MATHIU 10

Asangho Bang Krehini Atum Aphan Kebat

(Mar 3.13-19; Luk 6.12-16)

1Jisu amethang asangho bang krehini atum aphan amethang adung chehangsi kangthirthe ahi-i atum aphan kephlungji, ason ason akeso lapen ajakong kekomdet akeso hei hei kepameji ajakong pilo. 2Ketoitang bang krehini atum amen lahelo: aphrangsi ke Pitor pu abang, Simon lapen akorte Andriu; Jebedi asopo Jems lapen akorte Jon; 3Philip lapen Bartholomeu, Thomas lapen midu kerung abang Mathiu; Alpheus asopo Jems lapen Thadeus; 4det-chinghon a-Simon lapen Judas Iskariot, Jisu aphan hotur arideng kehodai abang.

Sangho Atum Kam Keklem

(Mar 6.7-13; Luk 9.1-6)

5Jisu la bang krehini atum aphan hukum pisi pulo, “Jihudi kalidet atum angbong damri, lapen Samaria atum arongsopi lutdamri, 6bonta la alar Israel akhei kangbotang abiresak atum along le damnon. 7Lapen nangtum kedam ahut pachethang ra punon, ‘Sining arat tebok-het-lo.’#Luk 10.4-12 8Nangtum keso atum aphan pamenon, kethitang atum aphan ingthurnon, si-i kelong atum aphan pangthirnon, lapen hi-i atum aphan phlungnon. Akejoisi nangtum long-lo, akejoile pinon.#Luk 10.4-12 9Nangtum nang methang methang ajamborong along ser, rup, kalite tam thap ponri,#Luk 10.4-12 10lapen tovar aphan jamborong, choi asele, keng-op lapen chin ponri. Pima kam keklem abang kecho longji a-ot do.#1 Kor 9.14; 1 Tim 5.18

11“Nangtum mo rongsopi, rongsoso lutdam lote nangtum aphan ning kangsam pen nangkechak abang ahemle lutdamnon, lapen nangtum hadak pen barbetik ke alangli hem le donon. 12Labangso ahem kelutdam ahut kardom chepinon. 13Lapen labangso ahem amonit atum jongsi nangtum aphan chak-lo tangte la aphuthak nangtum aning kangsam padonang, bonta nangtum aphan chakche tangte nangtum aning kangsam nangtum along pachevoi-thunang. 14Lapen nangtum aphan chakche, kalite nangtum alam arjuje tangte nangtum labangso ahem pen tame, mate arongsopi pen tame kebar ahut nangtum akeng alongle aduk cheho tekangnon.#Akam 13.51 15Chenamsi ne nangtum aphan nangpulang, mo kangsai arni labangso arongsopi aphan apar Sodom lapen Gomorrah alongri atum aphan ingjinso mu-chotji.#Mat 11.24; Kech 19.24-28

Akesung Hei Hei Kevangji Alamjir

(Mar 13.9-13; Luk 21.12-17)

16“Chini tha! Ne nangtum aphan mahar ahur angbong biresak atum asonsi nangtoilo. Tangte nangtum pherui asonthot kere, lapen vothung asonle asotdut cheplangnon.#Luk 10.3 17Bonta monit atum aphan cherenon, pima halatum nangtum aphan arong arong amei arideng nang hodaiji, lapen Sinagog hei hei along nangtum areng pasoji,#Sinagog=Mat 9.35 along langnon #Mar 13.9-11; Luk 12.11-12; 21.12-15 18lapen nangtum halatum lapen Jihudi kalidet atum angno haki kepijisi nangtum aphan det ahemphu lapen recho atum angno nangponji.#Mar 13.9-11; Luk 12.11-12; 21.12-15 19Bonta halatum nangtum aphan kehodai ahut nangtum kopusonsi, mate kopisi ningje nangjima, lake ning biri. Pima halabangso apor mamat nangtum keningje nangji alam nangtum aphan nangpidetji,#Mar 13.9-11; Luk 12.11-12; 21.12-15 20pima nangtumle keningje nangji kali, bonta nangtum a-Po a-Karjongsi nangtum pen ajok ningjepo.#Mar 13.9-11; Luk 12.11-12; 21.12-15

21“Kepathijisi akorte abang akorte aphan, lapen apo abang aso aphan hodaiji; lapen asomar atum api-apo ahotur cheplangsi halatum aphan pathiji.#Mar 13.12; Luk 21.16 22Lapen ne men pen apot kadokave atum nangtum aphan hijimpetji, bonta kejut anta keche-chakthip abang jokji.#Mat 24.9,13; Mar 12.13; Luk 21.17 23Nangtum aphan elong arongsopi nangkechenek ahut arongsopi kaprek-le katnon; lapen chenamsi ne nangtum aphan nang-pulang, nangtum Israel arongsopi an damtupte ako Monit a-Sopo vangji.

24“Athanbang apar asangho themu, kalite ahemphu apar aban themu, lapu kali.#Luk 6.40; Jon 13.16; 15.20 25Lahelo asangho abang athanbang ason thakthak lapen aban abang ahemphu ason thakthak plangthek lote latum aphan chok-lo. Jongsi latum hem ahemphu aphan Beelzebul pusi hang-lo tangte hem asangho atum aphan la apar kopu-an akehingno alam pudetji.#Mat 9.34; 12.24; Mar 3.22; Luk 11.15

Komat Aphansi Kephere Nangji

(Luk 12.2-7)

26“Tangte monit atum aphan phereri, pima non kepaklangkle-detsi kedipthip amar an mo thek long petji, lapen kepachininedet, akepatu amar anta chini petji.#Mar 4.22; Luk 8.17 27Ne nangtum aphan nangkethanjoi alam kethe-ang angbong punon, lapen nangtum ano pen karjulongjoi alam hem asarnung pen pachethangnon. 28Lapen abang arpum pathithek, bonta karjong aphan kepathi thekthe abang aphan phereri, la alar abang arpum lapen akarjong aphanta Chom arlo kepavirthek a-Bang aphanle pherenon. 29Sok puru avo jonni poisa isi ador pen jorlo, kalima? Tebonta nangtum a-Po aning hanghete latum angbong ejon natta longle athak klokledetji. 30Nangtum aphan ke nangtum aphu achu ajeng anta lakhapet tang-lo. 31Tangte, phereri, sok puru avo ake-ongpi apar nangtum ador somu.

32“Lahelo badutame monit atum angno nephan Hemphu pu kehang abangphutin aphan neta sining athak kedo ne-Po angno ne pusi hangji; 33bonta badutame monit atum angno nephan Hemphu pu hanghedet tangte, neta sining athak kedo ne-Po angno labangso abang aphan ne pu hanghedetji.

Sangho Keman Unji A-ot

(Luk 12.51-53; 14.26-27)

34“Ne pirthe athak ning kangsam kevanji aphansi vang-lo puke mathari; ning kangsam kevanji aphanle ne kevang kali, bonta nokjirsi vanlo. 35Pima apo ahotur asopo, lapen apei ahotur asopi, lapen anipi ahotur amunpi kepaplangjisi ne vang-lo, 36lapen monit ahotur amethang asangho atum helo kecheplangji.

37“Nephan apar api apo aphan kechinghon munak abang ke ne sangho plang un-e. 38Lapen badutame amethang athengparpan cheponra nephi phi kedunde abang ke nesangho plang un-e.#Mat 16.24; Mar 8.34; Luk 9.23 39Badutame amethang apran kecheraiji kebor-i abang ke la pangbodetji, lapen ne pen apot amethang apran kepangbodet abang ke la longji.#Mat 16.25; Mar 8.35

Nong-e Kelong

(Mar 9.41)

40“Badutame nangtum aphan kechak abang ke nephan chak-lo, lapen nephan kechak abang ke nephan nangketoi abang aphan chak-lo.#Mar 9.37; Luk 9.48; 10.16; Jon 13.20 41Montri pu mathasi montri aphan kechak abang ke montri anam longji, lapen dhoromi pu mathasi dhoromi abang aphan kechak abang ke dhoromi anam longji. 42Lapen badutame la kebinei atum angbong inut abang aphan Jisu asangho pu mathara lang kangsam harlung isi kepi abang ke, jonghe setta anam longledetji, lapu kali.”

Currently Selected:

MATHIU 10: KARBIBSI

Highlight

Copy