Yɨvɨru 2

Gotɨyai nevadaihasamaata naanga nebulyasɨ.

1Sarevɨdaa'nyɨ yagaala nemɨ mena wɨ'no' nemɨ nayaa kuna lɨmwagaraana! Nemɨre sɨmunyangɨ dɨragɨnna yawɨ'daa mɨdɨnaana! Yagaala daza'na dɨragɨnna mi nyaadɨka! Yɨ sara yawaajɨ yɨnahu nyagalya'mavaadɨka! 2Sare' darevɨnyɨ. Sɨnnawɨ Gotɨyai mamaayaraavɨre maangikɨdaa'nyɨ Juyainaavɨre Ne sɨnnawɨnyaraavɨne kɨwɨnya' jaakelyɨ. Yɨ yagaala daza' nebulya'nanya' dɨragɨnna daavɨkesɨ. Yɨ yagaala savɨne yɨwetawakya gazasavɨnajɨ yagaala savɨ galazekɨvala gazasavɨnajɨ tɨvɨkɨta kayaa'nanya' maryaasa'nanyɨ. Kumɨre kayaa'nanya yadɨvɨta sabwina yɨnɨgeva tɨvɨkɨta yɨda'maraange' warɨ'. Yɨ mamaayaraavɨre maangikɨdaa'nyanna tɨvɨkɨta sara maryaasa'na 3dahaa' nevadaihasamaata naanga nebulya'nanyavɨne' navɨka mwalaaja' yɨ nemɨ lɨkaanya wawaajɨ kayaa'nanaangevɨ gatha'dara wavɨlavaadevaka! Yuna wana aawa nebulya'na. Sɨnnawɨnyaraavɨne tɨvɨkɨta sa' maalɨkesɨ. Dahaa' nemɨnyɨne' tɨvɨkɨta naangesɨ. Yɨ mamaayara nedetara mɨ'. Sɨnnawɨ Naangei gamɨ sai yagaala daza' mena wɨdakesɨ. Nabaai a'mwera gamɨnyɨ kadɨka wɨ'neva sahwara nemɨnyɨ dara nejɨwaake' “Yagaala daza' yuna wana naanga nebulya'nanyasɨ.” 4Sara nedadaapi Gotɨyai sahwarajɨ ye'mwannajalɨkuraka'. Yɨ sahwai yɨjɨwaainyajɨ atɨka maru'nasajɨ dɨragɨnya dala pɨnɨnna pɨnɨnnanyajɨ yada ye'mwannajalɨkurakɨna. Nabaai sahwai gannya sɨmunyavɨ nayaa yawɨ'da Kurya Tewaanyare sɨhumale a'mweraavɨna yanga wɨjaavada ye'mwannajalɨkurakɨna. Yɨ sarengɨ ye'mwannajalɨkurakakelyɨ.

Jizaazai padaihasamaasabwinevɨ makabakerɨnesɨ.

5Sare' darevɨnyɨ. Dɨvi yɨma'nade pɨbwina dɨvanɨgo'nanyɨ. Gawaalɨvaangei maremwaaidelyɨ. Gotɨyai mamaayaraavɨ dazahɨrɨvɨ maremwaalya'neraavɨ dahɨlakakera mɨ'. 6Aawa. Gotɨyare bukuyavɨ pɨkarya pɨrɨvɨ a'mwe pwai nayaa dara jalɨkurakɨnɨ'

“A'mwe kwara bewaraavaka!

Gotɨyaigɨ sahwaraavɨna yawɨ'dɨnyaigɨ daa!

A'mweraavɨne kaimɨraayai bewalaka!

Yɨ gɨmɨ nayaa be'na maremwaaidɨnyaigɨnaka!

7Yune tusagaa'nana gɨmɨ wakagɨnyalyɨ.

Sahwai mamaayaraavɨ dalaangewɨ wɨla'narɨ'.

Byaannyavɨ sahwarɨne yaya' munyaba makɨlagɨ.

Yɨ sahwarɨ yaya naange' wɨjaavagɨnyalyɨ.

8Sahware sɨvɨlyɨraarɨ kwaaka dalaangewɨ yuya wakagɨ.

Sahwai yuya sa dɨragɨnna maremwaalɨkelyɨ.”

Sara dɨnɨke' Gotɨyai yuya a'mwe kwaraavɨ kwaaka dalaangewɨ wakakengɨ. Yɨ sarevɨdaa'nyɨ aane pɨrɨ' kɨrɨ' kumɨnyɨ dalaangewɨ mula'narya'. Kɨrɨ' dahaa' kumɨnyɨ dalaangewɨ yuya warɨke nemɨ mwanganyɨnanyɨ. 9Kɨrɨ' nemɨ a'mwe pwai Jizaazarɨ yawɨrangamanɨgolyɨ. Kɨgaa' maalɨkegaa' a'mwe sahwarɨ mamaayaraavɨna maalɨkɨbawei wɨmwaaihakelyɨ. Yɨ a'mweraavɨna gaimwagya'nei balya'ne'na Gotɨyare yanga gaimwange' marima'naaba'. Sahwai daanga dazahɨrɨ' maa'da yɨ bala'. Sarevɨdaa'nyɨ yɨ Gotɨyai sahwarɨne yaya' munyaba makida byaanna dɨragɨnya' wɨjaavakelyɨ.

10Sare' darevɨnyɨ. Yuya Gotɨyarɨnengɨra. Sarei yuya yavɨkaryaka yuyangɨna dɨragɨnya kuna wɨjaavadelyɨ. Yɨ sahwai yawɨraka “A'mwera nɨmɨre kaimɨraayara yɨma'nɨpɨka!” gannya kaimɨraaya kwalaalyaraavɨna byaanna dɨragɨnyavɨ makwia'nerɨ Jizaazarɨ daange' wɨjaava'. Yɨ daanga dazavɨ Jizaazai sahwaraavɨ yɨnɨga wi'na padaihasamaarya'nei sahwai a'mwe naanga yune nebulya'nanyai yɨma'na'. Daanga wɨjaaya sasare sabwi Gotɨyai yake' yɨ sa' yɨda'nanyasɨ. 11Sare' darevɨnyɨ. A'mwe dazai a'mwe yuyara Gotɨyarera tewaanya nawɨ'nya yɨma'nya'neraavɨna ya'nelyɨ yɨ a'mwe dazarajɨ yuyaraavɨ kuvɨnɨmaangei yune gave pwainanyɨ. Sarevɨdaa'nyɨ Gawaalɨvaangei sahwaraavɨna dara wɨdɨvanɨ' “Nya'mweihɨlyɨra.” Saraavɨna sasara ja'na gamɨnyɨ wagɨla muvwa'nyakelyɨ. 12Sai Gotɨyarɨ wɨda'. Dara dɨnɨ'

“Gɨmɨnyɨna nya'mweraavɨ ‘Sasarelyɨra. Nawɨ'nyaangelyɨra,’ wɨdɨdeinyɨ.

Gɨmɨnne yaya' makɨlya'ne' kusɨlaanyavɨyaraayaba daata dɨdeinyɨ.”

13Nabaai ayahi dara dɨnɨkesɨ.

Nɨmɨ sarajɨ sahwarɨ dɨragɨnna lɨmwagarɨdelyɨ.

Nabaai dara dɨnɨkesɨ.

Yɨthaa, nɨmɨjɨ kaimɨraaya Gotɨyai nyɨjaavakera nye'mwannemwaaihasare.

14Kaimɨraaya dazara a'mwera mwaaiha'. Yɨ tawanakera yaka mɨwɨ'nakere. Sarevɨ yɨ Jizaazai kwalyɨ sahwarabɨ' avaaina a'mwei yɨma'nakelyɨ. Yɨ sarei balakelyɨ. Nabaai “Balya dazavɨ balyaburɨne dɨragɨnya' kɨnɨnnakerɨ kayaa'nanyarɨ kayaaka yɨgalakɨma!” daka a'mwei yɨma'nakelyɨ. Yɨ balyaburɨne dɨragɨnya' kɨnɨnnakei yɨ sai Yuyaraavɨ Kotɨya Maryadei, Saataanɨ. 15Nabaai dare'nesɨ. A'mwerajɨ a'mwejɨ balya'na lɨka yadɨvɨsarera. Nabaai yuyagaa' Kwaakevakɨ sahwara mwaaidapiyaraavɨ lɨka daza' yaasɨwa'wawɨnyavɨ galyɨralɨmwaga'desɨ. Sahwai balaka daza' yɨ sahwaraavɨ kalavuza sahɨrɨvɨ wo'dalamarasɨta ya'nelyɨ. 16Naanga nebulya'nanyasɨ. Sahwai mamaayaraavɨ gaimwanga ya'nei sara myakelyɨ. Aawa. Sahwai yaka sa' yɨ Evɨraamɨmɨre yɨsavaakɨyaraavɨ gaimwagya'ne' yakelyɨ. 17Sarevɨdaa'nyɨ yuyangɨ gamɨre gya'mwerabɨ' sai nayaa avaaina nebulya'na yɨma'nya'ne' tɨvɨkɨta warakesɨ. Yɨ daresɨ. “Yɨ a'mweraavɨ Gotɨyareraavɨ kale gaimwanga wia'neinyɨ yɨma'nɨma! Yɨ Gotɨyarɨnengɨ gamɨre wawɨnya' nayaa lɨmwaga'dɨ Gotɨyarɨna Mubɨthɨka Yɨra'de Naangeinyɨ yɨnɨga wi'na mwaalɨma! Sareinyɨ a'mweraavɨ wagɨlyangɨ marasɨta'neinyɨ sɨnna tɨka wɨdayabwina mubɨnɨma!” daka gya'mwerabɨ' nayaa avaaina nebulya'na yɨma'nakelyɨ. Gotɨyarɨ wɨjaavɨnya' yɨnɨga wi'na yannelyɨ. 18Sare' darevɨnyɨ. Sarei taange' yuya taanga gamɨnyɨ yɨma'naka sangɨ maarakelyɨ. Nabaai Kamaalyai yɨjɨwaala yaamɨjɨ wiaka kɨrɨ' dɨragɨnna daavakelyɨ. Yɨ sarei a'mweraavɨ yɨma'nakengɨna sara yɨbwakɨnakevɨdaa'nyɨ sahwaraavɨ taanginyabwi kima'nojɨ sahwaraavɨ gaimwange' yɨ yuyagaa' sarei yɨnɨga wi'na yadelyɨ.

Currently Selected:

Yɨvɨru 2: byr

Highlight

Copy

Compare