EPHESAS 3
3
Pol Jihudi Kalidet Atum Angbong Keklem Akam
1Labangso apotsi nanglitum Jihudi kalidet atum aphan ajok Khristo pen apot phatek kejangnang abang, neli Arnam aphan choningrilo. 2Nanglitum ale kelongji aphan Arnam akangjinso pen neliphan labangso akam nepek-lo pu alam nanglitum arjulong binong-lo pusi neli mathalo. 3Arnam neliphan kedip alam nepaklangsi nepachinilo. (Aphrangta neli nanglitum aphan labangso alamjir nangtok-lo. 4Nanglitum halabangso aloh along ketok alam hei hei porhe lote Khristo akedip alamjir neli kechinidam alam nanglitum chini unpo.) 5Arnam amethang a-Karjong pen ajok ketoitang lapen Arnam amontri atum aphan labangso akedip alam non kepaklang asonthot ke aphrang a-ove atum aphan ke pachininepinlang.#Kolo 1.26-27 6Kedip alam la helo: Jihudi kalidet atumta birta keme pen ajok Jisu Khristo pen chelangpetsi Jihudi atum pen Arnam ahirjume chepahemphulong rap rap-lo, halatum isipet abang arpum a-ok athan hei hei cheplang-lo lapen Arnam kechaktang ason long rap rap-lo.#Kolo 1.26-27
7Arnam amethang ajakong neli long kepado pen ajok Arnam akangjinso adan nepisi neliphan labangso a-Birta Keme aban nepaplang-lo. 8Kangthir atum angbong pen akebinei ke neli helo setta kechini un-e Khristo akhi alamjir abirta keme Jihudi kalidet atum angbong kethan kepachethangji aphansi Arnam akangjinso pen neliphan labangso akam nepek-lo. 9Arnam kepatujoi akemang akam non keklem kepaplengji alam monit atum aphan kepachinita neli keklem nangji akamlo. Kadokave kepinchong a-Arnam kedamtang akai anke labangso kepatujoi akemang alam dipjoilo. 10Sining asonthak thak adim kepangri atum lapen ajakong kedo atum non mondoli pen ajok Arnam alep kedo-o abidi kechini longji aphansi non monit atum aphan hala kepatujoi akemang alam pachinilo. 11Arnam aphrang pen kemang atengsi non lapuson klemlo, lapen lake e-Hemphu Jisu Khristo pen ajoksi akam papleng-lo. 12Ilitum Khristo pen kechelangpet lapen alangliphan kekroi pen ajok ning thek-long pen Arnam along damhai. 13Lasi neli nanglitum aphan choningrilo, nanglitum aphan ajok neli keduk kesung kephonang apot ke nanglitum aning cheparunhup-ri; lake nanglitum adak aturlo.
Khristo Akanghon
14Labangso apotsi neli Po angno neli kengphu patongruilo. 15Sining athak lapen pirthe athak kedo ahemtuntin aphanta la Posi amen irlo. 16Arnam amethang a-Karjong pen ajok alangli methang adak atur akhi angbong pen nanglitum aphan jakong nangpisi nanglitum aning ajakong kepatheji, 17nanglitum akekroi pen ajok Khristo nanglitum aning arlo kedoverji lapen nanglitum klem aling setta kanghon paklongsi keklemji, 18Khristo akanghon ko-an avar thema, ko-an dingma, ko-an ingtuima lapen ko-an arnukma, la nanglitumta hala kangthir atum an pen pen kechini thekji, 19lapen nanglitum chenamsi alangli kanghon kechini thekji, tebonta alangli akanghon ke chini pame un-e lapen lasi nanglitum Arnam a-ot pen keplengsetji aphansi neli Arnam ardomlo.
20Ilitum along kam keklemvoi abang, atheke alangli methang a-Karjong pen ajok, ili kechohang pen apar lapen ili kemathadam pen apar ekepi un abang aphan, 21atheke Arnam aphan mondoli pen ajok lapen Khristo Jisu pen ajok a-ovetin kejut un-e akai apar akai anta adak atur pathenang! Amen.
Currently Selected:
EPHESAS 3: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
