Yɨvɨru 4

Gotɨyare a'mweinaavɨna kwaamusabanna mwaalya'nebwinesɨ.

1Sarevɨdaa'nyɨ nayaa jawɨrila! Gotɨyare yune naanga nebulya'na yagaala dakɨnɨke' nemɨnyɨne' kuna warɨ'. Yɨ sai dara dɨvanɨ' “Sarɨmɨnɨku' nɨmɨre kwaamusaba wibɨneihɨlyɨ.” Sare' kɨrɨ' nemɨ lɨka dara yaana! O, Gotɨyai tɨnna nengada nemɨnyɨdaa'nya kwai pwarɨna dara najɨdavadɨka! “Sahwai menyawɨ yalawakada dazavɨ yɨ yɨwɨna yɨvanɨkelyɨ.” 2Sare' darevɨnyɨ. Sɨnnawɨ a'mwamaayaba mwalyaasara Gotɨyare yagaala kwaamusa'ne' wɨ'nyaatabaaibɨ' nemɨ yagaala tewaanya sa' kadɨka wɨ'noinera. Kɨrɨ' nabaai sahwara kadɨka yaasɨwa' wɨ'nyɨna yeva dɨragɨnna malɨmwagi yaa'. Yagaala daza' wɨ'neva dɨragɨnna mye'mwannalɨmwagaryaasare. Sarevɨ yagaala daza' sahwara kadɨka wɨ'nesa', sa' yɨ sahwaraavɨ gaimwanga mwiaa'. 3Sare' darevɨnyɨ. Nemɨ dɨragɨnna lɨmwaga'manɨgoina kave kwaamu' mwaalya'ne dazaba wɨlaadeine. Yɨ sɨnnawɨ Gotɨyai malɨmwagyadɨvɨsaraavɨna dara dɨnɨkesɨ.

Sare'na nɨmɨnyɨ sɨmɨlɨka nyuidaa'nyɨyavɨ

Yagaala dɨragɨnya' dara jalɨkurakyaa

“Kwaaka kave kwaamu' kujaavɨwɨdɨkeba

Sahwara kusawɨ bwibɨ'dera mika!”

“Sa' wana naanga nebulya'nanyasɨ.”

Sahwai sara daka kɨrɨ' nabaai sɨnnawɨ Gotɨyai Kwaake' mena wakyaakegaa' kwaamusabwine' mena dakɨnɨkesɨ. Sagaa' kwaamusavɨ mwaaida nemɨnyɨna yemwaaidelyɨ. 4Sare' darevɨnyɨ. Gotɨyare Bukuyavɨ yɨrɨka asi ata purɨdaa'nyɨ daryaalyarɨkɨna dara dɨnɨ' “Gotɨyai gamɨre wawɨnya yuya sa mena yaka yɨrɨka asi ata purɨdaa'nyɨ daryaalyarɨkɨ kave kwaamu' mwaala'.” 5Sɨnnawɨ mi'na yɨhɨthɨwevɨ (3:11,4:3) Gotɨyai Yɨzɨrelɨyaraavɨna dara wɨda'

“Kwaaka kave kwaamu' kujaavɨwɨdɨkeba

Sahwara kusawɨ bwibɨ'dera mɨka!”

6Yagaala daza' “Pwara gamɨre kave kwaamu' mwaalyaba wibɨ'dere,” kuna warɨ'. Nabaai sɨnnawɨ yagaala tewaanya' kwaamusaburɨne' wɨ'neta sahwara yagaala sa' galazekɨvala yesa'na kusawɨ wɨletagaa' mɨ'. 7Sarevɨdaa'nyɨ yɨ Gotɨyai yɨrɨka pɨrɨ' ayahi dahɨlaka'. Sahwai yaya da' yɨrɨka dazarɨ'na “Dahaaka.” Sɨnnawɨnyara galazekɨvala kye' kwarame kwalaalya mena kabwawa' Gotɨyai Devitɨmɨre maangikɨ yagaalya' da'. Mi'na yɨhɨthɨwe' dara dɨnɨ'

“Dahaa' Gotɨyare maangwɨraaya' kadɨka wɨ'nɨpɨja'

Sarɨmɨre sɨmunya' kaanya wana dɨragɨnna marihɨremwaaibɨna!”

8Sare' darevɨnyɨ. Sɨnnawɨ Jozuwaa' saraavɨ kwaamu' mwaalyabwi wɨjaavajɨ kwajɨ sagaa'daa'nyɨ yɨrɨka pɨrɨ'na Gotɨyai mujɨ kyadɨka!

9Sarevɨdaa'nyɨ dara yawɨ'manɨgo. Sɨnnawɨ Gotɨyai yuya wakaka yɨrɨka ata purɨdaa'nyɨ daryaalyarɨkɨ kwaamu' mwalyaakabaaibɨ' Gotɨyare a'mweraavɨne kave kwaamu' mwaalya' kuna warɨ'. 10Sare' darevɨnyɨ. A'mwei Gotɨyare kave kwaamu' mwaalyaburɨ wɨlajai sai gannya wawɨnya' mena yɨ'mwannojɨ kwaamu' mwaaladelyɨ. Sɨnnawɨ Gotɨyai yune gannya wawɨnya' mena yɨ'mwannaka kave kwaamu' mwalyaakabaaibɨ' a'mwe sai kwaamu' mwaaladelyɨ.

11Sarevɨdaa'nyɨ kwaamu' mwaalya dazaba kusawɨ wɨlya'nevɨ nemɨ nayaa dɨragɨnna yuyanna yawɨrayaana! Yɨ kɨgaa' sahwara ke'ba'nanya'na yetabaaibɨ' a'mwe pwai kwai galazekɨvala ya'ne sabwi mɨdɨda yɨ sai kayaa'nanyaburɨ walaraawojɨ yɨ yɨwɨna nyadɨka! 12Sare' darevɨnyɨ. Gotɨyare yagaalya' nemɨrebwina bɨranemaaranne'nanyɨ. Yagaala sa' gaalyabwi kɨnɨnnakesɨ. Yɨ sa' wawɨnya dɨragɨnya yɨnɨga wi'na yadesɨ. Sa' gurɨmaanga dɨ'bwa'nɨke' yɨ kwaari'masɨramɨnya gurɨmaanga pimagɨnyaala gazavɨzavɨ wavɨlavɨkesɨ. Yɨ sa' a'mweraavɨ dabɨra'nɨgwida yune kuta ke'mwewɨ nebulya'na widesɨ. Sa' tɨnnyawɨ wɨlyɨ'ma'da gaalyavɨjɨ kuryarɨjɨ yɨ sawaarɨ mɨdaaihɨ'desɨ. Yɨ sa' dahaalyangɨjɨ yagɨdɨlyangɨjɨ tɨnnyaba wɨlyɨ'ma'da yuya sangɨ dabɨra'desɨ. Yɨ sa' yuya sɨmunya sangɨjɨ nemɨ ya'nengɨjɨ yune'na maryawɨbwa'desɨ. 13Gotɨyai wakyaaka aane pɨmɨlɨ' kɨmɨlɨ' gamɨre sɨnnyɨkɨ lɨka yɨnɨga wi'na yulyaranne' mɨ'. Aawa. Yuya kaanya yuya basɨnadaa'na yaka yɨ Gotɨyarɨ tɨnnyarɨ wana ku'maayaba warɨkengɨ. Yɨ Gotɨyai yune sahwaina nemɨ yadaanya sabwi maryawɨbwaradengɨra. Nemɨnyɨ Gotɨyai yagaainakelyɨra.

Gotɨyarɨna Mubɨthɨka Yɨra'de Naangei kɨnɨnnakeina dɨragɨnna jalɨkurakaanne'nesɨ.

14Sarevɨdaa'nyɨ dara yaana! Nemɨre Gotɨyarɨna Mubɨthɨka Yɨra'de Naangaangei Sɨgunyavɨ ke'mwewɨnyavɨ Gotɨyaryabanna yɨlayɨ'mavakei sai Jizaazai Gotɨyare Gawaalɨvaangei kɨnɨnnakeina mwaaihovɨ yɨ nemɨ sahwarɨne jalɨkurakyabwi nayaa dɨragɨnna lɨmwagaraana! 15Sare' darevɨnyɨ. Nemɨ saina wagɨlyavɨ walamarakya'neina dɨragɨnya maayaine. Nemɨre wɨrɨsangɨna Gotɨyarɨna Yɨra'de Naangei yawɨ'daa'nyɨ nemɨnyɨna kale mwi yannei mɨ'. Aawa. Yuya yɨjɨwaala sa nemɨnyɨ neyɨma'nadevaaibɨ' yuya daza gamɨ kwarɨ yɨjɨwaala ya'ne mena yɨma'nakengɨ. Sare kɨrɨ' sahwai wagɨlya myakelyɨ. Sarei nemɨnyɨna yɨbwakɨdevɨna neyɨvaimwagannelyɨ. 16Sarevɨdaa'nyɨ nemɨ lɨka myadaa Gotɨyaryawɨ gamɨre kingɨnamwaalyɨsavɨna gaimakunna wɨlaana! Sahwai yɨ yanga gaimwangebwi kɨnɨnnakelyɨ. Nemɨ gamɨre kale gaimwangebwi maarya'neina nabaai taanginya neyɨma'nadaaworiyagaa' gamɨre yanga gaimwangebwi nemɨnyɨ neya'neina sahwaryawɨnna wawaana!

Currently Selected:

Yɨvɨru 4: byr

Highlight

Copy

Compare