MATHIU 14

Jon Baptist Kethi

(Mar 6.14-29; Luk 9.7-9)

1Halabangso ahut Galili adet ahemphu Herod Jisu alamjir arjulong-lo. 2Alangli amethang aban atum aphan pulo, “Labangso abang ke Jon Baptist-lo, alangli kethi pen rengthutang-lo; la apotsi alangli kemanghumeme akam kethe hei hei klem unlo.”

3Pima Herod ke akorte Philip apiso Herodias pen apot Jon aphan nepcheksi kokdong-lo, lapen phatek bengthot-lo.#Luk 3.19-20; Levi 18.16; 20.21 4Pima Jon alangliphan pulo, “Nangli labangpi aphan ke-enji aron ave.”#Luk 3.19-20; Levi 18.16,20-21 5Lapen alangli alangliphan kepathiji aning hang setta armu aphan pherelo, pima halatum Jon aphan Arnam amontri pusi mathalo.

6Bonta Herod pirthe kehache arni nanglesi Herodias asopi halatum angbong kanlo, lapen Herod la aning ingsamlo. 7Ansi alangli semetangsi labangpi kehang aling piji pusi alam chak-lo. 8Labangpi apei pen abidi longsi pulo, “Ladak kasu kethe arlo Jon aphu nepinon.” 9Recho aning duk-lo, bonta alangli kechaktang alam pen apot lapen alohi atum pen apot la kepiji ahukum pilo. 10Ansi alangli toisi phatek arlo Jon angphun pangthanpet-lo. 11Lapen aphu vansi kasu akethe athak nangbilo, lapen labangpi aphan pilo, lapen nimsopi la apei aphan pidamlo. 12Jon asangho atum vangsi abang arpum ponsi pip damlo lapen halatum damsi Jisu aphan than damlo.

Bang Suri Pho Aphan An Kepacho

(Mar 6.30-44; Luk 9.10-17; Jon 6.1-14)

13Jisu labangso alam arjulongsi hadak pen telong pen damsi monit kavedet, kangsamri adim dodamlo. Lapen armu atum la arjulongsi, arongsopi-heihei pen vangsi akeng pen alangli phi phi dunlo. 14Lapen alangli telong pen che-osi armu ake-ongpi aphan thek long-lo lapen halatum aphan ingjinsosi aning duk-lo lapen halatum akesota pamelo.

15Arni kangsam ahut asangho atum alangli long vangsi pulo, “Ladak ke kangsamri adim lapen arnita chiji dokdok-lo, latum aphan arong arong toira amethang methang aphan kecho ahormu kepachonam damjile hukum pinon.” 16Jisu thaksi pulo, “Halatum dam nangnelo, nangtumle latum aphan kechoji ahormu pinon.” 17Latum alangliphan thaksi pulo, “Netum arideng him plang pho lapen ok jonni pen apar thangnatta ave.” 18Ansi alangli pulo, “Lahei nelong vannon.” 19Alangli armu atum aphan bapso athak kepangniji ahukum pilo, lapen him plangpho lapen ok jonni ensi sining anat langsi ahirjume hang-lo, lapen him bengsi asangho atum aphan pilo. Asangho atum armu aphan la pilo. 20Kadokave atum la chosi ingkrang-lo, lapen halatum kecho abeng achet pangrumsi ton krehini papleng-lo. 21La kecho atum arlosomar lapen osomar atum aphan lakha ponpedetta pinso atum lok bang suri pho anbak dolo.

Jisu Akeng Pen Lang Athak Kedam

(Mar 6.45-52; Jon 6.15-21)

22Ansi Jisu asangho atum aphan telong pachethap-lo, lapen alangli phrang ha parai padam toilo, lapen amethang ke armu atum aphan pusi padamtoilo. 23Armu atum aphan padamdet aphi alangli Arnam kardomjisi inutpet ha inglong arlu damlo. Arni kangsam anta alangli hadak inutpetsi dolo, 24lapen telong ke halabangso ahut talo akung pen helo-olo, lapen lang angsum kethur pen ajok la paleng-longtong-lo, pima tomon japsi laphan khang-lo. 25Ansi adap baji kethom pen baji throk adak malom alangli talo athak akengkam chejorsi asangho atum along damlo. 26Bonta asangho atum alangphan talo athak akengkam kechejor thek longsi thirik-hurlo lapen chamburukso pusi alangliphan puhurlo, lapen kepheresi hangjolo. 27Bonta hala mamat Jisu latum aphan pulo, “Ning thirklongnon, ne lema; phere nangne.”

28Ansi Pitor alangliphan thaksi pulo, “Hemphu, jongsi la chenam tangte, lang athak kedamji ahukum nepitha.” 29Alangli pulo, “Vangnon.” Ansi Pitor telong pen hirsi lang athak kengkam chejorsi Jisu along damlo. 30Bonta tomon thek longsi alangli pherelo, lapen lang jangji dokdoksi alangli hangsersi pulo, “Hemphu, nepajoknon.” 31Hala mamat Jisu ari chirungsi alangliphan otsi pulo, “O nang kekroi kekom abang, nang kopi apotsi nang ning aberbu kedo langma?” 32Lapen latum telong chethapdet anke tomon hamdet-lo. 33Ansi telong arlo kedo atum alangliphan ardom-khrupsi pulo, “Ahok-lo, nangke Arnam a-Sopolo.”

Jisu Gennesaret Alongri Keso Kepame

(Mar 6.53-56)

34Ansi latum parai kapsi Gennesaret alongri nanglelo. 35Halabangso alongri amonit atum alangliphan chini pamesi latum det adang an monit toisi kadokave akeso alangli dung pavanlo. 36Halatum ape abu ke-ot chotji ahukum chohang-lo, lapen la ke-ot long atum an medet-lo.

Currently Selected:

MATHIU 14: KARBIBSI

Highlight

Copy