MATHIU 17

Jisu Arje Kaprek Kechepharlo

(Mar 9.2-13; Luk 9.28-36)

1Nithrok aphi Jisu Pitor, Jems lapen akorte Jon aphan ha monit kavedet adim, kangtuiving Anglong athak japonlo.#2 Pit 1.17-18 2Alangli latum angno arje kaprek chepharlolo. Alangli mahang ke arni ason tur-ang-lo, lapen alangli pe ke kethe-ang ason thakthak lok kling cheplang-lo.#2 Pit 1.17-18 3Lapen la bangkethom asangho atum Moses lapen Elijah Jisu pen lam kechingki thek long-lo.#2 Pit 1.17-18 4Lasi Pitor Jisu aphan pulo, “Hemphu, etum ladak kedo ke me-olo! Nang jongsi nangning hangte ne ladak hem-pharla humthom kimpo; ehum ke nangphan, ehum ke Moses aphan lapen ehum abang ke Elijah aphan.”#2 Pit 1.17-18

5Alangli keningjebom ahut, chini iktha, kethe-angdang anghun ephar vangsi latum aphan binthip-lo, lapen inghun pen ase pulo, “Labangso abang ke ne kechinghon a-Sopolo; ne laphan ning dok olo; alangli lam arju non.”#Kech 22.21; Keth 18.15; Lun 2.7; Isa 42.1; Mat 3.17; 12.18; Mar 1.11; Luk 3.22 6Sangho atum la arjulongsi pherepik-lo, lasi latum longle athak domkhrup-lo. 7Bonta Jisu latum adung vangsi, lapen latum aphan otsi pulo, “Thurnon, phere nangne!” 8Latum angsong anatthu langsi Jisu aphan apar badu aphanta thek longledet-lo.

9Lapen latum inglong pen nangkehir ahut Jisu latum aphan hukum pisi pulo, “Monit a-Sopo kethi pen thurthetik-ke nangtum labangso aning arjan alam badu aphanta thanri.”

10Asangho atum alangliphan arjusi pulo, “Tangte aron thekser atum pisi aphrangsi Elijah vangji pu puloma?”#Mala 4.5

11Alangli thaksi pulo, “Ahok-lo, Elijah aphrangsi vangpo,” lapen alangli kadokave sik pamepo. 12Bonta ne nangtum aphan nangpulang, Elijah vang-et-tang-lo, bonta monit atum alangliphan chininedet-lo; lapen halatum aning kehang alingsi alang-liphan klemlo. Lapusonthotsi halatum Monit a-Sopo aphanta pasungpo.#Mat 11.14

13Ansi asangho atum la Jon Baptist alamjirsi alangtum aphan pulo pu chinilo.

Jisu Hi-i Kepho A-oso Aphan Kepame

(Mar 9.14-29; Luk 9.37-43)

14Latum armu atum along nangke-chevoithu ahut, inut amonit Jisu along vangsi, alangli ingno akengphu patongruisi 15pulo, “Hemphu, neli sopo aphan ingjinsotha, pima la klibup akeso pen ajok dukparlo; lapen abatai batai la me lapen lang alongta klilo. 16Neli nangli sangho atum alongta laphan ponlo, bonta latum pame un-edet-lo.”

17Jisu thaksi pulo, “O kekroi kave, lapen kechingkino a-ove! Ne nangtum along kopu-an ajir keding donang jilangma? La nedungle vannon!” 18Ansi Jisu la hi-i aphan ingchek-lo lapen oso along pen la damjuilo. Halabangso ahut pen mamat kesota medet-lo. 19Ansi asangho atum Jisu along vangjoisi pulo, “Kopi apotsi netum la phlung un-edet-loma?” 20Alangli latum aphan pulo, “Lake nangtum kekroi kekom apot-lo. Chenamsi ne nangtum aphan nangpulang, nangtum akekroi jongsi hanjang emu anbak-le dote labangso aphan ‘Ladak pen hadak chetereknon!’ pusi nangtum pudetji apot-lo; lapen la cheterek po. Nangtum thangnatta ake-un-e avedetji apot-lo.”#Mat 21.21; Mar 11.23; 1 Kor 13.2 21Bonta lapuson aphan ke Arnam kardom lapen an kehum pensi phlung unchotji; ason kaprek pen ke un-e.

Jisu Amethang Kethiji Alam Kethanthu

(Mar 9.30-32; Luk 9.44-45)

22Asangho atum an ha Galili kechepangrum ahut, Jisu latum aphan pulo, “Monit a-Sopo aphan monit atum arideng hodai vekji, 23lapen halatum alangliphan pathivekji, lapen nithom arni alangli thurthuvekji.” Asangho atum aning duk parpik-lo.

Kardomhemthepi Amidu Ketu

24Jisu lapen alangli sangho atum Kapernaum nangledet aphi kardom hemthepi amidu kerung atum Pitor along vangsi pulo, “Nangtum athanbang kardomhemthepi amidu pima?”#Keba 30.13; 38.26 25Alangli thaksi pulo, “Pi,” Alangli hem kechevoi ahut Jisu alangliphan arjuphit-lo. “Simon, nang kematha kopuson? Pirthe arecho atum komat mat along pensi midu, kalite khajona rung-loma? Amethang arat aso atum penma, mate adet akaprek atum along penlo?” 26Pitor pulo, “Akaprek adet atum along pen.” Jisu arju longsi alangliphan pulo, “Tangte hala amethang arat aso atum ke jokphlot-lo. 27Tebonta etum latum aphan aning kepa-oi-edetji aphan nangtum ha talo along damra ok parhi damnon. Lapen nang kelongcheng a-ok ennon, lapen la angho along nang sika kethom longji. Nang la ennon lapen halatum aphan etum bang hini apharman pi damnon.”

Currently Selected:

MATHIU 17: KARBIBSI

Highlight

Copy