Wɨjalangasakyaꞌ 8

Bukuyavɨ pwɨyɨnɨka wɨla ata purɨdaa'nyɨ pwaraalya' marapyasɨbwarake'nesɨ.

1Sipɨzipɨya Dɨwɨnyai wɨlya' bukuyavɨ pwɨyɨnɨke' ata purɨdaa'nyɨ pwaraalya' mena marapyasɨbwa'mwa'. Yɨ Sɨgunyavɨ saba yagaala maayawɨ kuna yada nyitaka pimagɨnya'bɨ' (aapɨ-aawaaya sagaa') wavɨla'na yɨwa'. 2Wavɨla'na kyɨwa' ejelɨya ata purɨdaa'nyɨ pwaraalyara Gotɨyare sɨnnyɨkɨ daa'dapi nɨmɨ tɨnna wanganna. Yɨ sahwaraavɨna pihulɨya ata purɨdaa'nyɨ pwaraalya wɨjaavɨna yɨwa'. 3Yɨ ejelɨya pwai Gotɨyare kwaraanyaba gidɨkusaba buladaa'na. Yɨ sai maa'gula golɨya' wabatɨrɨnya yɨravayɨhwia'ne' lɨmwagakei. Sahwarɨna paawɨraayana kwalaalya wabatɨrɨnya yɨravayɨhwia'ne wɨjaawakei sai a'mwe Gotɨyare tewaanyaraavɨre wɨja Gotɨyarɨnejɨ mari'bwarakya ya'nei. Yɨ sahwai kingɨnamwaalyɨsavɨ kusɨmagɨnya dɨ'bɨnya golɨya warɨka dazavɨ Gotɨyarɨna wɨja Gotɨyarɨna wɨjaaya'bɨsajɨ wabatɨrɨnya' mari'bwarakya ya'nei. 4Yɨ paawɨraaya dazangɨre jɨta wabatɨrɨnyasɨ Gotɨyare tewaanyaraavɨre gamɨnyɨ wɨja yagaalyajɨ ejelɨyare asɨrɨ lɨmwagakevɨdaa'nyɨ yɨlaawaka munyaba Gotɨyare sɨnnyɨkɨ yɨ'ma'mwakengɨ. 5Sara yaka sai yɨkunaabɨthɨ'maa'gulya' maaraka dɨke' yɨ dɨkwaraka kwaraanyaba maaraka yɨ maa'gulyavɨ maradɨ'gwalaka yɨ sai dɨke' lɨvaramwake' Kwaakevakɨna waimwaawɨ'. Sai mena kalɨvaramwa' yɨ sagaa' yɨ'munya pilɨna, purinya yɨnnyɨna, yɨnamɨraasavɨre dɨ'baake mwasabɨ' lɨvapɨna, yɨ sagaa' Kwaakeva' wɨnɨnya' yɨna yakengɨ.

Ejelɨyara pihulɨya makuresa'nesɨ.

6Ejelɨya ata purɨdaa'nyɨ pwaraala dazara pihulɨya ata purɨdaa'nyɨ pwaraala daza lɨmwagarevera pihulɨya pwa'nyɨ makusa'na yavada'galayovɨravalɨmwanna yɨwaa'. 7Yɨ ejelɨya aaya mudɨ'nanyai gamɨre pihulɨya' pwa'nyɨ maku'na kyɨwa' sɨrɨmyasɨ dɨkesɨ tawe ye'mwannayɨma'naabɨna yaka Kwaakevakɨna walaraawɨna yɨwa'. Kwaaka yuyangɨ dawaai dasɨmagɨ jaapaina yɨnɨkeba dawaalyaba tewaanya wa'dɨ'nyɨ pɨba saba dɨke' nyɨna. Nabaai yɨta yuyaraavɨ dawaai dasɨmagɨ jaapaina yɨnɨkeba dawaalyaba tewaanya wa'dɨ'nyɨ pɨba saba dɨke' nyɨna. Yɨ kurɨvaarɨya yuyangɨ yɨ sa kɨnɨngɨjɨ dɨke' baihinyɨna yɨwa'. 8Yɨ ejelɨya ayawɨdaasai (2) gamɨre pihulɨya' pwa'nyɨ maku'na kyɨwa' mugunya naange' nadaasɨya'bɨsa' dɨka naange' saalaalyavɨna walaraawɨna. Yɨ saalaalya dawaai dasɨmagɨnya jaapaina yɨnɨka davanyaai tewaanya wa'dɨ'nyɨ pimagɨnyavaa' tawe' yɨma'nyɨna. 9Saalaalyavɨ gaala mwaaihasaraavɨ maralɨgɨsɨvaina yɨnɨka dawaai dasɨmagɨnya yɨma'nyɨna kyɨwa' yɨ pimagɨnya pɨvaa' mena balɨna yɨwaa'. Yɨ sɨpɨyangɨna maralɨgɨsɨvainɨka dawaai dasɨmagɨnya yɨma'nyɨna kyɨwa' yɨ sɨpɨya pimagɨnya pɨvaa' kayaaka mena yɨnyɨna yɨwa'. 10Yɨ ejelɨya ayawɨdaasa pwai daraai dalyai (3) gamɨre pihulɨya' pwa'nyɨ maku'na kyɨwa' sɨlɨngaamɨnya naanga pɨrɨ' dɨ'baake' wana dɨka nebulya'bɨ' yɨdɨwake' yɨ sa' sɨgunyavɨ yɨlamakwasaawaka yɨ bwala'na. Aalya yuyangɨjɨ aalɨyɨmɨnya yuyangɨjɨ sangɨ dawaai dasɨmagɨnya maralɨgɨsɨvainɨka davanyaai wa'dɨ'nyɨ aalya pimagɨnya pɨnɨngɨ sɨlɨngaamɨnya' bwala'na. 11Sɨlɨngaamɨnya dazavɨne yaya' dara wo'nɨke' “Yɨrɨke'. Kayaakuryava.” Aalya yuyangɨ pimagɨnya savaa' yɨrɨke' yɨma'nyɨna yɨwa'. A'mwe kwalaalyara aalya daza' neva yɨ aalya' kumɨre munyɨkɨ dɨka kubaihinnɨwa' yɨ sahwara mena baimwaa'. 12Yɨ ejelɨya ayawɨdaasa pwai daraai daraalyai (4) gamɨre pihulɨya' pwa'nyɨ kamaku'mwa' yɨ nabaai nyɨlyarɨjɨ lawerɨjɨ yuya sɨlɨngaamɨnyangɨjɨ tamɨna yaka yɨ nyɨlyare dawaai dasɨmagɨdaasa pimagɨ yɨgalakɨna. Yɨ lawere dawaai dasɨmagɨdaasa pimagɨ yɨgalakɨna. Yɨ sɨlɨngaamɨnyangɨ dawaai dasɨmagɨdaasa pimagɨ yɨgalakɨna. Sarevɨdaa'nyɨ kumɨre baaka pade dahasaai nayaa wa'dɨ'nyɨ baaka pade pimagɨnya' jɨhɨnya ya'na yɨna. Yɨ nyɨlyai yɨrɨkevɨ dahasaalyagaa' naangegaa' (2) nayaa purɨna yada yɨrɨkevɨ maalɨkegaa' (1) mavuri. Yɨ nabaai sawɨta pimagɨnya' sara mavuri yɨwa'.

13Yɨ bwaangya naanga pwai sɨgunyavɨ tɨnnyaba pɨlavamaryadaa'nyɨ nɨmɨ tɨnna wanganna. Yɨ nɨmɨ kadɨka wɨ'nyɨna yadaazɨ sai maangwɨraaya jaka dɨragɨnna dara dɨna “We'! We'! We'! A'mwe Kwaakevakɨ mwaaihata kemwaraavɨna dahasaai dahaa' kale nyɨwa'. Ejelɨya daraai dala pwara pihulɨya pwa'nyɨ kamakurapi yɨ nabaai taanginya naange' sahwaraavɨ yɨma'nadesɨ.”

Currently Selected:

Wɨjalangasakyaꞌ 8: byr

Highlight

Copy

Compare