangtoilo. 35Ketiki atum alangli ban atum aphan nepcheksi inut abang aphan areng pasolo, inut abang aphan ke pathilot-lo lapen inut abang aphan ke arlong pen arbulo. 36Puthot alangli aphrang atum apar ong muchot, akaprek aban atum aphan toilo, lapen hala ketiki atum aphrang ason thak-thaksi latum aphanta klemlo. 37Aphisi alangli halatum along amethang asopo aphan toisi pulo, ‘Latum nesopo aphan aman pivekpo.’ 38Bonta ketiki atum alangli sopo aphan thek-longsi latum angbong chepulo, ‘Lake kechepahemphuji abang-lo; vangnon, etum laphan pathi lonang, lapen alangli sar arni akhi an chepahemphu lonang.’ 39Halatum alangliphan nepcheksi drakha aberi angtan varchorsi pathilot-lo.

40“Tangte drakha aberi ahemphu kevangji ahut, alangli hala ketiki atum aphan pisi klemjima?” 41Halatum alangliphan thaksi pulo, “Alangli la kehingnodak atum aphan akepherememe akesung pen pathiji, lapen abotor ahut drakha athe alangliphan apharman kepiji, lason akaprek ketiki atum aphan pekdetji.”

42Jisu halatum aphan pulo, “Hastro along nanglitum la porhehe pin langma? Atheke hadak tok-lo,

‘Hem kekim atum kevartang a-arlongsi hem kepathir-i akenangsotnei a-arlong cheplang-lo.

Lake Hemphusi klemlo;

La kelang ko-an akemanghumeme plang-lo?’

43“Lasi neli nanglitum aphan nangpulang,” Jisu puthulo, “Arnam Arat nanglitum along pen pondetji, lapen hala athikpet athe kepathe, adet kaprek atum aphan pidetji.” 44Labangso a-arlong athak keklo abang aling ke klorup rupdetji, lapen labangso a-arlong jongsi komane abang athak klo lote, labangso abang ke padukniji.

45Kurusar kethe atum lapen Pharisi atum alangli kethan alamlir hei hei arjulongsi, Jisu alanglitum alamjirsi ningjelo pu chinilo, 46ansi latum alangliphan kenepchekjisi abidi ribomlo. Bonta latum armu atum aphan pherelo, pima rat atum alangli-phan Arnam amontri pusi mathalo.

Currently Selected:

MATHIU 21: KARBIBSI

Highlight

Copy