MATHIU 20

Drakha Aberi Along Kam Keklem Atum

1“Pima, sining a-Rat ke lapuson helo: Inut amonit amethang adrakha aberi arlo kam kepaklemji aphan adapprang kam kechongdat atum aphan ridamlo. 2Lapen arnisi ‘denari’ isi kepiji aphan kechongdat atum pen cheparaisi alangli latum aphan amethang aberi arlo toilo. 3Lapen baji sirkep anbak apor alangli damthusi hithi along karjapphrong, thangta keklemkle atum aphan thek-long-lo. 4Alangli latum aphan pulo, ‘Nangtumta neli drakha aberi arlo damtha, neli athikpet ador nanglitum aphan nangpiji.’ Ansi latum damlo, 5lapen puthot nerlo chetim anbak apor, lapen baji kethom aporta alangli damsi lapusonthot klemlo. 6Lapen puthot baji pho anbak apor alangli damthusi karjapphrong atum aphan thek long-lo, lapen alangli latum aphan pulo, ‘Kopi apotsi nangtum losini thang klemklera ladak arjapphrong loma?’ 7Latum alangliphan pulo, ‘Baduta netum aphan kam nepipelang.’ Ansi alangli latum aphan pulo, ‘Tangte nanglitumta kam keklem damjile neli beri arlo damnon.’

8“Arni kangsam ahut drakha aberi ahemphu kam keja abang aphan pulo, ‘Kechongdat atum aphan hangpet-ra anam pirepnon. Aphi atum aphan pi paphrangra aphrang atum aphan pajutnon.’#Mat 25.31; Luk 22.30 9Ansi baji pho apor anbak kevang atum ‘denari’ isi longrep-lo. 10Hala adapprang kevang atum ke kelong ong muchotpo pusi mathalo, bonta latum ‘denari’ isi si ansi longchot-lo. 11La long-lok pen latum ahemphu aphan adai ketinjisi pulo, 12‘La kevang paphi atum porphai isi ansi klemchot-lo, lapen nelitum ke losini arni keso ajo klemlo setta nangli kepi pachingbarpet-lo.’

13“Bonta alangli halatum angbong pen inut aphan pulo, ‘Jirpo, neli nangliphan thangnat akechokche akam klemklelo, nangli neli pen denari isi ador cheparailo, kalima? 14Nangli kelongji an enra damnon, neli nangliphan asonthot aphi kevang atum aphanta kepiji neli ning hang-lo. 15Neli methang akhi pen neli neli ning kehang aling klem un, kalima? Kalite, neli keklem mesen apotsi nangli neliphan ne langdun un-e loma?’

16“Lasonthotsi aphi atum paphrangji lapen aphrang atum paphiji.”#Mat 19.30; Mar 10.31; Luk 13.30

Jisu Amethang Kethiji Alam Batai Kethom Aphong Kechethan

(Mar 10.32-34; Luk 18.31-34)

17Jisu Jerusalem karludam ahut alangli long asangho bang krehini atum aphan cheponlo, lapen tovar kedambom ahut alangli latum aphan pulo, 18“Chini iktha, etum ha Jerusalem an dampo; lapen Monit a-Sopo aphan kurusar kethe lapen aron thekser atum arideng hodai detji, lapen halatum alangliphan ingsaisi kepathiji ahukum piji, 19lapen alangliphan Jihudi kalidet atum arideng hodaisi papinremji lapen champre abu pen pachokji, lapen thengparpan athak pathiji, bonta nithom arni alangliphan pathurji.”

Jebedi Apiso Kechoningri

(Mar 10.35-45)

20Ansi Jebedi apiso amethang asopo bang hini atum pen Jisu along vangsi, ardomkhrupsi akerap chohang-lo. 21Alangli labangpi aphan pulo, “Nangli kopisi kenangjima?” Labangpi alangliphan pulo, “Nangli rat angbong la neli sopo bang hini aphan nangli ar-e anat inut lapen nangli arvi anat inut pangnilongtha.” 22Bonta Jisu thaksi pulo, “Nangtum kopisi kehang, lake nangtum chinine. NE KEJUNJI AHARLUNG NANGTUM JUN UNJIMA?” Latum thaksi pulo, “Netum un.”

23Alangli latum aphan pulo, “Nangtum ne harlung pen jun vekji, bonta ne ar-e lapen ne ar-vi anat kepangniji, lake nejakong ave, nepo kepathiktang atumsi la longji.” 24Hala bangkep atum la arjulongsi la bang hini akorte atum aphan aning thi-lo.

25Ansi Jisu latum aphan amethang adung chehangsi pulo, “Nangtum chinilo, Jihudi kalidet atum arecho halatum aphuthak ajakong do, lapen keja atum ajakong do pame.#Luk 22.25-26 26Bonta nangtum angbong ke lapuson paplangple nang, lapen badutame nangtum angbong akethe kecheplangji aning hang-lote, alangli nangtum aban cheplang nangji,#Luk 22.25-26 27lapen nangtum angbong badutame aphrangsi kecheplangji aning hang lote alangli nangtum aban cheplang nangji,#Mat 23.11; Mar 9.35; Luk 22.26 28lake Monit a-Sopo ason thakthak-lo, atheke alangli bang arideng pen keru kethai kelongji aphanle kevang kali, bonta keru kethaiji lapen ongdung atum aphan kepajokji aphan amethang apran kechepijisi vang-lo.”

Jisu Bang Hini Amek Kave Atum Aphan Kepame

(Mar 10.46-52; Luk 18.35-43)

29Jisu lapen asangho atum Jeriko pen kebar ahut armu ake-ongpi atum alangli phi phi dunlo. 30Lapen chini iktha, bang hini amek kave atum tovar alongsi ingnilo, lapen latum Jisu labangso atovarsi vangji pu arjulongsi latum hangjosi pulo, “O Hemphu, David a-Sopo; nelitum aphan ne ingjinsotha!”

31Bonta armu atum doklip non pusi ingchek-lo, bonta latum aphrang apar kehang ase pathemuchotsi pulo, “O Hemphu, David a-Sopo; nelitum aphan ne-ingjingsotha!”

32Jisu sangkoksi, latum aphan hangsi pulo, “Neli nanglitum aphan kopisi nangklempi nangjima?” 33Latum thaksi pulo, “Hemphu, nangli nelitum amek pachecharjisi netum ning hang-lo.” 34Jisu latum aphan ingjinsosi latum amek ot-lo, lapen hala mamat latum amek checharlo, lapen alangli phi phi dunlo.

Currently Selected:

MATHIU 20: KARBIBSI

Highlight

Copy