Romɨ 8

Kɨraazɨtɨyai kayaa'nanya nemarasɨ'da Kurya Tewaanyarɨ nejaavanɨke'nesɨ.

1Sarevɨdaasɨ yɨ dahaasagaa' Kɨraazɨtɨyai Jizaazarɨ wɨlamwaaihasaraavɨna yagaala yawɨbwata'ne jɨdata'ne mwari'. 2Sare' dare'nesɨ. Kɨraazɨtɨyai Jizaazai yakevɨ Kuryai gaala gɨzaavaderebwi kayaa'nanyabulyɨ yune naanga balyabulyɨ saburaarɨ mena wɨla gyɨ'dalamaara'. 3Yɨ sare' dare'nesɨ. A'mweraavɨre kɨlaakejɨkɨya yawɨta savɨna kɨwɨnyabwi ya'neina waryaanyaina mwaaiho'na Kɨwɨnyabwi kayaa'nanyaburɨ padaihasamaa'na neyannebwi mɨ'. Sara mi yade' Gotɨyai sara yakesɨ. Gotɨyai gannya Gawaalɨvaangerɨ maryasaabakelyɨ. Sarei a'mwe kayaa'nanyaibɨ' kɨlaa'nakei yɨma'nakelyɨ. Gamɨ a'mweraavɨre kayaa'nanya bwalamarasɨ'nya'nei walaabakelyɨ. Yɨ a'mweraavɨ kayaa'nanyabwi wɨlarɨkeburɨ Gotɨyai jɨda'na kya' Kɨraazɨtɨyai a'mweraavɨneba kayaa'nanyanne tɨvɨkɨta'na balakelyɨ. 4Gotɨyai nemɨnyɨna “Sahwara kɨwɨnyabwi dakɨnɨka yɨda'maraangengɨ yuna yadɨvɨsaraavɨ wɨmwaaihɨma!” kada' sara balakelyɨ. Sareina a'mweraavɨre kɨlaakejɨkɨya yawɨta savɨ kaanya myamaryadaanyɨ. Aawa. Nemɨ Kurya Tewaanya sarɨ kaanya yamaryadaanyainaavɨnesɨ. 5Sare' dare'nesɨ. A'mwera a'mweraavɨre kɨlaakejɨsɨyara kumɨre sɨmunyangɨ kɨlaakejɨkɨyanna yawɨrirɨkɨ'dɨvɨsare. Nabaai Kuryalyɨyara kumɨre sɨmunyangɨ Kuryarenna yawɨrirɨkɨ'dɨvɨsare. 6Sare' dare'nesɨ. Kɨlaakejɨkɨya sɨmunyavɨ a'mwe sara yune naanga balyabwi Gotɨyarɨna kɨmata yɨremwaalyabwi maa'manɨgasare. Yɨ nabaai Kurya Tewaanyare sɨmunyavɨ a'mwe sara gaalyasɨ sɨmunya kwaamu'nanyasɨ maa'manɨgasare. 7Sarevɨ kɨlaakejɨkɨya yawɨta sa' sɨmunyangɨ maremwaalajara Gotɨyare yɨkamaangera yɨma'nɨwaasare. Kɨlaakejɨkɨya sɨmunya' Gotɨyarɨna yɨkamaangesɨ. Sare' dare'nesɨ. Sahɨrɨ' Gotɨyare Kɨwɨnyavɨ wɨla'na'de' mɨ'. Dare'nesɨ. Yɨ nabaai sahɨrɨ' sara yɨnɨga yanne' mɨ'. 8Kɨlaakejɨkɨyangɨ mwaaidɨvɨ' a'mwe sarera Gotɨyarɨ yɨlaaya wigalya'nera mamwaalyɨ yɨpɨnere.

9Sarɨmɨ kɨlaakejɨkɨyangɨ mamwaalyɨga'. Aawa. Gotɨyare Kurya Tewaanyai sarɨmɨnyɨ wɨlayɨhɨmwaaidori Kurya Tewaanyarɨ wɨlamwaaihasaihɨlyɨ. Nabaai, yɨ pwai kwai Kɨraazɨtɨyare Kurya Tewaanyai maayai a'mwe sai Kɨraazɨtɨyarei mɨ'. 10Nabaai Kɨraazɨtɨyai sarɨmɨnyɨ wɨlayɨhɨmwaalajai yɨ pɨrɨ' daresɨ. Kayaa'nanyabwine'na sarɨmɨre kɨlaakejɨ' baladezɨkɨra. Yɨ pɨrɨ' daresɨ. Sarɨmɨnyɨna Gotɨyai “Yɨda'maraangeihi nɨmɨreihɨlyɨ,” mena yɨhɨthake'na Kuryai gaala mena yɨhɨmwaaihakeihɨlyɨ. 11Gotɨyai Jizaazarɨ bainɨkeraayawɨ yɨdɨkaavakere Kuryai sarɨmɨnyɨ wɨlayɨhɨmwaaidori Kɨraazɨtɨyai Jizaazarɨ baryarɨ yɨdɨkaavakei sarɨmɨ balapɨjɨyagaa' sarɨmɨre kɨlaakejɨ' gaala yɨhɨzaavadelyɨ. Kuryai sarɨmɨnyɨ wɨlayɨhɨmwaaidevɨ kɨlaakejɨkɨ gaala yɨhɨzaavadelyɨ.

12Yɨ sarevɨdaasɨ, nya'mweihi, nemɨ tɨvɨkɨta wɨjaaya'ne kɨnɨnnakeine. Tɨvɨkɨta sa' Kurya Tewaanyarɨ mwaalya'nesɨ. Kɨlaakejɨkɨya yawɨsangɨna tɨvɨkɨta aawa. Nemɨ kɨlaakejɨkɨya yawɨsangɨna mwaalya'ne tɨvɨkɨta mwari'. 13Sare' dare'nesɨ. Sarɨmɨ kɨlaakejɨkɨya yawɨsangɨna mwaaibɨza' yɨ sarɨmɨ yune naanga dɨvalyɨla! Kɨrɨ' Kuryare dɨragɨnyavɨ sarɨmɨ kɨlaakejɨkɨya yawɨsa ya tamakɨpɨja' yɨ gaala dɨmwaalyideihɨlyɨ.

14Sare' dare'nesɨ. Gotɨyare Kurya Tewaanyai gazarazaraavɨ wibwarɨdaakuvanɨkera yɨ sahwara Gotɨyare gawaalɨvaangere. 15Sare' dare'nesɨ. Sarɨmɨ Gotɨyarɨna lɨka ayahi ya'ne' kalavuzɨwawɨnyavɨ yɨgidɨwagamaremwaala yɨhyade Kuryarɨ mamaaryesalyɨ. Aawa. Gawaalɨvaangeihɨrɨ yɨhɨmwaaihaka Kuryarɨ maaresalyɨ. Yɨ sahwarɨ, nemɨ Gotɨyarɨ jaka dadaanyɨ “Tataala! Nɨmwala!” 16Kuryai gamɨ sahwai nemɨre kuryarajɨ nemɨ Kɨraazɨtɨyarɨ lɨmwadaanyainaavɨna dara jalɨkurakɨvanɨ' “Gotɨyare kaimɨraayaihɨlyɨ.” 17Nabaai Gotɨyare kaimɨraayaina mwalaaja' Nɨmwai sare yuya tewaanya maraadeinera. Pɨrɨ' daresɨ. Gotɨyare yuya tewaanya maraadeinera. Pɨrɨ' daresɨ. “Kɨraazɨtɨyalyɨ byaanna dɨragɨnya' maraana!” dawaajɨ Kɨraazɨtɨyalyɨ taanginya ye'mwannamaraaja' Kɨraazɨtɨyai yuya tewaanya maarade ye'mwannamaraadeinera.

Dɨvine' byaanna dɨragɨnya'nesɨ.

18Sare' dare'nesɨ. Nɨmɨ yawɨ'manɨge. Dɨvi sagaa'ne Gotɨyai byaanna dɨragɨnyavɨ ku'maayaba wakaabozɨ nejaavade' naangaangesɨ. Dahaasa'ne taanga sa' maa'manɨgo datha' wana maalɨkesɨ. 19Sare' dare'nesɨ. Yuya Gotɨyai wakyaaka a'mwerabɨsa yemwaaidɨvɨ' “Gotɨyai gamɨre gawaalɨvaangeraavɨ ku'maayaba wɨmwaihaabya'ne' tɨlɨjaaya baihanaraana!” dadɨvɨsangɨ. 20Sare' dare'nesɨ. Yuya wakyaaka sa dɨvidaa'nyɨ waryaanyabwi maremwaalya'ne wakyaakengɨ. Kumɨre kunyaburɨna mɨ'. Aawa. Gotɨyai kumɨnyɨ ya'nenna nawɨ'nyanna maarya'ne yemwaalya'nengɨna waryaanyabwi maremwaalya'nengɨ wakyaakengɨ. 21Yemwaalya sa' daresɨ. Yuya wakyaaka kumɨ sa dahaasa bwia burya'ne kalavuzɨwawɨnyavɨ yɨrɨka pɨrɨkɨ Gotɨyai kyarakojɨ ayɨna bwia burya'nebwi dɨragɨnya mwarina. Nabaai wakyaaka sa nemɨ Gotɨyare kaimɨraayainaavɨre byaanna dɨragɨnyavɨ tewaanya ye'mwannayarakadesɨ. 22Sare' dare'nesɨ. Nemɨ yawɨ'manɨgo. Dahaa' kɨgaasɨ yuya Gotɨyai wakyaaka daza a'mwe' kaimɨraaya maarya'negaa' daanga wɨvɨdevaaibɨ' daanga wɨvɨdaawori sɨmuyɨwaala yawɨ'mwaainadɨvɨsangɨ. 23Nabaai yuya gave dahɨnɨnnanna mɨ'. Aawa. Nemɨ Gotɨyai yɨsɨlyabɨta sɨnnawɨnya sɨhumale nejaavaka Kuryai kɨnɨnnakeina nemɨ kwainajɨ daanga nevɨdaasɨ sɨmuyɨwaala yawɨ'daa yemwaidaanyɨ. “Gotɨyai sasare sabwi yasɨ'nana!” dadaa “Yune gamɨre gawaalɨvaangeinaavɨ nemwaaihya'ne' yɨ nemɨre kɨlaakejɨ' ayɨna nemubya'nevɨ tɨlɨjaaya baihanaraana! Nemɨre kɨlaakejɨ' mudɨkejɨ' yɨma'nana!” dadaanyaine. 24Sare' dare'nesɨ. Gotɨyai nemɨre kɨlaakejɨka nawɨ'nyajɨka wakadevɨna yemwaalya'neinaavɨ nevadaihasamaarakelyɨ. Dahaa' nemɨre kɨlaaka nawɨ'nyajɨka yɨma'nya'nejɨkaavɨna yemwaidaa dɨvidaasɨ mena wanganawaajɨyajɨkaavɨna yemwaalya' mɨka! Sare' daresɨ. Pwai kwai pɨrɨ' mena wanganaka ayahi yemwaalɨka' mɨ'. 25Nabaai pɨrɨ' tɨnna mwanganyadaanya' yemwalaaja' yɨ “Sahɨrɨ'na tɨlɨjaaya baihanaraana!” dadaa dɨragɨnna yemwaaimanɨgo.

26Sasare sabwibɨsavɨ Kuryai dɨragɨnya maayainaavɨ negaimwadelyɨ. Nemɨ Gotɨyarɨ wɨja'nengɨna myawɨryadaanya'na dadaanyɨ “Nayaa Gotɨyarɨ wɨdaaza'na gara wɨdaazɨhyɨwona!” Sare' sɨmumaayainera. Aawa. Sasare saburɨ Kuryai gamɨ sai yune sɨmunyavɨna sɨmuyɨwaala yawɨ'da nemɨnyɨna marewɨdada negaimwadelyɨ. 27Nabaai Nɨmwai a'mweraavɨre sɨmunyavɨ tɨnna nebulya'na yawɨrangadei Kuryare sɨmunya dazaburɨ yawɨrangadelyɨ. Kuryai Gotɨyare sɨmunyaburɨ mɨdɨdevɨna Gotɨyare tewaanyaraavɨna nayaa marewɨdadelyɨ.

28Nabaai nemɨ yawɨ'manɨgo. Taanga gazaza Gotɨyarɨna wɨvu'naderaavɨ yɨma'nyangɨ Gotɨyai nawɨ'nya ya'ne yadelyɨ. Da kumɨ Gotɨyai kumɨnyɨne yawɨsa' yɨma'nya'nevɨna Gotɨyai jaka wɨjɨvwaramaarakere. Yɨ sahwaraavɨnyɨ. 29Sa' dare'nanyɨ. Gotɨyai kumɨnyɨ sɨnnawɨ mena yawɨranganaka nabaai sɨnnawɨ mena dahɨlakyaakerera. Yɨ gamɨre Gawaalɨvaangeibɨ' avaaina yɨma'nya'neraavɨ dahɨlakɨna. Yɨ Gawaalɨvaangere gya'mwe kwalaalyaraavɨ aaya kuvɨdaakaanga yɨ aaya sɨraanga Naangei yɨma'nya'ne'na yɨ sahwaraavɨ dahɨlakɨna. 30Nabaai a'mwe sara sɨnnawɨ mena dahɨlakakera yɨ sahwaraavɨ jaka wɨjɨvwaramaarakere. Nabaai jaka wɨjɨvwaramaarakera yɨ sahwaraavɨ “Yɨda'maraangeihi nɨmɨreihɨlyɨra,” wɨdakere. Yɨ nabaai sara wɨdakera yɨ sahwaraavɨna gamɨ sare gannya byaanna dɨragɨnya' wɨjaavakere.

31Sarevɨdaasɨ yuya dazanna be yagaala daathevaka? Gotɨyai nemɨnyɨ negaimwagazavɨ, yɨ Gotɨyarɨna nemɨnyɨ yɨkamaanga gazaizai nevɨlavadeina daaka! 32Gotɨyai gannya Gawaalɨvaangerɨ lɨka sangina maribwaayakai mɨ'. Aawa. Nemɨ yuyainaavɨna sahwarɨ nemɨnyɨneba balya'nerɨ maryasaabakelyɨ. Yɨ sarevɨ gamɨ kwarɨjɨ yanga nejaaya'ne yuya pɨnɨ kɨnɨjɨ yanga nejaavadei midaaka! 33A'mweraavɨ Gotɨyai dahɨlakaka gamɨnneraavɨ yɨ saraavɨ kotɨya' aaihwai jatheraava'! Gotɨyai gamɨ sai nedɨvanɨkelyɨ “Yɨda'maraangeihi nɨmɨreihɨlyɨ.” 34Aaihwai jɨda'na yadelaka! Kɨraazɨtɨyai Jizaazai nemɨnyɨneba balake'nanyɨ. Yɨ sarevɨ dare' wavɨla'desɨ. Barya sahwarɨ yɨdɨkaavakelyɨ. Yɨ sahwai dɨragɨnyaba Gotɨyare aangasɨrɨ yɨlamwalaawakelyɨ. Yɨ nabaai sahwai nemɨnyɨna Gotɨyarɨ marewɨdadelyɨ. 35Kɨraazɨtɨyare kale savɨ nemɨnyɨjɨ gewɨ gewɨ yɨnɨga jaapalya'ne benɨ warɨka! Nemɨnyɨ taanginya kaneyɨma'nojɨ dɨngaka! Daanga kanevɨnojɨ dɨngaka! A'mwera kayaa'na kaneyapɨjɨ dɨngaka! Nemɨnyɨ mɨjɨka naanga kaneyojɨ dɨngaka! Baazɨ'ma'nya kannya sazanna kanegainojɨ dɨngaka! Kayaa'nanaanga nemɨnyɨna “Kayaaka yɨgalɨma!” dozɨ yaamɨjɨ lɨka kaneyɨrɨ'galojɨ dɨngaka! Kwaari'masɨramɨnya mala kaneramakapɨjɨ dɨngaka! Kumɨ dazasare sabwi Kɨraazɨtɨyare kale savɨ nemɨnyɨjɨ gewɨ gewɨ nejaapaladevwi daaka! 36Sare sabura neyɨma'najanna Gotɨyare bukuya' dara dɨnɨkabaaibɨsasɨ.

“Gɨmɨnyɨne'na yɨrɨka yunegaa' neramakɨvanɨgasaine.

‘Sipɨzipɨyaraavɨ tamaana!’ dadɨvɨ' nemwaihɨwaasaine.”

Sara dɨnɨkabaaibɨsasɨ. 37Sasare sabura Kɨraazɨtɨyare kale savɨ nemɨnyɨjɨ gewɨ gewɨ nejaapaladevura mɨ'. Aawa. Dazasare yuyaburaavɨ nemɨ dɨragɨnaangeina yɨma'naanneine. Kɨraazɨtɨyarɨ nemɨnyɨna wɨvu'nakerɨ dɨragɨnaangeina yɨma'nɨvanɨgo. 38Sare' dare'nesɨ. Nɨmɨ nebulya' dɨragɨnna yawɨ'manɨge. Kɨraazɨtɨyare kale savɨ nemɨnyɨjɨ gewɨ gewɨ yɨnɨga nejaapalanne aane pɨnɨ kɨnɨ aawa. Pɨnɨ mɨ'. Balyabwi aawa. Gaalyabwi aawa. Yɨmakera aawa. Gɨlaayara aawa. Dahaasanna aawa. Dɨvinenna yɨma'nade aawa. Kulatɨka aawa. Gɨri'nya aawa. Kulaa'nya aawa. 39Munya ke'mwewɨnyanna aawa. Kwaaka kewewɨnɨnyanna aawa. Yuya wakyaaka pɨnɨ aawa. Aane pɨnɨ kɨnɨ Gotɨyare kale sa' nemɨnyɨjɨ gewɨ gewɨ yɨnɨga nejaapalanne mɨ'. Kɨraazɨtɨyai Jizaazai nemɨre Naangei yakevɨ dara yawɨ'manɨgo. Nemɨnyɨna Gotɨyarɨ kale dɨragɨnna wiadaa'nyɨ nemɨnyɨna wɨvu'nadelyɨ.

Currently Selected:

Romɨ 8: byr

Highlight

Compare

Copy