Romɨ 15

1Nemɨ a'mwe lɨmwangevɨne yawɨsa' yune sɨdu'nakeina a'mwe lɨmwangevɨne yune yawɨsa' sɨdu'maayaraavɨ gaimwagya'neina wawɨnya' kɨnɨnnakeine. Yɨ sahwaraavɨ nayaa gaimwadaa kumɨre kɨmaakebwine taanginya maraana! Nemɨ sainaavɨna yune myɨgainaanna! 2Nemɨnyɨdaa'nya gazaizai Kɨraazɨtɨyarerɨ nemɨnyaba mwaalɨkerɨ gaimwangebwi nayaa yaana! Sarerɨ wigalaana! Nabaai sareburɨ sahwarɨ dɨragɨnya yɨvaimwagaana! 3Sare' dare'nesɨ. Kɨraazɨtɨyai kwai gamɨ sarɨna yune yɨgainakai mɨ'. Aawa. “Gotɨyarɨna a'mwera bɨrala nyɨja'ne' wikɨra,” yawɨ'na kya' sara wie'. Sahwarɨ yɨma'nakebwi yɨ Kɨraazɨtɨyai Gotɨyarɨ wɨdake' Gotɨyare bukuyavɨ dara dɨnɨkabaaibɨkɨ “A'mwera bɨraizɨka gɨthadɨvɨta yagaala daza yɨ nɨmɨnyɨ bilanya'dengɨ.” 4Sare' dare'nesɨ. Gotɨyare bukuyavɨ yuya yagaala sɨnnawɨ yɨdaveta sa, yɨ nemɨnyɨ yɨwɨrya'ne yɨda'nɨkengɨ. Gotɨyai nemɨnyɨna “Yagaala daza yɨ kumɨre sɨmunyavɨ dɨragɨnya wivaimwagana! Nabaai wɨmaredaa'dori kumɨ kuna dɨragɨnya daa'dɨvɨ' yɨ nɨmɨ yune wɨmaara'mujɨyarɨne dɨragɨnna yemwaalyabwi maapɨka!” kada' yagaala sa yɨda'nɨkengɨ. 5Gotɨyai dɨragɨnya daaya'ne aaya kaavɨlyalyɨ. Nabaai nemɨnyɨ neyɨvaimwadelyɨ. Yɨ sasarei Kɨraazɨtɨya Jizaazai sara yakeburɨ pada'galamɨdɨnya nebulya'na sarɨmɨnyɨ gazaihizaihɨrɨna avaaizɨmunya' yanga yɨhɨzaavana! 6Sarevɨ sarɨmɨnyɨna “Avaaizɨmunya'na mwaalyara avaaimaangi'na jara nɨmɨnyɨna ‘Byaannakeigɨne!’ dɨpɨka!” daka yanga yɨhɨzaavana! Sai Gotɨyalyɨ. Sai nemɨre Naangei Jizaazai Kɨraazɨtɨyarɨ Ganɨmaangelyɨ.

7Sarevɨ sarɨmɨ yuyaihi sɨrya'mwe pwaraavɨ nayaa maarapi yɨ sahwarajɨ avaaimunyɨ'na je'mwannemwaalyɨla! “Gotɨyai byaanna kɨnɨnnakelyɨ,” dɨnya'neinaavɨ Kɨraazɨtɨyai nemaarakabaaibɨ' nayaa dɨmaaryɨla! 8Sare' dare'nesɨ. Dara dɨvanɨge. Kɨraazɨtɨyai kɨlaaka gurya da'nadɨvɨsara Juyaraavɨ gaimwagya'nei wɨdaayadei yɨma'nakelyɨ. Sara yaka sa' Gotɨyare yagaala nebulyavɨ sara dɨnɨke'nesɨ. Yɨ Gotɨyai kwɨyakwalaangeraavɨ Kɨraazɨtɨyarɨna yune naanga nebulya'na wɨjaake yunebanna ya'nennanyɨ. 9Nabaai ajɨmya yuyangɨyara Gotɨyare kale'na gaimwangebwi wangadɨvɨ' gamɨnyɨna “Byaannakelyɨ,” ja'neraavɨna Kɨraazɨtɨyai yɨma'nake'nanyɨ. Yɨ sare' Gotɨyare bukuya' dara dɨnɨkabaaibɨkɨ

“Sarevɨ ajɨmya yuyangɨyaraavɨ gɨmɨnyɨna jalɨkurakɨdeinyɨ.

Yɨledaasavɨ gɨmɨnne yaya' munyabanna makɨlɨdeinyɨ.”

10Nabaai yagaala pɨrɨ' dara dɨnɨkabaaibɨkɨ “Ajɨmya yuyangɨyaihi Gotɨyarera Yɨzɨrelɨyarajɨ yɨlaaya je'mwannayideihɨlyɨ.” 11Nabaai pimagɨnyavɨ dara dɨnɨkesɨ.

“Ajɨmya yuyangɨyaihi Naangerɨne yaya' munyaba dɨmakɨlyɨla!

Nabaai a'mwe yuyarajɨyaihi gamɨnne yaya' munyaba dɨmakɨlyɨla!”

12Nabaai Aazaayai kwalyɨ dakesɨ.

“Devitɨmɨre ganɨmaangei Jeziyarevaakɨdaa'nyai yɨma'nadelyɨra.

Ajɨmya yuyangɨyaraavɨ maremwaalya'nerɨ dahɨlakadelyɨra.

Wɨgaimwagya'ne sahwarɨna ajɨmyangɨyara yemwaaibɨ'derera.”

Sara dakesɨ. 13Gotɨyai nemɨre yemwaalyabwine aaya kaavɨlyai sarɨmɨ gamɨnyɨ dɨragɨnna lɨmwadɨvɨsavɨ yɨlaaya naangejɨ kwaamu'nanya naangejɨ yɨnɨga wi'na yɨhyana! Yɨ sarɨmɨ Kurya Tewaanyare dɨragɨnya' maarapɨjɨ Gotɨyarɨ yemwaalyabwi, yɨ daza' sarɨmɨnyɨ yunebanna naange' yɨhwarade'na sara yɨhyana!

Polɨ ajɨmya yuyangɨyaraavɨna yake'nesɨ.

14Nya'mweihi, nɨmɨ sainyɨ nɨmɨre sɨmunyavɨ nebwina yawɨ'manɨge. Sarɨmɨ saihi yuyagaa' tewaanyabwina yunebanna yadɨvɨsaihɨlyɨ. Nabaai yuya yawɨta dala pɨnɨnnanya kɨnɨnnakeihɨlyɨ. Yɨ sarevɨ nabaai sarɨmɨ sɨrya'mweraavɨ sɨmunya tewaanyabwi yɨnɨga wi'na wivaimwabɨneihɨlyɨ. 15Sare' kɨrɨ' yagaala dɨragɨkɨbawenna paazɨya davɨ yagaala pɨnɨ sarɨmɨnne yɨda'mwengɨ. Nabaai pɨkarya yɨda'mwe'na lɨka miwa. Gotɨyai yanga gaimwangeburɨ sarɨmɨre sɨmunya dɨhaa'bwata yɨhide'nanyɨ. 16Gotɨyai tewaanna sara nyada ajɨmya yuyangɨyaraavɨ ya'neinyɨ Kɨraazɨtɨyai Jizaazarɨ wɨdaayadɨnyainyɨ nyɨmwaaihakelyɨ. Nɨmɨ Gotɨyarɨna mubɨthɨka yɨra'deibɨsainyɨ Gotɨyare yagaala tewaanya' ajɨmya yuyangɨyaraavɨ wɨdɨvanɨge. “Gotɨyaryawɨnna ajɨmya yuyangɨyaraavɨ makulaabɨma!” dadɨ Kurya Tewaanyai sahwaraavɨ nawɨ'nyaraavɨ kumwaaihojɨ “Gotɨyai sahwaraavɨna ‘Nɨmɨnyɨna mubɨthɨka tamiraya'ne sipɨzipɨya nawɨ'nyarabɨsara ajɨmya yuyangɨyara nawɨ'nyaraavɨ maarɨma!’ yawɨrya'nerɨ yanga wɨjaavɨde'nanyɨ,” dadɨ yɨvanɨge. 17Sarevɨdaa'nyɨ nɨmɨ Kɨraazɨtɨyai Jizaazarɨ wɨlamwaaihe'na Gotɨyarɨne yɨvanɨgengɨna yɨlaaya yɨnɨga wi'na yɨwɨneinyɨ. 18Sare' dare'nesɨ. Yagaala dɨragɨkɨbawenna yɨhɨthɨma! Lɨka myɨwɨna! Pwaraavɨre wawɨnyanna nɨmɨ myenenna majalɨkurakɨwɨna! Aawa. Kɨraazɨtɨyai gamɨre dɨragɨnya' nɨmɨnyɨ kanya' sara yadenna jalɨkurakɨma! Kɨraazɨtɨyai sara kanya' nɨmɨ yagaala sannajɨ yadɨnya sannajɨ ajɨmya yuyangɨyara Gotɨyarɨ mɨdɨnya'nera lɨmwagya'neraavɨ sara sara yadɨnyainyɨ. 19Yɨ nɨmɨre yagaalyangɨ dɨragɨnya nyɨgaimwada nɨmɨre wawɨnyangɨ dɨragɨnya nyɨvaimwada yɨ yɨjɨwaainya atɨka maru'narya'ne dala pɨnɨnna pɨnɨnnanyanna yadennajɨ Kurya Tewaanya kwalyɨ dɨragɨnya nyadennajɨ sahwara Gotɨyare dɨragɨnya' tɨnna wanganna. Sareinyɨ aaya mudɨ'na yamaasaba anga Jeruzaalemɨdaasɨ Kɨraazɨtɨyarɨne yagaala tewaanya' nɨmɨ yuna wɨjɨwaake. Sareinyɨ anga yuyawɨ yunebanna yamaryena aaya'nanya' Pɨrovijɨ Yɨlɨrikaamɨ saba yɨdaakwe. 20Yɨ sarevɨ anga pɨwɨ Kɨraazɨtɨyarɨne yaya' mu'nyadɨvɨsaraavɨrewɨ yagaala tewaanya' wɨjɨwaakyavɨna nawɨ'nyɨna nyɨvu'nadeinyɨ. A'mwe pwai a'mwe kware lɨkɨlaja' milamajɨ yadevaaibɨ' nɨmɨ Kɨraazɨtɨyarɨna pwai mi'na wɨjɨwaakaja' saba mujɨwaaki yɨdeinyɨ. 21Aawa. Gotɨyare bukuya' dara dɨnɨkabaaibɨ' nɨmɨnyɨ dara nyɨvu'nɨvanɨ'

“Gamɨnne yagaalya' mujɨwaakyesara wangabɨ'delyɨ.

Gamɨre yagaalya' mu'nyesara yawɨrangabɨ'delyɨ.”

Polɨ “Romɨ mwaalyaraavɨ angyɨrɨ'maata yɨma!” dake'nesɨ.

22Sarevɨ wawɨnya daza' kwalaalyagaa' nɨmɨre tusa' wɨla nyɨralɨmwaga'daasɨ yɨ sarɨmɨnyawɨnna mabi yɨwɨneinyɨ. 23Kɨrɨ' dahaa' dimagɨ sara wɨjɨwaakena ayahi wawɨnya' maayainyɨ. Nabaai kwarame kwalaalya nɨmɨ sainyɨ sarɨmɨnyawɨnna wɨya'na tewaanya nyɨvu'nada 24sarevɨ dɨvi sagaa' Pɨrovijɨ Sɨpenɨna wɨde dazagaa' sarɨmɨnyabanna wɨdeinyɨ. Yɨ sare' dara yawɨ'manɨge. Sarɨmɨnyabanna bi'mava'muri yɨ sarɨmɨnyɨ mena yɨhwangana'muriyagaa' yɨ sagaa' wɨdeinyɨ. Sarɨmɨjɨ maalɨ'na pɨjɨ' yɨhye'mwannamwaala'muri nɨmɨre sɨmunya' nawɨ'nya mena kanyɨma'nojɨ yɨ sagaa' sarɨmɨ Sɨpenɨne tusavɨne gɨlyɨvɨta tɨka wapaa dɨnyɨgaimwagamakwideinyɨ. 25Kɨrɨ' dahaasagaa' Jeruzaalemɨ mwaalya tewaanyara Gotɨyare a'mweraavɨna nɨgwia makulaawia'neinyɨ Jeruzaalemɨna wɨde'nanyɨ. 26Sare' dare'nesɨ. Pɨrovijɨ Maazathonɨya mwaalyarajɨ Pɨrovijɨ Gɨriza mwaalya kwarajɨ yeva yagaalya' mena wi'na jovɨrawakɨna yevegaa' kumɨre nɨgwia Jeruzaalemɨ Gotɨyare tewaanyaraavɨ gɨlyɨvɨsanna wɨgainaderaavɨna maryaasa'ne avaala pɨba yɨ'bwaramadakɨna yɨwa'daa'. Sarengɨ makulaawɨdengɨ. 27Sare' dare'nesɨ. Kumɨre sɨmunya' nawɨ'nya wiadaasɨ sara yɨvanɨga'. Nabaai sahwara Jeruzaalemɨ mwaalyaraavɨ wɨjaaya'ne tɨvɨkɨta kɨnɨnnakerera. Sare' dare'nesɨ. Gotɨyai Juyaraavɨna kumɨre kuryaraavɨne yanga wɨjaavaka sa ajɨmya yuyangɨyara ye'mwannamaare'. Yɨ sarevɨ ajɨmya yuyangɨyara kɨlaakejɨkɨya gɨlyɨvɨsa Juyaraavɨ gaimwagya'ne yanga wɨjaaya' tɨvɨkɨsa' kɨnɨnnakere. 28Sarevɨdaa'nyɨ wawɨnya sa' yune'na yɨ'mwanna'mujɨ, yɨ nɨgwia nawɨ'nya yuya yɨsɨlyabɨ' dadɨvɨ' yɨ'bwaramadakɨwa'daasa sahwaraavɨna wɨjaava'mujɨ sarɨmɨnyawɨnna kaanya wɨdeinyɨ. Yɨ Sɨpenɨne tusavɨ ya'mujɨyagaa' sarɨmɨnyɨ yune'na yɨhwanganɨdeinyɨ. 29Nabaai mena yawɨ'manɨge. Nɨmɨ sarɨmɨnyawɨnna bɨwɨja', yɨ Kɨraazɨtɨyare nawɨ'nyabwi sarɨmɨnyɨjɨ yunebanna neya'nevɨ bɨdeinyɨ.

30Nya'mweihi, nemɨre Naangei Jizaazai Kɨraazɨtɨyarɨjɨ Kurya Tewaanyai wɨvu'nya saburɨ neyɨmavɨdaakuvanɨkevɨjɨ sarevɨ kavena dɨragɨnna yɨhithaangamanɨge. Nɨmɨnyɨ nyɨgaimwagathe'na, nɨmɨjɨ yagɨyagɨ ye'mwannawɨdaathevɨ Gotɨyarɨ duzɨla! 31“A'mwe Juthɨya mwaalyara Naangerɨ galazekɨvaidɨvɨsaraavɨre asɨrɨ duvadaihasamaaka! Nabaai gɨnnya Jeruzaalemɨ mwaalya a'mwera tewaanyara Polɨmɨre wawɨnya yɨvanɨka dathavɨna ‘Yɨ negainadeinaavɨne' tewaanyabulyɨ,’ yawɨpɨka!” dapɨjɨ duzɨla! 32Nabaai “Gotɨyai sɨmunyavɨ sara yawɨrajavɨ sarɨmɨnyawɨnna bathehaa' gamɨ yɨlaaya yada nemɨnyaba gamɨre kuryarɨ gaala wivaimwada ye'mwannamwalaana!” dapɨjɨ sara duzɨla! 33Gotɨyai kwaamu'nanyaburɨ aaya kaavɨlyai sarɨmɨjɨ yɨnahu yɨhye'mwannamwaalana! Naanga sahɨrɨsɨ.

Currently Selected:

Romɨ 15: byr

Highlight

Compare

Copy