Wɨjalangasakyaꞌ 11

A'mwe pwaraai yagaalya' jalɨkurakagɨlya'nesɨ.

1Nɨmɨnyɨna yannyarɨ' wɨjaavɨna. Yanna sarɨ' yaamɨjɨ yunebanna ya'nerɨ', yɨta kaanya yade mavamarya ya'nerɨ'bɨsarɨ'. Yɨ wɨjaavɨna nyaka nɨmɨnyɨ wɨdɨna “Gɨmɨ wawa'gɨzɨ Gotɨyare anga nawɨ'nyavɨ Gotɨyarɨne kwaraanya kɨrɨvɨjɨ yunebanna yaamɨjɨyɨta dakya! Nabaai sahwarɨna lotuya (yɨlaaya) yadɨvɨta a'mweraavɨna ata dɨhi! 2Kɨrɨ' anga nawɨ'nyavɨ kurɨta dazavɨ mwasɨlaa warɨkevɨ yaamɨjɨyɨta mwakɨnna! Sa' yɨ gɨmɨ nayaa yagalya'ma'na jɨ! Waramaryana! Mwasɨmagɨnya daza' yɨ sa' ajɨmya yuyangɨyara mu'nyadɨvɨsaraavɨre' yɨma'nɨwa'. Yɨ sahwara anga naanga nawɨ'nyaba (Jeruzaalemɨ) sɨvɨla paihɨpɨ'dere. Kuna yɨwopɨjɨ lawe 42 (yɨrɨka 1260) yɨdaakupɨ'dehaa'nanyɨ. 3Yɨ nabaai nɨmɨ a'mwe pwaraala dazaraai nɨmɨnyɨ jalɨkurakya'neraarɨna maryasaabɨderaalyɨ. Yɨ saraai bekɨya kale'najɨ sɨmunya mudɨkebwi yawɨramaarya'najɨ sa' baazɨ'ma'nakɨlyɨ yɨ nɨmɨnyɨ nyu'nakɨlyɨ pwaraavɨ wɨjɨwaakikaderaalyɨ. Kuna yɨwokɨlyɨ yune yɨrɨka 1260 sagaa'nanyɨ.” 4Saraai yɨta wolivɨyawaalyɨ. Yɨ laamɨvananya' yɨlakya'newaalyɨ. Yɨ sareraai kwaaka yuyavaakɨne Naangere sɨnnyɨkɨ daakɨlyaraalyɨ. Wolivɨwelivananya' laamɨvananyavɨ dɨka yewɨta'dɨvɨ' baaka wannadevaaibɨ' saraai Gotɨyare Kuryare dɨragɨnyavɨ jalɨkurakikaderaalyɨ. 5Nabaai a'mwe pwai kwai “Saraarɨ kayaa'na yɨgalɨma!” dozɨ yajai, yɨ nabaai saraare maangevɨdaa'nyɨ dɨke' yɨma'nojɨ sahwaraare yɨkamaangeraavɨ dɨka nakadere. Yo, a'mwei “Saraarɨ kayaa'na yɨgalɨma!” dozɨ yajai yɨ sasare dazaburɨ sai balɨna yadelyɨ. 6Saraai dɨragɨnya' kɨnɨnnakeraalyɨ. Yuya sagaa' saraai Gotɨyare yagaalya' wɨ'nyɨna yakɨlyɨ pwaraavɨ wɨjɨwakadaakɨlyɨyagaa'na yɨraaya' galalɨmwagya'ne' yɨ burɨke' maya'ne dɨragɨnya' kɨnɨnnakeraai. Yɨ saraai aalya yuya tawe yɨmawakya'neraai, yɨ a'mwe Kwaakevakɨyaraavɨ kayaaka yɨgalakya'neraavɨ kayaaka dala pɨnɨnnanyajɨ tamya'ne dɨragɨnyasɨyaraalyɨ. Yuya sagaa' saraai “Sara yaka!” dakɨlyɨya' yɨ saraai yɨnɨga wi'na yɨna yɨkaderaalyɨ.

7Saraai kɨrɨmɨre jalɨkurakɨwawɨnya' mena kyɨ'mwannakɨri yɨ sɨgyaarya dazai yɨ yɨrorɨla daanga maayavɨ mwaaidei savɨ yagalya'mavojɨ yɨlaabathelyɨ. Yɨ sai saraalyɨ mala bwa'nɨpɨ'delyɨ. Yɨ sai saraarɨ wavɨla'na yojɨ yɨ saraarɨ tamakɨna yaderaalyɨ. 8Yɨ nabaai anga naanga dazabanya tutaanya naangevakɨ saraare kɨlaakejɨkaai waradezɨkaalyɨ. Anga naanga daza' Kuryai dadeva ke'ba'nanya'na “Sothomɨma, Yɨzɨpɨma,” wo'nɨkesɨ. Sabanyaai Gotɨyare yɨkamaangera mwalyaasabanyaarɨna sara wo'nɨkesɨ. Da anga naanga dazahɨbanna saraare Naangei yɨta yovihɨrarannɨkevɨ balake'. 9A'mwe yuya kɨlaaka dala nabinyajɨ'jɨya pwarajɨ yɨ yɨta savakaavɨyarajɨ yagaala yuyangɨne pwarajɨ ajɨmya yuyangɨya pwarajɨ jalɨkurakya dazaraarɨ tɨnna wangamanɨgasare. Yɨ yɨrɨka darɨkaai darɨ' yojɨ maalɨkegaasɨ yune sagaa'na wangamanɨgasare. Yɨ sahwara a'mwe pwara saraarɨ maralɨkirakya'na “Ya. Gɨlekavi'nɨnnyavɨ wɨlakaana! Wagɨla nuvwa'nadɨka!” yɨnɨga dɨpɨ'dera mɨ'. 10Saraai mena baimwaalya'na a'mwe Kwaakevakɨyara sahwara yɨlaaya yɨpɨ'dere. Yɨ nabaai sahwara kwarame yadɨvɨ', yɨ tɨka wapaa nadɨvɨ' sɨhumale kwɨya'mweraavɨna wɨjaavɨpɨ'dere. Sare' dare'nanyɨ. Gotɨyarɨ wɨ'nadi' a'mwe Kwaakevakɨ mwaaihasaraavɨna wɨdɨwaalya'na dazaraai taanga kayaa'nanya' wɨjaavagɨleraalyɨ.

11Yɨrɨka darɨkaai darɨsɨ maalɨkegaasɨ mena kyɨwa' yɨ nabaai Gotɨyai pwa'nyɨ maku'nya gaala ya'ne' kamaryaasɨwa' saraarɨ kwimwa' yɨ saraai dɨkaa'na yagɨla, yɨ kɨrɨmɨre sɨvɨlyi daavɨna yɨwaalyaraalyɨ. A'mwera saraarɨ tɨnna wanganna yeva lɨka naanga yɨwaa'. 12Yɨ saraai maangwɨraaya pɨrɨ' Sɨgunyavɨdaa'nya' kadɨka wɨ'nyɨna. Yɨ saraarɨ jaka dɨragɨnna dara wɨdɨna “Kɨrɨmɨ munya davanna jɨlaabila!” Yɨ saraai kadɨka wɨ'nyɨna yagɨla munyaba Sɨgunyavɨna yɨraayavɨ yɨlaawɨna. Yɨ saraare yɨkamaangera sara tɨnna wanganna yadaapi saraai yɨlaawɨna yɨwaai. 13Yɨ dazagaasagaa' wɨnɨnya naange' yɨma'nyɨna kyɨwa' yɨ anga naangebanya pimagɨnya pɨvaa' yɨ savaa' kayaaka yɨma'nyɨna. Yɨ anga pimagɨnya naangeba pimagɨnya ata purɨdaa'nyɨ daraai daraalyavaka kuna warɨna. Nabaai wɨnɨnya dazavɨ a'mwe kwalaalyara (7,000) sara mena balɨna. Balɨna kyɨwaa' a'mwe pwara yɨvainɨkera lɨka naanga yadɨvɨ' yɨ sahwara Gotɨya Sɨgunyavɨyarɨne yaya' munyabanna makina yɨwaasaraavɨnera.

14Taanginya naanga daraalya' we' pwaraalya' sa' menanyɨ. Yɨthaanyi! Yune maalɨkegaa'na yojɨ yɨ taanginya daraai dalya' yɨ yarai yɨma'nadesɨ.

Ejelɨya ata purɨdaa'nyɨ daraalyai pihulɨya' pwa'nyɨ makurake'nesɨ.

15Yɨ ejelɨya ata purɨdaa'nyɨ daraalyai gamɨre pihulɨya' pwa'nyɨ maku'na kyɨwa', yɨ nabaai, Sɨgunyavɨdaa'nyɨ maangwɨraaya pɨnɨ jaka naanga'na dɨragɨnna dara dɨna “Nemɨre Naangei Gotɨyai gannya Kɨraazɨtɨyai Kingɨya dahɨlakyaakerɨ maryasaabakelyɨ maremwaalya Kwaakevakɨya yuya gamɨre yɨma'nɨwakengɨ! Yuyagaa' yuyagaa' sai kingɨyai maremwaaidelyɨ.” 16Sara dɨna kyɨwaa' a'mwe naanga tɨwedipoyara Gotɨyare tɨnnyarɨ kunnya kingɨnamwaalyɨsangɨ mwaaidapiyara kumɨre sɨnnyɨ' kwaakewɨnna walaruta'nareva Gotɨyarɨ yɨlaaya yɨna yeva 17dara dɨna

“Naangeigɨ, Gotɨyaigɨ Dɨragɨnya Yuyangɨ Aaya Kaavɨlyaigɨ

Gɨmɨ dahaa' mwaaihɨnyaigɨ kɨgaakuna kuna mwaalagɨneigɨ

Gɨmɨre dɨragɨnya naange' maaragɨna kingɨyaigɨ mwaaihɨnya'na

Yɨ nemɨ gɨmɨnyɨ ‘Su! Su!’ gɨthɨvanɨgo.

18Ajɨmya yuyangɨyara mu'nyadɨvɨsara gɨmɨnyɨna sɨmɨlɨka wɨlakere.

Kɨrɨ' gɨmɨre sɨmɨlɨka naange' mena yɨma'nɨvanɨ'.

Dahaa' kotɨyavɨ yɨ'maya'negaa' bainɨkeraavɨna yɨma'nɨvanɨ'.

Dahaa' gɨmɨre yaasɨwa'wawɨnyaraavɨna tɨvɨkɨta nawɨ'nya wɨjaaya'negaakɨ.

Sara yɨ Gotɨyarɨ wɨ'nawɨjɨwaakadɨvɨsarajɨ, yɨ gɨmɨre tewaanyarajɨ,

Sahwara lɨka yadɨvɨ' gɨmɨnyɨ dalaangewɨ wɨla'nadɨvɨsara

Yɨ a'mwe kwaakewɨnyarajɨ yɨ a'mwe munyabanyarajɨ.

Nabaai dahaa' a'mwe Kwaakevakɨ mwaalyaraavɨ yɨgalakadɨvɨsaraavɨna,

Yɨ sahwaraavɨ kayaaka yɨgalakya'negaa' mena yɨma'nɨvanɨ'.”

19A'mwe naangera mena devegaa' yɨ Sɨgunyavɨ Gotɨyare anga nawɨ'nya' baasɨna kyɨwa' baasɨnɨka kusawɨ yɨ bukuta Gotɨyare wɨlɨmwagarakevɨre' yɨ sa' ku'maayaba warɨna. Bukuta savɨ Gotɨyare kɨwɨnya ye'mwannajaake' wɨlarɨke' dara yawɨrya'nesɨ. Gotɨyai nemɨjɨ ye'mwannamwaalɨkelyɨ. Sa' ku'maayaba warɨna yadɨ'nyɨ yɨnamɨraasavɨre dɨ'baake mwasabɨ' lɨvapɨna, purinya yɨnnyɨna, yɨ'munya pilɨna, kwaakeva' wɨnɨnya' yɨna, sɨrɨmya naange' bwala'na yakengɨ.

Currently Selected:

Wɨjalangasakyaꞌ 11: byr

Highlight

Copy

Compare