EPHESAS 4
4
Kekroi Atum Anke Isipet Abang Arpum Ason
1Lasi, Hemphu aphan keklempi apot phatek kejangnang abang, neli nanglitum aphan choningrilo, Arnam nanglitum aphan nangkepha ahut nanglitum aphan kepadotoi asonthot-le nanglitum do thak non. 2Nanglitum kaiketa kechepabihek a-ot pen, asotdut a-ot pen lapen kechepaningding penle do non. Nanglitum lahin lahin aphan dengra nanglitum akanghon chepaklangnon.#Kolo 3.12-13 3Ning kangsamsi nanglitum aphan nangkok-rappet-lo, lapen labangso aning kangsam pen ajok Karjong nanglitum aphan ning isi nangpaplang-lo. Nanglitum aning isi kedoverjile un-an bor-inon. 4Ilitum aning kethedam ason isinat. La isinat aning kethe kedoji aphansi Arnam nangphalo. Ning kethedam ason isinat asonthotsi bang arpumta isinat lapen Karjongta isinat. 5Hemphu inutnat, kekroi isinat lapen baptisomta isinat; 6lapen Arnam, atheke kadokave a-Po inutnat. Alangli ke kadokave atum a-Hemphulo. Alangli kadokave atum pen ajok klem lapen kadokave atum along do.
7Khristo ilitum aphan ekepi atengsi ilitum abangphutin kenangsot adan long-lo. 8Lasi hastro pulo,
“Alangli kangtuipik adim kedam ahut keneptang atum aphan ponlo,
lapen monit atum aphan dan hei hei pilo.”#Lun 68.18
9Tangte, “Alangli angsong arludamlo,” pu kepu athe kopilo? Labangso alamthe kepudam athe la helo: aphrangke alangli pirthe abernei adim hirdamlo. 10Lasi arum nangkehir abangthotsi, kadokave asonta kepachok limji aphan kadokave asining apar kangtuimu adim arludamlo. 11Alanglisi monit atum aphan kenangsot adan hei hei pilo. Komanene atum ke ketoitang atum, komanene atum aphan ke Arnam amontri atum, komanene atum aphan ke Birta Keme kepachethang atum, komanene atum aphan ke mondoli keja mate pastor atum lapen komanene atum aphan ke kethan atum kecheplangji aphan Alangli kenangsot adan hei hei pilo. 12Khristo abang arpum kepathirklongji aphan kangthir atum keklem nangji akam keklem thekji aphan kepachesik pameji aphansi alangli la klemlo. 13Tangte la ko-an ahut anta doji? Ilitum akekroi lapen Arnam a-Sopo aphan kechini pen ajok ilitum isipet plangpletik, lapen ilitum arta dosi Khristo akrom ajon ateng plangpletik ke lahei hei do nangjilang. 14Anke ilitum osomar atum ason kalidetsi kehingno akere atum kechomosoi alam alang angsum lapen atomon kepon aling ke dunthapthedetsi leng long tongtedetpo. 15Bonta ilitum kanghon pen ahok alam ningjera kadokave asonta Khristo ason kecheplangjile thebom lonang. La Khristo ke bang arpum aphulo. 16Alangli pen ajoksi abang athantin pachechulo, lapen labangso akepachechu akechechu an pen ajok abang arpum pacherapplang-lo. Lasi abang athantin keklem nangji akam cheklem pame lote kanghon pen ajok abang arpum thepo lapen ajakong thepo.#Kolo 2.19
Khristo Aphan Kekroi Atum Ot Kemi Pen Kedo Kethak
17Lasi Hemphu amen pen neli nanglitum aphan nangpupo: nanglitum non pen apara hala thangta kalidet aning kematha pen kedo, Arnam aphan kekroikre atum ason ke do thak-rinon. 18Halatum kechini ajakong ingtingkuk-lo. Halatum aning buikluihak huksi kechinine pen apot Arnam kepi achethe pen chepahe-loving-lo. 19Halatum thangta therak thekthe; halatum ke kehingno akam keklemlokjisi aning kehang, lapen aning thang akechak-hik ave pin pen kehingno akam an klembom.
20Bonta nanglitum Khristo alamjir kecharli long ke lapuson kali! 21Nanglitum alangli lamjir arjulong binong-lo, lapen nanglitum ke alangliphan kekroi atumlo apotsi nanglitum aphan Jisu alamjir ahok alam nangthan binong-lo pusi neli mathalo. 22Lasi nanglitum aphrang amonit a-ot adur barim che-onon. Ok aning kehang, kar-ithapsi labangso amonit barim aphan ke pavirbomlo.#Kolo 3.9 23Nanglitum aning angthin chepamithunon, 24lapen Arnam a-ot ason kepinchongtang a-ot kemi chepindengnon. Labangso a-ot kemi ke ahok pen keplang adhoromipet akam lapen kangthir akam along klangdak-lo.#Kech 1.26; Kolo 3.10
25Lasi nanglitum non pen apara ke pachoreirinon. Tebok abang aphan ahok alamle ningjenon, pima ilitumke kadokaveta Khristo abang a-ok athan hei heilo.#Zeka 8.16 26Nanglitum ning thi setta pap klemri. Nanglitum aning kethi arni kechi an padoverri.#Lun 4.4 27Hi-i Sarpo aphan asoi keme pek-ri. 28Kechonghu abang non pen apara chonghurinon, bonta nang methang kereng-iji aphan lapen keduk kelak atum aphan kerapdun thekji aphan nang methang ari pen kam keme choklemnon. 29Nanglitum angho pen kehingno alam ethe natta pabar longri, bonta karju atum ahirjume kelongjile halatum aphan kepame alam lapen halatum akenangji atengle akeme alam ningjenon. 30Nanglitum Arnam a-Karjong Kangthir aning pa-oiri. Pima la Karjong kedo ke Arnam amonit-lo pu angthek-lo. Lapen mo kepajokji Arni ahut Arnam nanglitum aphan nang pajokvekji pu angthek aphan Karjong aphan sap ason paplangsi nanglitum athak sap thengtang-lo. 31Ning keho, ning kesedeng lapen ning kethi a-ot an che-onon. Non pen apara nanglitum hang pangtarrinon, chepusit-rinon lapen chelangselet-ri non. 32Nanglitum lahin lahin cherap seroinon, chejinso seroinon lapen Jisu Khristo pen ajok Arnam nanglitum aphan nang kediya asonthot-le nanglitum lahin lahin chediya seroinon.#Kolo 3.13
Currently Selected:
EPHESAS 4: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
