Wɨjalangasakyaꞌ 10

Ejelɨyai bukuya maalɨke' Jonɨmɨna kujaava' tɨka nake'nesɨ.

1Ejelɨya pwai dɨragɨnaangei Sɨgunyabadaa'nyɨ waidavadaa'nyɨ nɨmɨ tɨnna wanganna. Sai gannya kɨlaakejɨkɨ yɨraayasɨ bwaakɨnɨkei, yɨ gamɨre mɨnyagɨnyavɨ byaawɨlya' wɨdaa'dɨ'nyɨyai, yɨ gamɨre sɨnnyɨ' nyɨlyaibɨ' yɨdadaa'nyɨ, yɨ gamɨre sɨvɨlyaraai dɨhɨbya'bɨ' dɨtaalɨta saamɨnyawa' yɨdadaasɨya'bɨsaraai. 2Sarei gamɨre asɨrɨ bukuya maalɨtaaya pwi lɨmwagakei, yɨ bukuyi tɨlaayɨnaka warɨna yadɨ'nyɨyai. Sai saalaalyavɨ gamɨre sɨvɨla aangasi yɨlakadɨ'nyɨ yɨ kwaakevakɨ sɨvɨla kwanaami yɨlakɨna yaka daavɨna yɨwa'. 3Daavɨna yada kavɨjɨlɨkeibɨsai laayonɨyai pwaka dadevaaibɨ' sai jaka naanga dɨragɨnna dɨna. Jaka sara dɨna kyɨwa' sagaa' yɨ'munya ata purɨdaa'nyɨ daraala sa kumɨre maangwɨraaya pilɨna. 4Sara pilɨna kyɨwa' nɨmɨ yawɨ'na “Kumɨre yagaalya' yɨdavɨma!” yawɨ'na yena yɨwe'. Nɨmɨ kadɨka wɨ'nyɨna yadaazɨ Sɨgunyavɨdaa'nyɨ maangwɨraaya pɨrɨ' dɨna “Yɨ'munya ata purɨdaa'nyɨ pwaraalyangɨre yagaala pimwake' sa' gɨmɨre sɨmunyavɨ nayaa marabɨpalemwaaina jɨ! Pɨkarya mida'dɨnna!” 5Dɨna kyɨwa' ejelɨya dazai saalaalyavɨjɨ kwaakevakɨjɨ daa'dɨ'nyɨ nɨmɨ tɨnna wangamwei “Yagaala naange' dɨma!” daka Sɨgunyavɨ gamɨre aangasi munyaba makina yaka 6dɨna “Gotɨyarɨne yayavɨ yagaala nebulya' warya'ne' dɨma! Yɨ Gotɨyai sai yuyagaa' yuyagaa' gaala mwaaidei, sai Sɨgunya' wakyaakesɨ yuya Sɨgunyavɨ warɨkejɨ, yɨ kwaakesɨ yuya kwaakevɨ warɨkejɨ, yɨ saalaalya kɨrɨsɨ yuya saalaalyavɨ warɨkejɨ yuya sa wakyaakei gamɨre yayavɨ yagaala nebulya' dɨma! Yɨrɨkerɨ' mena yaja sagaa'. Gotɨyai yemwaala ayahi pɨzɨ'gwa yadei mɨ'. 7Aawa. Dɨvi ejelɨya ata purɨdaa'nyɨ pwaraalyai pihulɨya' kamakurojɨ, yɨ gamɨre jake' kinnojɨ yɨ dazagaa' sagaa' Gotɨyare yoimavajalɨkurakya sa' menanyɨ. Yɨ sa' Gotɨyai wana nebulya'na yadesɨ. Yɨ gamɨre yaasɨwa'wawɨnyara, gamɨnyɨ wɨ'nawɨjɨwaakadɨvɨta saraavɨ nayaa sara wɨdakabaaibɨ' sara yɨma'naabakesɨ!”

8Yɨ maangwɨraaya daza' sɨnnawɨ Sɨgunyavɨdaa'nyɨ kyɨma'nɨwa' nɨmɨ kadɨka wɨ'nɨwe' nɨmɨnyɨ ayahi dara wɨdɨna “Ejelɨya saalaalyavɨjɨ kwaakevakɨjɨ daavakere asɨrɨ bukuya dazi tɨlaayɨnɨka si dɨmaraawa!” 9Sara wɨdɨna kanyɨwa' nɨmɨ ejelɨyaryawɨnna kaanna wɨna yena, yɨ sarɨ nɨmɨ wɨdɨna “Bukuya maalɨka dazi dɨnyɨjaama!” wɨdɨna kye, yɨ, sai nɨmɨnyɨ wɨdɨna “Di maara'gɨzɨ tɨka dɨnɨgu'na! Yɨ sa' gɨmɨre munyɨkɨ yɨrɨka gima'nadesɨ. Kɨrɨ' nabaai gɨmɨre maangikɨ kaamyoikwarakebɨ' waburya gyathesɨ.” 10Sai mena kanyɨdɨwa' yɨ nɨmɨ ejelɨyare asɨrɨ bukuya maalɨka dazi maarɨna yena yɨ nɨmɨ tɨka nyɨna. Yɨ nɨmɨre maangevɨ yɨ sa' kaamyoikwarakebɨ' waburya yɨna. Kɨrɨ' nɨmɨ mena kanɨwa yɨ sa' nɨmɨre munyɨkɨ yɨrɨka nyɨwa'. 11Yɨ nɨmɨnyɨ wɨja' dara dɨnɨ' “Gɨmɨ Gotɨyare yagaalya' (yɨkwia' nɨwaanya') yɨma'nadenna nayaa ayahi duzɨwaakɨ! Yɨ kɨlaaka dala nabinabinya kwalaalyara, ajɨmya yuyangɨya kwalaalyara, yagaala ge gejɨya kwalaalyara, kingɨya kwalaalyarajɨ saraavɨna duzɨwaakɨ! Sara ja!”

Currently Selected:

Wɨjalangasakyaꞌ 10: byr

Highlight

Copy

Compare