MATHIU 9

Thi-klak Abang Aphan Kepame

(Mar 2.1-12; Luk 5.17-26)

1Jisu telong chethapsi lapen parai nangkapsi amethang arongsopi chevang-lo. 2Lapen chini iktha, penang amonit atum hongplang athak ketirok inut thi-klak abang aphan alangli long vanlo. Jisu latum akekroi thek longsi thi-klak abang aphan pulo, “Ning thirklong penle donon po, nangpap hei hei diyatang-lo.” 3Lapen chini iktha manene aron thekser atum aning arlo pulo, “Labangso abang Arnam aphan pinremlo.” 4Jisu halatum akematha ason chinisi pulo, “Kopi apotsi nangtum aning arlo akehingno mathahur loma? 5Pima, ‘Nangpap hei hei diyatang-lo’ pu keputong kejoima, mate ‘Thurra nang kengkam chejornon’ pu keputong kejoima? 6Atheke, lake Monit a-Sopo pirthe athak pap hei hei kediyaji ajakong do pu nangtum kechiniji aphanlo.” Ansi alangli thi-klak abang aphan pulo, “Thurra, nang hongplang cheponra nanghem chedamnon.” 7Lapen alangli thursi ahem chedamlo. 8Armu atum la thek-longsi pherehurlo lapen monit atum aphan la-an ajakong kepi a-Arnam aphan anong pathelo.

Mathiu Aphan Kehang

(Mar 2.13-17; Luk 5.27-32)

9Jisu hadak pen damsi midu kerung amaro along kangni, Mathiu pu inut amonit aphan thek-long-lo, lapen Jisu alangliphan pulo, “Ne phi phi nangdun non.” Lapen alangli thursi alangli phi phi dunlo.

10Jisu, Mathiu ahem an kecho kangni ahut midu kerung lapen papi ake-ongpi atum alangli lapen alangli sangho atum along chingrum dunsi an kecho along ingni dunlo.#Luk 15.1-2 11Pharisi atum langphrongsi alangli sangho atum aphan pulo. “Nangtum athanbang kopi apotsi midu kerung lapen papi atum pen chorap rap loma?”#Mat 12.7; Hos 6.6 12Bonta alangli la arju longsi pulo, “daktor ke apran kemesen atum aphan kali, bonta kesodet atum aphansi nangji. 13‘Athok ajir kali, kangjinsosi nening hang-lo’ pu alamthe kopima, lale charli damnon, pima dhoromi atum aphan kali, bonta papi atum aphan kephajisi ne vang-lo.”#Mat 12.7; Hos 6.6

An Kehum

(Mar 2.18-22; Luk 5.33-39)

14Jon asangho atum Jisu along vangsi pulo, “Nelitum lapen Pharisi atum an humbom setta nangli sangho atum ke an humhe, la kopi athema?” 15Jisu halatum aphan pulo, “Piso kechepangri apinso abang dotik ke alangli long kedun atum chiru-chernapnelo, kalima? Bonta kechepangri apinso aphan halatum angbong pen pondetji, lason ahut vangji, lapen halatum halabangso ahut an humji. 16Lapen badutame kechetutte ape kemi pen choiban athak bangbe, pima la akemi abang ke chetutsi choiban aphan vungji lapen kechingsek adim themuchotji. 17Lapen ke monit atum ok-reng abong ban pen drakha ahorlang kemi pangpenpe. Lapu kalite ok-reng abong ingbopdakji lapen drakha ahorlang bu phakji, lapen ok-reng abongta virdetji. Bonta monit atum drakha ahorlang kemi ok-reng abong kemi along pangpenpo, lapen la sonni amarta virvedetpo.”

Kardom Ahem Ahemphu Asopi Lapen Avi Kebu Arloso Aphan Kepame

(Mar 5.21-43; Luk 8.40-56)

18Jisu halatum aphan la hei hei alam kethanbom ahut rat ahemphu inut alangli long vangsi, alangliphan ardomkhrupsi pulo, “Neli sopi non-hetsi kethilang, bonta nangli vang-ra labangpi aphuthak nangliri bat-lote la rengthuji.” 19Jisu thursi asangho atumta alangli phi phi dunlo. 20Lapen chini iktha, ningkan krehini pen avi kebu arloso alangli nung anat vangsi ape abu nang ot-lo. 21Pima alangli aning arlo pulo, “Achoile ne ot longchot anta, ne medetpo.” 22Jisu chetevarsi alangliphan thek longsi pulo, “Ning thirklong penle donon, pei! Nang akekroi nangphan pametang-lo.” Lapen labangso arloso halabangso ahut pen mamat methudet-lo. 23Lapen Jisu hala rat kepangri abang ahem lut damsi pongsi kebut, lapen armu atum kehurisei thek longsi pulo, 24“Ingtan damhurtha, pima labangso a-oso thithe, bonta ameksi kejangchot.” Lapen halatum alangliphan ingnekchoilo. 25Bonta armu atum aphan ingtan padam-etsi, alangli lut damsi labangpi ari ot-lo, lapen la bihek a-osopi thurlo. 26Lapen labangso abirta halabangso adet adang chethangpet-lo.

Amek Kave Bang Hini Aphan Kepame

27Lapen Jisu hadak pen kedam ahut hilolo amek kave bang hini atum alangli phi phi dunsi hangjosi pulo, “David a-Sopo, netum aphan ne ingjinsotha.” 28Jisu hem lut damdet pen la amek kave atum alangli long vang-lo, lapen Jisu latum aphan pulo, “Ne la klem un pusi nangtum kroiloma?” Halatum alangliphan pulo, “Kroilo, Hemphu!”

29Ansi alangli halatum amek otsi pulo, “Nangtum akekroi asonthot-le nangtum aphan paplangnang.” 30Lapen halatum amek chingpulo. Jisu halatum aphan papheresi pulo, “Chininon, baduta la pachini longri.” 31Bonta latum damsi alangli nong halabangso adet adang pachethangpet-lo.

Jisu Alam Kave Abang Aphan Kepame

32Halatum alangli long pen damjui aphi, chini iktha, manene atum alangli long hi-i kepho, alam kavedet abang aphan vanlo. 33Bonta hi-i aphan phlungdet pen mamat la alam kave abang kaningjeji pangcheng-lo. Ansi armu atum manghuphrongsi pulo, “Lapuson akam Israel adet kai penta thek longle pinlang.” 34Bonta Pharisi atum pulo, “Kethenei ahi-i ajakong pensi alangli hi-i atum aphan phlung-lo.”#Mat 10.25; 12.24; Mar 3.22; Luk 11.15

Rat Atum Aphan Jisu Kangjinso

35Jisu kadokave arongsopi lapen arong an damtupsi Sinagog hei hei along lam thanlo, lapen sining a-Rat abirta keme pachethang-bomlo; lapen kadokave akeso lapen ajakong kekom-det atum aphan pamelo.#Mat 4.23; Mar 1.39; Luk 4.44 36Jisu armu ake-ongpi atum aphan thek-longsi halatum aphan ingjinsosi munduk-lo; pima kevi abang kavedet biresak atum ason thak-thaksi halatum sungpiksi abidi jutdet-lo.#Kela 27.17; 1 Rec 22.17; 2 Phur 18.16; Eze 34.5; Mar 6.34 37Lasi alangli asangho atum aphan pulo, “Ahok-lo, sok ke do-o, bonta kerot atum ke ong-e.#Luk 10.2 38Tangte alangli kam keklem atum aphan sok keparotjisi nangketoiji aphan sok kerot a-Hemphu aphanle cho-ardomhurnon.”#Luk 10.2

Currently Selected:

MATHIU 9: KARBIBSI

Highlight

Copy