MATHIU 11

Jon Baptist Asangho Atum Aphan Jisu Along Nangketoi

(Luk 7.18-35)

1Jisu asangho bang krehini atum aphan la hei hei alam thandet aphi halatum rongsopi along kethanji lapen kepachethangjisi hadak pen damlo.

2Jon phatek arlo kedo ahut Khristo keklem akam alamjir arjulongsi amethang asangho atum aphan toisi Jisu aphan papulo, 3“Kevangji abang nang heloma? Mate anut kaprek aphan inghong nangjilangma?” 4Jisu thaksi halatum aphan pulo, “Nangtum damra karjulong ponbom lapen kethekdun longbom alamle Jon aphan chethan damnon. 5Atheke, amek kave atum chechar long-lo, lapen akeng ketekok atum akengkam chejorlo; si-i kelong atum aphan pangthirlo lapen ano kangthong atum arjulong-lo, kethitang atum aphan pathurlo, lapen keduk kelak atum angno birta keme pachethang-lo.#Isa 35.5-6; 61.1 6Lapen nephan kekhamkhekhe abang rengme.”

7Jon asangho atum damjui aphi Jisu armu ake-ongpi atum aphan Jon alamjir kepuji pangcheng-lo, “Nangtum kejejangtang ajo kopi kelangdamsi damloma? Arpik arong tomon kejap ma? 8Tangte kopi kelang damjisi ingtan damloma? Phirsoni ape keche-um abang aphan kelang damma? Chini iktha, phirsoni ape kechepindeng atum recho ahemsi do. 9Tangte kopi athesi nangtum ingtan damloma? Montri inut aphan kelang damma? Ahok-lo, ne nangtum aphan nangpulang, montri apar kethemu abang aphan nangtum thek long-lo. 10Hastro along ketok alamjir ke alangli lamjirlo, atheke, ketok do, ‘Chini iktha, nesi ne pherangke nang-phrang toipo, alangli nangphrang tovar nang sikpiji.#Mala 3.1 11Chenamsi ne nangtum aphan nangpulang, arlosomar atum pirthe kepahache tang a-osomar atum angbong Jon Baptist apar akethe muchot abang ave, bonta sining arat akebinei abang alangli par themu. 12Jon Baptist a-arni pen non anta sining arat kelongji aphan ron kechedan ason thak-thak-lang lapen la ron kechedan atum bor-i borkhansi la chepahemphulo.#Luk 16.16 13Pima Jon a-arni anta montri atum an lapen Aronta Sining a-Rat alamjir thanlo.#Luk 16.16 14Lapen nangtum kedengji ning hangte, ha kevangji abang ke Elijah helo.#Mala 4.5; Mat 17.1-13; Mar 9.11-13 15Tangte ano kedo abang parjunang.

16“Bonta ne labangso a-ove aphan kopi pensi pangbarpoma? Lake osomar atum hithi along kangnira ajirpomar atum aphan kechehang ason thakthak-lo, 17‘Netum nangtum aphan mori but-lo, bonta nangtum kankedet-lo! Netum nangtum aphan ningduk alun lunlo, bonta nangtum chiru chernap-nedet-lo.’ 18Pima Jon ke chota choche, junta junje, lapusonsi vang-lo, lapen halatum alangliphan pulo, ‘Alangli hi-i photang-lo!’ 19Monit asopo kevang ahut ke alangli choponbom junponbomlo, lapen kadokave atum pulo, ‘Langtha, keboho lapen hor kangri abang, lapen midu kerung lapen papi atum ajirpo!’ Tebonta gian ke amethang akam pen ajoksi dhoromi pu cheklangpo.”

Kekroikre Arongsopi-hei hei

(Luk 10.13-15)

20Ansi Jisu kemanghumeme akam keklemtang ke-ong muchot arongsopi hei hei aphan kangchekji pangcheng-lo, pima halabangso amonit atum aning chiruiredet-lo. 21“Korazin! Nang ko-an akesungpik abang plangpo! Ko-an akesung pho nangpo, nang Bethsaida! Pima nangtum angbong keplangtang akemanghumeme akam hei hei jongsi Ta-ir lapen Sidon angbong klem asonte halatum hako ahut penta pethoila che-umsi, lapen thek-lo charsi si aning chiruiji apot-lo.#Isa 23.1-18; Eze 26.1—28.26; Jol 3.4-8; Amo 1.9-10; Zeka 9.2-4 22Bonta ne nangtum aphan nangpulang, mo kangsai arni nangtum aphan apar Ta-ir lapen Sidon aphan diya muchotji. 23Lapen nang Kapernaum, nangke sining athak anta the jilang pusi ning hang-loma? Nangphan ke ha kethitang atum kedo adim nangvarchorji! Pima, nang angbong keklemtang akemanghumeme akam kethe hei hei jongsi hala Sodom angbong klem asonte la pini arni anta doji apot-lo.#Isa 14.13-15; Kech 19.24-28 24Bonta ne nangtum aphan nangpulang, mo kangsai arni nangphan apar Sodom aphan diya muchotji.”#Jer 6.16

Jisu Along Kesanglong

(Luk 10.21-22)

25Halabangso ahut Jisu pulo, “Ne nangphan chorolo Po, sining lapen pirthe a-Hemphu, atheke nang lahei hei giani lapen abidi kedo atum angno pen patu tang-lo lapen oso thi-i atum aphan paklang-lo, 26ahok-lo Po, pima lake nangning kedok alamlo.

27“Ne-Po nephan kadokave nehodai-tang-lo. Po si Sopo aphan chinichot, baduta alangphan chinine, lapen Sopo lapen ke Sopo amethang aning kehang pen kepaklangji aning kehang atumsi Po aphan chinichot, baduta chinine.#Jon 3.35; 1.18; 10.15 28Anghor kardik pen apot kelak atum an nelong vangnon, ne nangtum aphan nangpasanglongji. 29Nangtum ne Juali cheparphang-ra nelong pen charli non, pima neke asotdut lapen chepabihek-lo, lapen nangtum nang methang methang akelak pen sanglongpo.#Jer 6.16 30Pima ne Juali lapen ne inghorke arjangtang.”

Currently Selected:

MATHIU 11: KARBIBSI

Highlight

Copy