Wɨjalangasakyaꞌ 9

1Yɨ ejelɨya atɨlyai (5) gamɨre pihulɨya' pwa'nyɨ kamaku'mwa' sɨlɨngaamɨnya pwai Sɨgunyavɨdaa'nyɨ Kwaakevakɨna mena bwala'mwakerɨ nɨmɨ tɨnna wanganna. Yɨ tɨnna kuna wanganna yadaazɨ sahwarɨna kiya' wɨjaavɨna. Kiya daza' yɨrorɨla yune kewewɨnɨ yɨnɨgwalaawaka yɨ daanga maaya dazavɨne tɨkurya' baasa'nesɨ. 2Sai yɨrorɨlyavɨ tɨkurya daza' kabaasɨwa' yɨ yɨrorɨlyavɨdaa'nyɨ jɨsa' yɨlɨna. Saaidɨka naangevɨre jɨta sa'bɨ' yɨlɨna yaka nyɨlyarɨjɨ yɨhusavaakɨjɨ galabɨ'jɨ'na kyɨwa' yɨ nyɨlyalyɨ yɨhusasɨ jɨhɨnya yɨma'nyɨna yɨwa'. 3Jɨhɨnya yɨma'nyɨna yadaa'nyɨ jɨta savɨdaa'nyɨ baarɨnnyara yɨma'naabɨna yeva yɨ Kwaakevakɨna walaawɨna yɨwaa'. Yɨ sahwara dɨragɨnya' dɨraavalyare dɨragɨnya'bɨ' maarɨna. Yɨ Kwaakevakɨya dɨraavalyara a'mweraavɨ kayaaka yɨgaidɨvɨtabaaibɨ' kayaa'na ya'ne dɨragɨnya' maarɨna yɨwaa'. 4Maarɨna yeva yagaalya' dara maarɨna “Sarɨmɨ kurɨvaarɨyangɨjɨ Kwaakevakɨ dala pɨnɨnna pɨnɨnnanya yɨrɨ'nade sangɨjɨ yɨta gazarɨzarɨjɨ kayaaka migalakɨpɨna! Aawa. A'mwe Gotɨyare yavɨkwajɨka pɨkarya' kumɨre yamengɨ maayaraavɨ yɨ dazaraavɨ kayaaka nayaa jɨhalakyi! 5Sarɨmɨ a'mwe dazahwaraavɨ daanga naanga jɨ'mwagyidere. Kuna yɨwopɨjɨ yune lawe atinanyangɨna. Kɨrɨ' sahwaraavɨ tamakya mipɨna!” Yɨ baarɨnna dazara a'mweraavɨna daanga kayaa'nanya' wɨjaavadɨvɨsara. Yɨrɨvaburyara a'mweraavɨ tɨka da'dɨvɨ' daanga wɨjaavadɨvɨtabaaibɨ' wɨjaavɨna. 6Yɨ daanga dazagaa' a'mwera balya ya'ne tusa'na bɨ'dɨvɨ' kɨrɨ' sahwara tɨnna mwanganyadɨvɨsare. Arɨkawɨ. Sahwara “Balaana!” kuna yawɨ'dɨvɨsare. Kɨrɨ' baryabwi sahwaraavɨ lɨkaanya wodesɨ.

7Baarɨnna dazara ozɨyara mala ya'neraayawɨnnera yawɨmwavedaa'dɨvɨtabaaibɨsare. Kumɨre mɨnyagɨnyangɨ kingɨmwaaihɨ'nya golɨyabɨsa yɨlarɨkera. Yɨ kumɨre sɨnnyɨ' a'mwere sɨnnyɨ'bɨsɨ'. 8Yɨ kumɨre mɨjasa saamɨnaange, a'mwe kɨnɨngɨre mɨjasabɨsa. Yɨ kumɨre maangerɨka kavɨjɨlɨkere maangebɨsa, yɨ laayonɨyare saanyabɨsa. 9Kumɨre kɨhɨsangɨ baazɨ'ma'nya kaapaayabɨsa saabya' maredaa'nɨkengɨ. Yɨ kumɨre pɨya kaarɨzɨya kwalaalyabɨ' ozɨyara mwagi'namakwodaapi mala'nera pa'da pa'da yɨnnadevaaibɨ' woryaraavɨre pɨyangɨ pa'da pa'da yɨnɨkesɨ. 10Kumɨre suyarɨka yɨrɨvaburyaraavɨrebaaibɨsarɨka. Yɨ suyarɨkɨ kumɨre langerɨ' kwaamɨnya daanga wɨjaaya'ne' kɨnɨnnakerɨ' warɨ'. Nabaai kumɨre langerɨkajɨ daanga naanga daza' a'mweraavɨ kayaaka yɨgalya'nera. Sahwara daanga naanga daza' wɨjaaya'ne dɨragɨnya' yune lawe atinanyangɨna maa'nɨkere. 11Kumɨnyɨ munyaba kumɨre maremwaaidei yɨ sai yɨrorɨla yune kewewɨnɨ yɨnɨgwalaawɨka yɨ daanga maayavɨya ejelɨyalyɨ. Sarere yaya' Yɨvɨruyagaalyavɨ Aavathonɨ, yɨ Gɨrikɨyagaalyavɨ Aapolɨyonɨ. Yayavɨ aaya kaavɨlyasɨ, “Yuyangɨ Kayaaka Yɨgalakadei.”

12Sɨnnawɨnya' taanginya naange' sa' menanyɨ. We' sɨnnawɨnya daza' menanyɨ. Yɨthaanyi, taanginya pɨrɨwaai dɨvidaa'nyɨ yɨma'naabathewaai kuna warɨ'.

13Yɨ ejelɨya ata purɨdaa'nyɨ pwai (6) gamɨre pihulɨya' pwa'nyɨ kamaku'mwa' Gotɨyare sɨnnyɨkɨ dɨ'bɨnya golɨyavɨ saanya dawaai dawaalyaba tɨnnyaba maangwɨraaya pɨrɨ' dɨna. Sa' dɨna yadaa'nyɨ nɨmɨ kadɨka wɨ'nɨwe'. 14Yɨ maangwɨraaya daza' ejelɨya ata purɨdaa'nyɨ pwai pihulɨya' lɨmwagarɨkerɨ dara wɨdɨna “Aalya naanga Yupɨretɨzɨyavɨya ejelɨya daraai daraala sara wɨla yɨ'nakasara saraavɨ dɨmakwaasa!” 15Wɨdɨna kyɨwa' ejelɨya sai ejelɨya daraai daraala saraavɨ makwaasɨna kyɨwa' Gotɨyai a'mwe yuyaraavɨ yɨta davakaai dava'nevɨ jaapaina yada gave pɨvaa'na sahwara tamakya'neraavɨ dahɨlakɨnɨkera yovɨrawakɨgasare. Yɨ sarera aawaaya nyihaanya daza'na, yɨ yɨrɨka dazarɨkɨ, yɨ lawe dazɨkɨ, yɨ kwarame yune dazavɨna wawɨnya daza' ya'nera yovɨrawakɨnɨkere. 16Yɨ ata gɨlyara aawɨlasara ozɨyaraavɨ mwaaihasara yɨ tu aadɨretɨ milɨyonɨyara. Kumɨre ata gɨlya'na nɨmɨ kadɨka wɨ'nɨwe'. 17Yɨ nɨmɨ a'mabaaitɨnnya' ya'nena tɨnna dara wanganna. Ozɨyaraavɨjɨ ozɨyaraavɨ yɨlamwaaleveraavɨjɨ kumɨre sabwi darera. A'mwera kɨhɨsangɨ baazɨ'ma'nya kaapaaya baazɨ'ma'nevera, yɨ kumɨre kalaaya dazangɨre sa dɨkevɨya wayaaka, yɨ gwaagwaaja yɨ saalɨpaayavɨya awi'ja kɨnɨnnakera. Ozɨyaraavɨre mɨnyagɨnya yɨ kavɨjɨlɨkeibɨta laayonɨyaraavɨre mɨnyagɨnyabɨsangɨ. Yɨ kumɨre maangengɨ dɨkesɨ jɨsasɨ sɨla saalɨpaayasɨ yɨma'naka mwasabɨ' lɨvapɨna. 18Kayaa'nanaanga dawaai data daza a'mwe pimagɨnya savaa' tamakɨna. Yɨ yuyaraavɨya davakaai mwaaidakɨlyɨyaraavɨ maramaki yadɨvɨ' yuyaraavɨ davaa' mwaaidɨ'nyɨyaraavɨ tamakɨna. Yɨ dɨka dazasɨ yɨ jɨsasɨ yɨ sɨla saalɨpaayasɨ sahwaraavɨ tamakɨna. Ozɨyaraavɨre maangengɨdaa'nyɨ lɨvapɨna yaka tamakɨna. 19Sare' dare'nesɨ. Ozɨya dazaraavɨre dɨragɨnya' tamakya'ne dɨragɨnya' maangikɨjɨ warɨna, lɨkikɨjɨ warɨna. Sare' dare'nesɨ. Kumɨre suya kamaalyarabɨsangɨ. Yɨ kamaaimɨnyagɨnya kɨnɨnnakengɨ. Yɨ dazajɨ a'mweraavɨ kayaaka yɨgalakadɨvɨsare.

20A'mwe yuya pwara, kayaa'nanaanga daza tamakagihɨwakera tɨnna nayaa wanganeva kɨrɨ' kumɨre asajɨ yavɨkaryadɨvɨta sangɨna kumɨre sɨmunyabwi mudɨkebwi kuna myawɨramariwaa'. Arɨkewɨ. Yɨmakeraavɨ lotuya ya sabwi, yɨ kwaasɨgotɨyaraavɨ sahwara yavɨkaryadɨvɨta golɨyajɨ sɨlɨvaayajɨ bɨraazɨyajɨ sɨlyarajɨ yɨsarajɨ saraavɨ yɨlaaya'na bule'na wɨjaavadɨvɨtara mɨ'. Yɨ kwaasɨgotɨya dazara yɨ tɨnna yɨnɨga mwanganyadɨvɨ' kadɨka yɨnɨga mu'nyadɨvɨ' kaanya yɨnɨga yamaryadɨvɨtara mɨ'. 21Yɨ a'mwe dazara kumɨre a'mwe pwaraavɨ tamakyabulyɨ gɨri'nya yabulyɨ ata lɨmwangebulyɨ kukebulyɨ sasare sabwi kɨburɨna sɨmunya mudɨkebwi yawɨramaa'dɨvɨtara mɨ'.

Currently Selected:

Wɨjalangasakyaꞌ 9: byr

Highlight

Copy

Compare