MATHIU 12

Sabbath Arni Alamthe

(Mar 2.23-28; Luk 6.1-5)

1Halabangso ahut Sabbath arni Jisu sok ajo dong ponputsi damlo, lapen asangho atum an ingchirsi sok abu chongthon ponlo lapen la henotsi kechoji pangcheng-lo.#Keth 23.25 2Bonta Pharisi atum la thek-longsi alangliphan pulo, “Langnon, nangli sangho atum Sabbath arni aron kalidet akam klemlo.”

3Jisu thaksi pulo, “David lapen ari asangho atum an kangchir ahut alangli kopisi klemlo, lake nangtum porhehe pin langma?#1 Sam 21.1-6; Levi 24.9 4Atheke, alangli Arnam ahem lut damsi halatum Arnam aphan kepanongtang ahim hei hei cholo; lake alangli, kalite ari asangho atum cho kertang, kurusar atum ansi cholongchot.#1 Sam 21.1-6; Levi 24.9 5Kalite kurusar atum kardom ahem thepi arlo Sabbath arni klem kertang akam klem setta adai ave, lake nangtum aron angbong porhehepin langma?#Kela 28.9-10 6Bonta ne nangtum aphan nangpulang, kardom ahem thepi apar kopine akethemu daksi do. 7Hastro pulo, ‘Ne athok ajir kali, kangjinsosi ning hang-lo.’ Labangso alam athele nangtum chini asonte adai kave atum aphan adai padodedetji apot-lo.#Mat 9.13; Hos 6.6 8Pima Monit a-Sopo ke Sabbath arni ahemphulo.”

Ari Krenghak Abang Aphan Kepame

(Mar 3.1-6; Luk 6.6-11)

9Lapen Jisu halabangso adim che-osi Sinagog arlo lut damlo. 10Lapen chini iktha, hadak inut pinso amonit ari kekrenghak abang dolo. Halatum alangliphan adai ketinji abidi risi alangliphan arjulo, “Sabbath arni keso kepame aron doma?” 11Alangli halatum aphan thaksi pulo, “Nanglitum kopisi mathalo? Jongsi ejon abiresak Sabbath arni hilik jangthot lote, ahemphu laphan hilik pen kerungredetji, lason abang nanglitum angbong komane doma?#Luk 14.5 12Tangte biresak apar monit ador kopu-an somu! Lahelo Sabbath arni kam klem long-lo.” 13Ansi alangli halabangso abang aphan pulo, “Nangri chephajeng non.” Alangli ari chephajeng-lo, lapen la ahong kaprek ason thakthak methulo. 14Bonta Pharisi atum ingtan damsi alangliphan kepathiji abidi chingvailo.

Arnam Aban

15Bonta la chinisi Jisu hadak pen katjuilo, lapen ake-ongpi atum alangli phi phi dunlo. Alangli keso atum an aphan pamethu-et-lo, 16lapen alangli lamjir thanri pusi alangli halatum aphan sodak ahukum pilo. 17Lake Isaiah montri keputang alam kepachekokji aphanlo, atheke alangli pulo,

18“Langnon, ne kangvaitang aban, ne kechinghon abang;

laphan ne ning dok-lo.

Alangli phuthak ne Karjong batji,

lapen alangli adet kaprek kaprek atum aphan athikpet akangsai alamjir than pachethangji.#Isa 42.1-4

19Alangli lam chedan dundedetji, lapen hangser-sedetji,

lapen baduta tovar along alangli kehang ase arjulongledetji,#Isa 42.1-4

20alangli athikpet akangsai pahaidet detik ke,

keroptang a-arpik alangli ingdipetpedetji,

lapen amehi ketokmon ahonjengta pamepmedetji,#Isa 42.1-4

21lapen alangli men aphansi adet kaprek kaprek atum aning chetheji.”#Isa 42.1-4

Jisu Lapen Beelzebul

(Mar 3.20-30; Luk 11.14-23)

22Ansi halatum Jisu adung amek kave pen alam kave inut ahi-i kepho-lok abang aphan vanlo, lapen alangli laphan pamethulo, ansi la alam kave abang ningjelo lapen amek checharlo. 23Armu kadokave atum manghuphrong-lo, lapen halatum puhurlo, “Lake David a-Sopo kalima?” 24Bonta Pharisi atum la arju longsi pulo, “Hi-i atum arecho, Beelzebul pen ajoksi labangso abang hi-i atum aphan phlung-lo.”#Mat 9.34; 10.25

25Jisu halatum akematha chinisi alangli halatum aphan pulo, “Arat aling tame, amethang angbong chebohongseira chebahak lote la dorap thekthedetji, 26lapen Soitan jongsi Soitan aphan phlung lote la amethangsi chebahak tang-lo. Tangte alangli rat kopusi arjap thekpoma? 27Lapen ne jongsi Beelzebul pen ajok hi-i phlung-lo tangte, nangtum asomar atum komat pen ajoksi halatum aphan phlung-loma? Lahelo halatum nangtum aphan kangsai abang cheplangji. 28Lapen ne jongsi Arnam ajakong pen hi-i atum aphan phlungbomlo, tangte Arnam arat nangtum angbong vangtang-lo. 29Badutame, kopusonsi hala ajakong kethe abang ahem lutdamra amar kethi pon thekjima? Aphrang alangli hala ajakong kethe abang aphan ingnanghet nangji, ansi alangli hala amar alingta thipon-un ji, kalima? 30Badutame, nebe kalidet abang ke ne hoturlo, lapen nelong nangkechingrum dunde abang aling ke pratseiji.#Mat 9.34; 10.25 31La apotsi ne nangtum aphan nangpulang, monit atum kadokave apap lapen Arnam aphan kepinrem apot ke diya longji, bonta Karjong aphan kepinrem apot ke diya longledetji. 32Lapen badutame, Monit a-Sopo abekethur ke diya longji, bonta Karjong Kangthir abekethur-ra keningje abang ke non akai, kalite mo kevangji akai setta diya longledetji.#Luk 12.10

Thengpi Lapen Athe

(Luk 6.43-45)

33“Mesen athengpike atheta mesenji, kalite athengpi jongsi hingnodakte atheta hingnodakji; pima athe pen ajoksi athengpi chiniji.#Mat 7.20; Luk 6.44 34O pherui akhei! Nangtum hingnodak-le kopusi akeme alam ningje thekpoma? Pima nangtum aning arlo kedo tang alamsi nangtum angho pen ningjelo.#Mat 3.7; 23.33; 15.18; Luk 3.7; 6.45 35Kemesen amonit ke amethang akhi keme pen ason ason akeme pachon lapen akehingno amonit abang ke amethang akhi kehingno pen ason ason akehingno pachon. 36Bonta ne nangtum aphan nangpulang, mo kangsai arni monit atum ale kavedet alam athetin alakha chepinangji, 37pima nanglam hei hei pen ajok nangphan dhoromi pu lakhaji lapen nanglam hei hei pen ajok nangphan ado padoji.”

Angthek Keri

(Mar 8.11-12; Luk 11.29-32)

38Ansi manene aron thekser lapen Pharisi atum alangliphan pulo, “Thanbang, nangrideng pen kopine angthek kethek longjisi netum ning hang-lo.”#Mat 16.1; Mar 8.11; Luk 11.16 39Bonta alangli thaksi halatum aphan pulo, “kehingno lapen a-ot kave a-ove atumsi angthek ribom, bonta Jonah montri angthek apar laphan thangnat angthekta paklang-kledetji.#Mat 16.4; Mar 8.12 40Pima Jonah lang a-ok thepi apok arlo jothom nithom kedo asonthotsi Monit a-Sopota jothom nithom longle arlo doji.#Jon 1.17 41Mo kangsai arni Nineveh asor labangso a-ove pen pen thursi latum aphan ado padoji, pima halatum Jonah kepachethang pen ajok aning chiruilo, lapen chini tha, Jonah apar akethemuchot daksi do.#Jona 3.5 42Mo kangsai arni Nirep arechopi labangso a-ove pen pen thursi latum aphan ado padoji, pima alangli Solomon akethek-kere karjujisi pirthe ahoi an pen vang-lo, lapen chini iktha Solomon apar akethe daksi do.#1 Rec 10.1-10

Kangthirthe Ahi-i Nangkecherui

(Luk 11.24-26)

43“Kangthirthe ahi-i monit pen nangbardet aphi lang kavedet adim damsi Kesangji adim ridamlo, bonta la nohokta adim longledet-lo. 44Ansi la pulo, ‘Mo ne nangkebar ahem along puthot chedam thupo.’ Lapen la vangthusi hem angse, arkok-et lapen pangthir etsi rim-bi pame thek long-lo. 45Ansi la damsi amethang apar adur kehingno muchot ahi-i bang throksi ari chevansi hadak chelut damthupo, ladak dopo lapen aphisi labangso amonit aphrang apar hingno muchotpo. Lapusonthotsi labangso adur kehingno a-ove ta plangpo.”

Jisu Apei Lapen Amumar Binong

(Mar 3.31-35; Luk 8.19-21)

46Jisu armu atum aphan kepu bom ahut, chini iktha, alangli pei lapen amumar atum ingtan nang arjapsi alangli pen kechingkiji abidi rilo. 47Ansi armu angbong inut abang alangliphan pulo, “Langtha, hala nangli pei lapen nangli mumar atum nangli pen kechingkiji aphan ingtan arjapphrong-lo.”

48Bonta alangli halaphan thaksi pulo, “Neli pei komat-lo, lapen neli mumar komat-lo?” 49Lapen asangho atum anat ari jongsi alangli pulo, “Langtha, neli pei lapen neli mumar atum lahelo! 50Pima sining athak kedo neli Po aning kehang keklem abang aling helo neli korte, neli ingjir lapen neli pei lo.”

Currently Selected:

MATHIU 12: KARBIBSI

Highlight

Copy