EPHESAS 2
2
Khristo Pen Kechelangpet Pen Kedo Thekji Aphan Arnam Jakong Kepi
1Ahut isi ke nanglitum Arnam aphan kekroikre lapen nang methang apap hei hei apot Karjong anat ke akethitang-lo.#Kolo 2.13 2Halabangso ahut ke nanglitum labangso apirthe akehingno a-ot atengsi do thak-lo, lapen tomon angbong kedo kehingno akarjong atum aphan kepangri abang, kehingno akarjong aphansi nanglitum kroilo. Labangso kehingno akarjongsi Arnam aphan kekroikre atum aphan non charibomlo.#Kolo 2.13 3Aphrangke ilitum kadokaveta halatum asonthak thak-lo. Ilitum a-ok aning kehang atengsi ili klemlo, ebang, ening ekepaklemtoi alingsi ili klemlo. Lasi kadokave atum asonthotsi ilita Arnam aning kethi kephovek nangji atumlo. 4Bonta Arnam akangjinso theparpik-lo, lapen alangli ilitum aphan e-inghonparpik-lo. 5Atheke ilitum Arnam aphan kekroikre pen ajok Karjong anat ke akethitang-lo setta, alangli Khristo aphan pen pen ilitum aphan eparengthulo. Arnam akangjinso pen ajoksi nanglitum kejok long-lo.#Kolo 2.13 6Ilitum Khristo pen kechelangpet pen ajok Arnam ilitum aphan Khristo aphan pen pen epathursi sining athak Khristo along epangnidunlo. 7Arnam Jisu Khristo pen ajok ilitum aphan e-inghon alangli ketheparpik akangjinso chepaklang-lo. Alangli akangjinso theparpik-lo pu mo mo akai an aphanta kepachiniji aphansi alangli lason klemlo. 8Nanglitum akekroi apot Arnam akangjinso pen ajoksi nanglitum kejok long-lo. Lake nanglitum methang akam pen apot kali, bonta Arnam akangjinso adanlo. 9Baduta kechepindak longledetji aphan lake kam keklem pen apot kali. 10Arnam ilitum aphan non lapuson epaplang-lo. Ilitum keklemji aphan Arnam aphrang pen akeme akam hei hei ethikpilo, lapen ilitum Jisu Khristo pen kechelangpet pen ajok alangli ilitum aphan non lapuson ekepajalang ke ili la hei hei akam keklem thekji aphanlo.
Khristo Pen Kechelangpet Pen Ajok Isipet Keplang
11Hala Jihudi atum, atheke “Rengrot ke-en atum,”#Rengrot: Jihudi atum aron atang ateng pen pinso a-oso aphan ni nerkep arta ahut a-ok angchun areng kerot akam pu kechepu atum ke (Rengrot ke-enke aron atang ateng pen abang a-ok kerot akamchot) nanglitum aphan, atheke mahang kethek penta Jihudi kalidet atum aphan “Rengrot ke-en-e atum,” pusi nangpulo. Ahut isi ke nanglitum kopuson amonit atum loma, lale chemathanon. 12Halabangso ahut ke nanglitum Khristo aphan chininedetsi alangli pen chepaheloving-lo; nanglitum Israel amonit kalidet-lo, atheke nanglitum Arnam kangvaitang amonit kalidet-lo. Nanglitumke kaprek adet amonit pinak-lo, lasi Arnam amethang amonit atum aphan kechak akechechak along nanglitum apharman avedet-lo. Nanglitum ning kethe avepin pen lapen Arnam aphan chininepin pensi labangso apirthe athak dodunlo. 13Aphrang ahut ke nanglitum Arnam pen chepaheloving-lo, bonta nonke nanglitum Khristo Jisu pen kechelangpet pen apot nanglitum aphan Khristo avi pen ajok Arnam adung nangvantang-lo. 14Jisu Khristo amethangsi Jihudi lapen Jihudi kalidet atum aphan isipet paplangsi ilitum angbong lahin lahin ning kechingsam padolo. Halatum aphan hini akhei kepaplang-i lapen kepachelang un-e ahoi arpong alangli phridak-lo. 15Alangli pen kechelangpet pen ajok la hini akhei aphan isi khei kemi kepinchongjisi alangli Jihudi atum kekroi Aron, Aron ahukum hei hei lapen aron atang hei hei kekroi akenang pavedet-lo;#Kolo 2.14 lapen lapusonsi alangli halatum angbong lahin lahin ning akechingsam padolo. 16Khristo thengparpan athak amethang apran kechepi pen ajok la kheini angbong kedo akhet pavirdetsi halatum aphan isipet akhei paplang-lo, lapen halatum aphan Arnam along vanthusi Arnam pen pachepamethulo.#Kolo 1.20 17Khristo vangsi nanglitum Arnam pen keheloving atum aphan, atheke Jihudi kalidet atum aphan lapen hala Arnam pen ketebokhet atum aphan, atheke Jihudi atum aphan ning kangsam alamjir a-Birta Keme thanlo.#Isa 57.19 18Khristo pen ajoksi ilitum kadokaveta, atheke Jihudi lapen Jihudi kalidet atumta isipet a-Karjong akerap pen ajok Arnam along vanglong-lo.
19Labangso apotsi nonke nanglitum bang adet asor, mate bang adet pen vangsi nangkedo amonit atum kalilo; nonke nanglitum kangthir atum pen isipet adet amonit atumlo, lapen Arnam ahem asangho atumlo. 20Ketoitang atum lapen Arnam amontri atum kepangnitang ahemthur athaksi nanglitum aphanta nangkimtang-lo;#Ketoitang atum lapen Arnam amontri atum aphan ahemthur eplangsi nanglitum aphan kimtang-lo pusi akaprek a-Baibel along ketok do lapen labangso ahem kepathir-i akenangsotnei a-arlong ke Jisu Khristo helo. 21Alanglisi labangso ahem pache-rapplang-lo, lapen pathebomsi Hemphu aphan kepanongpitang akardom ahem kangthir paplangbomlo. 22Arnam a-Karjong kedo ahem kepaplangji aphansi nanglitum Khristo pen kechelangpet pen ajok nanglitum aphanta anut kaprek atum aphan pen pen labangso ahem along nang pacherapdunbomlo.
Currently Selected:
EPHESAS 2: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
