EPHESAS 1
1
Chepachini
1Arnam aning kehang pen Jisu Khristo ketoitang abang, neli Polsi nanglitum aphan, atheke, Ephesas arongsopi kedo, Khristo Jisu pen chelangpetsi kekroi kethirklong, kangthir atum an aphan labangso aloh tok-lo.#Akam 18.19-21; 19.1
2E-Po Arnam lapen Hemphu Jisu Khristo nanglitum aphan kangjinso lapen ning kangsam nangpapinang!
Jisu Khristo Pen Kechelangpet Pen Ajok Karjong Ahirjume Kelong
3E-Hemphu Jisu Khristo a-Arnam lapen a-Po aphan ili ro archo lonang! Pima ilitum Khristo pen kechelangpet pen ajok alangli ilitum aphan sining asonthak thak adim ahirjume an pen hirjume epitang-lo. 4Arnam angno ilitum kangthir-et lapen kedin move-det atum keplangji aphan, ilitum Jisu Khristo pen kechelangpet pen ajok amethang amonit ekepaplangjisi pirthe pinchongche ako pen Arnam e-ingvailo.
Kanghon pen 5Arnam Jisu Khristo pen ajok ilitum aphan kur kepon asopomar atum ekepaplangji aphan Arnam aphrang pen pathiktang-lo. Lake Arnam aning kehang lapen kemang akamlo. 6Amethang adak atur keplengset akangjinso ekepi apot ili Arnam aphan ro archo lonang! 7Ilitum alangli pen chelangpetsi alangli vi pen ajok kejok long-lo, atheke Arnam ilitum apap hei hei diyatang-lo. Arnam akangjinso ko-an akethe!#Kolo 1.14 8Arnam ilitum aphan labangso akangjinso epi-olo.
Arnam amethang agian lapen abidi an pen 9alangli ning kehang akam klemtang-lo, lapen alangli Khristo pen ajok keklem kepatangji pu kepa-thiktang kedipjoi alam non ilitum aphan epachinilo. 10Arnam athik apor ahut labangso kemangdam akam keklem patangji. Labangso akam ke la helo: sining lapen pirthe athak kedo, kepinchongtang an aphan pangrumpetsi Khristo aphan halatum ahemphu paplangji.
11Arnam amethang kemang lapen aphrang pen kepathiktang atengsi, nelitum Khristo pen kechelangpet pen ajok nelitum aphan amethang amonit nekepaplangjisi neingvailo. Lake Arnam amethang aning kehang ateng aphrang pen kepathiktang akamlo. 12Nelitum, Khristo aphan ning kethe kedo paphrangcheng atum Arnam, adak atur kepathe thekji aphansi Arnam lason klemlo.
13Arnam alamjir ahok alam, atheke nanglitum kejok kelong-i a-Birta Keme arjulongsi nanglitumta Arnam amonit plang-lo. Nanglitum Khristo aphan kekroi pen ajok Arnam nanglitum aphan amethang kechaktang a-Karjong Kangthir nangpisi amethang amonit angthek asap nanglitum athak theng-tang-lo. 14Arnam amethang amonit atum aphan kechaktang ason ilitum longvekji pu angthek ke la Karjong helo, lapen Arnam amethang amonit atum aphan pajokphlot binongji pu ilitum labangso pen ajok chini. Ilitum alangli dak atur pathe lonang!
Pol Arnam Kardom
15Labangso apotsi nanglitum Hemphu Jisu aphan kekroi lapen kangthir atum aphan kanghon alamjir neli karjulong ahut pen 16nanglitum pen apot kaita Arnam aphan kero piverlo. Neli Arnam kardom abataitinta nanglitum aphan nangmathaponverlo, 17lapen nanglitum Arnam aphan kechini thekji aphan, nanglitum aphan Karjong nangkepapijisi neli Hemphu Jisu Khristo a-Arnam, atheke adak atur kedo a-Po aphan choningrilo, atheke Karjong ke Arnam aphan kechini ajakong lapen kechini ajakong kepi abang-lo. 18Arnam nanglitum aphan nangkepha apot nanglitum ning kechethedam ason kopima, kangthir atum alangli long pen kechepahemphu longji adak atur kedo akhi ko-an ale kethema, 19lapen ilitum along kedo alangli jakong, atheke kekroitang atum along kedo alangli jakong ko-an akethema, la hei hei nanglitum kechini thekji aphan nanglitum alangli akethe-ang kethek-longjisi nanglitum aning amek nangkepangpuji aphan neli Arnam ardomlo. La ilitum along kedo alangli jakong ke 20Khristo aphan kethitang atum angbong pen kepathur-i ajakong lapen alangliphan sining athak amethang ari ar-e anat kepangni-i ajakong kethe pen isipet-lo.#Lun 110.1 21Sining asonthak thak adim kepangri atum an, kepangriji ajakong kelong atum an, ajakong kedo atum an lapen ahemphu atum kelong ajakong apar Khristo kelong ajakong themu, lapen labangso ajakong pensi alangli hadak pangrilo; lapen non kedobom akai anchot kali, mo kevangji akai angbong kedo atum kelong amen an apar alangli kelong amen themulo. 22Arnam kadokave amarta Khristo akengpak arum bilo, lapen alangliphan kadokave amar a-Hemphu kethenei paplangsi mondoli aphan hodailo.#Lun 8.6; Kolo 1.18 23Mondoli ke Khristo abang arpumlo, lapen alangli kadokave adim kedo amar aphan kepachok lim asonthotsi amethangta mondoli pen ajok chok limlo.#Lun 8.6; Kolo 1.18
Currently Selected:
EPHESAS 1: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
