Yɨvɨru 6

1Kaimɨraayarabɨsaihi kuna namwaaibɨthɨka! Sarevɨdaa'nyɨ nemɨ Kɨraazɨtɨyarɨne yune yagaala mudɨ'nanya sasare savɨna mamwalaanna! Aawa. Nemɨ kuna wawaajɨ a'mwe naanga mena yɨnɨkerabɨ' yagaala naangebwina daana! Yɨ kwalaalyagaa' nemɨ angevɨne lɨkɨla ayɨna, ayɨna yadaanyabaaibɨ' yagaala yune mudɨ'nanyanna madaanna! Mudɨ'nanya darengɨ. A'mwera kayaa'nanyabwi balya'bɨsabwina yagalya'maya'nera sɨmunya mudɨka nayaa yawɨramaapɨka! Yɨ sara yapɨjɨ Gotɨyarɨ nayaa lɨmwabɨka! 2Nabaai pwara sahwaraavɨ dara wiwɨripɨka! Yɨ aalya yɨnya'ne dala pɨnɨnna pɨnɨnnanya nayaa yawɨbwapɨ'de'nanyɨ. Yɨ Kɨraazɨtɨyare kusɨlaanyavɨ wɨlya'nesɨ Kurya Tewaanyarɨ maarya'nesɨ sahwaraavɨ ata dathɨwabɨ'de'nanyɨ. Yɨ Gotɨyai a'mwe yuya bainɨkeraavɨ ayɨna yɨdɨkaavade'nanyɨ. Yɨ Gotɨyai a'mweraavɨ maryawɨbwarojɨ yuyagaa' yuyagaa'ne tɨvɨkɨsabwi wɨjaavade'nanyɨ. Sara wiwɨripɨ'desɨ. 3Nabaai Gotɨyai “Ya!” daza' yɨ nemɨ mudɨ'nanya sasarenna mujɨ yawaajɨ naangenna yɨhɨthaana!

4Sare' darevɨnyɨ. Jizaazarɨna nayaa jawɨranganyɨla! A'mwera Kɨraazɨtɨyarɨne bule'na wɨjaavɨpɨja' sahwara sɨmunya mudɨke' maarya'neraavɨ yɨnɨga wi'na ayɨna gara wɨmwaihaanneraavaka! Sahwara pɨgaa' Gotɨyare baake' kumɨre sɨmunyavɨ mena wannakera. Yɨ sahwara Sɨgunyavɨdaa'nyɨ walaabake yange' mena nagaanganesare. Yɨ Kurya Tewaanyarɨ sahwara ye'mwannamaaresara. 5Yɨ Gotɨyare yagaalya' yaamɨjɨ yadɨvɨ' dara yawɨresare “Yɨ sa' tewaanya nawɨ'nyaange'.” Yɨ Gotɨyare dɨragɨnya nawɨ'nya dɨvi yɨma'nya'ne'na mena yɨbwakɨnesara. 6Yɨ sarera sara mwaaibɨza' kɨrɨ' wala'daawadɨvɨ' Kɨraazɨtɨyarɨ bule'na wɨjaavɨpɨja' kumɨre tusa' sɨmunya mudɨkebwi ayɨna yawɨramaarya'ne' yɨ aawa. Yɨ sasare dazabwi kumɨ kwara Gotɨyare Gawaalɨvaangerɨ yɨsavɨri ayɨna tamarɨmupɨ'devaaibɨsasɨ. Sahwara tamarɨmupɨjarɨ ku'maayaba a'mwera bɨrala dangabɨ'delyɨra. Sare'na mala nayaa jɨwannyɨla!

7Sare' darevɨnyɨ. A'mwera darerera. Kwaaka kwalaalyagaa' burɨke' waidaavadevɨ tɨka munne maranya'ne nawɨ'nya yɨrɨ'devakɨ Gotɨyai tewaanya naanga yanga yadevakɨra. Yɨ a'mwe Gotɨyai nawɨ'nyangɨ wɨjaavadera nawɨ'nyabura nayaa yadɨvɨsaraavɨ sahwai tewaanya naanga yanga yaderera. 8Kɨrɨ', nabaai pwara nawɨ'nya myadɨvɨsara darerera. Kwaaka yune wɨla langa kɨnɨnnaka dala pɨnɨnna pɨnɨnnanyajɨ kurɨvaarɨya dala pɨnɨnna pɨnɨnnanyajɨ yɨrɨ'deva' kayaa'nanyavakɨ. Sava' Gotɨyai kayaaka yadevɨna yɨ nebawa mɨ'. Dɨvidaa'nyɨ yɨ dɨke' nakadevakɨra.

9Sarɨmɨnyɨna nyɨvu'nadeihi, dahaa' nemɨ yagaala taanginya daza' dɨwo. Kɨrɨ' nemɨ sarɨmɨnyɨna nebulya' yawɨramaa'manɨgo. Yɨ sarɨmɨ sasare sabwi wavɨla'dɨvɨ' kayaaka sasara jideihi mɨ'. Aawa. “Gotɨyai padaihasamaarakeina mwalaaja' nemɨ sareina nawɨ'nyabwina yaadeinera,” dɨthɨnyideihɨlyɨ. 10Sare' darevɨnyɨ. Gotɨyai yɨda'na myadei midaa'! Sahwai wawɨnya yuya sarɨmɨ yeta sanna sɨmunya navɨka yadei midaa'! Sarɨmɨnyɨ Gotɨyarɨna yɨhɨvu'nadaa'nyɨ gamɨre a'mwe tewaanyaraavɨ gaimwange'na wɨdaayesaihɨlyɨ. Yɨ sasare sara kuna yadɨvɨsaihɨlyɨ. Yɨ daza' sarɨmɨnyɨ Gotɨyarɨna yɨhɨvu'nadevwi wibwarɨdaakwadesɨ. Sare' sahwai yɨda'nanyai sarɨmɨnyɨna navɨka yadei mɨ'.

11Yɨ nemɨnyɨ tewaanya dara nevu'nɨvanɨ'. Sarɨmɨnyɨdaa'nya gazaizai Kɨraazɨtɨyarɨ dɨragɨnna lɨmwadevwi avaainanya' kuna wibwarɨdaakwana! Yɨ pada'galalɨmwanga yadɨvɨ' Gotɨyai nedakenna kwaamu' jemwaalyɨla! Kuna yɨwawagopɨjaihi yune yɨwɨya yaja sarɨmɨregaa'na sasara yune dɨragɨnna jɨla! 12Sarɨmɨ maa'na nayɨhinadɨka! Aawa. A'mwera nebulya'na dɨragɨnna lɨmwaga'dɨvɨsara maa'na yarai mwinyakera mwaaidɨvɨ' dɨragɨnna daa'dɨvɨ' sɨnnawɨ Gotɨyai yune naanga nebulya'na dake gamɨreraavɨ wɨjaaya'na yuya kuna maa'dɨvɨsaraavɨrebwi sarɨmɨ nayaa pada'galamɨdɨnya jɨla! 13Sare' darevɨnyɨ. Sɨnnawɨ Gotɨyai Evɨraamɨmɨ yune naanga nebulya'na wɨja' yagaala dɨragɨnya' wɨjaa'. A'mwei naangei yaka Gotɨyarɨ wavɨlavɨkei aawa. Yɨ a'mwei pwai mɨ'. Pwarɨne yayavɨ Gotɨyai yagaala dɨragɨnya' wɨja'nei mamwaalyɨ'. Aawa. Sarevɨdaa'nyɨ yɨ Gotɨyai yagaala dɨragɨnya' gamɨnne yayavɨna wɨjaakelyɨ. 14Sahwai dara wɨjaa' “Nɨmɨ yagaala nebulyava'na dɨwa. Yɨ nɨmɨ gɨmɨnyɨ tewaanya naanga yanga yune'na gideinyɨ. Yɨ nɨmɨ gɨmɨre dɨviya jakwalaangeraavɨ kwalaalya kwalaalyaraavɨ gimavɨgɨmwaaihidere.” 15Sarevɨdaa'nyɨ Evɨraamɨ dɨragɨnna lɨmwaga'da maa'na winyaakei mamwaalyada yemwaaina yaakevɨ dɨvidaa'nyɨ “Sara gideinyɨ,” wɨjaakabaaibɨ' sahwai sara maryaakebulyɨ. 16Sare' darevɨnyɨ. Yagaala dɨragɨnya' nebulya'na javwi yɨ sa' daresɨ. A'mwera yagaala dɨragɨnya' ja'negaa' sahwaraavɨne wavɨla'dere yayavɨ nebulya'na dadɨvɨsare. Nabaai yagaala dɨragɨnya sa' yuya yagaainakeburaavɨna yɨ a'mwe pwaraavɨre maangengɨ kaanya tihɨralɨmwagata ya'nesɨra. Yɨ dazasa' yagaala sangɨ aaya kaavɨlya' tɨvi'nanyasɨ. 17Sarevɨ Gotɨyai gamɨre kaimɨraayainaavɨ gaimwange'na “Nɨmɨre yagaala dazavɨ maravɨla'nya ya'neinyɨ mɨ'. Sahɨrɨ' wana ku'maayaba yɨbwarɨdaakuma!” dakelyɨ. Sara dada yɨ sahwai yune gannya yagaalyavɨ dɨragɨnya yɨwagya'ne'na yagaala dɨragɨnya' nebulya'na dakelyɨ. 18Nabaai sawaai yune naanga nebulya'na wɨjasɨ yagaala dɨragɨnyasɨ sawaai maravɨla'nya mi ya'newaai kɨnɨnnakeine. Yɨ pɨrɨwaala daza'na Gotɨyai kwaasɨ dannei mɨ'. Arɨkewɨ. Yɨ dazawaai nebulya'na dɨragɨnya yɨvaimwanga neyadewaalyɨ. Nemɨ a'mweinaavɨre sɨmunyangɨ lɨkaanya wodaa Gotɨyarɨ gidɨkusaba lɨka yulya'daanyainaavɨ. Gotɨyai nemɨnyɨna yune naanga nebulya'na dake'na nemɨ Gotɨyarɨ nayaa pada'galalɨmwagata yadaa nemɨ sahɨrɨ' kuna yemwaalyabwina maarya'neina sahwaryawɨ lɨka yulya'daanyaine. 19Sɨpɨya' wɨla naangevasɨ yɨ'dɨvaidevaaibɨ' nemɨre Jizaazarɨ yemwaalyabwi sahwarɨ nevwɨyadevaaibɨ' sahwarɨ dɨragɨnaanga lɨmwaga'daanyaine. Gotɨyarɨna Mubɨthɨka Yɨra'dɨvɨta Naangera Gotɨyare angevɨ kusawɨnya jannevɨ wɨlaaweva kusawɨ yunewɨnna widɨvɨtabaaibɨ' Jizaazai Sɨgunyavɨyavɨ wɨla'. Nabaai Jizaazarɨ yemwaalyabwi Gotɨyaryabanna nemɨre sɨmunyavɨ marima'naabadesɨ. 20Yɨ sahɨbanna Sɨgunyavɨ ku'dɨka yarinɨka dazavɨ sɨnnawɨ Jizaazai gamɨdaasɨ nemɨnyɨ negaimwange'na wɨlakelyɨ. Yɨ sahwai nemɨnyɨne'na Mubɨthɨka Yɨra'de Naangei yuyagaa' yuyagaa'nei Melɨkɨzathekɨmɨvaavɨ avaainanyai yɨma'nakelyɨ.

Currently Selected:

Yɨvɨru 6: byr

Highlight

Copy

Compare