Yɨvɨru 8

Gotɨyare anga nebulya'nanya Sɨgunyavɨyavɨ Jizaazai Mubɨthɨka Yɨra'de Naangei yɨvanɨkeburɨnesɨ.

1Yɨ, yagaala dazavɨya mɨnyagɨnya' nemɨ dɨvanɨgo', sa' yɨ daresɨ. Dazai nemɨnyɨne Yɨra'de Naanga sarei kɨnɨnnakeine. Yɨ naangeba namwaalyɨsarɨ aangasɨmagɨ Kingɨya Aaya Mudɨ'nanya Sɨgunyavɨyarevɨ sai mena walamwaalakelyɨ. 2Sai Yɨra'de Naangei Gotɨyare anga gɨrɨ'maaya nawɨ'nyavɨ wɨdaayadelyɨ. Yɨ Selɨ anga daza' yɨleanga nebulya'nanyasɨ. Daza' a'mwe kwai marɨdaakwaka' mɨ'. Aawa. Yune Naangei Gotɨyai daakwakesɨ. Yɨ sahɨbanne wɨdaayadelyɨ. 3Sare' darevɨnyɨ. Yɨra'de Naanga gazaizai a'mweraavɨna Gotɨyarɨ yanga dala pɨnɨnna pɨnɨnna wɨjaaya'nejɨ yɨwetawakyanna Gotɨyarɨne tamiravawɨjaaya'nejɨ wawɨnya'na dahɨlakɨnɨkelyɨ. Sarevɨdaa'nyɨ nabaai nemɨnyɨnei dazai wɨjaaya'ne' kɨnɨnnakerɨne wawɨnya' warɨkelyɨ. 4Sarevɨdaa'nyɨ Kwaaka davakɨ kuna mwaaidori kwajɨ sai yɨra'dei mamwaalyɨ kyadɨka! Yɨ Kɨwɨnyavɨ dɨnɨkabaaibɨ' pwara Gotɨyarɨ yanga dala pɨnɨnna pɨnɨnna wɨjaaya'nera yɨra'dɨvɨsara mwaaihasa'nanyɨ. 5Sahwara Kwaakevakɨya Gotɨyare Anga dazavɨ wawɨnya yɨra'dɨvɨsa' lɨmwaga'dɨvɨsare. Anga sa' anga nawɨ'nya nebulya'nanya Sɨgunyavɨ mannɨkevɨ ke'ba'nanya' a'mabaalyɨnanya' warɨkesɨ. Ne Mozɨzai Gotɨyare selɨ ange' marɨdaakwakegaa' Gotɨyai anga savɨna sahwarɨ dɨragɨnna wɨdakebɨsasɨ. Sare' darevɨnyɨ. Sai dara da' “Gɨmɨ mala nayaa jɨwannana! Yɨnɨga nebulya'na avaala daza' nɨmɨ gɨmɨnyɨ mugunyavɨ givwarɨdaakwebaaibɨ' yɨ anga savɨya yuyangɨ sara javɨkarideigɨnyɨra.” Yɨ Sɨgunyavɨ nebulya'nanya daza' warɨkesɨ. 6Nabaai dahaa' saba Kɨraazɨtɨyai Yɨra'de Naangere wawɨnya' mena maarakelyɨ. Yɨ wawɨnya daza' Yɨra'dɨvɨta Naanga pwaraavɨrevɨ nebulya'na wavɨlavɨkesɨ. Yɨ sai Gotɨyarɨjɨ a'mweraavɨjɨ mariraku'dere yagaala wɨlɨmwagarɨka sa' yagaala wɨlɨmwagaraka sɨnnawɨnyavɨ wavɨlavɨkabaaibɨ' Yɨra'dɨvɨta Naanga pwaraavɨrevɨ nebulya'na wavɨlavɨkesɨ. Nabaai yagaala wɨlɨmwagarɨkebwi Kɨraazɨtɨyarɨne savɨ Gotɨyai yune naanga nebulya'na wɨja yɨ kɨwɨnyavɨ yune naanga nebulya'na wɨjangɨ wavɨlavɨke nawɨ'nya naanga warɨkesɨ. Yagaala wɨlɨmwagarɨka daza' yune naanga nebulya'na wɨja dazangɨ Gotɨyai yɨma'naabakesɨ.

7Sare' darevɨnyɨ. Yagaala wɨlɨmwagaraka sɨnnawɨnya' yɨwetawakya yune maaya' warajɨ kwajɨ yɨ Gotɨyai “Yagaala wɨlɨmwagaraka dazavɨneba dɨviya pɨrɨ' wakɨdeinyɨra,” myawɨri kyadɨ'. 8Sare' darevɨnyɨ. Yɨzɨrelɨyara gamɨre kɨwɨnyavɨ galazekɨvalesaraavɨre yɨwetawakyanna yawɨraka Gotɨyai gamɨre bukuyavɨ da'. Yɨ dara dɨnɨkesɨ.

Naangeinyɨ dɨwa “Yɨthaa! Dɨvi yɨrɨkerɨka yɨma'naabathegaa'

Yɨzɨrelɨyaraavɨre yɨsavaasɨ Juthɨyaraavɨre yɨsavaasɨ saraavɨna

Yɨ nɨmɨ yagaala wɨlɨmwagarade mudɨke' dakɨdeinyɨ.

9Mudɨka daza' sɨnnawɨnya' dakage sa'bɨta' mɨ'.

Kwɨyakwalaangeraavɨ nɨmɨre asɨlyɨ wibwarɨdaakwia'neinyɨ

Yɨzɨpɨ Kwaakevɨ yagalya'mavesaraavɨ makwawegaa'

Kwɨyakwalaangeraavɨ yagaala sa' dake sa'bɨta' mɨ'.

Nɨmɨre yagaala wɨlɨmwagaraka kuna mamɨdɨnyesa'na

Nɨmɨ sahwaraavɨ wanganake,” Naangeinyɨ dɨweinyɨ.

Sarevɨdaa'nyɨ yagaala wɨlɨmwagarade mudɨke' yɨdeinyɨ.

10“Sare' yɨrɨka sarɨka mena kyojɨ

Yɨzɨrelɨyaraavɨre yɨsavaasɨ mudɨka daza' ye'mwannayɨdeinyɨ.”

Naangeinyɨ dɨwa. Yagaala wɨlɨmwagarade sa' daresɨ.

Kumɨre yawɨsavɨna nɨmɨre kɨwɨnyangɨ wɨlakɨdengɨ.

Kumɨre sɨmunyavɨna dazangɨ pɨkarya yɨdavɨdengɨ.

Nabaai nɨmɨ kumɨnyɨ Gotɨyainyɨ mwaalɨdeinyɨ.

Nabaai kumɨ nɨmɨnyɨ a'mwera mwaaibɨ'dere.

11Sarevɨdaa' nyɨ gazaizai gamɨre angebanyarɨ wɨjɨwaakadei mɨ'.

Nabaai gazaizai gathaa'gahwaarɨ wɨjɨwaakya'ne' mwari'.

“Naangerɨ nayaa jawɨrangana!” wɨdathei mɨ'.

Yɨ dazagaa' nɨmɨre a'mwe yuyara nayaa nyawɨrangabɨ'dere.

Maalɨkerajɨ a'mwe naanga kwarajɨ nyawɨrangadaapiya'na

Sara wɨjɨwaakya'ne wawɨnya wɨmudaasadera mɨ'.

12Sahwaraavɨ nɨmɨ kale gaimwanga wide'

Kumɨre yɨwetawakyangɨne tɨvɨkɨta marasɨ'nɨde'nanyɨ.

Yɨ kumɨre kayaa'nanyabwina sɨduta ayahi yawɨrɨdeinyɨ mɨ'.

Sareinyɨ yɨde sare'na yuyara nyawɨrangabɨ'deinyɨ.

Gotɨyare bukuyavɨ sara dɨnɨkesɨ. 13Dɨnɨkevɨna “Mudɨkeva!” dakevɨ yɨ sɨnnawɨnya' aya mena dakɨnɨkesɨ. “Yarai yɨmaannadesɨ,” yawɨrakesɨ. Yɨ yuya aya yɨma'nɨvanɨke yɨ neibɨsangɨ. Sa yune maalɨkegaa'na waradengɨ. Yɨ yɨnahu yuya yɨwɨna yadengɨ. Sarebaaibɨ' yagaala wɨlɨmwagaraka sɨnnawɨnya' sara yadesɨ.

Currently Selected:

Yɨvɨru 8: byr

Highlight

Copy

Compare