Romɨ 16

Polɨ kwalaalyaraavɨ “Nya'mweigɨ! Nya'mwe'gɨ!” wɨdake'nesɨ.

1Nɨmɨ dara yɨhɨthɨvanɨge. Neya'mwe' Piviya' sarɨmɨnyawɨnna bathevɨna yɨhɨthɨma! Sare' Segɨrɨya Naangere kusɨlaanyaraavɨ wɨdaayade' yɨ daza' a'mwe tewaanyasɨ. 2“Gotɨyare tewaanyara kwɨya'mwerɨ maapɨjavaaibɨ' sarɨmɨ Naangerɨna a'mwe sarevɨ dɨmaaryɨla! Sarɨmɨjɨ yɨhye'mwannemwaalana! Nabaai pɨnɨnna kugainojɨ, taanga kwiojɨ sahɨrɨvɨ nayaa dɨhaimwagila!” dena yɨhɨthɨvanɨge. Sare' dare'nesɨ. Sahɨrɨ' a'mwe kwalaalyaraavɨ gaimwadesɨ. Yɨ nabaai nɨmɨnyɨ kwainyɨjɨ nyɨgaimwamwa'dɨkesɨ.

3Pɨrɨzɨlavɨjɨ Aakwilaamɨjɨ sayorɨ “Nya'mweyoihi!” nɨmɨnyɨna duzɨla! Sahɨyoi nɨmɨjɨ wawɨnya Kɨraazɨtɨyai Jizaazarevɨ avaaiwawɨnyayolyɨ. 4Kɨrɨmɨ sayoi nyɨvadaihasamaarya'neyoi balyabɨsayoi karamakɨpɨdɨkeyolyɨ. Sarevɨ suya' yune nɨmɨnna mivanɨge. Aawa. Yuya Naangere kusɨlaanya ajɨmya yuyangɨya kwarajɨ yuya sahwara sayorɨna suya' wɨdadɨvɨsarera. 5Nabaai sahɨyore angevɨ Naangere kusɨlaanyaraavɨ “Nya'mweigɨ! Nya'mwe'gɨ!” nɨmɨnyɨna duzɨla! Epanitaazai Pɨrovijɨ Ezɨya saba yɨsɨla aaya mudɨ'nanyai sɨnnawɨ gamɨdaasɨ Kɨraazɨtɨyarɨnei yɨma'nakerɨna nyɨvu'nadelyɨ. Yɨ sasarerɨ nɨmɨnyɨna “Nya'mweigɨ!” duzɨla! 6Maarɨyaa' sarɨmɨnyɨ gaimwange'na wawɨnya kwalaalya naanga yakevɨ nɨmɨnyɨna “Nya'mwe'gɨ!” duzɨla! 7Aadɨronikaazalyɨ Junɨyaazalyɨ saraai nɨmɨjɨ avaaitawejɨkɨyaraalyɨ. Kɨgaa' nɨmɨjɨ kalavuzavɨ ye'mwannayɨ'naroraalyɨ. Apozelɨyaraavɨ naanga sɨnnawɨnya sahwaraarɨna kwala naangera yawɨ'manɨgasaraalyɨ. Yɨ sahwaraai Kɨraazɨtɨyarɨ sɨnnawɨ kyɨma'nagi sahwaraarɨ dɨviyainyɨ. Sareraarɨ nɨmɨnyɨna “Nya'mweraaihi!” duzɨla! 8Aabɨlɨyataazarɨna Naangerɨ nyɨvu'naderɨ nɨmɨnyɨna “Nya'mweigɨ!” duzɨla! 9Wɨrɨvanaazai Kɨraazɨtɨyarɨ nemɨre avaaiwawɨnyalyɨ Sɨtaakɨzai kwarɨna nyɨvu'nadelyɨ saraarɨ nɨmɨnyɨna “Nya'mweraaihi!” duzɨla! 10Aapelɨzarɨ kayaa'na kyare' Kɨraazɨtɨyarɨ kuna dɨragɨnna lɨmwagakerɨ nɨmɨnyɨna “Nya'mweigɨ!” duzɨla! Aarɨzɨtovyulaazarɨ angevɨyaraavɨ nɨmɨnyɨna “Nya'mweihi!” duzɨla! 11Erothɨyonɨ nɨmɨjɨ avaaitawejɨkɨyai nɨmɨnyɨna “Nya'mweigɨ!” duzɨla! Naazɨzaazare angevɨyara Naangerɨ wɨlamwaaihasaraavɨ nɨmɨnyɨna “Nya'mweihi!” duzɨla! 12Tɨraaipanaasɨ Tɨraaipozasɨ sanadaai Kɨraazɨtɨyarɨ wawɨnya mɨraagɨkɨ'disawaarɨ nɨmɨnyɨna “Nya'mwewaaihi!” duzɨla! Pezɨza' sahɨrɨvɨna tewaanya wɨvu'nade' Naangerɨ wawɨnya kwalaalya mɨraagɨkɨrakevɨ nɨmɨnyɨna “Nya'mwe'gɨ!” duzɨla! 13Rupaazai Naangerɨ a'mwe tewaanaangei, dahɨlakɨnɨkei yɨ sahwarɨ nɨmɨnyɨna “Nya'mwei!” duzɨla! Nabaai sahware ganaange', yɨ sahɨrɨ' nɨmɨnyɨ tewaanya nyade'na nyɨnaange' yɨma'nakevɨ “Nɨwaava!” duzɨla! 14Aazɨgɨritaazalyɨ Pɨlihonɨjɨ Emizalyɨ Patɨrovaazalyɨ Emaazalyɨ sarajɨ nabaai saraavɨ kwɨya'mwe yɨlaaya ye'mwannayɨvanɨgasarajɨ saraavɨ nɨmɨnyɨna “Nya'mweihi!” duzɨla! 15Pilolohaazalyɨ Julɨyaasɨ Nerɨyaazalyɨ gamɨre ganyaabulaangesɨ Wolibaazalyɨ sarajɨ nabaai Gotɨyare tewaanyara yɨlaaya ye'mwannayɨvanɨgasarajɨ saraavɨ “Nya'mweihi!” duzɨla! 16Sarɨmɨ gazaihizaihi sɨrya'mweraavɨ “Nya'mwei!” wɨdadɨvɨ' tewaanyaihi maangwɨdaayɨlaaya dɨmarinyɨla! Kɨraazɨtɨyare kusɨlaanya yuyaba mwaaihasara sarɨmɨnyɨ “Neya'mweihi!” yɨhɨthɨvanɨga'.

17Nya'mweihi, dɨhaa'bwata yɨhide'na dɨragɨnna yɨhithaangamanɨge. Naangereraavɨ tangɨvalya'nera Naangerɨ lɨmwangebwi kayaaka yɨgaidɨvɨsara kwaasɨ yɨhɨzɨwaakadɨvɨsaraavɨna mala nayaa yɨwannadɨvɨ' dɨmwaalyɨla! Yɨ sahwara sarɨmɨnyɨ yagaala nayaa mi'na yɨhɨzɨwaaketa nawɨ'nya savɨ galazekɨvaleva yagaala pɨnɨ yɨhɨzɨwaakadɨvɨsarera. Sasare saraavɨna sarɨmɨ gɨnyɨra'nyɨna jɨla! 18Sare' dare'nesɨ. A'mwe sasarera nemɨre Naangei Kɨraazɨtɨyarɨ wɨdaayadɨvɨtara mɨ'. Aawa. Sahwara kunnya yune kɨlaakejɨkɨne sangɨna mɨdɨdɨvɨsare. Yɨ wabwiwayagaalyajɨ nawɨ'nyabɨsajɨ a'mwe sɨmunya kayaa'nanyabwina myawɨryadɨvɨsaraavɨre sɨmunyavɨ kwaasɨ yagaala wɨdadɨvɨsare. 19Dare'nesɨ. Sarɨmɨ Gotɨyare yagaalya' mɨdɨdɨvɨsaburɨna a'mwe yuyara mena wɨ'nɨvanɨga'. Sarevɨdaa'nyɨ yɨ nɨmɨ sarɨmɨnyɨna yɨlaaya naanga yɨhɨmarivanɨge. Nabaai sare kɨrɨvɨ sɨmunya dara yawɨ'manɨge. Sarɨmɨ nawɨ'nya sabwina ya'ne sɨmunya kɨnɨnnakeihi dɨmwaalyɨla! Kayaa'nanyabwina ya'ne sɨmunya maayaihi dɨmwaalyɨla! 20Yɨ sareihɨrɨna Gotɨyai kwaamu'nanyaburɨ aaya kaavɨlyai maalɨkegaa' yadehaa' Saataanɨmɨ yɨlapaihɨrojɨ sarɨmɨre sɨvɨlyɨrɨ kwaakewɨ wakadevaaibɨ' Saataanɨmɨrera kwaasɨ wɨjɨwaakadɨvɨsaraavɨ dɨthathɨwagyideihɨlyɨ. Nemɨre Naangei Jizaazare yanga gaimwangebwi sarɨmɨjɨ yɨhye'mwannarana!

21Timoti, nɨmɨre avaaiwawɨnyai yɨhɨthɨvanɨ' “Nya'mweihi!” Nabaai Luzɨyaazalyɨ Jaizonɨjɨ Sozɨpaatalyɨ sara nɨmɨjɨ avaaitawejɨkɨyara “Neya'mweihi!” yɨhɨthɨvanɨga'.

22Nɨmɨ Tetɨyaazainyɨ Polɨmɨre maangikɨ yagaalya' maarena pɨkarya da' yɨda'mweinyɨ. Yɨ nɨmɨ Naangerɨ wɨlamwaaiheinyɨ “Nya'mweihi!” yɨhɨthɨvanɨge.

23Gaayaazai, gamɨre angevɨ nawɨ'nya nyɨmaremwaaimanɨ'. Yɨ nɨmɨnyɨ, Naangere kusɨlaanya yuyaraavɨjɨ nayaa sara maremwaaidelyɨ. Yɨ sahwai “Nya'mweihi!” yɨhɨthɨvanɨ'. Yɨrazɨtaazai anga naanga davanya kaajolɨyaraavɨre wawɨnya ya'ne nɨgwia maremwaaidelyɨ Kwaataazai neya'mwelyɨ saraai “Nehɨrya'mweihi!” yɨhɨthɨvanɨgi.

24Nemɨre Naangei Jizaazai Kɨraazɨtɨyare yanga gaimwangebwi sarɨmɨ yuyaihɨlyɨ yɨhye'mwannarana! Sara kuna yɨma'nana!

25Gotɨyai, sai yagaala tewaanya' dadɨnya savɨne dɨragɨnyasɨ wi'na yɨvaimwagannerɨne yaya' munyaba nayaa pada'galamakɨlaana! Yɨ yagaala tewaanya sa' Jizaazai Kɨraazɨtɨyarɨne wɨjɨwaakyasɨ. Yoimavajalɨkurakya' yuya sɨnnawɨ kɨgaasɨ lɨka yulyaryaake' Gotɨyai ku'maayaba mena wɨjalangasakɨwaabɨkesɨ. 26Kɨgaakuna lɨka yulyaryaaka kɨrɨ' dahaasagaa' Gotɨyarɨ wɨ'nawɨjɨwaakadɨvɨsara pɨkarya yɨdavesavɨ nebulya'nanya sa' ku'maayaba yɨma'nɨwaabɨkesɨ. Naangerɨ yawɨralɨmwadɨvɨta yuyara sahwarɨ mɨdɨnya'nei Gotɨyai yuyagaa' yuyagaa' mwaaidei “Gazabazaba a'mwera wɨ'nɨpɨka!” sara wɨdakevɨ ajɨmya yuyangɨya kwalaalyara sahwarɨna sɨdu'nakeraavɨ wɨmwaaihɨvanɨ'. 27Gotɨyai dazai sɨmunya yuya yawɨta yuya aaya kaavɨla sa nebulya'na kɨnɨnnakelyɨ. Yɨ sarei gave pwainanaangerɨna Jizaazai Kɨraazɨtɨyarɨ yuyagaa' yuyagaa' “Byaannakela!” daana! Naanga sahɨrɨsɨra.

Polɨ

Currently Selected:

Romɨ 16: byr

Highlight

Compare

Copy