MATHIU 13

Chili Kerik Alamlir

(Mar 4.1-9; Luk 8.4-8)

1Halabangso arni mamat Jisu hem pen damsi talo akung ingni damlo. 2Lapen armu ake-ongpi alangli ingno chepangrumlo, ansi alangli telong ehong along chethapsi ingnilo lapen armu atum talo akungsi arjapphrong-lo.#Luk 5.1-3 3Lapen alangli lamlir pen halatum aphan thansi pulo:

“Ephong inut amonit chili kerikjisi damlo. 4Alangli chili kerik ahut penang-an achili ke tovar akung klolo, lapen vo atum vangsi la chongthok et-lo. 5Akaprek achili ke longpak athak klolo. Hadak longle ongparpedet apotsi hala mamat la arong vang-lo, 6bonta arni vangsi la thikhrailo, lapen angkur kechesak arnuknedet apot la chekedulo. 7Akaprek achili ke ingsu kethe ajo klolo, lapen ingsu arong thesi laphan petthip-lo. 8Bonta akaprek achili ke longle keme along klolo, lapen athe pathelo, abang pen ke phan pharo, abang pen ke phan throk-kep lapen abang penke phan thomkep anta dolo.” 9Jisu than pajutsi pulo, “Ano kedo abang parjunang!”

Lamlir Alam Athe

(Mar 4.10-12; Luk 8.9-10)

10Ansi sangho atum Jisu along vangsi alangliphan pulo, “Nangli kopi athesi halatum aphan lamlir hei hei pen puloma?” 11Alangli thaksi latum aphan pulo, “Nangtum aphan sining arat akepatu alam kepachiniji aphan nangpi tang-lo, bonta latum aphan ke pipedet-lang. 12Pima akhi kedo abang aphan aling pidetji, lapen alangli khi do-opo, bonta alangli akhi kavedet abang pen alangli long kedo amar anta thi pondetji.#Mat 25.29; Mar 4.25; Luk 8.18; 19.26 13La apotsi ne halatum aphan lamlir pensi pulo, pima latum langding setta thek longle, lapen arjubom setta arjulongle, lapen ke chinine. 14Isaiah kemontri alam halatum pen ajok chekok-lo, atheke la pulo:

‘Labangso amonit atum arjubom arjubomji,

bonta chininedetji;

halatum langbom langbomji,

bonta thek longledetji.#Isa 6.9-10

15Pima halatum aning buikluihak-huk-lo,

lapen ano ingthongjong-jang-lo,

lapen amek selokjok-jak-lo.

Lapu kali asonte, halatum amek pen thek longji apot-lo,

ano pen arjulongji apot-lo,

halatum aning pen chiniji apot-lo,

lapen halatum nenat aning chiruisi ne halatum aphan pameji apot-lo.’#Isa 6.9-10

16“Bonta nangtum ke nangkopai keme atumlo! Pima nangtum ke nang-mek pen thek-long-lo, lapen nangtum ano pen arjulong-lo.#Luk 10.23-24 17Ne chenamsi nangtum aphan nangpulang, Arnam amontri lapen dhoromi amonit ake-ongpi atum nangtum kethek long ason kethek longji ingtungpik-lo, bonta halatum thek longledet-lo, lapen nangtum karjulong ason karjulongji ingtungpik-lo, bonta halatum arjulongledet-lo.#Luk 10.23-24

Chili Kerik Alamlir Alam Athe

(Mar 4.13-20; Luk 8.11-15)

18“Tangte hala chili kerik alamlir alam athe kopima, lale nangtum arjutha. 19Sining a-Rat alamjir arju setta kechinine abang ke hala tovar akung keklo achili ason thakthak-lo. Kehingno abang vangsi halabangso amonit aning arlo keriktang alam thipondetpo. 20Hala alam karjulong pen mamat aning arong pen kedeng atum ke longpak athak keklo achili ason thakthak-lo. 21Bonta angkur kechesak arnuknedet apot lake cherso ahut ansi dochot-lo. Lasi lam pen apot akesung kalite akechenek kethur ahut pen mamat latum obuppo. 22Hala ingsu akethe ajo keklo achili abang ke, hala alam arju setta labangso akai aphan aningbi kedo, akhi aphan kar-i pen ajok lam aphan kepetthip lapen athe kepathethe abang ason thakthak-lo. 23Hala longle keme along keklo achili abang ke hala alam karju lapen kechini abang ason thakthak-lo. Lake athe pathelo; abang pen ke phan pharo, mane abang ke phan throk-kep lapen mane abang ke phan thomkep an athe pathelo.”

Nonpelar Alamlir

24Jisu akaprek alamlir pen halatum aphan thansi pulo, “Sining arat aphan amethang arit along chili keme kerik abang pen pangbar un. 25Ningve isi monit atum amek jangklip ahut ahotur abang vangsi sok tepli angbong nonpelar achili rik tekangsi damjuilo. 26Bonta arong kevang lapen kephi ahut halabangso anonpelarta cheklang-lo. 27Ansi hem ahemphu aban atum alangli long vangsi pulo, ‘Hemphu, nangli akeme achili rik-lo, kalima? Tangte la nonpelar konat pensi vang-loma?’ 28Alangli halatum aphan pulo, ‘Hotur abangsi la klemlo.’ Ansi aban atum alangliphan pulo, ‘Nelitum damsi la kepangrum damji aphan nangli ning hangma?’ 29Bonta alangli pulo, ‘Lapu kali, nonpelar kepangrum ahut nangtum sok ta pangrumpon rappet tahai.” 30Sok rot-re-tik ke la hinita pathe rap rap lonang, lapen mo sok kerot ahut ne sok kerot atum aphan pupo, ‘Aphrang nonpelar an pangrumra papeng kreinon lapen me phrindutnon, bonta sok tepli ke pangrumra ne sok puru along thapnon.’”

Hanjang Amu Alamlir

(Mar 4.30-32; Luk 13.18-19)

31Puthot Jisu halatum angno akaprek alamlir thansi pulo, “Sining arat ke inut amonit amethang arit along hanjang amu kerik ason thak-thak-lo; 32lake kadokave amu angbong pen akebineilo, bonta arong the lote han arong angbong la theneilo, lapen thengpi arong ason cheplangpo, lasi vo atum vangsi la aro hei hei along atar chepatarpo.”

Thap Alamlir

(Luk 13.20-21)

33Jisu halatum aphan puthot akaprek alamlir pen thansi pulo, “Sining arat ke lapuson helo. Inut arloso penang an athap ensi him pen pangvuilo, lapen la kadokave kangpet-petik ke patip rapbomlo.”

34Kadokave alam Jisu lamlir pensi armu atum aphan pulo, lapen lamlir pen kalite alangli halatum aphan thangnatta pupedet-lo. 35Lake Arnam amontri kepu alam kepachekokji aphanlo. Atheke alangli pulo,

“Neli lamlir pen neli ingho chingpuji,

pirthe kepinchong ahut pen kepatujoi alamthe neli ningjeji.”#Lun 78.2

Nonpelar Alamlir Alam Athe Kethan

36Jisu armu atum pen chekakdet aphi alangli hem arlo lutdamlo, lapen asangho atum alangli long vangsi pulo, “Rit anonpelar alamlir alam athe netum aphan nethan pametha.”

37Alangli thaksi pulo, “Chili keme kerik abang ke Monit a-Sopolo, 38lapen rit ke pirthe, lapen chili keme ke ha sining a-Rat aso atumlo. Lapen nonpelar ke kehingno abang asomarlo. 39Lapen nonpelar kerik abang, hala hotur ke Hi-i Sarpolo. Lapen sok kerot ahut ke non akai akejut-lo, lapen sok kerot atum ke sining apherangke atumlo. 40Lasi nonpelar kepangrum lapen me kephrindut asonthotsi labangso akai akejut plangji. 41Monit a-Sopo amethang apherangke atum aphan nangtoiji lapen halatum alangli rat angbong pen pap kepaplang-i ason an lapen kehingno keklem atum an aphan pangrum petji, 42lapen meherang arlo halatum aphan varchuiji. Hadak latum chiru chernapsi aso chardengji. 43Ansi Po a-Rat angbong hala Arnam amonit atum arni asonsi tur-angji. Ano kedo abang parjunang.

Kepatu Akhi Alamlir

44“Sining arat ke lapuson helo: Inut amonit rit angbong kepatujoi akhi thek long-lo. Alangli la dipthusi patulo lapen aning arong piksi akhi kedo-an jordamdetsi halabangso arit namlo.

Mukut-abor Alamlir

45“Puthot, sining arat ke lapuson helo. Inut amonit akemesen amukut-abor rilo, 46lapen alangli kemepik amukut-abor thek damlongsi kadokave ahormu an chejordam-etsi labangso amukut-abor namlo.

Lan Alamlir

47“Puthot, sining arat aphan lan pen pangbar me. La talo along varlo lapen ok ajat kedo-an beng rappet-lo; 48lapen la plengset aphi halatum talo akung an alan vungsi ingniklip-lo. Ansi akeme a-ok an ke ingvaisi burup arlo thap-lo, bonta akeningjoino anke var-et-lo. 49Lasonthotsi labangso akai akejut plangji. Sining apherangke atum vangji lapen dhoromi atum angbong pen kehingno atum aphan paprekji, 50lapen herang arlo halatum aphan varchuiji. Hadak latum chiru chernapsi aso chardengji.

51“Nangtum la kadokave chiniloma?” Latum alangliphan thaksi pulo, “Chinilo.” 52Lapen alangli halatum aphan pulo, “La apotsi sining arat alamjir kecharlitang, aron kethekser abang ke ehum ahem ahemphu ason thakthak-lo. Alangli amethang akhi apuru angbong pen akemi lapen aban ahormu en.”

Nazareth Asor Jisu Aphan Kechakche

(Mar 6.1-6; Luk 4.16-30)

53Lapen Jisu la kadokave alam-lir ningje tangdet aphi hadak pen damjuilo. 54Lapen amethang adet chevangthusi alangli halatum asinagog arlo halatum aphan lam thanbomlo. Ansi latum kematha abidi jutdetsi pulo, “Alangli labangso agian lapen akemanghumeme akam hei hei keklemji ajakong konat pensi kelong-loma? 55Labangso abang ke hala kapat akimbang asopolo, kalima? Alangli pei amen ke Meri puhelo, kalima? Lapen alangli korte atum ke hala Jems, Joseph, Simon lapen Judas helo, kalima? 56Lapen alangli ingjir do-an etum alongsi do, kalima? Tangte alangli la kadokave konat pensi long-loma?” 57Lasi halatum alangliphan chakchedet-lo. Bonta Jisu halatum aphan pulo, “Arnam amontri aphan bithe bithata aman pi, bonta amethang ahem lapen arong angbong ke alangli aman longle.”#Jon 4.44 58Lapen latum akekroikre pen apot alangli hadak kemanghumeme akam kethe klempikpedet-lo.

Currently Selected:

MATHIU 13: KARBIBSI

Highlight

Copy