Yɨvɨru 13

Aaya neyɨdɨkaa'bwarya'ne yagaalyangɨnesɨ.

1Nemɨ Kɨraazɨtɨyarɨ lɨmwadaanyaina daakajɨ yuyagaa' sɨrya'mweraavɨna kuna yɨhɨvu'nana! 2Sarɨmɨre angengɨna badaapiyaraavɨ gaimwange'na sɨmunya navɨka myagalya'mapɨna! Sare' darevɨnyɨ. Sɨnnawɨ a'mwe pwara sasara yaasara yɨ sahwara a'mweraavɨ makabadɨvɨ' kunnya angengɨ yadɨvɨ' saraavɨ maremwaaina yesare. Kɨrɨ' aanga'mwera mɨ'. Navɨka mwaaidɨvɨ' kɨrɨ' Gotɨyare mamaayaraavɨ maremwaaina yesare. 3Sarɨmɨ neya'mwe kalavuzavɨ mwaaihasaraavɨna sɨmunya nayaa jawɨrila! Sarɨmɨ saihi kalavuzavɨ sarajɨ ye'mwannamwaaihasaihibɨ' dɨhaimwagila! Nabaai neya'mwe kunnya kɨlaakejɨkaavɨ taanginya maa'manɨgasaraavɨna sɨmunya nayaa jawɨrila! Yɨ sarɨmɨ saihi kɨlaa'nakeihi kumɨre taanginya ye'mwannamaa'manɨgasaihibɨ' nayaa jɨla!

4Kwala maaryabwi yɨ sa' nawɨ'nyaangesɨ. Dazaburɨ yaya' yuyaihi munyaba nayaa dɨmakɨlyɨla! Sayoihi kwala maaryabwinebwi nayaa jɨla! Wana nebulya'na tɨrɨmaaya' warana! Sare' darevɨnyɨ. A'mwera pwaraavɨre a'mwengɨ ata lɨmwabɨzaraavɨjɨ a'mwera a'mwe yaasɨwa' pɨnamarya yadɨvɨsaraavɨjɨ tɨvɨkɨta kayaa'nanya wɨjaaya'nei jɨdavadelyɨ Gotɨyai.

5Nɨgwiangɨ wabarɨnna ya saburɨ mamɨdɨbɨna! Gɨlyɨvɨta sarɨmɨ lɨmwamanɨgasa, sa yɨ nayaa dara jawɨrila! “Sa yɨ nawɨ'nyangɨra. Sa yɨnɨga wi'na neyadengɨra.” Sare' darevɨnyɨ. Gotɨyai mena dɨvanɨ' “Yɨ nɨmɨ gɨmakwaasɨdeinyɨ mɨ'. Arɨkewɨ. Yɨ nɨmɨ bule'na gɨzaavɨdeinyɨ mɨ'. Arɨkewɨ.” 6Sarevɨ nemɨ nennya sɨmunya' dɨragɨnya yɨwadaa dara daana!

Naangei nɨmɨnyɨ nyɨgaimwadelyɨ.

Nɨmɨ lɨka miwɨna!

A'mwera berɨ' nyɨpɨ'deinyaka!

Yɨnɨga wi'na gara nyɨpɨneinyaka!

Sara yawɨ'daa dɨragɨnya neyɨvaimwadeinera.

7Sarɨmɨre Kɨraazɨtɨyarɨna maremwaaidɨvɨsaraavɨna sɨmunya nayaa jawɨrila! Sɨnnawɨ sahwara sarɨmɨnyɨ Gotɨyare yagaalya' Kɨraazɨtɨyarɨne' yɨhɨzɨwaake'. Sahwaraavɨre kaanya yamaryabulyɨ balyabulyɨ sɨmunya nayaa jawɨrila! Yɨ sahwaraavɨre dɨragɨnna lɨmwagasabwina dɨmɨdɨnyɨla! 8Jizaazai Kɨraazɨtɨyai yɨ sai kuna avaainanyalyɨ. Yɨ wonajɨ yɨ dahaa' kɨgaasɨ yɨ yuyagaa' yuyagaasɨ avaaina mwaaidelyɨ. Sahware sabwi avaainanyasɨ. 9Sare'na sarɨmɨre sɨmunyangɨ yagaala dala nabinabinya nabulayɨhɨmwagi'nadɨ'! Yɨ sarɨmɨ Gotɨyare tusavɨ nyagalya'mapɨka! Sare' darevɨnyɨ. Nemɨre sɨmunya' Gotɨyare yanga gaimwangevɨ dɨragɨnya' maarake' sa' yɨ nawɨ'nyasɨ. Nemɨre sɨmunya' wapaayangɨre kɨwɨnya nabinabinya dɨragɨnya' maarade' mɨ'. Sasare dazabwi saburɨ kaanya yamaryadɨvɨsaraavɨ gaimwadevwi mɨ'. 10Nemɨ Jizaazai kwaraanyaba mubɨthɨka yɨra'dɨvɨsa'bɨsai kɨnɨnnakeine. Yɨ yɨra'dɨvɨta sarɨ Juyaraavɨre yɨra'dɨvɨsara Kwaakevakɨya Gotɨyare Angevɨ wɨdaayadɨvɨsara tɨka nya'nera dɨragɨnya sa' maayarera. Sai balake'na nawɨ'nyabwi maa'manɨgo. Sahwara ayabwi kuna yɨvanɨgasa'na aawa. 11Sare' darevɨnyɨ. Gotɨyare Angevɨ Ku'dɨka Tewaanya Nebulya'nanyavɨ Yɨra'de Naangei tawe bulɨmakaawoyaresɨ memeyaresɨ kayaa'nanya marasɨ'nya'ne' makwide tawe sawaare kɨlaaka mɨwɨta tɨka nadɨvɨ' mɨ'. Yɨ sajɨkaarɨ angeba mwasɨlaa makwalyuna kye' dɨkevɨ yuna nasɨ'na'. 12Nabaai mwasɨlaanyavɨne sarevɨ Jizaazai kwalyɨ “Nɨnnya tawevɨ a'mwera nawɨ'nya tewaanya yɨma'nɨpɨka!” daka angabanne kaadihɨta mwasɨlaanyavɨ daange' maarakelyɨ. 13Sasarevɨdaa'nyɨ yɨ nemɨ kwainajɨ gamɨnyawɨnna angeba mwasɨlaabɨ' nayaa wawaana! Yɨ Juyaraavɨre ayabwina yadɨvɨsaraavɨrebwi yagalya'ma'na yawaajɨ sahwaraavɨ wagɨlya' sai maarakabaaibɨ' gamɨnyɨna nemɨ wagɨla sa' nayaa maraana! Sahwarɨ kuna lɨmwaga'daa sahwara yɨkamaangeraavɨna dɨragɨnna davaana! 14Mwasɨlaanyavɨne sare' darevɨnyɨ. Kwaaka dathavakɨ anga naanga pɨba yuyagaa' mwaalya'neba maayaine. Aawa. Anga naanga dɨvidaa'nyɨ yɨma'naabatheva Sɨgunyavɨya nawɨ'nyaba nemɨ bɨramaraade'nanyɨ. 15Sarevɨdaa'nyɨ Jizaazai negaimwadevɨ nemɨ Gotɨyarɨ yɨlaaya nayaa yaana! Yɨ yuyagaa' yɨlaaya daza' yɨra'dɨvɨsa'bɨ' sahwarɨ wɨjavaana! Yo, daresɨ. Nemɨre maangi' sahwarɨ nayaa dara wɨjavaana! “Gotɨyai nawɨ'nyalyɨ. Sahwarɨ Jizaazarɨna nemɨ dɨragɨnna lɨmwaga'manɨgoine.” 16Nawɨ'nya tewaanyabwi a'mweraavɨ ya'najɨ sarɨmɨre gɨlyɨvɨsa nayaa jaapaidɨvɨ' kuneraavɨ wɨjaaya'najɨ sarɨmɨ sɨmunya navɨka myagalya'mapɨna! Sare' darevɨnyɨ. Yɨra'dɨvɨsabɨ' sasare sa'na Gotɨyarɨ wigaimanɨ'. 17Sarɨmɨre maremwaaidɨvɨsaraavɨre yagaala nayaa dɨvada'galamɨdɨnyɨla! Yɨ sahwaraavɨ dalaangevɨ dula'narila! Sare' darevɨnyɨ. Gotɨyarɨna kumɨre wawɨnya yuyangɨ aaya kaavɨlyavɨna dɨvi yagaalya' dɨpɨ'dera sarɨmɨre kuryaraavɨ maremwaala yɨhyadɨvɨkɨ. Sara kyapɨri yɨ nabaai sahwara “Nennya wawɨnyanna yɨlaaya yadaa sara yaana!” dadɨvɨ' lɨmwagapɨ'dere. Yɨ saraavɨ sɨmunya' taanga mwinanna! Sahwara sɨmuyɨwaala myɨpɨna! Sare' darevɨnyɨ. Sarɨmɨnyɨ maremwaalya'na taanga winaja' yɨ daza' sarɨmɨnyɨ yɨhɨgaimwagathe' mɨ'.

18Sarɨmɨ negaimwagathe'na Gotɨyarɨ nayaa duzɨla! Sare' darevɨnyɨ. Nemɨ dara yɨbwakɨmanɨgo. Gotɨyare tɨnnyarɨ nemɨre sɨmunyai yɨda'maraangelyɨ. Yɨ yuyangɨ nemɨ nayaa tewaanya yamaryaana! 19Sarɨmɨ Gotɨyarɨ wɨja'na nyɨgaimwagathe'na yɨ nɨmɨ dara yɨhɨthɨhaa'bwa'manɨge. “Sarɨmɨnyawɨnna yɨme'nya'bɨ' ayɨna bɨma!” dena yɨhɨthɨvanɨge.

20Gotɨyai kwaamu'nanyaburɨ aaya kaavɨlyalyɨ. Sahwai nemɨre Naangei Jizaazarɨ bainɨkeraayawɨdaa'nyɨ ayɨna yɨdɨkaavakelyɨ. Jizaazai gamɨre sipɨzipɨyainaavɨ Maremwaala Naangei yɨma'nya'nei gamɨre tawe' kabwalaraawa' yagaala nelɨmwagarɨkebwi yuyagaa'ne' dɨragɨnna dakake'nanyɨ. Yɨ sarevɨ Gotɨyai gamɨre a'mweinaavɨ tewaanyainaavɨ tɨvi'nanyaina yɨma'nya'neinaavɨ yakelyɨ. 21Sahwai gamɨre sɨmunya sabwi yɨnɨga wi'na dɨmɨdɨnyide'na yuya nawɨ'nya tewaanya gazabwizabwi yɨhɨzaavana! Jizaazai Kɨraazɨtɨyai negaimwagathevɨ Gotɨyai gamɨ sarɨ wigaimanɨkebwi nemɨ yuyainaavɨre sɨmunyavɨ marima'naabathelyɨ. Jizaazai Kɨraazɨtɨyai yuyagaa' yuyagaa'ne byaanna dɨragɨnya' kɨnɨnnakei mwaalana! Sahwarɨne yaya' munyaba makɨlaana! Sahɨrɨsɨra!

22Nya'mweihi, nɨmɨ sarɨmɨnyɨ dɨragɨnna yɨhɨthɨhaa'bwa'manɨge. Yagaala dazavɨ sarɨmɨre sɨmunya' dɨragɨnya yɨwagya'ne nɨmɨ dɨvanɨgevɨ sarɨmɨre kadɨkikɨ nayaa dakyɨla! Sare' darevɨnyɨ. Pɨkarɨyɨkwia daza' nɨmɨ sarɨmɨnyɨna yɨda'mwe' yɨ sa' tu'nanyasɨ. 23Sarɨmɨ dara jawɨranganyɨla! Nemɨre neya'mwe Timotirɨ kalavuzavɨ mena makwasɨwaa'. Nabaai sai nɨmɨnyawɨnna yɨme'nya'bɨ' bi'mavaja' yɨ naarɨmɨ yuyainaai yakwoihɨlyɨ yɨ sarɨmɨnyɨ tɨnna yɨhwanganaawakadeinaalyɨ. 24Nɨmɨnyɨna sarɨmɨre maremwaaidɨvɨta yuyaraavɨ “Nya'mweihi!” duzɨla! Gotɨyare tewaanya yuyaraavɨ “Nya'mweihi!” duzɨla! Kwaaka Yɨtaali mwaalyara Naangerɨnera “Neya'mweihi!” yɨhɨthɨvanɨga'.

25Yanga gaimwangebwi sarɨmɨ yuyaihɨlyɨ yɨhye'mwannamwaalana!

Currently Selected:

Yɨvɨru 13: byr

Highlight

Copy

Compare