Romɨ 2

Gotɨyai a'mwe yuyaraavɨ yɨda'maraangebwina yawɨbwarade'nesɨ.

1A'mweigɨ, sasare savɨdaasɨ kayaa'nanya sasarebaaibɨ' yɨvanɨgɨnyaigɨ a'mwe pwaraavɨ nyawɨbwa'dɨka! Pwaraavɨ jɨda'dɨnyaigɨ Gotɨyai gyawɨbwaradehaa' be yagaala duthatheigɨnaka! Aawa. Sare' dare'nesɨ. Gɨmɨ pwaraavɨ jɨda'dɨnyagaa' gɨmɨ kwaigɨnyɨne'na jɨda'nɨnneigɨnyɨ. Sare' dare'nesɨ. Gɨmɨ saigɨ jɨda'dɨnyaigɨ avaala sasare sabwi yadɨnyaigɨnyɨne'nanyɨ. 2Nemɨ yuyaina yawɨ'manɨgo. A'mwe sara yuya kayaa'nanya sara yɨpɨja sabwina Gotɨyai daanga wɨjaavɨna yadevwina Gotɨyai nebulyaburɨna sara yawɨbwa'devulyɨ. 3A'mweigɨ, a'mwe sara sasarebwi yadɨvɨsaraavɨ jɨdata yɨvanɨgɨnya gɨmɨ kwaigɨ avaala sara yɨvanɨgɨnyaigɨ kunya gara yawɨ'mwaa! Gotɨyai yawɨbwata savɨ yɨnɨga wi'na wavɨla'na yɨja' lɨkaanya yɨnɨga wɨna yɨnneigɨ daa! 4Gotɨyai yange'na tewaanna bwiwanna gyada saamɨnyagaa' gyemwali'maa'da tɨvɨkɨsa'na yɨme'nya'bɨ' gɨzaavadei mɨ'. Sasara gyade'na “Yaasɨwakengɨra,” jawɨ'manɨgɨ! Gotɨyai “Sɨmunya mudɨkebwi jawɨramaaka!” yawɨ'manɨke' myawɨrijɨvanɨgɨ! Yɨ sarevɨdaasɨ tewaanya nawɨ'nyabwi gyɨvanɨke'nanyɨ. 5Gɨmɨre sɨmunya' gɨmɨre kayaa'nanyanna kaanya tihɨremwaaina yagɨna gɨmɨ myawɨramaarivanɨgɨnyavɨna Yɨrɨka Pɨrɨkɨna sasareigɨnyɨne'na gɨrɨvɨkɨrya'ne marayɨngakingɨla yɨvanɨgɨnyaigɨnyɨ. Yɨrɨka sagaa' Gotɨyare sɨnna tɨke' ku'maayaba yɨma'naabathe', yɨda'maraangebwina yawɨbwarade savɨ daanga kayaa'nanya sasɨ pɨnɨjɨ dɨmaa'dengɨ. 6Gotɨyai a'mwe gazarɨzarɨ gamɨre yade sabwina wɨrɨvɨkɨradelyɨ. 7Pɨrɨ' daresɨ. Pwara Gotɨyai kumɨnyɨna byaanna dɨragɨnyasɨ kumɨre yaya makɨlade'nesɨ gaala kayaaka minya'ne sabulyɨ sa wɨjaaya'ne bɨ'dɨvɨ' tewaanya saburɨ dɨragɨnna kuna mwaalɨna yadɨvɨta saraavɨ gaala yuyagaa' yuyagaa' mwaalya'ne sabwi wɨrɨvɨkɨradelyɨ. 8Pɨrɨ' daresɨ. Pwara yune kumɨnyɨne'na yawɨ'dɨvɨ' nebulyabwi galazekɨvaina yadɨvɨ' yɨda'maraanga myabwinanya savɨ mɨdɨmanɨgata saraavɨna Gotɨyarɨ sɨnna tɨke' wɨdavadesɨ daanga kayaa'nanya sabulyɨ wɨrɨvɨkɨradelyɨ. 9Yɨ a'mwe kayaa'nanya' yadɨvɨta yuya saraavɨre kuryaraavɨ taanginaangebulyɨ daanga naangebulyɨ dathɨwaaladevulyɨ. Sare' Juyaraavɨdaasɨ yɨ kumɨ Anga Pimagɨnya (Gɨrikɨya) pwara kwaraavɨjɨ dathɨwaaladevulyɨ. 10Yɨ a'mwe gazarazara nawɨ'nyabwina yadɨvɨta saraavɨna Gotɨyai byaanna dɨragɨnyasɨ yaya makɨlyasɨ munyɨ' kwaamu' kave warɨna yadevulyɨ wɨjaavadelyɨ. Yɨ Juyaraavɨdaasɨ Anga Pimagɨnyaraavɨna yɨna. 11Sare' dare'nesɨ. Gotɨyai kunya dara yawɨ'dei mɨ' “A'mwe Juyarɨ nayaa maryawɨbwarɨma! A'mwe Anga Pimagɨnyarɨ kayaa'na maryawɨbwarɨma!” Aawa. Sara majai a'mwe sara yadɨvɨta sabwina avaaina maryawɨbwa'delyɨ.

12Yɨ sare' da'dare'nesɨ. A'mwe yuya sara Ne Mozɨzare Kɨwɨnya' kunera pɨvakaavɨyara kayaa'nanya wagɨla sabura yadɨvɨ' yɨ sahwaraavɨna Kɨwɨnya sa' Gotɨyai myawɨri yada kyawɨbwarojɨ sahwara yɨwɨpɨ'dere. Nabaai a'mwe yuya sara Kɨwɨnya sa' kɨnɨnnakera Juyara kayaa'nanya wagɨla sabura yadɨvɨ' yɨ sahwaraavɨna Kɨwɨnya sa' yawɨ'na yada saburɨna maryawɨbwaradere. 13Sare' dare'nesɨ. A'mwe sara Kɨwɨnya sabwi kadɨka yaasɨwa' wɨ'nadɨvɨsara Gotɨyarɨna yɨda'maraangera Gotɨyarera yɨma'nadɨvɨ' mɨ'. Aawa. A'mwera yune Kɨwɨnyabwi mɨdɨbɨzɨ kwajɨ a'mwe dazaraavɨna Gotɨyai kudathɨkere “A'mwe yɨda'maraangelyɨ. Nɨmɨrelyɨ.” Kɨrɨ' sarera mamwaalyɨgasare.

14Nabaai sare' dare'nesɨ. Ajɨmya yuyangɨya pwara Kɨwɨnya sa' maayara kunnya sɨmunya sabwi mɨdɨdɨvɨ' Kɨwɨnya pimagɨnya sa' dɨnɨke' mɨdɨnapɨjɨyagaa' yɨ Kɨwɨnya sa' maayara sara yadɨvɨsa'na kumɨre sɨmunyai gamɨ sai kumɨre Kɨwɨnyabulyɨ. 15Sahwara kumɨre mwaalyabwina dara wɨjɨwaainadesɨ. Kumɨre sɨmunyavɨ Gotɨyai Kɨwɨnya' dɨnɨke'ne yɨdavakengɨ sɨmunyavɨ wakakengɨ. Yɨ kumɨre sɨmunyai tewaanyai wɨvadaihɨrakya' jalɨkurakaderera. Yɨ pɨgaa' kumɨre yawɨsa kumɨre yadɨvɨta sabwina “Kayaa'na yɨwaa,” jɨda'nadengɨ. Pɨgaa' kumɨre yawɨsa kumɨre yadɨvɨta sabwina “Tewaanya yɨwaa,” wɨdathengɨ. 16Gotɨyai dɨvi yɨrɨka pɨrɨkɨ yawɨbwarya'nerɨ Kɨraazɨtɨyai Jizaazarɨ kumwaaihojɨ sasarebaaibɨ' sahwai yuya lɨka yulya'de sabura a'mwera sara yawɨ'dɨvɨsanna maryawɨbwaradelyɨ. Nɨmɨ yagaala tewaanya' dadɨnya' yagaala sa' kɨnɨnnakevɨnyɨ.

Juyaraavɨnajɨ kumɨre Kɨwɨnyavɨnajɨ dɨnɨke'nesɨ.

17Nabaai gɨmɨ, “Juyai,” wo'nɨkeigɨ daaka! Gotɨyare Kɨwɨnya sabwi kɨnɨnnakeigɨ Gotɨyarɨna dɨragɨnna daa'dɨnyaigɨ daaka! Saigɨnyɨna yaya' munyaba ke'banna makidɨ “Nemɨ Gotɨyareinera,” dadɨnyaigɨ daaka! 18Gotɨyare Kɨwɨnya saburɨdaa'nyɨ gɨzɨwaakesa'na yawɨrangadɨnya'na Gotɨyare sɨmunya' sɨdu'nakeigɨ, nabaai yɨda'nanya sabwina pɨburaavɨ wavɨla'devwina gima'nadeigɨ daaka! 19Gɨmɨ Juyaigɨ dɨragɨnna dara yawɨ'dɨnyɨ “Sɨmunya sabwi tɨvi'na maa'mwa. Gotɨyarɨ myawɨryaraavɨ tɨbɨnyaraavɨ tuta tewaanyarɨ' wi'na yɨbwarɨdaakwɨdeinyɨ. A'mwe jɨhɨnyavɨ mwaaihasaraavɨna nɨmɨ kumɨre dɨ'baakeinyɨ. 20Gotɨyarɨna a'mwe sɨmunya maayaraavɨ yɨwɨryamaryadɨnyainyɨ. Nɨmɨ Kɨwɨnyaburɨne kaimɨraaya maalɨkebɨsaraavɨre wɨjɨwaakadɨnyainyɨ. Gotɨyare Kɨwɨnya saburɨ aaya kaavɨla kunya yawɨta sasɨ yɨ nebulya'nanyasɨ kɨnɨnnakeinyɨ mwaaihe'ne'nanyɨra.” Sara dadɨnyaigɨ daaka! 21Sasarevɨdaa'nyɨ sasareigɨ a'mwe pwaraavɨ wɨjɨwaakadɨnyaigɨ gɨmɨ saigɨnyɨ yɨjɨwaakɨdɨnyaigɨ midaaka! “A'mwe sara kuka nyɨpɨka!” dadɨnyaigɨ gɨmɨ kwaigɨ kuka myadɨnyaigɨ daa! 22“A'mwera a'mwengɨ ata nalɨmwabɨthɨka!” dadɨnyaigɨ nabaai gɨmɨ kwaigɨ ata malɨmwagyadɨnyaigɨ daa! Gɨmɨ gotɨya kwaasɨyaraavɨna a'mwa'mweraavɨna sɨmɨlɨka wimwaaihɨnyaigɨ gɨmɨ saigɨ a'mwa'mwa-angengɨ gɨlyɨvɨta kuka myɨjɨvanɨgɨ? Sare'na gɨrɨkita'nanya kɨnɨnnakeigɨ midaaka! 23Gɨnnya yaya' munyaba ke'banna makinadɨ yɨlaaya'na “Nɨmɨ Gotɨyare Kɨwɨnyabwi kɨnɨnnakeinyɨra,” dɨvanɨgɨnyaigɨ Kɨwɨnya sabwi sekɨvalapari'ma'manɨgɨnya sasare saburɨ Gotɨyarɨne yaya' kwaakeba bamakwalaawia myɨjɨvanɨgɨ? 24Sare' dare'nesɨ. Sarɨmɨ sara yɨvanɨgasa'na Gotɨyare bukuya' dara dɨnɨkabaaibɨkɨ “Sarɨnnyaburɨna ajɨmya yuyangɨyara Gotɨyarɨne yayavɨ yagaaibɨraizɨka yɨvanɨga'.”

25Sare' dare'nesɨ. Gɨmɨ Juyaigɨ Kɨwɨnyaburɨ mɨdɨdɨzaigɨ “Gotɨyarelyɨra,” yɨbwarɨdaakwia'ne' gɨmɨre kɨlaakejɨ' gurya daya sabwi nawɨ'nyabulyɨ. Kɨrɨ' gɨmɨ Kɨwɨnyabwi sekɨvalapari'ma'dɨzaigɨ gɨmɨre kɨlaakejɨ' gurya madaya yɨnɨkejɨ'bɨta sajɨ' yɨma'nadezɨkɨra. 26Yɨ sarevɨdaa'nyɨ a'mwe pwarɨ kɨlaakejɨ' gurya madaya yɨpɨjai, sai Kɨwɨnya tewaanya sabura mɨdɨnajai yɨ Gotɨyai “Sahwai kɨlaakejɨ' gurya da'nɨkerɨ wɨmwaaihɨwa!” dathei midaaka! 27Gɨmɨ Kɨwɨnyavɨne pɨkarya' kɨnɨnnakeigɨnyɨ. Nabaai gɨmɨnyɨ kɨlaakejɨ' gurya gɨthavesaigɨnyɨ. Sare kɨrɨvɨ Kɨwɨnyabwi pari'ma'dɨnyaigɨnyɨ. Yɨ savɨdaasɨ a'mwe pwarɨ kɨlaakejɨ' gurya madaya yɨpɨja' gamɨ sai Kɨwɨnya sa' nayaa pada'galamɨdɨnajai gɨmɨnyɨ jɨdata gyatheigɨnyɨra. 28Sare' dare'nesɨ. A'mwe pwai Yɨta Juya savaakɨdaasai kɨlaakejɨ'na ku'maayaba Juya mwaaide sai Juya nebulai mɨ'. Yɨ ku'maayaba kɨlaaka gurya daya yadɨvɨta sai Juya nebulai mɨ'. 29Aawa. A'mwei sɨmunyavɨna kɨma'nyawɨ Juya mwaalajai, sai Juya nebulya'nanyalyɨ. Yɨ nabaai kɨlaaka gurya daya sabwi sɨmunyavɨnebulyɨ. Gotɨyai pware sɨmunya' wanganaka “Nɨmɨrelyɨ,” yawɨ'dei kɨlaakevɨna mɨ'. Sa' yune pɨkarya yɨda'nɨka saburɨna mɨ'. Sa' Gotɨyare Kuryarɨnanyɨra. A'mwei sara yojɨyarɨ a'mwera yɨlaaya mwi yɨpɨ'de kɨrɨ' sarɨ Gotɨyai yɨlaaya wiadelyɨra.

Currently Selected:

Romɨ 2: byr

Highlight

Compare

Copy