MATHIU 15

Aphusar Atum Kethan Alamthe

(Mar 7.1-13)

1Ansi Jerusalem pen Pharisi lapen aron thekser atum Jisu along vangsi pulo. 2“Nangli sangho atum kopi apotsi ephusar atum ekepitekang aron kroikredet-loma? Pima latum ari chersamsesi cholo.” 3Bonta alangli thaksi halatum aphan pulo, “Nanglitumke tangte kopi apotsi nanglitum a-ove ove pen kevang aron pen apot Arnam ahukum kroikredet-loma? 4Pima Arnam hukum pisi pulo, ‘Nangpi lapen nangpo aphan anong pathenon,’ lapen ‘Api apo aphan kehingno kepu abang aling aphan pathi vek nangji.’#Keba 20.12; 21.17; Keth 5.16; Levi 20.9 5Bonta ‘Badutame, alangli pen kelong nangji ale alangli Arnam aphan pitang-lo pule api lapen apo aphan thanlote, alangli api, apo anong pathe nangnelo.’ pusi nanglitum pulo. 6Lasi a-ove ove pen kevang aron pen apot nanglitum Arnam alam ale pavedet-lo. 7Nangtum angthin ke-ik atum! Isaiah nanglitum alamjir montri pamesi pulo,

8‘Labangso arat atum angtur pen nenong pathelo,

bonta latum aning ke ne pen heloving-lo;#Isa 29.13

9latum nephan kangduk thangnat ale ave,

Pima latum kethan alam hei hei ke monit kepinchong aron chot-lo!’ ”#Isa 29.13

Monit Aphan Kepahijim Ahormu

(Mar 7.14-23)

10Ansi Jisu armu atum aphan alang-lidung hangsi halatum aphan pulo, “Arjura chinitha! Ingho pen kelut amar ke ephan pahijimje, 11bonta ingho pen nangkebar amarsi ephan pahijimlo.”

12Ansi asangho atum alangli long vangsi alangliphan pulo, “Nang labangso alam kepu apot Pharisi atum aning oihurlo, lake nang chiniloma?” 13Alangli thaksi pulo, “Sining athak kedo nepo ke-e-edet athengpi arong an phu-etji. 14Halatum aphan thangta mathari. Latum ke amek kave atum aphan kejapon amek kave atumlo. Inut amek kave abang jongsi akaprek abang aphan japon lote latum bang hinita hilik jang rap-rapji.”#Luk 6.39

15Ansi Pitor thaksi alangliphan pulo, “La lamlir alam athe netum aphan nethantha.”

16Jisu latum aphan pulo, “Nangtum jokta non anta thangta chinine langma? 17Nangtum chinine langma, ingho arlo pen kelut amar an epok arlo dampo, lapen barpi nangkebar ahor pen nangbarpo. 18Bonta ingho pen nangkebar ason an ening arlo pensi vang-lo, lapen la hei hei ephan pangthirthelo.#Mat 12.34 19Pima ning arlo pensi kehingno akematha vang-lo atheke pran ke-en, beisa keklem, arloso aphan kelangrem, kechonghu, chobei ahaki kepi, kepinrem hei heisi 20monit aphan pangthirthelo; bonta ari kecharsamse pen kechoke monit aphan pangthirthe pupe.”

Jisu Kanaan Adet Arloso Aphan Kepame

(Mar 7.24-30)

21Jisu hadak pen ha Ta-ir lapen Sidon alongri damjuilo. 22Lapen chini iktha, inut a-Kanaanpi halabangso alongri pen vangsi hangsersi pulo, “O Hemphu, David a-Sopo; neliphan ne ingjinsotha. Neli sopi pherememe ahi-i pholok-lo.” 23Bonta alangli labangpi aphan thangnatta thak dundedet-lo. Sangho atum alangli long vangsi, choningrisi pulo, “Labangpi aphan toinon, pima la etum aphi phi nangdunsi hangkong-lo.” 24Alangli thaksi pulo, “Neliphan Israel akhei kangbotang abiresak atum along ansi netoichot-lo.” 25Bonta labangpi vangsi alangliphan ardomkhrupsi pulo, “Hemphu, neliphan neliraptha.” 26Ansi alangli thaksi pulo, “Osomar atum ahim enra methan atum angno kevar, lake kemesen akam kali.” 27Labangpi thaksi pulo, “Ahok-lo Hemphu, tebonta methan atum ahemphu a-an kecho anghoi pen keklo abeng achet anta cholo.” 28Ansi Jisu thaksi labangpi aphan pulo, “O pei, nangli kekroi thedung-lo! Nangli ning kehang asonthot-le paplangnang.” Halabangso ahut pen mamat alangli sopi keso medet-lo.

Ongdung Atum Aphan Jisu Kepame

29Jisu halabangso adim che-osi Galili atalo akung soding damlo, lapen alangli inglong arlu damsi hadak ingnilo. 30Armu ake-ongpi alangli long vang-lo lapen halatum along akeng ketekok, ari ketekok, amek kave, alam kave, lapen akaprek kaprek ake-ongpi atum aphan vansi alangli kengri nangbilo, lapen alangli kadokave aphanta pamedet-lo. 31Lasi armu atum alam kave abang keningje, ari-akeng ketekok atum kemethu, akeng kehonghap atum kechejor lapen amek kave atum kechecharthu thek longsi manghuphrong-lo, lapen Israel a-Arnam anong pathelo.

Bang Suri Phli Aphan An Kepacho

(Mar 8.1-10)

32Jisu amethang asangho atum aphan adung chehangsi latum aphan pulo, “Ne armu atum aphan ingjinsolo, pima latum nelong nangkedodun nithomlo, lapen latum kecho ason thangnatta avelo. Latum aphan an pipepin pen kepadamji ne ning hanghe, pima latum hem kedam ahut aini ponruipo.” 33Lapen asangho atum alangliphan pulo, “Ladak monit kavedet, akangsamri adim armu atum aphan ke dorphlup a-an kepachoji aphan konatsi kelongpidam poma?” 34Jisu latum aphan arjulo, “Nangtum along him plang ko-an do?” Halatum thakdunsi pulo, “Him Plang throksi lapen oksomar asap.” 35Jisu armu atum aphan longle athak kepangniji ahukum pilo, 36lapen alangli hala him plang throksi lapen ok ensi Arnam aphan rolo. Alangli la bengsi asangho atum aphan pilo, lapen asangho atum la armu atum aphan pilo. 37Kadokave atum chosi ingkrangpet-lo lapen asangho atum kechotang abeng achet pangrumthusi ton throksi paplengset-lo. 38La kecholong atum arlosomar lapen osomar atum aphan lakhakhedetta pinsomar atum lok bang suri phli anbak dolo. 39Armu atum aphan padamtoisi alangli telong pen ha Megdala alongri damjuilo.

Currently Selected:

MATHIU 15: KARBIBSI

Highlight

Copy