MATHIU 22
22
Recho Asopo Aphan Piso Kepangri
(Luk 14.15-24)
1Puthot Jisu halatum aphan lamlir pen thansi pulo, 2“Sining Arat ke inut arecho asopo aphan piso kepangri amei kesik pen pangbar me. 3Alangli piso kepangri amei along kephatang atum aphan kepahang damjisi aban atum aphan toilo, bonta latum nangkedunji aning hanghedet-lo. 4Puthot alangli akaprek aban atum aphan toisi pulo, ‘Damra kephatang atum aphan than damnon, chini iktha, ne kechopi sik tang-lo, ne chainong alo lapen kepangtutang achainong anta thutang-lo, lapen kadokave ason anta siktang-lo, piso kepangri along nangduntha.’ 5Bonta halatum thangta arjujedetsi amethang akam chedam rep-lo; inut ke arit chedamlo, akaprek abang ke kulat damlo, 6lapen hala akaprek atum ke alangli ban atum aphan patherak-lo, lapen pathi-et-lo. 7Recho aning thisi, aron-aso atum aphan toilo, lapen hala apran ke-en atum aphan pathikoilo, lapen arongsopi me pacho-et-lo. 8Ansi alangli aban atum aphan pulo, ‘Piso kepangri akechopi siktang-lo, setta kephatang atum la kecho longji a-ot avedet-lo. 9Tangte nangtum tovarpi along damra nangtum kepholok abang aling aphan kechopi amei along nangkedunjile hangdamnon.’ 10Alangli ban atum tovar akrongtin along damsi kepholok atum an aphan pangrumdamlo, akehingno lapen akeme atum aphan pangrumlo. Ansi piso kepangri ahem ke alohi atum pensi paplengset-lo.
11“Recho abang alohi atum aphan kelang damjisi arlo damlo lapen alangli hadak inut piso kepangri ape kechepindengde abang aphan thek-long-lo. 12Lapen alangli laphan pulo, ‘O jirpo, nangli kopi apotsi piso kepangri ape avedet-le ladak nangkelut dun loma?’ Alangli thangta ningjejedetsi dojoilo. 13Ansi recho amethang aban atum aphan pulo, ‘Laphan ari akeng kok-ra ha ingtan akangtingle vardamnon, lapen hadak latum chiru chenapsi aso chardengji.’ ”#Mat 8.12; 25.30; Luk 13.28
14Lapen Jisu pulo, “Ake-ongpi atum aphan phalo, bonta penang an atum aphansi ingvaichot-lo.”
Midu Ketu Alamthe
(Mar 12.13-17; Luk 20.20-26)
15Ansi Pharisi atum damsi Jisu amethang keningje alam pen apot alangliphan adai kenepji abidi rilo. 16Halatum amethang asangho lapen Herod abe kedun atum aphan alanglilong toisi papulo, “Thanbang, nangli ke ahok, lapen ahok pensi Arnam atovar thanbomlo, lapen nangli badu aphanta pherere, thangbakma nangli monit atum aman aphan langdamde. 17Tangte nangli kopusi mathalo, nelitum aphan thantha: Koisor Recho aphan midu ketu aron doma avema?” 18Bonta Jisu halatum akehingno akematha abidi chinisi pulo, “Kopi apotsi neliphan asat nelang-loma? Angthin ke-ik atum! 19Midu ketu-i atangka neliphan nepaklangtha. Lapen halatum ‘denari’ isi alanglilong vanlo.” 20Alangli halatum aphan pulo, “Labangso amohor lapen amen komat-lo?” 21Halatum pulo, “Koisor Recho.” Ansi Jisu halatum aphan pulo, “Tangte mesenlo, Koisor Recho amar an Koisor Recho aphan tunon, lapen Arnam amar an Arnam aphan tunon.” 22Halatum la arjulongsi manghu phrong-lo, lapen alangliphan otekangsi damjuilo.
Monit Thidet Aphi Kethurji Alam
(Mar 12.18-27; Luk 20.27-40)
23Halabangso arni mamat Saduki atum alanglilong vang-lo, lapen kethitang atum thurthuthe pusi latum pulo. Lapen latum alangliphan arjusi pulo,#Akam 23.8 24“Thanbang, Moses pulo, ‘Mane abang jongsi aso ave ako thilot lote akorte abang la akorte apiso aphan patengvek nangji, lapen akorte asomar paplang nangji.’#Keth 25.5 25Non hadak nelitum along korte bang throksi dolo; aklengsi abang piso ensi thilot-lo, lapen alangli asomar avedet-lang apotsi alangli piso amu aphan otekang-lo. 26Lapusonthotsi adakvam abang lapen adakvam adun abang lapen ha bangthroksi atum anta plang-lo. 27Kadokave aphisi arlosota thilot-lo. 28Tangte mo kethur arni labangpi la bangthroksi angbong komat abang apiso cheplangjima? Pima kadokave labangpi aphan enpet-lo.”
29Jisu thaksi halatum aphan pulo, “Nanglitum akechokche thedung-lo, pima nanglitum hastro alamthe lapen Arnam ajakongta chininedet-lo. 30Pima mo kethur arni halatum pisota en-e lapen penanta dode, bonta halatum sining athak kedo apherangke atum ason thakthakpo. 31Bonta kethitang atum kethurji alam ke nanglitum porhehe pin langma? Atheke, Arnam nanglitum aphan putang-lo, 32‘Nelisi Abraham a-Arnam, Isaak a-Arnam lapen Jakob a-Arnam.’ Alangli ke kethitang atum a-Arnam kali bonta kereng-et atum a-Arnamlo.”#Keba 3.6
33Lapen armu atum la arjulongsi alangli kethan alam apot manghu phrong-lo.
Akethenei Ahukum
(Mar 12.28-34; Luk 10.25-28)
34Jisu Saduki atum aphan padoklip-lo pu Pharisi atum arjulongsi latum chingrumpet-lo. 35Ansi halatum angbong pen inut aron thekser abang alangliphan asat kelangjisi arjulo,#Luk 10.25-28 36“Thanbang, aron along akethenei ahukum kolo abang-lo?”#Luk 10.25-28 37Ansi alangli alangliphan pulo, “‘Nang ning ajakong an penle, lapen nangpran ajakong an penle lapen nang kematha ajakong an penle nang Arnam aphan chinghon non.’#Keth 6.5 38Lahelo aphrangsi lapen akethenei ahukumlo. 39Adun abang lahelo, ‘Nang methang aphan asonthot-le tebok abang aphan chinghon non.’#Levi 19.18 40Aron an lapen montri atum kethan alam hei hei ke la sonni ahukum pensi patirpilo.”
Khristo David Asopoma?
(Mar 12.35-37; Luk 20.41-44)
41Manene a-Pharisi atum keching-rum ahut Jisu halatum aphan arjusi pulo, 42“Nanglitum Khristo alamjir kopisi kemathama? Alangli komat asopoma?” Halatum alangliphan thaksi pulo, “David asopo.” 43Alangli halatum aphan pulo, “Tangte Karjong pen ajok David kopusonsi alangliphan Hemphu pusi puloma? Atheke, alangli pulo,
44‘Hemphu ne Hemphu aphan pulo,
Ne nang hotur atum aphan nang kengpak arum bibetik ke,
Ne ar-ele ingnitha.’#Lun 110.1
45David jongsi alangliphan Hemphu pusi hang-lo tangte alangli kopusonsi David asopopoma?” 46Baduta alangli-phan ethe natta thak thekthedet-lo, lapen halabangso arni penke baduta alangliphan alam kaprek arju haihedet-lo.
Currently Selected:
MATHIU 22: KARBIBSI
Highlight
Share
Compare
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
