Yɨvɨru 7

1Melɨkɨzathekɨmɨna daresɨ. Sahwai Anga Selemɨ kingɨyai maremwalyaa'. Yɨ sahwai Gotɨya Munya Ke'banya Nebulya'nanyare mubɨthɨka yɨra'delyɨ. Sɨnnawɨ Evɨraamɨmɨva kingɨyaraavɨ mala mena dathɨwanna yaka yɨ angebanna ayɨna yagalaawɨna yadaa'nyɨ yɨ tusavɨ Melɨkɨzathekɨ sai sahwarɨ wɨrata'nyɨna yaka tewaanya naanga yanga wɨdakelyɨ. 2Yɨ Evɨraamɨ gɨlyɨvɨta yuya kingɨyaraavɨ maarake jaapalaka ata yuyɨraalya pimagɨnya pɨrɨ' Melɨkɨzathekɨmɨ wɨjaavakelyɨ. Nemɨ Melɨkɨzathekɨma yaya maridaana! Daza' daresɨ. Tewaanya yɨda'maraangeburɨya kingɨyalyɨ. Sai kingɨya Selemɨne kwalyɨ. Selemɨ aaya kaavɨla dazavɨre' daresɨ. Kwaamu'nanyaburɨya kingɨyalyɨ. 3Gotɨyare bukuyavɨ ganɨmaangelyɨ ganaangesɨ sayorɨna madɨnyɨkesɨ. Nabaai sahwarɨ gyakwalaangeraavɨna madɨnyɨke'na sahwara kuneibɨsalyɨ. Nabaai avaainanya'na ganaange' maaraka yɨrɨkerɨ' kunelyɨ. Nabaai gamɨ balya'ne yɨrɨkerɨ' kunelyɨ. Sarenna sahwai Gotɨyare Gawaalɨvaangeibɨsalyɨ. Yɨ Gotɨyarɨna yɨra'dei yuyagaa' yuyagaa' kuna mwaalɨ'.

4Melɨkɨzathekɨ dazarɨna nayaa jawɨrila! Sai yaya naanga nebulya'na yɨma'nakelyɨ. Nemɨre neyakwalaanga aaya mudɨ'nanyai Evɨraamɨ yuya gɨlyɨvɨta malyavɨ maarake yanga muda'. Yɨ sahwai Melɨkɨzathekɨmɨna ata yuyɨraai jaapalaka yɨ atɨraalya pimagɨnya tewaanyanna tewaanyannanya wɨjaava' aaya mudɨ'nanyai. Sarevɨ “Yɨ Melɨkɨzathekɨ a'mwe sai naangaangelyɨreva,” dadaanyɨ. 5Nabaai pɨrɨ' daresɨ. Livaayarɨdaa'nya gyakwalaangera mubɨthɨka yɨra'dɨvɨsare. Sahwaraavɨne kɨwɨnya' dɨnɨkesɨ. Yɨ Gotɨyare kɨwɨnyavɨ dara dɨnɨ' “Yɨzɨrelɨyaraavɨre gɨlyɨvɨta mudɨka yuya atɨraalya pimagɨnya' maapɨka!” Yɨzɨrelɨyara sahwaraavɨ kwɨya'mwe nebulya'nanyara yɨ Evɨraamɨmɨre saanyavaakɨdaa'nyara mwaaleta kɨrɨ' Livaayara sahwara kwɨya'mweraavɨre gɨlyɨvɨta atɨraalya pimagɨnya' maa'dɨvɨsare. 6Pɨrɨ' daresɨ. Melɨkɨzathekɨ sahwai sahwaraavɨre yɨsavaakɨdaasɨ yɨma'nakai mɨ'. Menyalyɨ. Kɨrɨ' sai Evɨraamɨmɨna gɨlyɨvɨsa atɨraalya pimagɨnya' maarakelyɨ. Nabaai Evɨraamɨ Gotɨyare yune naanga nebulya'na wɨja kɨnɨnnakerɨ Melɨkɨzathekɨ sahwai yagaala tewaanya naanga yanga wɨdakelyɨ. 7Nemɨ mena yawɨ'manɨgo. A'mwe yagaala tewaanya naanga yanga yadei sai munyabanyɨ. Yɨ a'mwei sahware yagaala tewaanya naanga yanga wɨdade' maa'dei, yɨ sai kwaakewɨnyɨ. Sareburɨna yagaainake' mwari'. 8Nabaai pɨburaai warɨ'. Yɨ pɨrɨ' daresɨ. Livaayara atɨraalya pimagɨnya maa'dɨvɨtara sahwara a'mwe balya'nere. Yɨ pɨrɨ' daresɨ. Melɨkɨzathekɨ atɨraalya pimagɨnya maarakerɨna dara jalɨkurakɨnɨ' “Sai gaala mwaalɨ'.” 9Yɨ nemɨ yɨnɨga dara daanneine. Nebulyasɨ. Livaayai sai yɨ a'mwe gɨlyɨvɨta atɨraalya pimagɨnya sa' maa'delyɨ. Kɨrɨ' sɨnnawɨ Melɨkɨzathekɨ atɨraalya pimagɨnya' Evɨraamɨmɨre maara'. Yɨ dazarevɨ sai atɨraalya pimagɨnya' Livaayai kwarejɨ maara'. 10Sare' darevɨnyɨ. Melɨkɨzathekɨ Evɨraamɨmɨ tusavɨ wɨrata'nagɨla Livaayai gannya gyakwalaangere saanyavaakɨ kuna yɨ'nadɨ'nyɨ Evɨraamɨ wɨjaavaka kɨrɨ' Livaayai wɨjaava'. Sarevɨ Evɨraamɨmɨjɨ Livaayarevaakɨyaraavɨjɨ wavɨla'delyɨ Melɨkɨzathekɨ.

11Sare'na dara jawɨrila! Yɨzɨrelɨyaraavɨna Gotɨyai gamɨre kɨwɨnya' wɨjaayaburɨ aaya kaavɨlya' yɨ sa' Livaayara Gotɨyarɨna mubɨthɨka yɨra'dɨvɨsabulyɨ. Kɨrɨ' Livaayaraavɨrebwi sabwi Gotɨyarɨna a'mweraavɨ yɨda'maraangeraavɨ nebulya'na wɨmwaaihajɨ kwajɨ dɨvidaa'nyɨ Mubɨthɨka Yɨra'de Naanga geibɨ' yɨma'nakerɨna a'mweraavɨ be'na wɨmudaasanneraavaka! Gawaalɨvaangei Yɨra'de Naangei sai Melɨkɨzathekɨmɨvaavɨne avaainanyai. Yɨ sai Livaayarevaakɨdaasa Eronɨmɨrevaakɨdaasaraavɨ avaainanyaina mɨ'. 12Sare' dara yɨma'nakesɨ. Mubɨthɨka yɨra'dɨvɨsaraavɨre savaa' wavɨla'nya yake'na tɨvɨkɨta dare' warɨ'. Yɨ nabaai kɨwɨnya kɨrɨsɨ nayaa wavɨla'nakesɨ. Yagaala mudɨke' yɨma'naabakesɨ. 13Sare' darevɨnyɨ. Gotɨyare bukuyavɨ dɨnɨka dazai Yɨra'de Naanga mudɨkei yɨ sai yɨta pɨvaakɨyalyɨ. Eronɨmɨrevaakɨyai mɨ'. Sɨnnawɨ kwaraanyaba yɨra'dɨvɨsavɨ wɨdaayakei gamɨre yɨta savaakɨ a'mwei aane pwai kwai mɨ'. 14Sare' darevɨnyɨ. Nemɨ mena yawɨ'manɨgo. Nemɨre Naangei sai Juthare yɨta savaakɨdaasɨ yɨma'nakelyɨ. Yɨ Mozɨzai yɨta dazavaakɨna yɨra'dɨvɨsaraavɨne yagaala aane pɨmɨlɨ' kɨmɨlɨ' majaa'. 15Nabaai tamira'de dazai pwai yɨma'naka yɨ sai Melɨkɨzathekɨmɨvaavɨ avaainanyarɨna nemɨ mena yawɨrangamanɨgo. Yagaala dazavɨre aaya kaavɨlya' wana ku'maayaba warɨ'. 16Sahwai Mubɨthɨka Yɨra'dei yɨma'na'. Gamɨre kɨlaakevɨne kɨwɨnya'nanya' mɨ'. Gamɨre yɨsavaakɨre'na mɨ'. Aawa. Gaalya' yuyagaa' yuyagaa'nevɨre dɨragɨnya yune sahɨrɨsa' yakelyɨ. 17Sare' darevɨnyɨ. Gotɨyare bukuyavɨ dara jalɨkurakɨnɨkesɨ.

Gɨmɨ yuyagaa' yuyagaa'ne Yɨra'dɨnyaigɨ

Yɨ Melɨkɨzathekɨmɨvaavɨ avaainanyaigɨ mwaaidɨnyaigɨnyɨra.

18Sare' darevɨnyɨ. Pɨrɨ' daresɨ. Yɨra'dɨvɨsaraavɨrevaakɨne dakɨnɨke' sɨnnawɨnya' Gotɨyai mena marasɨ'nakesɨ. Yɨ kɨwɨnya daza' dɨragɨnya maaya' nemɨnyɨ yɨnɨga wi'na manegaimwagyade'na marasɨ'nakesɨ. 19Sare' darevɨnyɨ. Ne Mozɨzare kɨwɨnya' Gotɨyarɨna yɨda'maraanga aane pwarɨ kɨrɨvɨ yune nebulya'na yɨma'naabaka' mɨ'. Pɨrɨ' daresɨ. Gotɨyai pɨbwi dara yɨma'naabakesɨ. Gotɨyare kɨwɨnyavɨna maalɨke yemwaalya'nengɨ. Gawaalɨvaangei Yɨra'derɨna naangaange yemwaalya'nengɨra. Yɨ sahwarɨna nemɨ Gotɨyaryaba gidɨkusabanna wawaanneinera.

20Nabaai sahwarɨ Yɨra'derɨ Gotɨyai dahɨlakakegaa' sai yaasɨwa' dahɨlakya mya'. Aawa. Sai yagaala dɨragɨnya' gamɨnne yayavɨna daka yɨ sahwarɨ dahɨlaka'. Sare' darevɨnyɨ. Pɨrɨ' daresɨ. Sɨnnawɨnya yɨra'dɨvɨta sahwara Livaayaraavɨ sara mya'. Yagaalya' yune'na dɨragɨnya' nebulya'na dake'na Livaayara sahwara yɨra'dɨvɨsara yɨma'nya'neraavɨna aane pwai kwarɨ sara madahɨlakya'. 21Pɨrɨ' daresɨ. Gotɨyai gamɨ sai Gawaalɨvaangerɨ yɨra'dei yɨma'nya'nerɨ yagaala dɨragɨnya' gamɨnne yayavɨna dakelyɨ. “Daaina! Nyɨgɨvɨna!” wɨdadɨvɨtabaaibɨ' dɨragɨnna sara dakakelyɨ. Sahwarɨ dara wɨdakelyɨ

“Naangeinyɨ nɨmɨnne yayavɨna nebulya'na mena dena,

Yɨ sahwainyɨ sɨmunya' ayahi maravɨla'nya mye.

‘Yɨra'dɨnya yuyagaa' yuyagaa'neigɨ dɨmwaalago'deigɨnyɨ.’ ”

22Yuya sarevɨdaa'nyɨ yɨ nemɨ yawɨ'manɨgo'nanyɨ. Jizaazarɨna yagaala wɨlɨmwagarɨkebwi yɨ sa' tewaanaangesɨ. Sa' yɨ kɨwɨnya' dakɨnɨka sɨnnawɨnyavɨ wavɨlavɨkesɨ. 23Nabaai pɨrɨ' daresɨ. Sɨnnawɨ a'mwe kwalaalyara yɨra'dɨvɨtara mwaalesare. Yɨ yuyara balya ya'nera yuyagaa' mamwaalyɨ yɨpɨnere. Gazaizai wawɨnya sa' maaraka balake'na yagalya'mavakelyɨ. 24Pɨrɨ' daresɨ. Jizaazai Yɨra'de yuyagaa' yuyagaa'nei kuna mwaaide'na wawɨnya sa' yagalya'mavadei mɨ'. Yuyagaa' sa' lɨmwagaradelyɨ. Sa' makwasakade' mɨ'. 25Sarevɨdaa'nyɨ yɨ sahwai a'mwera gamɨnyɨne'na Gotɨyaryabanna gidɨku' badɨvɨsaraavɨ yɨnɨga wi'na padaihasamaarannelyɨ. Yɨ yuyagaa' yuyagaa' gaalyabulyɨyai mwaaida sahwaraavɨna Gotɨyarɨ marewɨdadevɨ sahwaraavɨ yune'na padaihasamaa'delyɨ.

26Sare' darevɨnyɨ. Mubɨthɨka Yɨra'de Naanga sasare dazai nemɨnyɨ negaimwagya'nelyɨ. Yunebannanyalyɨ. Sai Gotɨyarɨ yɨlaaya wigaidei gɨrɨ'maayai nawɨ'nyalyɨ. Yɨ dazarɨ kayaa'nanya aane pɨrɨ' kɨrɨ' warɨka' mɨ'. Yunebanna yune nawɨ'nyaangelyɨ. Yɨ yɨwetawakya maayalyɨ. Yɨ kayaa'nanyara yadɨvɨtabaaibɨ' sai yadei mɨ'. Sai nebulya'nanyai nabinyalyɨ. Sarɨ Sɨgunyavɨ munya ke'bevanya'na Gotɨyai makɨlaawakelyɨ. 27Sahwai Yɨra'dɨvɨta Naanga pwarabɨsai mɨka! Sai kayaa'nanyabwi myadevɨna gamɨre yɨwetawakya'na marasɨ'nya'nei kwaraanyaba sipɨzipɨyarɨ yɨrasa'na wɨmudaasadei mɨka. Sɨnnawɨnyara yuya yɨrɨkerɨkaavɨ aayagaa' kumɨre wagɨlya marasɨ'nya'na kwaraanyaba sipɨzipɨyarɨ kumɨnnedaasɨ yɨra'na yadɨvɨsare. Yɨ nabaai ayahi dɨvidaa'nyɨ a'mweraavɨre wagɨlyanna avaaina yadɨvɨsare. Sarei mɨka! Sare' darevɨnyɨ. A'mweraavɨre wagɨlyanna sai wɨjaavɨnya'nei gamɨ sarɨ yuyagaa'ne gave pɨgaa'na yakelyɨ. Sahwai gamɨre gaalya' Gotɨyarɨna wɨjaavakelyɨ. 28Sare' darevɨnyɨ. Mozɨzare kɨwɨnya' a'mwe yɨra'dɨvɨtara yɨma'nya'nera dɨragɨnya maayara mwaaidɨvɨta kɨrɨ' sahwaraavɨ dahɨlakadesɨ kɨwɨnya'. Kɨrɨ' Gotɨyare yagaalya' gamɨre yayavɨna yagaala dɨragɨnyasɨ kɨwɨnyavɨ dɨvidaa'nyɨ yɨma'nake' yɨ sa' Gawaalɨvaangerɨ dahɨlakakesɨ. Yɨ Gawaalɨvaanga sahwai yuyagaa' yuyagaa'ne yune nebulya'nanyai yune yɨda'maraangei mwaaidelyɨ. Yɨ sahwai nemɨnyɨna yuyagaa' yuyagaa'ne Yɨra'de Naangelyɨ.

Currently Selected:

Yɨvɨru 7: byr

Highlight

Copy

Compare