Popular Bible Verses from Yɨvɨru 13

Share

Nɨgwiangɨ wabarɨnna ya saburɨ mamɨdɨbɨna! Gɨlyɨvɨta sarɨmɨ lɨmwamanɨgasa, sa yɨ nayaa dara jawɨrila! “Sa yɨ nawɨ'nyangɨra. Sa yɨnɨga wi'na neyadengɨra.” Sare' darevɨnyɨ. Gotɨyai mena dɨvanɨ' “Yɨ nɨmɨ gɨmakwaasɨdeinyɨ mɨ'. Arɨkewɨ. Yɨ nɨmɨ bule'na gɨzaavɨdeinyɨ mɨ'. Arɨkewɨ.”

Jizaazai Kɨraazɨtɨyai yɨ sai kuna avaainanyalyɨ. Yɨ wonajɨ yɨ dahaa' kɨgaasɨ yɨ yuyagaa' yuyagaasɨ avaaina mwaaidelyɨ. Sahware sabwi avaainanyasɨ.

Sarevɨ nemɨ nennya sɨmunya' dɨragɨnya yɨwadaa dara daana! Naangei nɨmɨnyɨ nyɨgaimwadelyɨ. Nɨmɨ lɨka miwɨna! A'mwera berɨ' nyɨpɨ'deinyaka! Yɨnɨga wi'na gara nyɨpɨneinyaka! Sara yawɨ'daa dɨragɨnya neyɨvaimwadeinera.

Nawɨ'nya tewaanyabwi a'mweraavɨ ya'najɨ sarɨmɨre gɨlyɨvɨsa nayaa jaapaidɨvɨ' kuneraavɨ wɨjaaya'najɨ sarɨmɨ sɨmunya navɨka myagalya'mapɨna! Sare' darevɨnyɨ. Yɨra'dɨvɨsabɨ' sasare sa'na Gotɨyarɨ wigaimanɨ'.

Sarevɨdaa'nyɨ Jizaazai negaimwadevɨ nemɨ Gotɨyarɨ yɨlaaya nayaa yaana! Yɨ yuyagaa' yɨlaaya daza' yɨra'dɨvɨsa'bɨ' sahwarɨ wɨjavaana! Yo, daresɨ. Nemɨre maangi' sahwarɨ nayaa dara wɨjavaana! “Gotɨyai nawɨ'nyalyɨ. Sahwarɨ Jizaazarɨna nemɨ dɨragɨnna lɨmwaga'manɨgoine.”

Kwala maaryabwi yɨ sa' nawɨ'nyaangesɨ. Dazaburɨ yaya' yuyaihi munyaba nayaa dɨmakɨlyɨla! Sayoihi kwala maaryabwinebwi nayaa jɨla! Wana nebulya'na tɨrɨmaaya' warana! Sare' darevɨnyɨ. A'mwera pwaraavɨre a'mwengɨ ata lɨmwabɨzaraavɨjɨ a'mwera a'mwe yaasɨwa' pɨnamarya yadɨvɨsaraavɨjɨ tɨvɨkɨta kayaa'nanya wɨjaaya'nei jɨdavadelyɨ Gotɨyai.

Sarɨmɨre angengɨna badaapiyaraavɨ gaimwange'na sɨmunya navɨka myagalya'mapɨna! Sare' darevɨnyɨ. Sɨnnawɨ a'mwe pwara sasara yaasara yɨ sahwara a'mweraavɨ makabadɨvɨ' kunnya angengɨ yadɨvɨ' saraavɨ maremwaaina yesare. Kɨrɨ' aanga'mwera mɨ'. Navɨka mwaaidɨvɨ' kɨrɨ' Gotɨyare mamaayaraavɨ maremwaaina yesare.

Gotɨyai kwaamu'nanyaburɨ aaya kaavɨlyalyɨ. Sahwai nemɨre Naangei Jizaazarɨ bainɨkeraayawɨdaa'nyɨ ayɨna yɨdɨkaavakelyɨ. Jizaazai gamɨre sipɨzipɨyainaavɨ Maremwaala Naangei yɨma'nya'nei gamɨre tawe' kabwalaraawa' yagaala nelɨmwagarɨkebwi yuyagaa'ne' dɨragɨnna dakake'nanyɨ. Yɨ sarevɨ Gotɨyai gamɨre a'mweinaavɨ tewaanyainaavɨ tɨvi'nanyaina yɨma'nya'neinaavɨ yakelyɨ. Sahwai gamɨre sɨmunya sabwi yɨnɨga wi'na dɨmɨdɨnyide'na yuya nawɨ'nya tewaanya gazabwizabwi yɨhɨzaavana! Jizaazai Kɨraazɨtɨyai negaimwagathevɨ Gotɨyai gamɨ sarɨ wigaimanɨkebwi nemɨ yuyainaavɨre sɨmunyavɨ marima'naabathelyɨ. Jizaazai Kɨraazɨtɨyai yuyagaa' yuyagaa'ne byaanna dɨragɨnya' kɨnɨnnakei mwaalana! Sahwarɨne yaya' munyaba makɨlaana! Sahɨrɨsɨra!