MATHIU 16

Pharisi Atum Jisu Aphan Angthek Kehang

(Mar 8.11-13; Luk 12.54-56)

1Pharisi lapen Saduki atum Jisu along vang-lo. Latum Jisu aphan asat kelangjisi sining pen angthek kepaklangji aphan choningrilo.#Mat 12.38; Luk 11.16 2Bonta alangli thaksi latum aphan pulo, “Arni kangsam ahut nanglitum pupo, ‘Botor mesenji; pima sining erhang-lo.’ 3Lapen adapprang ahut nangtum pupo, ‘pini botor hingnoji; pima sining ingting-olo.’ Nanglitum sining angthek ke chini lapen thanthek, bonta labangso akai angthek ke thangnatta pu thekthe. 4Kehingnodak lapen adur kave a-ove atum ke angthek ribomlo, bonta Jonah angthek pen apar ke pipedetpo.” Ansi alangli latum aphan otekangsi damjuilo.#Mat 12.39; Luk 11.29

Pharisi Lapen Saduki Atum Kethan Alam Pen Asangho Atum Aphan Kepacheretoi

(Mar 8.14-21)

5Asangho atum ha parai nangledet aphi latum him van tengnedet pu thek long-lo. 6Jisu latum aphan pulo, “Pharisi lapen Saduki atum athap aphan lang pamera cherenon.”#Luk 12.1 7Latum angbong chethanseisi pulo, “Etum him vanvedet-lo.” 8Bonta Jisu la chinisi pulo, “Nangtum him kavedet apot-le kopisi chethansei loma? O kekroi kekom atum! 9Nangtum chinine langma? Hala him plangpho pen bang suri pho aphan kepi alam chematha-thuthema? Lapen nangtum ton ko-an pangrumthu loma?#Mat 14.17-21 10Kalite hala him plang throksi pen bang suri phli aphan pidet aphi nangtum ton ko-an pangrumthu loma, la nangtum chematha-damdema?#Mat 15.34-38 11Tangte ne nangtum aphan him alamjirle kepudam kali pu nangtum kopusi kechininedet-loma? Pharisi lapen Saduki atum athap aphanle cherenon.” 12Ansi latum him athap aphanle kepacheretoi kali, bonta Pharisi lapen Saduki atum kethan alam pensi kepacheretoilo pu chinilo.

Jisu Helo Khristo Pu Pitor Kechekobir

(Mar 8.27-30; Luk 9.18-21)

13Ansi Jisu Kaisaria Philipi alongri vangsi asangho atum aphan arjulo, “Monit atum, ‘Monit a-Sopo’ aphan komat pusi pudamma?” 14Lapen latum thaksi pulo, “Manene atum pulo, Jon Baptist, manene atum pulo, Elijah; lapen akaprek atum pulo, Jeremiah, kalite Arnam amontri atum angbong inut abang.”#Mat 14.1-2; Mar 6.14-15; Luk 9.7-8

15“Tangte nangtum ke?” alangli latum aphan pulo. “Ne komat abang pusi nangtum mathalo?” 16Simon Pitor thaksi pulo, “Nang ke Khristo, kerengver Arnam a-Sopolo.”#Jon 6.68-69

17Ansi Jisu alangliphan pulo, “Ahok-lo, Jona asopo Simon! Pima ok lapen vi pen kali, bonta sining athak kedo ne-Posi nangphan la paklang-lo. 18Lapen ne nangphan nangpulang, nang ke Pitor, labangso a-arlong athaksi ne nemondoli kimpo lapen chom ajakongta laphan hai un-e detji. 19Ne sining athak aphlok nangphan nangpiji, lapen pirthe athak nang kekok aling sining athakta la kokji, lapen pirthe athak nang kephlok aling sining athakta la phlokdetji.”#Mat 18.18; Jon 20.23 20Lapen alangli helo Khristolo pu alam badu aphanta thanri pusi asangho atum aphan sodak ahukum pilo.

Jisu Amethang Kethi Lapen Kethurji Alam Kemontri

(Mar 8.31—9.1; Luk 9.22-27)

21Halabangso ahut pen anke Jisu Jerusalem dam nangji lapen akesar atum, kurusar kethe atum lapen aron thekser atum arideng kesung chechakpik nangji, thi nangji lapen nithom arni alangliphan pathurji pusi alangli asangho atum aphan kepaklangji pangcheng-lo. 22Ansi Pitor alangliphan elong adim ponsi alangliphan kangchekji pangchengsi pulo, “Arnam la pakhang nang, Hemphu! Lapuson nangphan paplangplevek-nang.” 23Bonta alangli chetevarsi Pitor aphan pulo, “Nemek angden pen damnon, Soitan! Nang ne kedamji atovar kekhang abang-lo; pima la nang akematha ke Arnam penle kevang kali, bonta monit pensi vang-lo.”

24Ansi Jisu asangho atum aphan pulo, “Mane abang jongsi ne phi phi kedunji aning hang-lo tangte, alangli amethang aphan pachetengnedet-ra, lapen amethang athengparpan cheponra ne phi phi padunkrinang.#Mat 10.38; Luk 14.27 25Pima badutame amethang apran kechepajokji aning kehang abang aling ke la pangbodetji, bonta badutame ne pen apot apran kechepangbodet abang ke la longthuji.#Mat 10.39; Luk 17.33; Jon 12.25 26Pima mane abang pirthe adang longpet setta amethang akai pavirdet lote alangli kopi ale doma? Kalite inut amonit apran kopi pensi amethang achethe namthu unjima? 27Pima Monit a-Sopo amethang a-Po adak atur lapen ame-thang apherangke atum pen vangji dokdok-lo, lapen halabangso ahut alangli anut-tin aphan amethang akam atengsi anam piji.#Mat 25.31; Lun 62.12; Rom 2.6 28Chenamsi ne nangtum aphan nangpulang, ladak karjapphrong atum angbong manene atum Monit a-Sopo amethang arat pen kevang thek longle tik ke thithejilang.”

Currently Selected:

MATHIU 16: KARBIBSI

Highlight

Copy