Pilipaai 2

Pilipaai mwaalyara avaaizɨmunya'na yawɨsa'na Polɨ yɨlaaya yake'nesɨ.

1Kɨraazɨtɨyai nemɨre sɨmunya' neyɨvaimwadei daakajɨ, Nemɨnyɨna gamɨre wɨvu'nyabwi nemɨre munyɨ' nayaa newa'devwi daakajɨ, Kurya Tewaanyalyɨ ye'mwannamwaaihoina daakajɨ, Nemɨjɨya pwaraavɨna kale neyada tewaanaanga nevu'nadeina daakajɨ, 2yɨ sarevɨdaa'nyɨ nɨmɨre yɨlaaya naangebwi yuna naanga jɨla! Yɨ avaaizɨmunya'na jawɨryidevɨjɨ wɨvu'nya avaala saburɨ jidevɨjɨ kurya avaala gave pɨbwina dɨlɨmwagaryidevɨjɨ gave pɨbwi jawɨryidevɨjɨ yuneba yɨlaaya dɨnyɨgalyɨla! 3Sarɨmɨ yune sarɨmɨnyɨne'na sɨmunya yawɨ'dɨvɨ' aane pɨmɨlɨ' kɨmɨlɨ' mipɨnera! Sarɨnnya yaya munyaba makɨlya'na aane pɨbwi kɨbwi mipɨnera! Aawa. A'mwe pwaraavɨ dalaangewɨ mwaaidɨvɨ' “Sahwara nemɨnyɨ nevɨlapɨka!” jawɨrila! 4Gazaigɨzaigɨ gɨnnya yunenna mamaremwaaidɨnnera! Aawa. Gazaigɨzaigɨ pwaraavɨre sa kɨnɨngɨjɨ dɨmaremwaala!

5Kɨraazɨtɨyai Jizaazarɨ sɨmunya pɨbwi wɨwarakabaaibɨ' sɨmunya avaainanya dɨlɨmwagarila! Darebulyɨ. 6Sahwai Gotɨya nebulyai mwaalaka kɨrɨ' Sɨgunyavɨ Gotɨyalyɨ avaaina mwaalya sabwina kuna lɨmwange'na yawɨrakai mɨ'. 7Aawa. Sai sasare sabwi yagalya'ma'na yaka kunei yɨma'naka a'mwe yaasɨwa'wawɨnyaraavɨrebwibɨ' maarɨna yakei yɨ a'mwei yɨma'nyɨna. A'mwei a'mweraavɨne avaainanyai yɨma'nyɨna yada 8gamɨ sarɨ kwaakewɨ walamarakɨnyɨna. Sara yada Gotɨyarɨ yagaalya mɨdɨnakelyɨ. Nabaai kuna sara yada yune gamɨ balakegaa'na. Yo, yune yɨsavɨri kamaratamarɨmwe' wagɨlyavɨne yɨsavɨ balakegaa'na. Yɨ sarevɨ kwaakewɨ walamarakɨnakelyɨ. 9Sare'na Gotɨyai gamɨnyɨne yaya' munya ke'ba makɨlaka sahwarɨ munya ke'beva mwaaihakelyɨ. Sara yaka Gotɨyai yaya nawɨ'nya' yaya pɨnɨ wavɨlavɨke' wɨjaavakelyɨ. 10“Sɨgunyavɨ mwaaihata yuyarajɨ Kwaakevakɨyarajɨ kwaakevɨ amwihɨlyarajɨ Jizaazarɨne yaya sa' dadɨvɨ' gamɨnyɨ kwadaai gibɨka!” daka yaya nawɨ'nya sa' wɨjaavake'nanyɨ. 11Nabaai a'mwe yuyara kunnya maangisɨ dara jalɨkurakɨpɨ'de'nanyɨ “Jizaazai Kɨraazɨtɨyai sai Naangelyɨra.” Sare'na “Gotɨyai byaannakela!” dadɨvɨ' Nɨmwarɨne yaya' munyaba makibɨ'de'nanyɨ.

“Gotɨyai yɨhɨvadaihasamaarakeihi yɨpɨnengɨ jɨla!” dake'nesɨ.

12Nɨmɨre nyɨvu'nɨvanɨkeihi, Kɨraazɨtɨyai Gotɨyarɨ sara mɨdɨda sarɨmɨnyɨne'na ke'ba'nanya' yakabaaibɨ' “Gotɨyai sara nevadaihasamaarakei daakajɨ,” yɨpɨ'dengɨ jɨla! Yɨ sɨnnawɨ yuyagaa' Gotɨyarɨ mɨdɨnesaihɨlyɨ. Sarɨmɨjɨ yɨhye'mwannemwaaidɨnya yune sagaa'na mɨdɨnetabaaibɨ'na myɨhɨzɨvanɨge. Aawa. Dahaa' menyawɨ nɨmɨ mwaaida'mwi sarɨmɨ naanga kuna dɨmɨdɨnyɨla! Gotɨyarɨna dara yawɨ'dɨvɨ' “Sahwai naangaangei mena ke'ba mwaalɨkelyɨ,” lɨka nayaa yɨwainɨgulɨna yadɨvɨ' dahaakɨgaa' yɨhɨvadaihasamaarakeihi sareihi sara yɨpɨnengɨ jɨla! 13Sare' darevɨdaa'nyɨnyɨ. Gotɨyai sarɨmɨnyɨ kusawɨ yɨhyadelyɨ. Yɨ sarɨmɨre sɨmunyaburɨ gamɨ sai yɨhidɨkaa'bwa'delyɨ. Nabaai gamɨ sare sɨmunya nawɨ'nya kɨnɨnnakebwina wɨvu'nadevaaibɨsanna ya'neihɨrɨ yɨhɨmwaaihadelyɨ.

14Yuya yɨpɨja sa sarɨmɨ kɨnɨmyagaalyajɨ maiyagaalyajɨ nayaa makwasakɨna yadɨvɨ' jɨla! 15“Yɨwetawakya maayaina mwalaana! Nemɨre sɨmunyavɨ kayaa'nanyabwi mwaranna!” dapɨjɨ sara jɨla! Yɨ a'mwe yɨda'maraangebwi yagalya'ma'dɨvɨ' kumɨre sɨmunya naadɨya' yɨnɨkera kayaa'nanyabwi yadɨvɨsaraavɨ tɨnnyaba mwaalyaihi sarɨmɨ Gotɨyare kaimɨraayaihi kayaa'nanya maayaihi sara jɨla! 16Sarɨmɨ yagaala gaalyabwi kɨnɨnnake' maguzaavadɨvɨ' sahwaraavɨ tewaanya sa' wɨjɨwaakadɨvɨsavɨ sarɨmɨ a'mwe Kwaaka jɨhɨnya davakɨyaraayaba baakeihi lɨvamwaaidɨvɨsaihɨlyɨ. Sara yɨpɨjaihɨrɨna Yɨrɨka Kɨraazɨtɨyaregaa' yɨlaaya yɨdeinyɨ. Nɨmɨre yaya' makibɨ'de'nanyɨ. Dara yawɨrɨdeinyɨ. Kumɨnyawɨ nɨmɨ kaanyave'na gazare myadɨ nɨmɨre dɨragɨnya' yaasɨwa' mɨraagɨkɨ'na myeneinyɨ. 17Aawa. Sarɨmɨre Kɨraazɨtɨyarɨ dɨragɨnna lɨmwangebwi yɨ sabwi Gotɨyarɨ wabatɨrɨnya yɨravayɨhu'dɨvɨtabaaibɨsabulyɨ. Nabaai nɨmɨ baimuja' nɨmɨre tawe' dɨmapɨja' waainɨya'bɨ' Naangerɨna wabatɨrɨnya yɨravayɨhu'dɨvɨsavɨ dɨma'dɨvɨtabaaibɨ' yɨ sarevɨ yɨlaaya naanga yɨde'nanyɨ. Yo, nɨmɨ sarɨmɨjɨ yɨlaaya yɨhye'mwannayɨdeinyɨ. 18Sasare savɨ sarɨmɨ yɨlaaya avaaina jɨla! Yo, nɨmɨjɨ yɨlaaya dɨnye'mwannayɨla!

19Nabaai Naanga Jizaazai kyawɨrojɨ maalɨkegaa' sarɨmɨnyawɨnna Timotirɨ maryasaabɨdelyɨ. Sai ayɨna kabozɨ “Sarɨmɨnyɨnenna yawɨramaara'mujɨ nɨmɨre sɨmunya' yɨlaaya naanga yɨma!” da'mujɨ maryasaabɨdelyɨ. 20Sare' darevɨdaa'nyɨnyɨra. A'mwe pwai kwai, Timoti nɨmɨjɨ avaaizɨmunya'na yadeibɨsai kuneinyɨ. Sarɨmɨnyɨ gaimwange'na nebulya'na maremwaalya'ne pwai kuneinyɨ. Sarevɨ Timotirɨ dahɨlakɨwelyɨ. 21Sare' darevɨdaa'nyɨnyɨ. A'mwe yuya pwara kunnya yune yawɨsannenna bɨramaa'dɨvɨsare. Kɨraazɨtɨyai Jizaazarenna maremwaaidɨvɨtara mɨ'. 22Nabaai sarɨmɨ Timotirɨna sɨmunyabwi mena yawɨ'dɨvɨtabaaibɨ' sai a'mwe tewaanyalyɨ. Kaimɨraayai ganɨmaangerɨ gaimwadevaaibɨ' yagaala tewaanyavɨna nɨmɨjɨ ye'mwannawɨdaayolyalyɨ. Sarevɨ sahwarɨ dahɨlakɨwelyɨ. 23Sarevɨdaa'nyɨ nɨmɨnyɨ nyɨma'nadevɨ mena yawɨra'mujɨ sahwarɨ yɨme'nya'bɨ' sara maryasaabɨdelyɨ. 24Nabaai Naangerɨ nɨmɨ dɨragɨnna dara yawɨ'mwa. Maalɨkegaa' nɨmɨ kwainyɨjɨ sarɨmɨnyawɨnna bɨdeinyɨ.

25Nɨmɨ dɨragɨnna yawɨ'manɨge. A'mwe Epapɨrothaaitazarɨ sarɨmɨnyawɨnna yɨme'nya'bɨ' ayɨna maryasaabɨma! Sai nemɨre neya'mwelyɨ. Nɨmɨnyɨ avaaiwawɨnyalyɨ. Mala dazavɨna nɨmɨjɨ nyɨgaidaa'delyɨ. Sarɨmɨ kɨgaa' sahwarɨ nɨmɨnyawɨnna nyɨmaryasaabesai sarei nyɨmudaasakenna nɨmɨnyɨ nyɨgaimwagakelyɨ. 26Gamɨre sɨmunya' sarɨmɨnyɨ wanganya'na wabahɨlaaka wiadevɨdaa'nyɨ sarɨmɨ “Nalaaya kɨnɨnnakelyɨra,” kadɨka wɨ'nɨwa'daasa'na sahwai “Yawɨta kwalaalya nyɨpɨdɨka!” kadɨwa' sarɨmɨnyɨna taanginya wɨwa'manɨ'. 27Yɨ nebulyasɨ. Kɨgaa' nalaaya waraka kɨbawa mena kabaladɨkelyɨ. Kɨrɨ' sahwarɨna Gotɨyai kale wiaka tewaanya yavada'galakelyɨ. Nabaai Gotɨyai kale yune gave sarɨna yakai mɨ'. Aawa. Sai nɨmɨ kwainyɨnajɨ kale wiakelyɨ. Nɨmɨ gamɨre nalaaya'na kale nyakeinyɨ sahwai balajɨ kwajɨ taanginya naange' nɨmɨnyɨ yɨlasa'na kanyadɨka! Sarevɨdaa'nyɨ sarebwi “Aala!” yawɨraka gamɨnyɨ yɨvainɨmwaaihakelyɨ. 28Sarevɨdaa'nyɨ sarɨ kamaryaasa'mujɨ sarɨmɨ tɨnna ayɨna kwanganapɨjɨ “Yɨlaaya jɨla! Nabaai sai sarɨmɨnyɨna sɨmunya kwalaalya yawɨ'manɨke' mi'na yɨma'nade'na nɨmɨre taanginya kɨrɨsɨ myɨma'nanna!” da'mujɨ nɨmɨnyɨ tewaanya dɨragɨnna nyɨvu'nɨwa'. 29Sarevɨdaa'nyɨ kabi'mavojɨ Naangerɨ lɨmwaga'dɨvɨsara kunnya lɨmwaga'dɨvɨta pwaraavɨ maapɨnebaaibɨ' sarɨmɨ yɨlaaya naanga yadɨvɨ' sahwarɨ nayaa dɨmaaryɨla! A'mwe sasare saibɨsaraavɨne yaya' munyaba dɨmakɨlyɨla! Kuna sara jɨla! 30Kɨbawa mena kabaladɨkei Kɨraazɨtɨyare wawɨnyavɨ sai gaala kuna mwaalya'na yawɨ'dei mɨ'. Aawa. Sai wawɨnya' sarɨmɨ yɨnɨga manyɨgaimwagi yɨpɨne'na yawɨ'da “Polɨmɨ wɨgainɨwakevɨ yunebanna yɨ'mwannɨma!” yawɨ'da nyɨgaimwagakelyɨ. Sarevɨdaa'nyɨ sahwarɨ nayaa dɨmaaryɨla!

Currently Selected:

Pilipaai 2: byr

Highlight

Copy

Compare