EPHESAS 5
5
Kethe-ang Angbong Kedo
1Nanglitumke Arnam asomarlo apotsi alangli sonle charlidunnon. 2Khristo ilitum aphan e-inghonlo, lapen kenemprujin lapen Arnam aning kedok athok ason cheplangsi ilitum apharman amethang apran chepidet-lo. Lasonthot-le nanglitumta klem aling setta kanghon penle kengkam chejorra klemnon.#Keba 29.18; Lun 40.6
3Nanglitum angbong beisa akam, kangthirthe akam an lapen mek plengple akam anke alam anta pinpurpedet nangji. Pima kangthir atum angbong ke lahei hei avedet nangji. 4Nanglitum angbong ke ketherakmeme alam kechethan, thangbakbe alam kechethanthap lapen lam jong jong kaningje hei hei avedet nangji. Bonta la hei hei alar Arnam aphan kerole pinon. 5Beisa keklem abang, kangthirthe akam keklem abang lapen mek plengple abang ke, (Mek plengple akam ke eson ase karklilo) Khristo lapen Arnam arat angbong dim longdunde, lale nanglitum chinipamenon.
6Baduta nanglitum aphan thang-bakbe alam pen nang pachomosoi longri, pima lapuson akam pen apot Arnam alam kekroikre atum aphan Arnam aning thiji. 7Lasi nanglitum lason amonit atum along ke chelangdunri.
8Ahut isi ke nanglitum kangting angbongsi dolo. Bonta nonke nanglitum Hemphu pen chelangpetsi kethe-ang angbongsi dolo. Lasi nanglitum kethe-ang asomar asonthot-le kengkam chejorra do thaknon. 9Pima kethe-ang atheke akeme, kechok lapen ahok alongsi klang. 10Hemphu aning kedok kopima, lale langpamenon. 11Thangta ale kave akangting akam ke klemdunri, bonta la alar la paklangdaknon. 12Halatum keklem kanghu akam ke alam kechethan anta therakmeme. 13Bonta kethe-ang angbong vansi paklangdak lote a-ot binong thek-longdakpo. Pima keklangdak ason anke kethe-ang plang#Penang a-Baibel along ke, “Pima keklangdak ason anke kethe-ang plang,” pu adim “kethe-angsi kadokave asonta paklangdak-lo,” pusi ketok do 14Lasi pulo,
“O mek kejang abang, mek prangnon,
lapen kethitang atum angbong pen thurnon,
lapen Khristo nanglithak tur-angpo.”
15Lasi nanglitum kopusonsi keng-kam chejor pen do thak-loma, lale chelang pamenon. Kelu atum ason kali, bonta kere atum asonle do thaknon. 16Nanglitum asoi keme kelong aling kam keme klemnon, pima non akai ke hingno.#Kolo 4.5 17Nanglitum chepaluri, bonta Hemphu aning kehang kopima, la kechinijile bor-inon.
18Nanglitum hor ingriri. Lake akhat kave abang nangpaplangchot. Bonta la alar nanglitum Karjong chepa-plengsetnon. 19Hastro alun, dhorom alun lapen karjong alun hei hei penle lahin lahin chingki chethannon. Nanglitum aning aklong pen lun lapen ate-ot kejume penle Hemphu aphan ro archonon.#Kolo 4.5 20Ajat akam alam tame kaiketa Hemphu Jisu Khristo amen pen Po Arnam aphan kero pinon.#Kolo 3.16-17
Penanso Angbong Alam
21Nanglitum Khristo amahang langra lahin lahin alam chekroinon.
22Apiso atum, Hemphu aphan asonthot-le nanglitum methang apenan atum alam kroinon.#Kolo 3.18; 1 Pit 3.1 23Pima Khristo ke mondoli aphu asonthotsi apiso aphu ke apenan helo. Mondoli ke Khristo abang-lo lapen alanglisi la aphan pajok-lo. 24Lasi mondoli Khristo aphan kekroi asonthotsi apiso atumta ajat asonta amethang methang apenan atum alam chekroi nangji.
25Apenan atum, Khristole mondoli aphan chinghonsi mondoli aphan ajok amethang apran kechepi asonthot-le nanglitumta nang methang methang apiso aphan chinghonnon.#Kolo 3.19; 1 Pit 3.7 26Mondoli aphan lam pen ajok lang pen cham pakaksi kepangthir-etji; 27lapen mondoli aphan alon kepado parpik pen, atheke thang aphik kero, kechekedu lapen thang akehingno kepavedet pen amethang arideng kechehodaiji aphansi, lapen mondoli kangthir-etji lapen thangta kedin movedetji aphansi alangli lason amethang apran chepilo. 28Lasonthotsi apenan atumta amethang abang aphan kechinghon asonthotsi amethang methang apiso aphan chinghon nangji. Amethang apiso aphan kechinghon abang ke amethang aphansi kechinghonlo. 29Badu amonitta amethang abang aphan ke chehijimje. Bonta Khristo mondoli aphan keklem asonthotsi abangphutinta amethang methang abang aphan che-ora lapen chelana. 30Pima ilitumke Khristo abang a-ok athan hei heilo. 31Hastro along tok-lo, “Labangso apotsi monit ke api apo che-osi apiso pen chelangpetji, lapen bang hini a-ok isipet cheplangji.”#Kech 2.24 32Labangso ahastro alam along eson karsikkrung akepatu alam do; bonta lake Khristo lapen mondoli alamjirsi kepudam pusi neli kechini.#Penang a-Baibel along ke, “Bonta lake Khristo lapen mondoli alamjirsi kepudam pusi neli kechini,” pu adim “Khristo lapen mondoli alamjirsi neli kepudam,” pusi ketok 33Tebonta abangphutin apenanta amethang aphan kechinghon asonthotsi ame-thang methang apiso aphan chinghon nangji; lapen abangphutin apisota amethang methang apenan aphan aman pi nangji.
Currently Selected:
EPHESAS 5: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
