Wɨjalangasakyaꞌ 7
7
Yɨzɨrelɨya kwala naanga (144,000) sara Gotɨyare dahɨlakɨnɨke' maaresa'nesɨ.
1Sa' mena kyɨwa' Kwaakevɨya tɨvimagɨnya dawaai dawaalyaba ejelɨya daraai daraalyara daa'dapi nɨmɨ tɨnna wanganna. Sahwara Kwaakevakɨya yɨhuta dawaai dawaalya dɨragɨnna lɨmwaga'na. “Dahaa' yɨhuta sa yɨhu'maanarya Kwaakevakɨjɨ saalaalyavɨjɨ yɨta gazarɨzarɨjɨ nyadɨka!” deva dɨragɨnna lɨmwaga'na. 2Yɨ ejelɨya pwai nyɨlyai bilyɨrɨ'dimagɨ yidawadaa'nyɨyarɨ nɨmɨ tɨnna wanganna. Ejelɨya sai Gotɨya gaala mwaalɨkere yavɨkwajɨke' lɨmwagaka yɨ sai maangwɨraaya jaka dɨragɨnna naanga'na dɨna. Yɨ ejelɨya daraai daraala dazaraavɨna Gotɨyai dɨragɨnya' wɨjaavakera kwaakesɨ saalaalyasɨ kayaaka yɨgalakya'neraavɨ yɨ sahwaraavɨ jaka dɨna. 3Yɨ jaka dara dɨwa' “Sarɨmɨ dahaa' Kwaakevasɨ saalaalyasɨ yɨsarajɨ kayaaka yɨme'nya'bɨ' migalakɨpɨna! Nemɨ nemɨre Gotɨyare yaasɨwa'wawɨnyaraavɨre yamengɨ gamɨre yavɨkwajɨka pɨkarya yaadehaa'nanyɨ. Sara kyawaajɨ sarɨmɨ sahwaraavɨ migalaki yapɨjɨ gave pwaraavɨ jɨhalakyideihɨlyɨ.” 4Yɨ a'mwe yavɨkwajɨka pɨkarya' ma'mwaasaraavɨne ata dahɨlya' kanyɨdɨwa' nɨmɨ kadɨka wɨ'nɨwe'. A'mwe sahwaraavɨ pɨkarya wakɨwaka kwala naanga (144,000) sara. Yɨ Yɨzɨrelɨyaraavɨ yɨta gazavaasavaakɨya pwara yavɨkwajɨka pɨkarya ma'mwaasara. 5Yɨ Juthare yɨsavaakɨyara kwalaalyara (12,000) pɨkarya ma'mwaasara. Yɨ Ruvenɨmɨre yɨsavaakɨyara 12,000. Yɨ Gaatɨmɨre yɨsavaakɨyara 12,000. 6Yɨ Aazare yɨsavaakɨyara 12,000. Yɨ Napɨtalaare yɨsavaakɨyara 12,000. Yɨ Manaazare yɨsavaakɨyara 12,000. 7Yɨ Sɨmɨyonɨmɨre yɨsavaakɨyara 12,000. Yɨ Livaayare yɨsavaakɨyara 12,000. Yɨ Yɨzakaamɨre yɨsavaakɨyara 12,000. 8Yɨ Sevyulanɨmɨre yɨsavaakɨyara 12,000. Yɨ Jozepɨyare yɨsavaakɨyara 12,000. Yɨ Bejaminɨmɨre yɨsavaakɨyara 12,000. A'mwe dazara yɨ Gotɨyare yavɨkwajɨka pɨkarya' ma'mwaasare.
A'mwe kwalaalya naangera baazɨ'ma'nya yaake baazɨ'ma'nɨkeraavɨnesɨ.
9Yuya daza mena kya', yɨthaanyi, a'mwe kwalaalya naanga naangera yɨ'bwa'nemwaaidapi nɨmɨ tɨnna wanganna. Yɨ kumɨnyɨ a'mwei ata yɨnɨga wi'na gɨlanneraavɨna mɨ'. A'mwe dazara ajɨmya yuyangɨya gazasavɨyaraayawɨjɨ yɨta gazavaasavaasɨyaraayawɨjɨ kɨlaaka nabinabinyajɨyaraayawɨjɨ yagaala ge gejɨyaraayawɨjɨ yɨ sahɨbadaasare. Sahwara kingɨnamwaalyɨsavɨre sɨnnyɨkɨjɨ Dɨwɨnya Sipɨzipɨyare sɨnnyɨkɨjɨ daavɨna. Baazɨ'ma'nya yaaka saamɨgwazaaya wakevera yɨ kumɨre asɨraavɨ maimunyarabɨ'ne lɨmwageva 10maangwɨraaya naange' jaka dɨragɨnna dara dɨwaa' “Nemɨre Gotɨyai sai kingɨnamwaalyɨsavɨ mwaalɨkelyɨ yɨ Sipɨzipɨya Dɨwɨnyalyɨ saraai mena nevadaihasama'mwaalyaraalyɨ. Naangebula!” 11Yɨ ejelɨya yuyara kingɨnamwaalyɨsavɨjɨ a'mwe naangeraayawɨjɨ gaala kɨnɨnnaka daraai daraalyaraayawɨjɨ daaveva yunewɨnna bathakulaawesare. Yɨ sahwara kingɨnamwaalyɨsayaba gidɨkusaba kumɨre sɨnnyɨ' kwaakewɨ walaruta'nareva Gotɨyarɨ lotuya'na yɨlaaya yɨwaa'. 12Sahwara dara dɨna:
“Sahɨrɨsɨ. Nebula naangesɨ.
Nemɨre Gotɨyarɨ yɨlaayabwi wiaana!
Byaanna dɨragɨnya' kuna warana!
Sɨdu'nakeburɨ aaya kaavɨlyala!
‘Su! Su!’ wɨdaana!
Gamɨnne yaya' munyaba makɨlaana!
Dɨragɨnna maremwaalya'nebulyɨ dɨragɨnya naangebulyɨ
Yɨ sahwarebwi kuna kuna warana!
Yuyagaa' yuyagaa' dazabura waragwona!
Sahɨrɨsɨ. Nebula naangesɨ!”
13A'mwe naangerajɨya pwai ja'nanyɨdɨwa' “A'mwe baazɨ'ma'nya yaaka saamɨgwazaaya yɨra'neve dazara aaihwaravaavaka? A'mwe saraavɨ jawɨ'mwaa gawɨdaa'nyara?” 14Sara kanyɨdɨwa' “Nɨmɨre naangeigɨ, bewara dɨngaka! Nɨmɨ myawɨriwa. Saigɨ yawɨ'manɨgɨ.” Yɨ sai nyɨdɨwa' “A'mwe dazara yɨkamaangeraavɨ taanginya naangejɨ daangejɨ maare'. Yɨ taanginya naanga savɨdaasare. Yɨ kumɨre baazɨ'ma'nya Dɨwɨnyare tawevɨ aalya yesa'nanyɨ. Sarevɨ baazɨ'ma'nya daza yaaka wannyɨna ya'. 15Sarevɨdaa'nyɨ sahwara Gotɨyare kingɨnamwaalyɨsavɨ kusɨmagɨ daa'dɨvɨsare.
Nyɨlyavɨjɨ sawɨsavɨjɨ lotuya yadɨvɨsare.
Gamɨre anga nawɨ'nyavɨ sara yadɨvɨsare.
Kingɨnamwaalyɨsavɨ mwaaidei ye'mwannamwaalojɨ
Yɨ sahwaraavɨ maredaa'da kɨmata bwakedaavadelyɨ.
16Sahwara mɨjɨka ayahi yɨpɨ'dera mɨ'.
Nabaai aalya'na ayahi baibɨ'dera mɨ'.
Nyɨlyai mala tamya'ne'bɨ' dɨragɨnna wɨdathera mɨ'.
Dɨka naanga gazasa' daanga wi'dathera mɨ'.
17Dare' nanyɨ. Dɨwɨnya Sipɨzipɨyai wɨmaremwaaladelyɨ.
Kingɨnamwaalyɨsayaba kumɨre maremwaalyai mwaaladei.
Sahwaraavɨ aalɨyɨmɨnya nawɨ'nya yɨrijava wibwarɨdaakwadelyɨ.
Aalya gaala kɨnɨnnake' nya'neraavɨ makwawodei.
Nabaai Gotɨyai kumɨre tɨnnyaraavɨ yɨmwagathelyɨ.
Kɨdalaalya gazasa' yaalɨka kave yɨmwagathei.
Yɨ sahwara kɨnna ayahi dɨpɨ'dera mɨ'.”
Currently Selected:
Wɨjalangasakyaꞌ 7: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
