Yɨvɨru 10

1Sare' darevɨnyɨ. Mozɨzare kɨwɨnya' yuya tewaanya yɨma'nya'nenna a'mabaalyai kɨnɨnnakesɨ. Sa' dazanna ke'ba'nanya nebula' mɨ'. Kɨraazɨtɨyai ke'ba'nanya nebulyalyɨ. Kwarame gazasavɨ kɨwɨnyavɨya a'mabaalyaibɨsa yɨrayɨrata yadɨvɨta avaainanyangɨ aane pɨgaa' kɨgaa' a'mwe yune nebulya'nanyaraavɨ yɨnɨga wi'na yavada'galanne mɨ'. Yɨ yɨra'dɨvɨta avaainanya sangɨna Kɨwɨnya sa' Gotɨyaryawɨnna bɨpɨjaraavɨ tewaanya yune nebulya'nanyaraavɨ wɨmwaaihade' mɨ'. 2Sa' sahwaraavɨ yavada'galawɨmwaaihajɨ kwajɨ yɨ yɨra'dɨvɨsangɨ ayahi mujaayɨ kipɨdɨka! Sare' dare'nesɨ. Yɨ a'mwera Gotɨyarɨ yɨlaaya wɨmaryadɨvɨ' gave pɨgaa'na yune yɨrasa'ne pɨrɨvɨna kumɨre kayaa'nanyangɨ tɨvi'na duimwagasɨ'nɨpɨjɨ kwajɨ yɨ sahwara kumɨre sɨmunyangɨ wagɨlya' ayahi pɨrɨsɨ mibwakɨnyɨ kipɨdɨka! Sare' midaaka! 3Kɨrɨ' aawa. Kwarame gazasavɨ yɨrata daza' “Yɨ sahwaraavɨ ayahi yawɨpɨka!” dada kumɨre kayaa'nanyanna yadesɨ. 4Sare' darevɨnyɨ. Yɨra'dɨvɨta bulɨmakaawoya kwalyaraavɨre tawejɨ memeyangɨrejɨ sa kayaa'nanya yɨnɨga wi'na nebulya'na marasɨ'nanne mɨ'. Aawaawa. Kuna yawɨ'dɨvɨsare.

5Sarevɨ Kwaakevakɨ Kɨraazɨtɨyai dɨvi yɨsavɨ balya'nei walaabakegaa' aya kɨgaa' sai Gotɨyarɨ dara wɨda'

“Bulɨmakaawoyaraavɨ yɨrasa'najɨ wɨjaaya'najɨ gɨmɨ ‘Aala!’ yawɨ'mwaa.

Kɨrɨ' gɨmɨre sɨmunyaburɨ mɨdɨnya'neinyɨ kɨlaakejɨ' yovɨrawakɨwaanyaigɨnyɨ.

6Dɨkevɨ yuya nasɨ'nya'ne yɨra'dɨvɨsajɨ

Kayaa'nanya marasɨ'nya'nejɨ yɨlaaya gihaimwakeigɨ mɨ'.

7Sagaa' dara gɨthɨwa. Yɨthaa! Gotɨyaigɨ,

Sɨnnawɨ bukuyavɨ nɨmɨnyɨna yɨda'nɨkabaaibɨ'

Gɨmɨrebwi mɨdɨnya'neinyɨ mena bɨwa!”

8Daza' sɨnnawɨnya' wɨdake' “Gɨmɨnyɨne yɨrasa'nejɨ wɨjaaya'nejɨ sangɨna nebwina gɨvu'nadeigɨ mɨ'. Nabaai dɨka yuya nasɨ'nya'ne yɨra'dɨvɨsajɨ kayaa'nanya marasɨ'nya'ne pɨnɨjɨ yɨlaaya gihaideigɨ mɨ'.” Yɨ yuya dazangɨ kɨwɨnya savɨre saburɨna wɨjaavadɨvɨ' kɨrɨ' sara wɨdakesɨ. 9Mena sara wɨdaka sagaa' Gawaalɨvaangei wɨda' “Yɨthaa, gɨmɨre sɨmunyabwi mɨdɨnya'neinyɨ a'mweraavɨre kayaa'nanyanna sahwaraavɨjɨ gɨmɨnyɨjɨ marirakurɨde'na mena bɨwa.” Sarevɨ yɨ sai “Ayawɨdaasa' dazabwi dɨragɨnna marɨdaakwɨma!” daka sɨnnawɨnya sabwi marasɨ'nakelyɨ. 10Jizaazai Kɨraazɨtɨyai Gotɨyare sɨmunya dazabwi mɨdɨda yɨ sɨmunya avaalya' kɨnɨnnakei gannya yune kɨlaakejɨ' yɨrasa'nejɨ' wɨjaava' yune gave pɨgaa'na. Wɨjaavakevɨ aalya neyaka Gotɨyarɨ sɨmunya dazavɨna nemɨnyɨ Gotɨyare tewaanyainaavɨ neyavada'galakelyɨ. 11Pɨrɨ' daresɨ. Yuya yɨrɨkerɨkaavɨ yɨra'de gazaizai daa'da gannya wawɨnya yadelyɨ. Yɨ kwalaalya naangegaa' yɨrata sasare sa'na yadelyɨ. Kɨrɨ' yɨrata daza kayaa'nanya yɨnɨga wi'na nebulya'na marasɨ'nanne mɨ'. Sɨnnawɨnya yɨra'de gazaizai sara daavɨna yada sara yadelyɨ. 12Kɨrɨ', pɨrɨ' daresɨ. Kɨraazɨtɨyai yɨra'de sai yuyagaa'ne yune yɨrata gave pɨrɨ'na kayaa'nanyanna wɨjaavɨnaka yɨ sai Gotɨyare aangasɨrɨ dɨragɨnnakeba walamwaaina yakei mwaalɨ'. 13Sai kuna sara mwaalojɨ Gotɨyaregaa' gamɨre sɨvɨlyɨraarɨ dalaangewɨnna gamɨre yɨkamaangeraavɨ wakadehaa' yɨ yɨrɨka sagaa'na yemwaalɨ'. 14Sare' darevɨnyɨ. Yune yɨrata gave pwaina wɨjaavɨnakevɨ nemɨnyɨ tewaanyainaavɨ neyɨma'manɨkeinaavɨ Kɨraazɨtɨyarɨ mena lɨmwaga'daanyainaavɨ yuyagaa'ne yune nebulya'nanyainaavɨ yɨnɨga wi'na yavada'galanemwaaihakevɨnyɨra.

15Kurya Tewaanya kwalyɨ nemɨnyɨ dara nejalɨkurakɨvanɨ'. Yɨ sare' darevɨnyɨ. Sɨnnawɨ dara dɨnɨkesɨ.

16Kɨwɨnyavɨya yɨrɨka sarɨka mena kwavɨlavojɨ

Yagaala wɨlɨmwagarade dare' sahwarajɨ ye'mwannayɨdeinyɨ.

Naangeinyɨ dɨwa. Yagaala daza' daresɨ.

Kumɨre sɨmunyavɨ nɨmɨre kɨwɨnyangɨ wɨlakɨdengɨ.

Kumɨre yawɨsavɨ dazangɨ pɨkarya yɨdavɨdengɨ.

17Dɨvidaa'nyɨ yagaala jɨvwa'mwange' dara dɨnɨkesɨ.

Nabaai kumɨre kayaa'nanyajɨ yɨwetawakyajɨ tɨvɨkɨta

Sɨmunya ayahi yawɨrɨdeinyɨ mɨka. Arɨkewɨ.

18Yɨ Gotɨyai wagɨla daza mena marasɨ'nyabwi warɨkevɨdaa'nyɨ kayaa'nanyanne tɨvɨkɨsa' yɨrasa'ne wawɨnya' ayahi pɨrɨ' mɨ'. Tɨvi'nanyɨ.

Nemɨ nebulya' nayaa dɨragɨnna lɨmwaga'daa dɨragɨnna daavɨna yaade'nesɨ.

19Yuya sarevɨdaa'nyɨ, nya'mweihi, Jizaazare tawe nemɨnyɨnevɨ Gotɨyaryabanna gamɨre Ku'dɨka Tewaanya Nebulya'nanyavɨ nemɨ dɨragɨnna da'daanyaina yɨnɨga wi'na wɨlaanneine. 20Yɨ daresɨ. Nemɨ wɨlaanne dazaryabanne tuta dɨragɨnnaka mudɨke' Jizaazai gamɨ sai baasa'. Yɨ tuta daza' gamɨ sahwai gaalyavɨ aaya kaavɨlyalyɨ. Sahwai nemɨ wɨlya'neinaavɨna janne naange' kaadihɨsa'bɨsa' tɨmunadaa'dɨsɨyavɨ wɨlakelyɨ. Yɨ nabaai janne daza' gamɨre kɨlaakejɨkɨ. A'mwera Ku'dɨka Tewaanya Nebulya'nanyavɨ wɨlya'neraavɨ janne naange' tihɨ'nɨke' baasakabaaibɨ' gamɨre kɨlaakejɨ' mubɨthɨka yɨrasa'nejɨ' kayaaka yɨgaina'. 21Nemɨ Gotɨyare angevɨyainaavɨ gamɨreinaavɨ nemaremwaaideina Yɨra'de Naangei munyawɨnyai kɨnɨnnakeine. 22Daza nebwina warɨkevɨ nemɨ yuya kwaasɨya marasɨ'nadaa sɨmunya nebulya'nanya' kɨnɨnnakeina yɨ nemɨ Gotɨyarɨ nayaa dɨragɨnna nebulya'na lɨmwaga'daa yɨ sahwaryabanna nayaa gaimakunna wawaana! Jizaazai gamɨre tawejɨ' nemɨre sɨmunyai yuya yɨwetawakya yɨbwakɨnɨkerɨ yɨwaipɨwagasɨ'nya'na yɨrɨkuraka nemɨre kɨlaakejɨ' aalya nawɨ'nyaangesɨ aalya neya'najɨ neyakeina. Yɨ sareina Gotɨyarɨ wɨja'na sara wawaana! 23Nemɨ yuya tewaanya yemwaidaanyabwi ku'maayaba jalɨkurakya' dɨragɨnna lɨmwagaraana! Nemɨ lɨka sangina myaanna! Sa' nemɨ nayaa pada'galalɨmwagaraana! Sare' darevɨnyɨ. Yuya yune naanga nebulya'na Gotɨyai mena dɨnɨkengɨ ya'nenna sai yadelyɨ. 24Nemɨ nemɨre neya'mwe kwaraavɨnajɨ sɨmunya nayaa yawɨraana! Yɨ sɨmunya yawɨsa'na saraavɨ yɨdɨkaasa' pwaraavɨna wɨvu'nade'najɨ wawɨnya nawɨ'nya wɨgaimwabɨ'de'najɨ sara yaana! 25A'mwe pwara yadɨvɨtabaaibɨ' neya'mwerajɨ Gotɨyarɨ yɨlaaya ya'na kwaiyɨ'bwa'nya sabwi myagalya'mavaanna! Aawa. Neya'mwerajɨ sɨmunya yɨwange'na dɨha'bwa'naana! “Yɨrɨka aayarɨ' mena nebawa mɨka!” yawɨranganawaajɨ sarevɨ yɨ nemɨ wawɨnya sa' dɨragɨnna nayaa yaana!

26Sare' darevɨnyɨ. Nemɨ yagaala nebulya'nanya Naangerevɨ mena yawɨramaarona yɨ dɨvi yune nennya saburɨ nemɨ kayaa'nanyaburɨ yamaryadaanya'na kayaa'nanya daza' marasɨ'nya'ne yɨra'dɨvɨsa' aane pɨrɨ' kuna mwari'. 27Aawa. Sara yɨpɨjaraavɨ yune yawɨbwasa' lɨka yɨrɨ'galya'ne' yemwaaibɨ'dera mwaaibɨ'de'nanyɨ. Yɨ wana dɨkange'na na'nade' kayaaka yɨgaidevaaibɨ' yɨ Gotɨyai sahwaraavɨ gamɨre yɨkamaangera sara yɨma'nɨpɨjaraavɨ yɨgalade'nanyɨ. 28A'mwe pwai kwai Mozɨzare kɨwɨnya' mɨdɨnya'na “Arɨkewɨ!” yawɨralɨmwanna yajai, yɨ a'mwe pwaraaina a'mwe kwaraai kwainanyara gamɨre yɨwetawakyabwi tɨnna wanganeva sara jalɨkurakɨpɨja'na a'mwe naangera a'mwe dazarɨna kale mwiannera tamakadɨvɨsalyɨ. 29Yɨ sarɨmɨ a'mwe Gotɨyare Gawaalɨvaangerɨ bule'na wɨjaavajarɨna gara yawɨ'mwaava? A'mwe dazai yɨ taanga naanga Mozɨzarevɨ pari'mavajare tɨvɨkɨsa wavɨlavɨke maaradei midaaka! Yɨ dazai yagaala dɨragɨnya' Gotɨyai nemɨjɨ nelɨmwagarɨkevɨne tawe' sahwarɨ tewaanyarɨ wɨmwaaihya'ne' kɨrɨ' sahwai “Yaasɨwa'nanyasɨ,” yawɨrakelyɨ. Yɨ sai kale gaimwange'ne Kuryarɨ bɨraizɨke' wana kayaa'nanya nebulya'nanyabwi yakelyɨ. Yɨ sahwarɨna be tɨvɨkɨta' maaradelaka! 30Sare' darevɨnyɨ. Nemɨ Gotɨyai dakerɨna mena yawɨ'manɨgo. Dara dɨnɨkesɨ. Kayaa'nanyaburɨ tɨvɨkɨsabwi yɨ sa' wawɨnya' nɨmɨresɨ. Nɨmɨ sainyɨ kayaa'nanya' tɨvɨkɨrɨdeinyɨ. Nabaai sai yagaala pɨrɨ' da' “Yune Naangeinyɨ nɨnnya a'mweraavɨ maryawɨbwarɨderera.” 31Nabaai Gotɨyai gaalyavɨ aaya kaavɨlyai nemɨnyɨ kayaa'nanyanna nerɨvɨkɨrya'nevɨ gamɨre asɨrɨ galalɨmwagata neyaja' yɨ sa' wana lɨka neyɨrɨ'galade' naangaangesɨ.

32Sare kɨrɨ' sarɨmɨnyɨne sɨnnawɨ sagaa'na sɨmunya ayɨna nayaa jawɨrila! Yɨ Gotɨyare baake' sarɨmɨre sɨmunyavɨ yɨhwannakegaa' yɨ dazagaa' Kɨraazɨtɨyarɨ lɨmwagesa'na daanga kwalaalya maareva sahwarɨ myagalya'mayeva kuna dɨragɨnna daaya'neihi yagɨyagɨ wawɨnya naange' yesaihɨlyɨ. 33Yɨ pɨrɨ' daresɨ. Pɨgasa a'mwera sarɨmɨnyɨ a'mwe yuyaraavɨre tɨnnyarɨ marayɨhɨdaakwadɨvɨsare. Yɨ sahwara navaruyagaalya yɨhɨthadɨvɨsare. Yɨ taanginya yɨhɨzaavadɨvɨsare. Nabaai pɨrɨ' daresɨ. Pɨgasa sarɨmɨ sɨrya'mwe taanginya sara maa'dɨvɨsarajɨ avaaina ye'mwannamwaala yadɨvɨ' sarɨmɨ gaimwanga yadɨvɨkɨ. 34Sare' darevɨnyɨ. Kɨraazɨtɨyarɨ lɨmwagesa'na kalavuzangevɨ mwaaidɨvɨsaraavɨna kale yɨhyadaa'nyɨ gaimwagya'neihi sahwaraavɨre taanginyangɨ sahwarajɨ ye'mwannamwaalesaihɨlyɨ. Nabaai “Nemɨre nebulya'nanya Gotɨyai yune naanga nebulya'na wɨja kuna warɨ'. Nabaai sa yuyagaa' waradengɨ,” mena yawɨreva a'mwera Kɨraazɨtɨyareihɨre gɨlyɨvɨta yɨhipalamaareta kɨrɨ' sarɨmɨ yɨlaaya yɨna yadɨvɨ' yɨ wanganakɨna yesaihɨlyɨ.

35Sarevɨdaa'nyɨ sarɨmɨre dɨragɨnna lɨmwanga dɨragɨnaanga dazaburɨ kuna daa'dɨvɨ' myagalya'mapɨna! Aawa. Sa' yɨ gannya tɨvɨkɨta naange' kɨnɨnnakesɨ. 36Sare' darevɨnyɨ. Gotɨyare sɨmunya' mɨdɨnapɨjɨ sahwai sɨnnawɨ yune naanga nebulya'na yɨhɨthake' maarya'neihi kwaamu'nanyaburɨ dɨragɨnna nayaa dɨthaayidevwina dɨmaaryɨla! 37Sare' darevɨnyɨ. Gotɨyare bukuyavɨ dara dɨnɨkesɨ.

Maalɨkegaa'na, nebawana mɨ'.

Dazai nebwina walaabathelyɨ.

Sai yemwaala yadei mɨ'.

38Nɨmɨre yɨda' maraangei nyɨlɨmwaga'devɨ mwaaladelyɨ.

Kɨrɨ' sai lɨka sangina yaja'

Sarɨna nɨmɨre Kuryai yɨlaaya nyɨgaladei mɨ'.

39Kɨrɨ' sarɨmɨjɨ saina a'mwe lɨka sangina myadaa Gotɨyarɨ magɨnyɨrayadaa yɨwɨya yadaanyaina mɨ'. Aawa. Nemɨ a'mwe dɨragɨnna lɨmwadaa gaalyabwi ma'daanyaine nemɨ.

Currently Selected:

Yɨvɨru 10: byr

Highlight

Copy

Compare