Romɨ 9
9
Polɨ Yɨzɨrelɨyaraavɨna taanga nebulya'na wiake'nesɨ.
1Kɨraazɨtɨyarɨ wɨlamwaaiheinyɨ sareinyɨ yagaala nebulya'na dɨvanɨge. Kwaasɨ majɨvanɨge. Nabaai nɨmɨre sɨmunyai padaihɨrakyai nebulya'na dɨvanɨgevɨna avaaina jalɨkurakɨvanɨkelyɨ. Yɨ Kurya Tewaanyai sara maremwaaidɨsɨ nɨmɨnyɨna sara jalɨkurakɨvanɨkelyɨ. 2Sare'na nebulya'na dara yɨhɨthɨvanɨge. Nɨnnya yɨsavaakɨyara avaaitawera Kɨraazɨtɨyarera mamwaalyɨgasa'na taanga nebulya'na nyada yuyagaa' sɨmunyavɨ daanga yɨbwakɨdɨnyainyɨ. 3Sahwaraavɨ wɨgaimwagya'neinyɨ nɨmɨre sɨmunyavɨ Gotɨyarɨ yagɨnna dara wɨdɨvanɨge “Nɨmɨ sahwainyɨ Dɨkevɨ nyɨmarasɨ'nɨja', Kɨraazɨtɨyarɨ nɨmɨnyɨjɨ gewɨ gewɨ jaapaidɨza' nya'mweraavɨ avaaitaweraavɨ dɨvadaihasamaa'de' nawɨ'nyasɨ.” 4Kumɨ Gotɨyai dahɨlakyaaka yɨta savaakɨyara Yɨzɨrelɨyarera. Kumɨnyɨne'na Gotɨyai nawɨ'nya kwalaalya kwia' kɨrɨ' kwalaalya sahwara Kɨraazɨtɨyarɨ malɨmwagye'. Gotɨyai gamɨre gawaalɨvaangeraavɨ wɨmwaihyaakere. Gamɨre byaanna dɨragɨnya' wɨjɨwaainakera, yagaala wɨlɨmwagakenna ye'mwannawɨdakera, gamɨre Kɨwɨnya' wɨjaavakera, Gotɨyarɨ yɨlaaya nebwina wiesara, yune naanga nebulya'ne yagaalya maaresara, 5Ne sɨnnawɨnyara kwɨyakwalaanga naangera kɨnɨnnakera, nabaai kɨlaakevɨna Gotɨyai dahɨlakyaakei Kɨraazɨtɨyai kɨlaakevɨna sahwaraavɨre sahɨvaakɨdaasɨ yɨma'nakelyɨ. Yɨ gamɨ sahwai yuyangɨ maremwaalɨkelyɨ. Sai Gotɨyai nebulya'nanyalyɨ. Sahwarɨ yuyagaa' yuyagaa' nemɨ yɨlaaya kuna maryaana! Naanga nebulyasɨra.
6Nabaai Yɨzɨrelɨyaraavɨna Gotɨyai yune naanga nebulya'ne yagaalya' yaasɨwa' mena yɨwɨya myakevɨnera. Sare' dare'nesɨ. Yɨzɨrelɨyarɨdaa'nya yuyara Yɨzɨrelɨyara mɨ'. 7Nabaai Evɨraamɨmɨdaa'nyara gamɨre yɨsiwiara yɨma'neta yuyara Gotɨyare kaimɨraayara mɨ'. Aawa. Gotɨyai dara wɨdakelyɨ “Aazakɨmɨ gɨmɨre yɨta savaakɨyara yɨsiwiara yɨma'nɨpɨ'dere.” 8Sare' daresɨ. Kɨlaakejɨkɨya kaimɨraayara dazara Gotɨyare kaimɨraayara mɨ'. Aawa. Gotɨyai yune naanga nebulya'na dakera yɨma'nɨpɨjara dazara “Evɨraamɨmɨdaa'nyara yɨsiwiara nɨmɨrere,” yawɨrakere. 9Sare' dare'nesɨ. Yune naanga nebulya'ne yagaala dara dɨnɨkesɨ. Dathagaa' ayahi yɨma'nadehaa' ayɨna bɨdeinyɨ. Sara kya'muri Seraa' jɨwaalɨvaangei maaradesɨ. 10Nabaai yune sahɨrɨ'nanya' mɨ'. Aawa. Rɨvekaa' bwaramunya' maryaakevɨnyɨ. Nemɨre neyakwalaangei Aazakɨ gave pwainanyai munya makuna yakelyɨ. 11Kaimɨraayaraai kɨrɨnaange' mamaaryakegaa' nabaai saraai tewaanya pɨnɨ kɨnɨ myadisaraai kayaa'nanya pɨnɨ kɨnɨ myadisaraai mima'nyadakɨlyɨyagaa' 12kɨrɨnaangevɨ dara wɨdakesɨ, “Sarɨmɨre sɨraangei dɨviyaraavɨ maremwaaide kɨrɨ' gɨmɨre sɨraangei aaya dɨviyarɨ wɨdaayadei yɨma'nadelyɨ.” Sare' dare'nesɨ. Gotɨyai “Sara dahɨlakyabwina nɨmɨre yawɨsa' waragwona!” daka sara wɨdakesɨ. A'mwei wawɨnya nayaa yadevwina sara yɨma'naka' mɨ'. Aawa. Gamɨ sai jaka wɨjɨvwaramaarake'na sara yɨma'nakesɨ. 13Dɨvidaa'nyɨ dara dɨnɨkabaaibɨsasɨ. Nɨmɨnyɨ Jaikopɨmɨna tewaanya nyɨvu'nɨvanɨ'. Yɨzorɨna tewaanya manyɨvu'nyɨvanɨ'.
14Sarevɨdaa'nyɨ nemɨ be yagaala daathevaka? Nemɨ dara daanne' daaka! Gotɨyai yɨda'maraangebwi yadei mɨ'. Arɨkewɨnyɨ. 15Sare' dare'nesɨ. Sahwai Ne Mozɨzarɨ wɨdakesɨ. Nɨmɨ yawɨra'mujɨ “A'mwe sarɨ kale'na wɨgaimwagɨma!” yɨ sahwarɨ kale'na wɨgaimwagɨdeinyɨ. Nabaai “A'mwe pwarɨna kale nyana!” da'mujɨ yɨ sahwarɨna kale nyadeinyɨ. 16Yɨ sarevɨdaa'nyɨ Gotɨyai a'mwerɨ dahɨlakadevwi a'mweraavɨre yawɨsaburɨ mɨ'. Nabaai a'mwera yagɨyagɨnyaburɨ mɨ'. Aawa. Sai tewaanya kale'na wɨgaimwangei Gotɨyai dahɨlakadevurɨnyɨra. 17Sare' dare'nesɨ. Gotɨyai Peroyarɨ wɨdake' dara dɨnɨ' “Gɨmɨ nɨmɨjɨ mala je'mwannabwa'dehaa' ‘Nɨmɨre dɨragɨnya' yuyaraavɨ yɨbwarɨdaakwana!’ dena, nabaai, ‘Kwaaka yuyawɨ nɨmɨnne yaya' wɨdamaryɨpɨka!’ dena gyathɨkaavena kingɨya gɨmwaaiheinyɨ.” 18Yɨ sarevɨdaa'nyɨ sahwai yawɨraka “Sarɨ tewaanya kale'na wɨgaimwagɨma!” yɨ sara yɨna. Nabaai yawɨraka “Pwai pihadɨka yadere sɨmunya' tihɨrɨma!” yɨ sara yɨna yadelyɨ.
19Sarevɨdaa'nyɨ gɨmɨ nɨmɨnyɨ yaamɨjɨ dɨnyɨdatheigɨnyɨ “Sarevɨ gazaizai Gotɨyare sɨmunyavɨna yɨnɨga magalazekɨvalyɨ yɨpɨne'na a'mweraavɨna ‘Kayaa'nanyaburɨ yɨwetawakadɨvɨsarera,’ kuna be'na dadelaka!” 20Nabaai, a'mweigɨ, Gotɨyarɨ ayɨna yɨnɨga aaigɨ dɨza'nawɨdatheigɨnaka! Gyavɨkaryakeigɨ midaaka! Kwadɨka kwaaka lɨvagɨrɨ'mwannɨkei a'mwe kwadɨka sahwai yavɨkarinɨkerɨ dara wɨdannei dɨnga'! “Berɨ' garevɨ nyavɨkariwaana?” 21A'mwe kwadɨka yavɨkaryadei yasaaka maremwaaidei midaaka! Yɨ sahwai kwaaka pɨjɨ' maarojɨ yɨ kwadɨka pwarɨna tewaanya ya'nei yavɨkarina. Yɨ kwadɨka pwarɨna yaasɨwa' waramarya'nei yavɨkarina. Nabaai daza' maremwaalya' kɨnɨnnakei midaaka! 22Gotɨyai kwalyɨ sa'bɨ' yɨvanɨ'. Sahwai kayaa'nanyanna gamɨre sɨnna tɨke' “Ku'maayaba marima'naabɨma!” dazai nabaai “A'mwe yuyara nɨmɨre yɨwɨnevɨ yawɨrangabɨka!” dazai kɨrɨ' sara mi. Kwadɨka waryaanyara, yɨ kumɨre kayaa'nanyangɨna Gotɨyare sɨnna tɨke'na dɨragɨnna yawɨbwarya'nera kayaaka dɨlamwivalya'neraavɨna yarai maramyɨ yada saamɨnyagaa' yemwaaina. Sare' yagaainakeigɨ daa! 23Nabaai kwadɨka tewaanyara, Gotɨyai “Nɨmɨre byaanna dɨragɨnya' naangaange' nɨmɨrera yawɨrangabɨka!” daka sara wiemwaaina. Byaanna dɨragɨnya sa' kwadɨka Gotɨyai tewaanya kale'na wɨgaimwangeina sɨnnawɨ nemɨnyɨ mena yovɨrawakakeinaavɨ nejaaya'nesɨ. 24Yɨ nemɨnyɨ jaka nejɨvwaramaarakeine. Yune Juya yɨta savaakɨnanna mɨ'. Aawa. Ajɨmya yuyangɨya kwaraavɨjɨ jaka nejɨvwaramaarakeine. Sare' yagaainakeigɨ daa! 25Wozayare pɨkarya kɨrɨvɨ ajɨmya yuyangɨyaraavɨna dɨnɨkabaaibɨsasɨ.
A'mwe nɨmɨrera mamwaalyɨgasaraavɨna
“Nɨmɨrera,” sahwaraavɨna dɨdeinyɨra.
Yɨsavaakɨna tewaanya manyɨvu'nyɨwakevaakɨna
“Tewaanya nyɨvu'nɨwakevaa'gɨnyɨ,” dɨdeinyɨra.
26“ Nɨmɨreihi mɨ',” wɨdeva sahɨbeva
“Gotɨyainyɨ gaalyabwi kɨnɨnnakeinyɨre nyɨbwaalɨvaangeihɨlyɨ,”
Kumɨnyɨna yange'na sara dɨdeinyɨra.
Ajɨmya yuyangɨyaraavɨna sara dɨnɨkabaaibɨsasɨ.
27Nabaai Aazaayai Yɨzɨrelɨyaraavɨna jaka dake' dara dɨnɨ' “Yɨzɨrelɨyarera kwalaalyara saalaalyavɨre siwekamɨlɨkabɨ' mwaaibɨza' kɨrɨ' a'mwe yɨvainojɨyara maalɨkejɨkɨyaraavɨ Gotɨyai padaihasamaaradelyɨ. 28Sare' dare'nesɨ. Naangei a'mwe Kwaakevakɨyaraavɨna yagaalya' yarai yesɨmavojɨ gamɨre yawɨbwasa'na yuneba yɨme'nya'bɨ' yadelyɨra.” 29Nabaai sɨnnawɨ Aazaayai dahɨrɨvɨna dake' dara dɨnɨ'
“Naangei Dɨragɨnaangei mivainyɨ neyajɨ kwajɨ
Nemɨnyɨne yɨsiwia pwaraavɨ maneyɨvainyajɨ kwajɨ
Sothomɨ mwaalyarabɨsaina kayaaka kaneyɨgaladɨka!
Gomora mwaalyarabɨsaina yune kabalaadɨka!”
Yɨzɨrelɨyara Kɨraazɨtɨyarɨ malɨmwagyesa'nesɨ.
30Sarevɨdaa'nyɨ nemɨ be yagaala daathevaka? Nemɨ dara daana! Ajɨmya yuyangɨyara “Gotɨyai nemɨnyɨna ‘Yɨda'maraangerera,’ dana!” maja'nera yagɨyagɨ wawɨnya myadɨvɨsara yɨ, Gotɨyai “Yɨda'maraangeihi nɨmɨreihɨlyɨ,” mena wɨdɨvanɨkere. Yɨ daza' yɨdata sabwi Naangerɨ lɨmwange'nebulyɨ. 31Nabaai Gotɨyai dahɨlakyaakera Yɨzɨrelɨyara yɨda'maraangebwi maarya'nevɨ Kɨwɨnyavɨ yagɨyagɨ wawɨnya yadɨvɨ' kɨrɨ' Kɨwɨnyavɨyaburɨ yunebanna yɨ'ma'dɨvɨ' mɨ'. 32Sare' berɨvɨnaka? Yɨda'maraanga sabwi maarya'nevɨna Naangerɨ malɨmwagi kyɨpɨdɨke'nanyɨ. Sara mi. Aawa. “Wawɨnya kwalaalya sara yadaanya'na maraadeinera,” kwaasɨ yawɨ'dɨvɨsa'nanyɨ. Sɨlaanga sɨvɨlyangɨ muda'dei kumɨre sɨvɨlyangɨ muda'daasɨ yɨ kumɨ kayaaka ya'nera wala'dɨvɨkɨ. 33Gotɨyare bukuya' dara dɨnɨkabaaibɨsasɨ.
Yɨthaa! Saayonɨ Sɨlaangei wakɨwelyɨ.
A'mweraavɨre sɨvɨlyarɨ mudavayɨdɨhwakɨ'narya'nei wakɨwelyɨ.
Sɨlaanga walamudavamaarya'nerɨ nɨmɨ wakɨwelyɨ.
Nabaai sahwarɨ lɨmwagozɨya dahwai
Savɨna sɨmunyavɨ jɨkurɨtɨnna yannei mɨ'.
Savɨna wagɨla wɨvwa'nadei mɨ'.
Currently Selected:
Romɨ 9: byr
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
