Yɨvɨru 3

Jizaazai Ne Mozɨzarɨ wavɨlavɨke'nesɨ.

1Nya'mweihi Gotɨyare tewaanyaihi Gotɨyai Sɨgunyavɨ mwaalɨkei kwaihɨrɨjɨ jaka yɨhɨzɨvwaramaarakeihi, sarevɨdaa'nyɨ Jizaazarɨna sɨmunya nayaa dara dɨvada'galayawɨrila! Sahwai nemɨnyɨna Gotɨyai Wɨdasaabakelyɨ (Apozelɨyalyɨ). Nabaai sahwai Gotɨyarɨna Mubɨthɨka Yɨra'de Naangerɨ nemɨ dɨragɨnna lɨmwamanɨgolyɨ. Yɨ gamɨnne yaya' jalɨkurakɨvanɨgolyɨ. 2Sahwarɨ wawɨnya dazavɨna Gotɨyai dahɨlakakei yɨ sarei Gotɨyarɨ naanga nebulya'na lɨmwaga'delyɨ. Sɨnnawɨ Ne Mozɨzai Gotɨyare a'mweraavɨ (Gotɨyare angevɨyaraavɨ) yaakevɨna Gotɨyarɨ lɨmwagyaakabaaibɨ' sara yakelyɨ. 3Sarerɨna da'darevɨnyɨ. Jizaazarɨna Gotɨyai yawɨ'daasɨ sai angevɨ madei mwaalɨ'. Ne Mozɨzai angevɨyai mwaala'. A'mwei ange' madɨna yaderɨne yaya naange' sa' yune angevɨne yaya naangevɨ wavɨla'devaaibɨ' Jizaazare yaya byaannaka naange' yɨnɨga wi'na maarakere yaya sa' Mozɨzare yaya naangevɨ angevɨyarɨnevɨ wavɨla'delyɨ. 4Sare' darevɨnyɨ. Anga gazasa' yune a'mwerana madɨvɨsasɨ. Kɨrɨ' yuyangɨjɨ yuyaraavɨjɨ yavɨkaryaakei sai Gotɨyalyɨ. Sai Mozɨzarɨjɨ Gotɨyare pwaraavɨjɨ wɨmwaaihadelyɨ. 5Mozɨzarɨne' daresɨ. Sahwai Gotɨyare yuyaraavɨ (Gotɨyare angevɨyaraavɨ) wɨgaimwagya'nei Gotɨyarɨ wɨdayaakei dɨragɨnna lɨmwagyaakelyɨ. Sara yada Gotɨyai dɨvi Gawaalɨvaangerɨna neja'ne' jalɨkurakyaake'nanyɨ. 6Kɨrɨ' Kɨraazɨtɨyarɨne' daresɨ. Sahwai Gotɨyare Gawaalɨvaangei mwaaida Gotɨyare a'mweraavɨ (Gotɨyare angevɨyaraavɨ) munyaba mwaalya'nei sahwaraavɨ maremwaalɨkelyɨ. Yɨ nabaai yuyagaa' nemɨ Kɨraazɨtɨyarɨ kuna dɨragɨnna lɨmwagaaza' yɨ nemɨ yɨlaayasɨ yadaa Naangerɨna kuna dɨragɨnna yemwalaaja' nemɨ kwainajɨ Gotɨyareina (Gotɨyare anga savɨyaina) mwaaihoina.

7Sarevɨdaa'nyɨ Kurya Tewaanyai dake' dara dɨnɨkabaaibɨsasɨ.

Dahaa' Gotɨyare maangwɨraayavɨ kadɨka wɨ'nɨpɨja'

8Sarɨmɨre sɨmunya' kaanya wana dɨragɨnna marihɨremwaaibɨna!

Ne sɨnnawɨnyara galazekɨvala nyaatabaaibɨ' mipɨnera!

Sahwara kayaa'na yaasagaa' a'mwamaayɨmagɨ mwaaleva

Gotɨyainyɨ yaamɨjɨ dɨragɨnna yɨjɨwaala nyadɨvɨ'

“Navɨka mwaaladei dɨngaka!” deva nyaasare.

9Sarɨmɨre sɨryakwalaangera nyawɨranganya'nera yɨjɨwaala nyaasare.

Kwarame potiyangɨ nɨmɨ yaangɨ wanganyaata kɨrɨ'

Nɨmɨnyɨ kayaa'na yaamɨjɨ yɨjɨwaala nyaasare.

10Sarevɨdaa'nyi davaakɨna sɨmɨlɨke' nyulyaake'na

Yɨ nɨmɨ dɨragɨnna dara jaainyɨ

“Yuyagaa' kumɨre sɨmunyavɨ nyagalya'ma'dɨvɨsare.

Nɨmɨre saburɨ kaanya myamarya'nera manyawɨryadɨvɨsare.”

11Sare'na nɨmɨnyɨ sɨmɨlɨka nyuidaa'nyɨyavɨ

Yagaala dɨragɨnya' dara jalɨkurakyaa

“Kwaaka kave kwaamu' kujaavɨwɨdɨkeba

Sahwara kusawɨ bwibɨ'dera mɨka!”

“Sa' wana naanga nebulya'nanyasɨ.”

12Nya'mweihi, sarevɨdaa'nyɨ mala nayaa jɨwannyɨla! Sarɨmɨnyɨdaa'nya pwai kwai Gotɨya gaalyaburɨ aaya kaavɨlyarɨ yagalya'masa'na gamɨre sɨmunyavɨ Kɨraazɨtɨyarɨ dɨragɨnna malɨmwagarya kayaa'nanyabwi nularadɨka! 13Aawa. Yɨrɨka gazagaasagaa', Gotɨyai kuna dɨvanɨkegaa' “Dahaaka!” sa' kuna warɨkegaa' sarɨmɨ sɨrya'mweraavɨre sɨmunyangɨ dɨhaa'bwata jɨla! Yɨ kwaasɨya wagɨlyabwi sarɨmɨnyɨdaa'nya pwarɨ kwarɨ kwaasɨ nudathɨka! Yojɨ gamɨre sɨmunyavɨ dɨragɨnna narihɨremwaaihadɨka! 14Sare' darevɨnyɨ. Sɨnnawɨ nemɨ Kɨraazɨtɨyarɨ dɨragɨnna lɨmwadaa dɨragɨnyaina daavɨna yadaa yune nemɨ balaajahaa'na kuna dɨragɨnna lɨmwagaragwawaaja' yɨ nemɨ Kɨraazɨtɨyalyɨ ye'mwannamwaaihoina yɨma'naadeinera. 15Dɨragɨnna lɨmwagaragwokwia'neina Gotɨyare yagaala dɨnɨka sa' yawɨramaraade'nanyɨ. Yɨ dara dɨnɨ'

“Dahaa' Gotɨyare maangwɨraaya' kadɨka wɨ'nɨpɨja'

Sarɨmɨre sɨmunya' kaanya wana dɨragɨnna marihɨremwaaibɨna!

Ne sɨnnawɨnyara galazekɨvala nyaatabaaibɨ' mipɨnera!

‘Navɨka mwaaladei dɨngaka!’ deva nyaasare.”

16Sare' darevɨnyɨ. Sɨnnawɨ Gotɨyare maangikɨ kadɨka wɨ'nyaata kwara kɨrɨ' sahwara kayaa'na yɨna yadɨvɨ' gamɨre yagaalya' galazekɨvaina yaasara aaihwaravaavaka? Ne Mozɨzai makwiaakera Yɨzɨrelɨyara Yɨzɨpɨ saba yagalya'mayaata yuyara sasare dazabwi yaasara daaka! 17Kwarame potiyangɨ (40) Gotɨyai sɨmɨlɨke' aaihwaravaavɨna wɨlyaakalaka? A'mwe kayaa'nanyabwi yadɨvɨsa'na sahwara baidɨvɨ' kumɨre kɨlaakejɨ' a'mwamaayɨmagɨ bwalaraawɨna yaakera daaka! Gotɨyai sahwaraavɨna sɨnna tɨke' wɨlyaakere. 18Gotɨyai yagaala dɨragɨnya' naanga nebulya'na dara jalɨkurakyaa' “Kwaaka nɨmɨ kwaamu' kujaavɨwɨdɨkeba sahwara kusawɨ bwibɨ'dera mɨka!” Wana naanga nebulya'nanya' sara dakyaake' aaihwaravaavɨna jaakava'? Da a'mwe dazara gamɨre yagaalya' galazekɨvalyaasara daaka! 19Sarevɨdaa'nyɨ nemɨ dara yawɨrangamanɨgo. Kumɨ dɨragɨnna malɨmwagaryadɨvɨsa'nanyɨ. “Aala!” dadɨvɨsa'nanyɨ. Yɨ dazahɨrɨsavɨna sahwara Gotɨyare kwaamusabanna bwɨlyaatara mɨ'.

Currently Selected:

Yɨvɨru 3: byr

Highlight

Copy

Compare