Yɨvɨru 12

Nemɨ Jizaazarɨ nayaa yawɨrangadaa sahwarɨ dɨragɨnna lɨmwagaraade'nesɨ.

1Dathazarevɨdaa'nyɨ dara yaana! A'mwe sɨnnawɨnya dazara gɨhɨpaledaaveva nemɨnyawɨ yɨraayanga naange'bɨsara dɨragɨnna lɨmwagasabwi neyɨbwarɨdaakwe' nemɨnyɨ. Yɨ yuya taanginaanga gazasasɨ yuya kayaa'nanya nemɨwɨ'nɨka gazasasɨ nemɨ nayaa yagalya'mavaana! Yɨ nemɨre sɨmunya' nayaa dɨragɨnya yɨvaimwadaa Gotɨyai nemɨ kaanyave'na ya'ne' dahɨlakake' gavamarasɨ'nyɨkaanya daza' kaanyave'na dɨragɨnna yaana! 2Sara yadaa nemɨre tɨnnyai nayaa banganaraa Jizaazarɨ! Sai nemɨre dɨragɨnna lɨmwangevɨ aaya kaavɨlyai yɨ dɨvi nabaai sai lɨmwanga savɨ yunebanna nebulya'na yadelyɨ. Sahwai yɨlaaya' dahɨlakɨnɨke' dɨvi maarya'ne'na sɨmunya yawɨ'da dɨragɨnya mwaalaka yɨsavɨri tamarɨmwesavɨne daange' maaraka balakelyɨ. A'mwera yɨta yovihɨrarannɨkevɨ balya'na wagɨla naanga wɨvwa'nade' kɨrɨ' sahwai “Gesɨra,” yawɨraka balya savɨ yakelyɨ. Sarei dahaa' naangeba Gotɨyare maremwaaidere namwaalyɨsavɨ aangasɨmagɨ mwaalɨ'. 3Sare' darevɨnyɨ. A'mwe kayaa'nanyabwi yadɨvɨsara yɨkamaanga kayaa'na yesare Jizaazarɨ. Kɨrɨ' sai kuna dɨragɨnna mwaala'. Sasare'na nayaa jawɨrila! Sarɨmɨre kuryaraavɨ maa'na nayɨhinadɨka! Sarɨmɨre sɨmunyavɨ maalɨka nayɨhima'nadɨka! 4A'mwera sarɨmɨre lɨmwangebwi walamarakya'na kayaa'na yɨhyadɨvɨ' mala tannadɨvɨtabaaibɨ' sarɨmɨ dɨragɨnna mwaaiha'. Kɨrɨ' dahaa' dazavɨ sarɨmɨre tawe' mwalaabi yɨwa'. Mabalyɨ yɨwaa'. 5Yagaala Gotɨyai sarɨmɨre sɨmunyavɨ dɨragɨnya yɨvaimwange'na yɨhɨthake' ganɨmaangei gawaalɨvaangeraavɨ wɨdakabaaibɨsa' navɨka mena dahayɨvanɨga'! Dara dɨnɨkesɨ.

Nyɨbwaalɨ', Naangei gɨmɨnyɨ yavada'gala ya'ne'na

Pɨbura gyaza' daza'na “Yaasɨwa'nanyasɨra,” myawɨ'dɨnna!

Taanginya gɨzaavaja' gɨmɨre sɨmunyavɨ maalɨka magima'nanna!

6Sare' darevɨnyɨ. Naangei a'mwe pwarɨna kuvu'nojɨ

Yɨ nabaai sai gamɨre sabwi yavada'gaidelyɨ.

Sai gawaalɨvaanga gazarɨzarɨ “Nɨmɨreigɨnyɨ,” wɨdamaarojɨ

Nabaai sai yɨsarɨ' kɨrɨsɨ dɨka lɨ'bwaradelyɨ.

7Gotɨyai yɨhyavada'galya'neihi nayaa dɨragɨnya mwaaidɨvɨ' dɨvaihanaryɨla! Gotɨyai sarɨmɨnyɨ yɨhyaja sabwi yɨ gamɨre gawaalɨvaangeihɨrɨnyɨ. Sare' darevɨnyɨ. Kaimɨraayai mwaaidɨ'nyɨ gannya ganɨmaangei nayaa myavada'galyadei bewalaka! 8Aawa. Yuya kuvɨnɨmaanga nawɨ'nya sara kunnya kaimɨraaya yuyaraavɨ nayaa yavada'gaidɨvɨsare. Nabaai Nɨmwai gamɨre kaimɨraaya yuya pwaraavɨ yavada'gaide kɨrɨ' sarɨmɨnyɨ yavada'gala mayɨhyaja' yɨ gamɨre kaimɨraaya nebulya'nanyaihi mɨ'. Sarɨmɨ yaasɨwa' sɨgɨpwakɨsamɨlɨ'bɨsaihɨlyɨ. 9Sarɨmɨ daza' kɨrɨ'najɨ nayaa jawɨrila! Nennya nenɨmaanga Kwaakevakɨyara sahwara nayaa yavada'gala neyadɨvɨkɨ. Yɨ nemɨ kumɨnne yaya munyaba makidaanyɨ. Yɨ dare' yune naanga wavɨlavɨke' midaaka! Nemɨ kuryaraavɨ Ganɨmaangerɨ kwaaka dalaangewɨ nayaa kuna wɨla'naraana! Yɨ nemɨ gaalya' maraadeine. 10Sare' darevɨnyɨ. Nennya nenɨmaanga Kwaakevakɨyara kumɨre yɨnɨge saburɨna nemɨre sabwina yune maalɨkegaa'na neyavada'gaidɨvɨkɨ. Kɨrɨ' Gotɨyai sai nemɨnyɨ neyavada'gaide' yɨ nemɨnyɨ nebulya'na negaimwagya'nesɨ. Yɨ nemɨ gamɨre nawɨ'nya tewaanaanga sabwi maraade'nanyɨ. Yɨ gamɨbɨ' yɨma'naade'nanyɨ. 11Pɨrɨ' daresɨ. Nɨmwai nemɨnyɨ yavada'gala neya'nei taanginya nejaavanɨke' yɨ dazagaa' nemɨ yɨlaaya myadaanyɨ. Aawa. Nemɨre sɨmunya' yune taange'na yɨbwakɨdaanyɨ. Pɨrɨ' daresɨ. Sai nemɨnyɨ mena neyavada'galojɨ yɨ dɨvi nawɨ'nya tewaanya dara yɨma'nadengɨ. Nemɨ tewaanya yɨda'maraangebulyɨyaina yɨma'nadaanyaine. Yɨ nemɨre sɨmunya' kwaamu'na waradesɨ.

12Sarevɨdaa'nyɨ yɨ nabaai sarɨmɨre asɨra dɨragɨnya maaya sɨra yaasɨwa' tɨmunadaa'na nyadɨka! Sarɨmɨ wɨrɨlya yagɨnya nayaa wɨdɨ'dɨvɨ' Gotɨyare wawɨnya kuna jɨla! Yɨ nabaai kwannya' mena barya'bɨ' warɨka kɨrɨ' dɨragɨnna nayaa dɨthaayɨla! 13Sarɨmɨ kaanya sarɨmɨre sɨvɨlyajɨ nayaa yɨda'na jamarila! Sɨvɨla pimagɨnyi kayaa'nanyi yɨrota yunebanna yuya yakabaaibɨ' sarɨmɨnyɨdaa'nya dɨragɨnya maayai Gotɨyarɨ nyagalya'mavadɨka! Aawa. Sai yɨ tewaanya ayɨna nawɨ'nya yavada'galayɨma'nade'nanyɨ. 14Sarɨmɨ a'mwe yuya kwaraavɨjɨ munyɨ' kwaamu'nanya saburɨ mɨdɨnya'na jɨla! Nawɨ'nyabwi gɨrɨkita'nanya maayaburɨ dɨmɨdɨnyɨla! A'mwei nawɨ'nya sabwi maayai yɨ sai Naangerɨ wanganadei mɨ'. 15Sarɨmɨ nayaa dɨvada'galemwaalyɨla! Neya'mwe pwai walaraawojɨ Gotɨyare yanga gaimwanga sabwi nyagalya'mavadɨka! Nabaai kayaa'nanya neya'mwe pwai sarɨmɨnyɨdaa'nyare sɨmunyavɨ yɨma'naabozɨ kayaa'nanya sa yɨ sai yɨsarɨ yɨsɨla yɨrɨka yade yɨ'nadevaaibɨ' nyadɨka! Yɨ sarevɨ sarɨmɨnyɨ taanga yɨhɨzaavaja' yɨ sarɨmɨnyɨ Gotɨyare tɨnnyarɨ gɨrɨkita'nanya nayɨhyadɨ'! 16Yɨ Yɨzoi yaasɨwa' pɨnamaryabwi mɨdɨda sai yakabaaibɨ' sarɨmɨjɨya pwai Gotɨyarɨ bule'na nujaavadɨ'! Yɨzoi sɨraangei mwaalaka kɨrɨ' wapaaya yune gave pɨgaa'na yaasa'ne' sɨraangerebwina yakabaaibɨ' Gotɨyarebadaa'nyabwi wasɨ'nakelyɨ. 17Sare' darevɨnyɨ. Sarɨmɨ mena yawɨ'manɨga'. Dɨvidaa'nyɨ sai “Dɨragɨnya dazabwi ayɨna maarɨma!” daka yake, kɨrɨ' Gotɨyai da' “Aawana.” Yɨzoi sai dɨragɨnya' maarya'na kɨnna kwalaalya da'. Kɨrɨ' sɨmunya ayɨna yawɨramaarya'ne' gamɨnne tusa' pɨrɨ' mɨ'. Aawa. Sare'na mala nayaa jɨwannyɨla! Kɨraazɨtɨyarɨ kuna dɨragɨnna dɨlɨmwagarila!

18Sare' darevɨnyɨ. Gotɨyaryawɨnna sarɨmɨ bi'ma'manɨgasagaa' Yɨzɨrelɨyara yetabaaibɨ' mivanɨga'. Yɨ sahwara Mugunya Saainaaya a'mwera asa' yɨnɨga wi'na dathɨwanga yɨpɨnevɨ nabaai mugunya dɨka naangeyaba bi'mave'. Yɨ sagaa' wana sawɨsasɨ wana jɨhɨnyaanga nebulya'nanyasɨ jɨnnadaa'nyɨ yɨ yɨhuta gwavaaigwavaalya' yadaa'nyɨ 19yɨ Gotɨyare gware' naangave'na maku'na, yɨ Gotɨyare maangwɨraaya' yagaalyangɨ wɨdake wɨ'nyɨna. Yagaala sa kadɨka wɨ'neva lɨka naanga yeva Mozɨzarɨ dɨragɨnna dara wɨde' “Yagaala dazanna nemɨ kadɨka ayahi mu'naannera! Nabalaadɨka!” 20Sare' darevɨnyɨ. Gotɨyai yagaala sa' dara daka' “A'mwe pwai asa' wakojɨ mugunya dazavɨ ata lɨmwagaza' sɨla nayaa dɨlɨwakyɨla! Nabaai bulɨmakaawoya pwai sipɨzipɨya kwai yaja' avaala sasaresɨ.” Yɨ yagaala daza' sahwara lɨka naanga nebulya'na ye'. 21Nabaai Mozɨzai kwalyɨ yuya daza tɨnna wanganaka da' “We'! Nɨmɨ lɨka naanga yadɨ bɨ'bɨta kayaa'na yɨwaainɨwa.” Dazagaa' sahwara sara ye'. 22Sarɨmɨ sasarengɨ mi'mayɨvanɨga'. Aawa. Sarɨmɨ Sɨgunyavɨyangɨna mena yɨ'ma'mwaa'. Yɨ Mugunya Saayonɨ, yɨ Gotɨyai gaalyavɨ aaya kaavɨlyare anga naange' mannɨkevɨ Jeruzaalemɨ Sɨgunyavɨ warɨkebanna, yɨ ejelɨyara taawɨzanɨya kwalaalyara yɨ'bwa'neva yɨlaaya yemwaaihasabanna mena yɨ'ma'mwaa'. 23Yɨ kwaiyɨ'bwa'nyavɨ Kɨraazɨtɨyare kusɨlaanyavɨ, Gotɨyare kaimɨraayara sɨraangeraavɨrevɨ Gotɨyai kumɨnne yaya' mena yɨda'nɨke' Sɨgunyavɨ warɨkevɨyaraayawɨnna yɨ'ma'mwaa'. Yɨ Gotɨyaryabanna a'mwe yuyaraavɨre maryawɨbwarya'neryabanna yɨ'ma'mwaa'. Yɨ Gotɨyarera yɨda'maraangebwi yadɨvɨ' balesaraavɨre kuryaraavɨ yuyagaa'ne yune nebulya'nanyaraavɨ mena yavada'galawɨmwaaihakeraayawɨnna yɨ'ma'mwaa'. 24Yɨ Jizaazaryabanna sai yagaala nelɨmwagarɨka mudɨkevɨ yɨwagya'nei a'mweraavɨjɨ Gotɨyarɨjɨ marirakurakeryabanna yɨ'ma'mwaa'. Yɨ gamɨre tawevɨ a'mwera sarɨ tamakesa' tawe sa' yɨrɨku'nɨkeyabanna yɨ'ma'mwaa'. Tawe daza' yagaala nawɨ'nya dakesɨ. Sa' sɨnnawɨ Aivelɨmɨre tawe' dakabaaibɨ' avaainanya'na mɨ'. Aawa. Sa' Aivelɨmɨre tawe' wavɨlavaka yɨ nawɨ'nyaange' dakesɨ.

25Sarɨmɨ nayaa javada'gainyɨla! A'mwe dazai dahaa' dɨvanɨkerɨ sarɨmɨre kadɨke tɨla'narapi gamɨre yagaalyavɨna “Aala!” nadɨpɨka! Sare' darevɨnyɨ. Kɨgaakuna Mozɨzaregaa' Kwaaka dathavakɨ a'mweraavɨ yagaala dɨragɨnya' wɨjaavakelyɨ. Kɨrɨ' gamɨre yagaalya' galazekɨvala yesare. Nabaai sahwara lɨkaanya yɨnɨga wi'na wawetara mɨ'. Yɨ kumɨre wagɨlyavɨ tɨvɨkɨta yuna maare'. Dahaa' pwai Sɨgunyavɨ mwaalaka yɨ yagaala dɨragɨnaange' nejaavanɨ'. Nabaai nemɨ gamɨnyɨ bule'na wɨjavaaja' nemɨ wagɨlyavɨre tɨvɨkɨsavɨ lɨkaanya wawaajɨ yɨnɨga wavɨlavaanneina dɨngaka! Aawa nebulyasɨ. 26Sɨnnawɨ Mugunya Saainaaya Gotɨyare maangi' kada' yɨ kwaake' wɨnɨnya yakesɨ. Kɨrɨ' dahaa' sai nemɨnyɨ yune naanga nebulya'na nedɨwa' “Yɨ nɨmɨ Kwaakevɨ ayahi pɨgaasɨ tɨvɨpalɨdeinyɨ. Yɨ nabaai yune Kwaake'nanya'na mɨ'. Aawa. Yɨ nɨmɨ Kwaakesɨ sɨgunyasɨ sawaarɨ tɨvɨpalɨdeinyɨ.” 27Yagaala daza' “Ayahi pɨgaasɨ,” nemɨnyɨ dara neyɨbwarɨdaakuvanɨ' “Yuya sɨnnawɨ Gotɨyai yavɨkaryaake yɨ dahaa' sai tɨvɨpalasɨ'nadengɨ. Yɨ daza sai marasɨ'nadengɨ. Yɨ ayahi pɨnɨ warade mɨ'. ‘Yuya Sɨgunyavɨya sa marɨvɨpalasɨ'nyɨ yɨwɨne yɨ sa warana!’ dozɨ tɨvɨpalasɨ'nadengɨ.” 28Sarevɨdaa'nyɨ nemɨ ma'daanya nemaremwaaide' daza' marɨvɨpalasɨ'nyɨ yannevɨna nemɨ nayaa suya suya wɨdaana! Yɨ yanga gaimwanga daza' lɨmwadaa yɨ Gotɨyarɨ wigalya'neina gamɨnyɨ yɨlaaya nayaa maryaana! Gamɨnne yaya' munyaba nayaa makidaa yɨ gamɨnyɨna lɨka yaana! “Sahwai Naangelyɨ. Dɨragɨnaangelyɨ,” yawɨraana! 29Sare' darevɨnyɨ. Nemɨre Gotɨyai wɨdayadaanyai dɨka naangelyɨ. Yuya kayaa'nanyajɨ gɨrɨkita'nanyajɨ dazangɨ dɨka nasɨ'na yadelyɨ.

Currently Selected:

Yɨvɨru 12: byr

Highlight

Copy

Compare