Yɨvɨru 9

1Sarevɨdaa'nyɨ yagaala wɨlɨmwagaraka aaya mudɨ'nanyavɨ Gotɨyai yɨlaaya'na ya'ne kɨwɨnya pɨnɨ dakakesɨ. Nabaai yagaala savɨne ange' Kwaaka dathavakɨya' mannɨkesɨ. 2Sare' daresɨ. Anga selɨ anga sa' marɨdaakwesa'. Yɨ aaya ku'dɨka yarinɨka pimagɨnya mudɨ'nanyavɨ laamuyalyɨ yɨ'bɨnya Gotɨyarɨ wɨjaaya'ne gɨrɨkula daza kɨnɨnnakesɨ sawaai warɨ'. Ku'dɨka yarinɨka dazavɨna “Ku'dɨka Tewaanyava. (Gɨrɨkita'nanya maayava),” wo'nɨkesɨ. 3Kusawɨnya janne naange' kurɨke'bɨ' tɨmudaakunɨka bulyɨmagɨdaasɨ janne ayahidaasɨ ku'dɨka pɨrɨ' “Ku'dɨka Tewaanya Nebulya'nanyava,” wo'nɨkesɨ. 4Jɨta wabatɨrɨnya yɨravayɨhurya'ne' dɨ'bɨnya golɨya yavɨkarinɨke' ku'dɨka dazavɨ sɨmagɨnyavɨ wa'desɨ. Nabaai kusawɨ bukuta yagaala wɨlɨmwagarakebwi kɨrɨ' warɨkesɨ. Yunewɨnna bwakakɨnɨke' bukuta sare yuya sɨmagɨnya yune golɨyasɨna. Bukusavɨ kusawɨ maa'gula golɨyavɨ wapaaya manaaya' wɨla'dɨ'nyɨya' warɨ'. Nabaai bukusavɨ kusawɨ Eronɨmɨre yadisarɨ' yaalɨka mena yɨnɨkerɨ' kɨrɨ' kwaraka yɨrɨvakerɨ' warɨ'. Nabaai sɨla pwaraai sɨnnawɨ Gotɨyai yagaala wɨlɨmwagarakeburɨya sɨlyaraarɨ pɨkarya yɨdavakeraai warɨ'. Yɨ yuya sa bukusavɨ wɨlakakengɨ. 5Bukuta savɨ Gotɨyarɨ sɨnna tɨka wɨda'devwi munyaba ejelɨyaraaibɨ' pɨvɨnakeraai byaanna dɨragɨnyasɨyaraai yɨlamwaalɨ'. Yɨ saraare pɨyangɨ kwaakewɨ bukusavɨ bwakakya savɨ Gotɨyarɨ sɨnna tɨka wɨda'devwi marasɨ'nya'ne tawe lɨvirɨkurya'nebe. Kɨrɨ' dahaa' yuya dazangɨre aaya kaavɨlya' nɨmɨ tɨvi'nanya'na marima'naabɨdehaa' mɨ'. Kunegaakɨ.

6Yuya daza mena kwara' yɨ pɨrɨ' daresɨ. Yuya yɨrɨkerɨkaavɨ ku'dɨka aaya mudɨ'nanyavɨ mubɨthɨka yɨra'dɨvɨsara kunnya wawɨnya Gotɨyarɨne ya'nera widaawadɨvɨsare. 7Pɨrɨ' daresɨ. Kwarame gazasavɨ yune gave pɨgaa'na ku'dɨka ayahidaasavɨ Yɨra'de Naangei gave pwainanyai wɨlakelyɨ. Nabaai sai yaasɨwa'wɨlya yakai mɨ'. Aawa. Sai tamira'dɨvɨsavɨ tawe' maa'da wɨlakelyɨ. Yɨ tawe pɨrɨvɨ gamɨnne wagɨlya myawɨryade yake marasɨ'nya'nenna yɨ tawe pɨrɨvɨ wagɨlya a'mwera nayaa myawɨryadɨvɨ' yesa marasɨ'nya'nenna Gotɨyarɨna wɨjaavakelyɨ. 8Sasare dazaburɨ Kurya Tewaanyai dara neyɨbwarɨdaakuvanɨ'. Yagaala wɨlɨmwagaraka sɨnnawɨnyavɨya angevɨre wawɨnya kuna warakegaa' janne' kuna tɨmudaakwakegaa' yɨ nemɨre tuta Gotɨyare Ku'dɨka Tewaanya Nebulya'nanyavɨna yɨnɨgulɨke' sa' yɨ ku'maayaba mima'naabyakesɨ. 9Yɨ anga sɨnnawɨnya sa' yɨ dathahaa'nabɨ' dahɨlakake' ke'ba'nanyasɨ. Sɨnnawɨ anga dazavɨ a'mwera Gotɨyarɨna yanga dala pɨnɨnna pɨnɨnnanyajɨ yɨra'dɨvɨta sajɨ wɨjaavadɨvɨsare. Kɨrɨ' yuya sa wɨjaavadɨvɨta sa Gotɨyarɨ ya'ne pware sɨmunyai padaihɨrakyarɨ yune nebulya'na yavada'galanne mɨ'. Yɨ sahwai gannya sɨmunyarɨ kuna yawɨ'na “Nɨmɨre yɨwetawakya' kuna warɨ'.” Sareibɨsara Gotɨyare angevɨ wɨlaawetara mɨ'. 10Yɨ sasare sabwi dara dɨnɨ' “Wapaaya sa dɨnana! Sa kɨmaakɨya manɨnna! Aalya sa dɨnana! Aalya pɨnɨ kɨmaakɨyangɨ. Aalya yɨnya'nebwina sana sana ja!” Yɨ yuya sa kɨlaaka mwasɨmagɨnyavɨ duimwagasɨ'nya'nebulyɨ. Gotɨyai dakake kɨwɨnya yuya daza yɨ sahwara mɨdɨnya'neraavɨna yune aaya mudɨkebwi sahwai nayaa yɨma'naabazahaa'nanyɨ. Kɨraazɨtɨyarɨna yagaala nelɨmwagarɨka mudɨke' dakajahaa'nanyɨ. 11Sare' kɨrɨ' dahaa' Kɨraazɨtɨyai mena yɨma'naaba'. Yɨ sahwai yuya nawɨ'nya yɨma'nakenna nemɨ yɨbwakɨmanɨgongɨne Mubɨthɨka Yɨra'de Naangelyɨ. Sahwai Sɨgunyavɨ Gotɨyaryabanna yɨ selɨ anga naangaange' yɨda'nanya naangevɨ kusawɨ wɨlaawakelyɨ. Selɨ anga daza' Kwaakevakɨya sɨnnawɨnyavɨ wavɨlavɨkesɨ. Daza' a'mwera asɨrajɨ yavɨkarya madeta' mɨ'. Yuya Gotɨyai wakyaakejɨya' sa' mɨ'. 12Kɨraazɨtɨyai anga dazavɨ wɨlya'nei yɨra'dɨvɨsara yetabaaibɨ' memeyavɨre tawesɨ bulɨmakaawoya dɨwɨnyaresɨ maaraka' mɨ'. Aawa. Sahwai balakegaa' tamiraya'ne gannya yune tawevɨna yakelyɨ. Yaka sai anga tewaanyavɨ yuyagaa'ne gave pɨgaa'na wɨla'. Yɨ sai yuyagaa' yuyagaa'ne nemɨnyɨ ayahi mubya yanemaarake'nanyɨ. 13Sare' darevɨnyɨ. A'mwe pwaraavɨre kɨlaakejɨ' Gotɨyare tɨnnyarɨ gɨrɨkita'nanya yɨma'nadaasɨ yɨ yɨra'dɨvɨsara sahwaraavɨ pɨgaa' memeyavɨre tawesɨ pɨgaa' bulɨmakaawoya kwalyare tawesɨ lɨvirɨkureva nabaai pɨgaa' bulɨmakaawoya balya' yune' dɨka yɨra'dɨvɨ' kwaagɨta yovɨrawakadɨvɨsasɨ aalyasɨ gɨrɨkita'nanyaraavɨ lɨvirɨku'dɨvɨkɨ. Sara yadaapi yɨ kumɨre kɨlaakejɨ' tewaanyajɨ' yɨma'naderera. Sara yanne' waraja' 14yɨ Kɨraazɨtɨyare tawe' ya'ne' dazahɨrɨvɨ yune naanga wavɨlavɨkesɨ. Yɨ sahwarɨ yuyagaa' yuyagaa'ne Kurya Tewaanyai wɨgaimwagakei Gotɨyarɨna tamira'dɨvɨsa'bɨsa' gamɨre gaalya' wɨjaavɨnakelyɨ. Yɨ Kɨraazɨtɨyai sarɨ kayaa'nanya aane pɨrɨ' kɨrɨ' wɨwarɨkai mɨ'. Sarei wɨjaavɨnaka sarevɨdaa'nyɨ gamɨre tawe' nemɨnyɨ kɨlaaka gavejɨ'na miwaipɨwagi yannesɨ. Aawa. Sai nemɨre sɨmunyarɨ negaida yɨ dala pɨnɨnnanya balyaburɨ mɨdɨnya'nebwi nemarasɨ'nannesɨ. Gotɨyai gaalyavɨ aaya kaavɨlyarɨ wɨdayaade'na tawe sa' neduimwagasɨ'nannesɨ.

15Sarevɨdaa'nyɨ Kɨraazɨtɨyai yagaala nelɨmwagarɨka mudɨkevɨ yɨwagya'nei nemɨnyɨjɨ Gotɨyarɨjɨ nemariraku'dei mwaalɨ'. Yɨ sahwai yɨwetawakya a'mwera yeta yagaala wɨlɨmwagaraka mudɨ'nanya' kuna marerakegaa' yuya sa marasɨ'nya'nei sahwaraavɨ ayahi mubya yamaarya'nei gannya tawesɨ mena balakelyɨ. Sarevɨ yɨ a'mwera sɨnnawɨ Gotɨyai gannyanna yuyagaa' yuyagaa'nenna wɨjaaya'ne kaimɨraayaraavɨ jaka wɨjɨvwaramaa'dera yune naanga nebulya'na wɨja' yɨ gaala daza' maapɨ'derera. 16Sare' darevɨnyɨ. A'mwera kumɨ balya'negaa' kumɨre gɨlyɨvɨsa maarya'neraavɨna “Yagaalya' yune'na darɨgusakɨma!” dadɨvɨ' pɨkarɨyɨkwirɨ yagaala daza' yɨda'dɨvɨsasɨ. Nabaai kaimɨraayara yagaala dɨragɨnya dazavɨne kuvɨnɨmaangere gɨlyɨvɨsa maarya'negaa' yɨ tɨvɨkɨta daregaakɨ. A'mwera nayaa mena dara kyawɨranganapɨjɨ “Ganɨmaangei pɨkarɨyɨkwirɨ yɨdavakei nebulya'na baimwaka!” sagaa' kuvɨbwaalɨvaangera maa'dɨvɨsagaakɨ. 17Sare' darevɨnyɨ. Balya'negaa'ne pɨkarɨyɨkwirɨ yɨdavakei gaala kuna mwaalajai yɨ gamɨre yagaala dɨragɨnya' yaasɨwa' warɨna yadevɨnyɨ. Yɨ sahwai mena kabalojɨ yɨ yagaala savɨre dɨragɨnya' yɨma'nadesɨ. Sara dɨnɨke' sara yɨpɨ'desɨ. 18Sarevɨdaa'nyɨ Gotɨyare pɨkarɨyɨkwirɨ yɨdavake' yɨ gamɨre yagaala wɨlɨmwagaraka sɨnnawɨnya' yɨ sa' dɨragɨnya' yɨma'naabya'ne'na arɨnga tameve gamɨre tawe' dɨmave'. Yɨ aane pwai kwai mabalyɨ yajɨ kwajɨ yagaala sa' dɨragɨnnake' myɨma'nyɨ kyadɨ'. 19Sare' daresɨ. Aayagaa' Ne Mozɨzai yuya kɨwɨnyavɨya yagaala gazasa' a'mwe yuyaraavɨ wɨjɨwaakakelyɨ. Yɨ dɨvidaa'nyɨ sai tawe bulɨmakaawoya dɨwɨnyaresɨ memeyavɨresɨ maaraka aalyasɨ yegɨrɨlaka sipɨzipɨyavɨre arɨla wayaake' yɨta yɨzopɨyavɨya taanya maalɨkengɨ yewaa'bwaraka yɨ tawe' kɨwɨnyavɨya bukuyavɨ yɨrɨkuraka dɨvidaa'nyɨ a'mwe yuyaraavɨ yɨrɨkurakelyɨ. 20Sara yada dara da' “Tawe da' Gotɨyarɨ mɨdɨnya'neihɨrɨ yɨhɨthakɨwake' gamɨre yagaala yɨhɨlɨmwagarɨka dazavɨ dɨragɨnya yɨvaimwanga ya'nesɨ.” 21Sarebaaibɨ' selɨ angevɨjɨ yuya dazavɨya wɨdaayadɨvɨta yɨlaaya ya'ne sangɨ tawe' yɨrɨkurakengɨ. 22Kɨwɨnyavɨre saburɨne nebawa yuya sa tewaanya nawɨ'nya yɨma'nya'nenna yune tawe savɨna yɨma'nadengɨ. Gɨrɨkita'nanya duimwagasɨ'nadengɨ. Yɨ nabaai tawe' mwalaabi yaja' yɨ Gotɨyai a'mweraavɨre wagɨlya marasɨ'dei mɨ'.

23Sarevɨdaa'nyɨ pɨrɨ' daresɨ. Yuya dazabura Sɨgunyavɨne warɨkebanya ke'ba'nanya dazangɨ, yɨ Kwaakevakɨ angesɨ angevɨya yuyajɨ sangɨ yɨwaipɨwagasɨ'nya'ne yɨra'dɨvɨta dazanna wawɨnya' warɨ'. Pɨrɨ' daresɨ. Sɨgunya gamɨ savɨya tusavɨ yɨwaipɨwagasɨ'nya'ne yɨra'de tewaanya nebulya'nanya' Kwaakevakɨya dazangɨ wavɨlavɨke' ya'nevɨna tɨvɨkɨta naange' warɨ'. Yɨ Kɨraazɨtɨyai Sɨgunyavɨya tusavɨ duimwagasɨ'nya'nei gamɨre gaalya' wɨjaavɨnake'nanyɨ. 24Sare' darevɨnyɨ. Anga tewaanya nebulya'nanya' a'mwera kunnya asɨrajɨ madesavɨ sahwai wɨlakai mɨ'. Yɨ anga sa' Gotɨyare anga nebulya'nanyavɨne yune kwaasɨ kwaasɨ ange'. Yɨ Kwaakevakɨya anga savɨ wɨlakai mɨ'. Aawa. Yune Sɨgunya kɨbeva wɨlakelyɨ. Sahɨbanna dahaa' nemɨnyɨ gaimwagya'nei Gotɨyaryabanna bi'mavamwaalaka nemɨnyɨneba marewɨdadelyɨ. 25Yuya kwarame sangɨna Ku'dɨka Tewaanya Nebulya'nanyavɨ Yɨra'de Naanga kwai tawe gamɨre' mwaryade' wɨjaaya'nei wɨlakabaaibɨ' Kɨraazɨtɨyai kwalaalyagaa' gamɨ sarɨ wɨjaavɨnya'nei Gotɨyaryaba widaawadei mɨ'. 26Nabaai sai kwalaalyagaa' sara yajɨ kwajɨ aaya Gotɨyai Kwaaka wakyaaka dazagaa'daasɨ yaka yɨ dahaasɨ yɨ sai kwalaalyagaa' daange' kamaaradɨ'. Kɨrɨ' aawa. Yuyagaa'ne gave pɨgaa'na yɨrɨka aaya darɨkaavɨ sahwai wagɨlyangɨ tɨvɨkɨsa' sahwai tɨvi'na mubya'nei gamɨ sarɨ tamira'dɨvɨtabaaibɨ' Gotɨyarɨna wɨjaavɨnya'nei Kwaaka davakɨ ku'maayaba yɨma'naabakelyɨ. 27Yɨ a'mweraavɨna gave pɨgaa'na balya'nebwi warɨ'. Nabaai kabalapɨri dɨvidaa'nyɨ Gotɨyai sahwaraavɨ maryawɨbwaradevaaibɨ' 28Kɨraazɨtɨyai yune gave pɨgaa'na a'mwe kwalaalyaraavɨre kayaa'nanyanna makwɨya'nei gamɨ sarɨ yɨra'dɨvɨsa'bɨsarɨ Gotɨyarɨna wɨjaavɨnakelyɨ. Nabaai dɨvi pɨgasaai sahwai bwalyɨ'mavadelyɨ. Kɨrɨ' sai sagaa' kayaa'nanya marasɨ'nya'nei ayɨna baladei mɨ'. Aawa. A'mwera “Sahwai walaabana!” dadɨvɨ' yemwaaimanɨgasaraavɨ nebulya'na yune'na padaihasamaarya'nei ku'maayaba yɨma'naabathelyɨ.

Currently Selected:

Yɨvɨru 9: byr

Highlight

Copy

Compare