Yɨvɨru 5

1Gotɨyarɨna Yɨra'de Naanga gazarɨzarɨ dahɨlakyabwi sa' daresɨ. Gotɨyai a'mweraayawɨdaa'nyɨ a'mwe pwarɨ dahɨlakada Gotɨyare wawɨnyangɨnei wɨmwaaihadelyɨ. Gotɨyareraavɨ gaimwagya'nei Gotɨyaryaba sahwaraavɨna marewɨdadelyɨ. Yɨ sahwai Gotɨyarɨ yanga dala pɨnɨnna pɨnɨnna wɨjaaya'nejɨ wagɨla marasɨ'nya'ne'na Gotɨyarɨne tamiravawɨjaaya'nejɨ wawɨnya kɨnɨnnakelyɨ. 2Gamɨ sai pɨburaavɨna dɨragɨnya maayai mwaaidevɨna a'mwe sɨmunya maayara Gotɨyare tusavɨ yagalya'ma'dɨvɨsaraavɨna yɨbwakɨda kave yɨnɨga wi'na bwiwanna wɨdannelyɨ. 3Sahwai yune dɨragɨnyai mamwaalyadevɨ a'mweraavɨre wagɨlya marasɨ'nya'nei Gotɨyarɨ tamiravawɨjaavadevaaibɨ' gamɨ kwarɨnajɨ tamiravawɨjaaya'ne tɨvɨkɨta warɨ'. 4Mubɨthɨka Yɨra'de Naangere wawɨnya daza' yaya naange' kɨnɨnnakesɨ. A'mwe aane pwai kwai yune gamɨre saburɨdaasɨ wawɨnya daza' maa'dei mɨ'. Aawa. Gotɨyai Ne Eronɨmɨ Yɨra'de Naanga sɨnnawɨnyarɨ jaka wɨjaakabaaibɨ' a'mwe sarɨ jaka wɨdadaasɨyagaa' sahwai wawɨnya daza' lɨmwadelyɨ. 5Sarebaaibɨ' Kɨraazɨtɨyai kwalyɨ sarelyɨ. Sahwai byaannyavɨ yune gamɨnne yaya'na munyaba mamakɨlyada Yɨra'de Naangei yɨma'nakai mɨ'. Aawa. Gotɨyai gamɨ sai sahwarɨ wawɨnya daza' ya'nerɨ dahɨlakakelyɨ. Sarevɨna sahwarɨ dara wɨda'

“Gɨmɨ nɨmɨnyɨ Nyɨbwaalɨvaangeigɨnyɨra.

Dahaa' Gɨmaamaangeinyɨ gɨmwaaihɨweigɨnyɨ.”

6Nabaai sabaaibɨ' pimagɨnyavɨ dara da'

“Yɨra'dɨnya yuyagaa' yuyagaa'neigɨnyɨ.

Melɨkɨzathekɨmɨvaavɨrebwina avaainanyaigɨnyɨ gɨmwaaihɨweigɨnyɨ.”

7Kɨgaa' Jizaazai Kwaakevakɨna kɨlaa'nakei mwaalakegaa' sahwai Gotɨyarɨ wɨdada yɨdaanganakelyɨ. Yɨ sahwai jaka naangesɨ kɨdaraalyajɨ Gotɨyai balyavɨ yɨnɨga wi'na maarannerɨ wɨdakelyɨ. Sahwai gannyabwi kwaakewɨ marulawakada yɨ Gotɨyarɨ dalaangewɨ wɨla'na'da sarevɨ yɨ Gotɨyai gamɨre yagaala wɨdakevɨ kadɨka wɨ'nakelyɨ. 8Sahwai Gotɨyare Gawaalɨvaangei kwai kɨrɨ' sahwai daange' maarakevɨ Gotɨyarɨ mɨdɨnya'na sasare sabwina gamɨre sɨmunyavɨ nebulya'na yɨwɨryakelyɨ. 9Daza' yɨ Gotɨyarɨne yune nebulya'nanyarɨ marima'na'. Sarevɨ sahwai a'mwe yuyara gamɨnyɨ mɨdɨdɨvɨsaraavɨ yuyagaa'na wɨvadaihasamaarannelyɨ. 10Yɨ Gotɨyai sahwarɨ dahɨlakaka dɨragɨnna wɨda' “ ‘Gɨmɨ Mubɨthɨka Yɨra'dɨnya Naangeigɨ,’ gɨthɨwa! Melɨkɨzathekɨmɨvaavɨ avaainanyaigɨnyɨra.”

11Melɨkɨzathekɨ ke'ba'nanyarɨne yagaala kwalaalya warɨ'. Yɨ nemɨ sanna yɨhɨthaathe'nanyɨ. Kɨrɨ' dahaa' sarɨmɨre sɨmunya kaanya tihɨ'nɨka yɨ sɨmunya yɨme'nya'bɨ' yawɨrarɨlaaya myaihɨlyɨ. Sarevɨ sarɨmɨnyɨ yɨbwarɨdaakwia'ne yagaala dazavɨre aaya kaavɨlyavɨ yɨ nemɨ yagɨyagɨ wawɨnya' kɨnɨnnakeine. 12Sare' daresɨ. Kɨgaakuna Kɨraazɨtɨyarɨ lɨmwagesaihɨlyɨ. Yɨrɨkerɨ' sarɨmɨ wɨjɨwaakyaihi mwaalya'na yɨnɨga wi'na yɨwaa'. Kɨrɨ' aawa. Yɨ a'mwei pwai sarɨmɨnyɨ mudɨ'nanya aaya kaavɨla Gotɨyare yagaalya' ayahi nayaa yɨhɨzɨwaakya'nerɨna sarɨmɨnyɨ sɨmunya'na tuta yɨhɨmudaasɨvanɨ'. Yɨ bwaranyai yune aamunya' maarya'nerɨ wɨmudaasadevaaibɨ' mudɨ'nanyanna yɨhɨmudaasɨvanɨ'. A'mwera wapaaya dɨragɨnya nya'neraavɨ wɨmudaasadevaaibɨ' sarɨmɨ yagaala naangenna yɨnɨga wi'na wɨ'namaapɨneihi mɨ'. 13Sare' darevɨnyɨ. Gazaizai mudɨ'nanyanna kuna yaamɨjɨ yawɨ'dei sɨmunya yɨda'maraangebwina nayaa yawɨ'dei mɨ'. Yɨ bwaranyai yune aamunya' nadevaaibɨsa'nanyɨ. 14Nabaai kɨrɨ' wapaaya dɨragɨnya a'mwe naangera nadɨvɨtabaaibɨ' Gotɨyarɨne aayanna a'mwe sɨdu'nakeraavɨnengɨra. Sahwara nawɨ'nyanna yadɨvɨsare. A'mwe sasarera yɨ kwalaalyagaa' kunnya sɨmunyangɨ yɨwɨrinya yadɨvɨsare. Yɨ sahwara nawɨ'nyabulyɨ kayaa'nanyabulyɨ mena wi'na maryawɨbwarya'nera kuna nayaa yadɨvɨ' yɨwɨrinya yadɨvɨsare. Kɨrɨ' sarɨmɨ aawa.

Currently Selected:

Yɨvɨru 5: byr

Highlight

Copy

Compare