Romɨ 7

Kwala maaryabwine ke'ba'nanyavɨnesɨ.

1Nya'mweihi, a'mweinaavɨre kɨwɨnyabwi yawɨ'manɨgasaihɨrɨ yɨhɨthɨvanɨge. Sasareihi, dara jawɨrila! “A'mwe kwai gaala kuna mwaaidehaa' yɨ dazahɨgaasagaa' gamɨ a'mweinaavɨre kɨwɨnyaburɨ kwaakewɨ mwaaidelyɨ.” 2Sare' dare'nesɨ. A'mwe' kwala maa'nojɨ gannya a'mwei gaala kuna mwaaidozɨ yɨ kɨwɨnya sabwi gamɨre a'mwei kwarɨjɨ galalɨmwagathesɨ. Nabaai gamɨre a'mwei balajai yɨ kɨwɨnya sabwi a'mwerɨjɨ ye'mwannalɨmwagathe' gamɨnyɨ ayahi lɨmwagathe' mɨ'. 3Sarevɨdaa'nyɨ a'mwei gaala kuna mwaaidozɨ a'mwe' a'mwe pwarɨ maa'naja' gamɨnyɨ wɨdɨpɨ'desɨ. Akai! Pwarɨ tidaakumanɨkesɨ. Nabaai a'mwei mena balaja' kɨwɨnya sabwi gamɨnyɨ ayahi lɨmwagathe' mɨ'. Yɨ savɨdaasɨ a'mwe pwarɨ kwala maa'naja' yɨ gamɨnyɨ “Pwarɨ tidaakumanɨkesɨ,” wɨdɨpɨ'de' mɨ'.

4Sarevɨ, nɨnnya nya'mweihi Kɨraazɨtɨyareihi, sarɨmɨ Kɨraazɨtɨyare kɨlaakejɨsɨ mena ye'mwannayɨrakure'. Yɨ sahɨrɨvɨ balakegaa' sarɨmɨjɨ mena bale'. Yɨ sare'na Gotɨyare Kɨwɨnyabwi sarɨmɨnyɨ ayahi yɨhɨlɨmwagatheihi mɨ'. Yɨ sarɨmɨ gaala mudɨke' maareva A'mwe pwai Kɨraazɨtɨyalyɨ kwala maa'nya'ne'bɨsaihi ye'mwannamwaalya'neihɨlyɨ. Yɨ A'mwe dazai mena kabala' ayahi yɨdɨkaavakerɨnyɨ. Nemɨnyɨna Gotɨyai “Nɨmɨnyɨne yɨsɨlya yɨrɨpɨka!” kada' nawɨ'nyabulyɨyaina yuna yɨma'nya'neina mena ye'mwannamwaalo'nanyɨ. 5Sare' dare'nesɨ. Sɨnnawɨ a'mweraavɨre sɨmunyaburɨ kuna mwaaidori Kɨwɨnyabwi nemɨre kɨlaakevɨ wabahɨlaaka ya'ne kayaa'nanyajɨkɨya yawɨta neyɨdɨkaava'. Sara neyadaasɨ nemɨ yɨsɨlyabɨ' kayaa'na yadaa mwaaloinera. Yɨ balyabure sasareina kayaa'nanyabulyɨyaina yune naanga balya'neina yɨma'nya'neina mwaalo'nanyɨ. 6Sarevɨ nemɨ Kɨraazɨtɨyalyɨ mena baidaa baryaina Kɨwɨnyabwi nelɨmwagarake' mena kyagalya'mavo Kɨwɨnyabwi ayahi nelɨmwagathe' mɨ'. Yɨ sarevɨdaa'nyɨ dahaasagaa' kɨwɨnya sabwi pɨkarya yɨda'nɨka ayangɨ mɨdɨnya'neburɨ myona Kurya Tewaanyarɨ gaalyaburɨne yaasɨwa'wawɨnya'neina mwaaihoinera.

Kɨwɨnyabwinajɨ kayaa'nanyabwinajɨ sa'nesɨ.

7Sarevɨdaa'nyɨ be yagaala daathevaka? Dara daathe' daaka! “Kɨwɨnyabwi gamɨ sabwi kayaa'nanyabulyɨra.” Arɨkewɨnyɨ. Aawa. Kɨrɨ' kɨwɨnyabwi nɨmɨnyɨ kayaa'nanya' manyɨbwarɨdaakwia nyaja' “Nɨmɨ yadɨnya' kayaa'nanyabulyɨ,” yawɨrangadɨnyainyɨ mɨ'. Sare' dare'nesɨ. Kɨwɨnya' dara dɨnɨ' “Gɨmɨ a'mwe pwaraavɨre gɨlyɨvɨsangɨ tɨganaarya minnera!” Sara dɨnɨka sa' mwaryaja' yɨ “Tɨganaarya ya sabwi kayaa'nanyabulyɨ,” yawɨrangamuneinyɨ mɨ'. 8Nabaai kayaa'nanyabwi Kɨwɨnyavɨre tusarɨkɨ bɨ'desɨ. Sara yada yuya tɨganaarya pɨnɨnna pɨnɨnnanya sa nɨmɨre sɨmunyavɨ nyɨdɨkavemwaaihadeinyɨ. Sare' dare'nesɨ. Kɨwɨnyabwi mwaryajɨ kwajɨ kayaa'nanyabwi navɨka warɨna kyadɨ'. 9Sɨnnawɨ maalɨkegaa' kɨwɨnya “Sana minna!” dɨnɨkebwi maayainyɨ mwaale dazagaa' navɨka mwaalageinyɨ. Nabaai dɨvidaasɨ Kɨwɨnya' yawɨ'na yadɨnyainyɨ yɨ sare' kayaa'nanyabwi dɨkaa'na kya' “Kayaa'nanya yɨma!” dɨragɨnna yawɨrena 10dara yawɨre, “We', Gotɨyarɨna nɨmɨre kuryai baimwakelyɨ.” A'mwera kɨwɨnya' yune' mɨdɨbɨzara gaala kamaapɨdɨ'. Kɨrɨ' a'mwera sara mi. Gotɨyai Kɨwɨnya' gaala wɨjaaya'ne'na dakake' nɨmɨ dara bɨramaa'mwe' “O, sara myɨ yɨwɨneinyɨ balya', Gotɨyarɨna kɨmata yɨremwaalya' maarya'neinyɨ dɨngaka!” 11Sare' dare'nesɨ. Kayaa'nanyabwi Kɨwɨnyavɨre tusarɨkɨ bɨrɨna yada yɨ nɨmɨnyɨ kwaasɨ nyakesɨ. Yɨ sasare saburɨ kayaa'nanyabwi kɨwɨnyavɨ maaraka dara nyɨbwarɨdaakwada “Gɨmɨnyɨ gɨzɨda'mwakeigɨnyɨ,” nyɨramakakesɨ. 12Sarevɨdaa'nyɨ nemɨ yawɨ'manɨgo. Kɨwɨnyabwi gamɨ sabwi tewaanya nawɨ'nyabulyɨ. Nabaai Gotɨyare yagaaikɨwɨnya gazasa' yɨ sa' kɨrɨsɨ tewaanya' gɨrɨka maaya' yaka yɨda'maraange' yaka nawɨ'nyasɨra.

13Sarevɨdaa'nyɨ nawɨ'nya dazahɨrɨ' nɨmɨnyɨ dahanyɨramaka'! Arɨkewɨnyɨ. Aawa. Kayaa'nanya sahɨbwi sabwi nyɨramaka'. Yɨ kayaa'nanyabwi ku'maayaba yɨma'naabya'nebwina nemɨnyɨna “ ‘Kayaa'nanyabwi wana kayaa'nanaangebwi warɨ',’ yawɨpɨka!” kada' kayaa'nanyabwi nawɨ'nya daza' maa'da yɨ dazavɨ balyabwi, Gotɨyarɨna kɨmata yɨremwaalyaburɨ marima'naabɨnɨkesɨ. Yɨ dazasare saburɨ kɨwɨnya daza' wibwarɨdaakwia'nesɨ. Kayaa'nanyabure aaya kaavɨlya', gamɨ wana kayaa'nanaangesɨ. Nemɨnyɨna “Sara yawɨpɨka!” daka Kɨwɨnya' wakakesɨ. 14Sare' dare'nesɨ. Nemɨ dara yawɨ'manɨgo. Kɨwɨnyavɨ Kuryai Gotɨyare sabwi neyɨbwarɨdaakuvanɨ'. Sare' kɨrɨ' nɨmɨ sɨmunya sɨnnawɨnya' kɨnɨnnakeinyɨ. Kɨlaakejɨkɨya yawɨsa nyɨmaremwaalɨkeinyɨ. Gotɨyare sabwi mamɨdɨnyainyɨ. Kayaa'nanyabwi nɨmɨnyɨ wɨla galanyɨ'daa'nyɨ gamɨre wawɨnya' yɨvanɨge. 15Sare' dare'nesɨ. Aaya kaavɨla nɨmɨ yadɨnya sabwina myawɨrivanɨge. Sare' dare'nesɨ. Nabaai pɨbwi nɨmɨnyɨ kuna yɨgunna nyadevwi sa' nayaa myadɨnyainyɨ. Aawa. Pɨbwi nɨmɨnyɨ sɨmɨlɨka nyuimwaaidevwi sabwi yuyagaa' yɨna yadɨnyainyɨ. 16Nɨmɨ sabura “Aala,” dadɨnya sara yadɨnyainyɨ. Yɨ nɨmɨre sasare saburɨ sa' dare'nesɨ. Nɨmɨ sɨmunyavɨ dara dɨvanɨge. Yo, Kɨwɨnyabwi tewaanyabulyɨ. 17Sarevɨ nɨmɨ sainyɨ kayaa'nanya daza mivanɨge. Aawa. Kayaa'nanyabwi nɨmɨnyɨ wɨlanyarɨkebwi gamɨ sahɨbwi sabwi nyɨvanɨkebulyɨ. Sare'na wɨla galanyɨ'daa'nyɨ yɨvanɨge. 18Sare' dare'nesɨ. Nɨmɨnyɨ dɨragɨnya' nayaa nawɨ'nya' ya'ne' mulanyari'. Nɨmɨnyɨ kɨlaa'nakeinyɨ a'mwe gaveinyɨna dɨvanɨge. Sare' dare'nesɨ. Nɨmɨ “Tewaanyabwi yɨma!” dena yɨweinyɨ. Tewaanya sa' mi yɨwɨneinyɨra. 19Sare' dare'nesɨ. Nɨmɨ “Nawɨ'nyabwi yɨma!” dadɨ yɨvanɨge', sabwi mivanɨge. Aawa. Nɨmɨ “Wagɨlyabwi myɨwɨnera!” dadɨ yɨvanɨge', yɨ sabwi yɨna yadɨnyainyɨ. 20Nabaai “Aala,” dadɨ yɨvanɨgevwi, yɨ sabwi yɨvanɨge sarevɨ yɨ nɨmɨ sainyɨ mɨ'. Daza' mivanɨge. Aawa. Kayaa'nanyabwi nɨmɨnyɨ wɨlanyarɨka gamɨ sahɨrɨsa' nyɨvanɨkesɨ.

21Sarevɨdaasɨ nɨmɨ davwi yabwi bɨramaa'dɨnyainyɨ “Nɨmɨ ‘Tewaanyabwi yɨma!’ dadɨ yadaari wagɨlyabwi nyarɨkebwi nɨmɨre tusa' kaanya nyɨrihɨ'manɨ'.” 22Sare' dare'nesɨ. Nɨmɨre sɨmunyaburɨ Gotɨyare kɨwɨnya'na nɨmɨnyɨ tewaanya nyɨvu'nɨvanɨ'. 23Nabaai nɨmɨ dara yawɨrangamanɨge, “Nɨmɨre kɨlaakejɨkɨyangɨ pɨbwi wɨlanyarɨkebulyɨ.” Yɨ sabwi dazabwi Gotɨyare kɨwɨnya' nɨmɨre sɨmunyavɨ nyarɨkevɨ mala tadevulyɨ. Yada kayaa'nanyabure sabwi nɨmɨre kɨlaakejɨkɨyangɨ nyarɨkevɨ, yɨ sabwi nɨmɨnyɨ wɨla galyɨralɨmwagata nyɨvanɨ'. 24Ako! Nɨmɨ a'mwe kayaaka nyɨgaideinyɨra. Kɨlaaka nɨmɨre dazɨ' balyabwi Gotɨyarɨna kɨmata yɨremwaalyaburɨna yɨvanɨkenna aaihwai nyɨvadaihasamaaradeinyaka? 25Gotɨyarɨ “Su! Su!” wɨdɨvanɨge! Jizaazai Kɨraazɨtɨyai nemɨre Naangerɨ gamɨ sahwai nyɨvadaihasamaaradelyɨ.

Sasarevɨdaa'nyɨ yɨ pɨrɨ' daresɨ. Nɨmɨ dareinyɨre sɨmunyabulyɨ Gotɨyare Kɨwɨnyabwi wɨdaayɨvanɨge yaasɨwa'wawɨnyainyɨ. Pɨrɨ' daresɨ. Nɨmɨre kɨlaakejɨkɨ yawɨsasɨ kayaa'nanyaburɨ sabwi wɨdaayɨvanɨge.

Currently Selected:

Romɨ 7: byr

Highlight

Compare

Copy