Yɨvɨru 11

Sɨnnawɨnyara Gotɨyarɨ dɨragɨnna lɨmwagesa' nejɨwaainɨvanɨke'nesɨ.

1Dɨragɨnna lɨmwangebwi yɨ sabwi darebulyɨ. Nemɨre sɨmunyavɨ dɨragɨnna mena lɨmwagaraaja' yɨ sa' yuya nemɨ yemwaaimanɨgonna Gotɨyai nejaaya'nenne aaya kaavɨlyasɨ. Yɨ daza nemɨre tɨnnyai tɨnna mwanganyɨvanɨgo sa yɨ nemɨre sɨmunya' lɨmwangebwi nebulya'na yawɨrangamanɨ'. 2Sare' darevɨnyɨ. A'mwe sɨnnawɨnyara sahwara dɨragɨnna kalɨmwage', sare' yɨ Gotɨyai da' “Sahwara yɨ nawɨ'nyarera.” 3Nemɨ dɨragɨnna lɨmwadaa sarevɨ yɨ nemɨ mena yawɨramaa'manɨgo. Gotɨyai yagaalya' wɨjaakevɨ sɨgunyasɨ Kwaakesɨ yavɨkaryaa'. Yuya nemɨ tɨnna wangamanɨgo sanna Gotɨyai pɨnɨngɨ tɨnna yɨnɨga wi'na mwanganyɨ yaannengɨ maaraka yuya sa yavɨkaryaakengɨ.

4Aivelɨ Gotɨyarɨ dɨragɨnna lɨmwaga'delyɨ. Sara yada yɨ sahwarɨna yɨrata tewaanya' wɨjayaa'. Yɨ yɨrata daza' gathaakaangei Kenɨmɨre yɨrasavɨ wavɨlavɨkesɨ. Yɨ tewaanya nebulyasɨ. Yo, Aivelɨ dɨragɨnna lɨmwagaka dazavɨna Gotɨyai “A'mwe yɨda'maraangeigɨnyɨra,” wɨjalɨkurakakelyɨ. Gotɨyarɨna yanga Aivelɨ wɨjayaakenna Gotɨyai nawɨ'nya wɨvu'nakelyɨ. Yɨ Aivelɨ mena kabala' kɨrɨ' gamɨre dɨragɨnna lɨmwanga dazavɨ sa' yagaala kuna dɨvanɨkesɨ.

5Yɨnokɨ Gotɨyarɨ dɨragɨnna lɨmwaga'delyɨ. Yɨ Gotɨyai sahwarɨna daka “Mabalanna!” sahwarɨ maaraka Sɨgunyavɨna makɨlaawa'. Gotɨyai mena maarake'na a'mwera sahwarɨna bɨramaarya'nera yeva kɨrɨ' mwanganyɨ ye'. Sare' darevɨnyɨ. Yɨ sɨnnawɨ Gotɨyai Yɨnokɨmɨ mamaaryadɨ'nyɨ yɨ dazagaa'na Gotɨyare Bukuyavɨ dara dɨnɨkesɨ. Yɨnokɨ Gotɨyarɨ yɨlaaya naanga wigalakelyɨreva. 6A'mwei Gotɨyarɨ malɨmwagya sai Gotɨyarɨ yɨlaaya wigalannei mɨ'. Sare' darevɨnyɨ. A'mwe pwai Gotɨyarɨ yɨlaaya ya'nei sahwaryaba gaimakuwɨlya'nei yɨ sahwai dara yawɨrana! Yɨ Gotɨyai mwaalɨ'. Sahwai a'mwera sahwarɨna bɨ'dɨvɨsaraavɨ tɨvɨkɨta nawɨ'nya' wɨjaavadelyɨ. Sara yawɨrana!

7Nowaai Gotɨyarɨ dɨragɨnna lɨmwaga'delyɨ. Sara yada yɨ Gotɨyai yune'na wɨdakevɨ “Mala nayaa jɨwannana!” sahwai dɨvi yɨma'nadevɨna kuna mwanganyada Gotɨyare yagaalya' kadɨka wɨ'namaa'na yaka sɨpɨya pɨrɨ' yavɨkarina ya'. Sarevɨ yɨ gamɨjɨ gamɨre a'mwakaimɨraayamɨlɨkajɨ sɨpɨyavɨ kusawɨ yɨkwina yeva wɨlamwaaina yesa'na nawɨ'nya yɨvainakenɨdake. Gannya dɨragɨnna lɨmwanga dazavɨ Nowaai Kwaakevakɨya a'mwe yuya pwaraavɨ kotɨya mena jɨdavakesɨ. Sahwai Gotɨyarɨ lɨmwaga'daa'nyɨ pwara aawa. Yɨ gamɨre dɨragɨnna lɨmwangevɨ Gotɨyai Nowaarɨ “A'mwe yɨda'maraangeigɨnyɨ. Yɨ nɨmɨre kaimɨraayaigɨ yɨma'nɨwaa,” wɨda'. Yɨ Gotɨyai a'mwe yuyara gamɨnyɨ dɨragɨnna lɨmwadɨvɨsaraavɨ yadevaaibɨsasɨ.

8Evɨraamɨ Gotɨyarɨ dɨragɨnna lɨmwaga'delyɨ. Yɨ Gotɨyai jaka wɨjɨvwaramaa'na kya' Evɨraamɨ Gotɨyare yagaalya' mɨdɨnna yakelyɨ. Sai gannya angeba yagalya'mavaka yɨ kwaaka pɨbanna Gotɨyai gannya yɨnahunya' wɨjaaya'nebanna wawa'. Evɨraamɨ myawɨrya' “Nɨmɨ gawɨnna wɨdeinyaka?” Kɨrɨ' sai dɨragɨnna lɨmwada wawa'. 9Sai dɨragɨnna lɨmwada kwaaka dazavɨ sɨnnawɨ Gotɨyai sarɨ yune naanga nebulya'na “Gɨzaavɨdesɨra,” daka savɨ mwalaawa'. Yɨ sai kwaaka savɨyaibɨ' kwaaka dazavɨ maaveibɨ' mwaala'. Sai selɨ anga sɨmɨnangebɨsangɨ Aazakɨ gawaalɨvaangelyɨ Jaikopɨ gyakwalaangelyɨ mwaalagɨlabaaibɨ' mwaaidelyɨ. Yɨ a'mwe dazaraai kwaaka daza' sɨnnawɨ Gotɨyai dakabaaibɨ' salyɨ yagaala yune naanga wɨja sa' ye'mwannamaaragɨlyaraalyɨ. 10Sare' darevɨnyɨ. Anga naange' Gotɨyai gave sahwaina anga naangeba majavwina yawɨramaa'na yaka gamɨ sai mada'. Yɨ anga naanga daza' yuyagaa'ne' mannɨgunɨkesɨ. Evɨraamɨ anga naanga dazaba kusawɨ wɨlya'ne gannya sagaa'na yemwaala yakelyɨ. 11Nabaai Seraa' Gotɨyarɨ dɨragɨnna lɨmwaga'devɨ gamɨ sa' yagɨnya' mwaaida kɨrɨ' nabaai a'mwe ne' mena mwaaida kɨrɨ' kaimɨraayarɨna munya wannya'ne dɨragɨnya' wi'na maarakesɨ. Seraa' sɨmunya dara yawɨramaarakevɨnyɨ “Yɨ Gotɨyai yagaala yuna nebulya'na dadelyɨ. Sahwai lɨmwangebwi yɨnɨkelyɨ. Sahwai nɨmɨ kaimɨraayarɨna munya wannya'ne'nyɨ mena nyɨdakɨwake' yɨnɨga wi'na yadelyɨ.” 12Sarevɨ yɨ a'mwe gave dazai nabaai sai yuna nei balya'neba kɨbawa yada sai gyakwalaanga kwalaalya naangeraavɨna kwɨyakwalaangei yɨma'nakei. Nabaai sahwara sɨlɨngaamɨnya sɨgunyavɨ yɨlarɨka sabɨ', saalaalyavɨ maangebaarɨ siweka warɨka sabɨ' kwalaalya naanga yɨma'nɨguvanɨga'. A'mwera ata yɨnɨga wi'na gibɨnera mɨ' sahwaraavɨ.

13Yuya dazara kuna dɨragɨnna lɨmwadɨvɨ' mena bale'. Sahwara Kwaakevakɨ mwaalesagaa' nawɨ'nya daza sɨnnawɨ Gotɨyai sahwaraavɨ yune naanga nebulya'na dake maaretara mɨ'. Aawa. Sahwara nawɨ'nya daza menya saamɨnyaba kuna daa'dɨvɨ' sahɨnɨ tɨnna wangadɨvɨ' yɨlaaya ye'. Yɨ ku'maayaba dara jalɨkurake' “Nemɨ Kwaaka dathavakɨ mwaaihoina a'mwe anga pɨwɨdaasarabɨsaine. Nemɨ angavaayaina maalɨkegaa' Kwaaka dathavakɨ bamwaaiho.” 14Sare' darevɨnyɨ. A'mwera yagaala sasare sa' dadɨvɨsara dara neyɨbwarɨdaakwe' “Nennya kwaaka Gotɨyai nenɨmaangei mwaaideva nebulya'na bɨramaraana!” 15Pɨrɨ' daresɨ. Anga dazaba sɨnnawɨ yagalya'maveva besaba kumɨre sɨmunyavɨ kuna warajɨ kwajɨ sahwara ayɨna wɨya'nera yɨ tusa' kɨnɨnnakera kamwaaibɨthɨka! 16Pɨrɨ' daresɨ. Kumɨre sɨmunyavɨ kwaaka pɨbanna yɨ sa' kumɨre abwaibwalaasavɨ wavɨlavaka yɨ tewaanya nawɨ'nyaangevɨna tewaanya wɨvu'nakesɨ. Sa' yɨ yune Sɨgunyabanna. Sarevɨ a'mwe dazarera dara desa'na “Gɨmɨ nemɨre Gotɨyaigɨnyɨ,” Gotɨyarɨ yɨlaaya wigaidɨvɨsalyɨ. Gotɨyarɨ sahwaraavɨna wagɨla muvwa'nyakelyɨ. Sare' darevɨnyɨ. Sai anga naanga pɨba a'mwe dɨragɨnna lɨmwaga'dɨvɨta dazara mwaaibɨ'deva mena yovɨrawakakere.

17Sɨnnawɨ Gotɨyai Evɨraamɨmɨ yaamɨjɨ yɨjɨwaalakegaa' sara kuda' yɨ Evɨraamɨ Gotɨyarɨ dɨragɨnna lɨmwaga'da “Nɨnnya Aazakɨmɨ tamiraya'nerɨ Gotɨyarɨna wɨjaavɨma!” dakelyɨ. Gotɨyai sahwarɨ yune naanga nebulya'na wɨdakei sahwai kaimɨraaya gave pwainanya dazarɨ tamirasa'nei sara daka yakelyɨ. 18Yɨ kaimɨraaya dazai Aazakɨmɨna Gotɨyai Evɨraamɨmɨ wɨda' “Yɨta yune Aazakɨmɨre savaa'na gɨmɨre yɨta savaa' yaya maapɨ'dere.” 19Evɨraamɨ dara yawɨraka “Nyɨbwaalɨ' mena kabalojɨ baa'nana! Gotɨyai ayahi yɨnɨga wi'na yɨdɨkaavannelyɨ.” Sarevɨdaa'nyɨ ke'ba'na yagaalya' daza'na sasare' nemɨ yɨnɨga daanneine “Evɨraamɨ gannya kaimɨraayarɨ ayahi maara' kavi'nɨnnyavɨdaasaibɨsarɨ.” 20Aazakɨ Gotɨyarɨ dɨragɨnna lɨmwaga'delyɨ. Sara yadevɨ sahwai Jaikopɨjɨ Yɨzolyɨ saraarɨ yagaala tewaanya naanga yanga ya'ne' wɨdakelyɨ. Yɨ yagaala dazavɨ sahwai sahwaraarɨ dɨvidaa'nyɨ yɨma'nya'nenna dakelyɨ. 21Jaikopɨ Gotɨyarɨ dɨragɨnna lɨmwaga'delyɨ. Sara yadevɨ yɨ gamɨ balya'ne kɨbawegaa' Jozepɨyare a'mwakaimɨraayaraarɨna Gotɨyai tewaanya naanga yanga yɨma'naabya'ne yagaala wɨda'. Yɨ sai yadisarɨkɨ yademavemwaaina yaka Gotɨyarɨ yɨlaaya yakelyɨ. 22Jozepɨyai Gotɨyarɨ dɨragɨnna lɨmwaga'delyɨ. Sara yadevɨ yɨ yɨrɨka gamɨ balya ya'negaa'ne yagaala daka'. Yɨ dɨvina Yɨzɨrelɨyara Yɨzɨpɨ yagalya'mavapɨri wɨpɨ'dehaa' gamɨre yagɨnyarɨ' kwaaka Gotɨyai wɨjaavadevɨna makabapi lɨkirakya'na sahwaraavɨ wɨda'.

23Mozɨzare ganɨmaangeyoi Gotɨyarɨ dɨragɨnna lɨmwaga'disawaalyɨ. Sara yadisavɨ ganaange' Mozɨzarɨ mudanga kya' yɨ sawaai kaimɨraaya tewaanya nawɨ'nyarɨ wanganna yagɨlya'najɨ kingɨyare yagaala dakɨnɨke'na sawaai lɨka myagɨlya'najɨ lawe dɨkaai dɨ'nannela dahɨla sahwarɨ lɨka yulyakɨna yagɨlyawaalyɨ. 24Mozɨzai Gotɨyarɨ dɨragɨnna lɨmwaga'delyɨ. Sara yadevɨ dɨvidaa'nyɨ sai naanga mena yɨma'naka “Aala!” da'. “ ‘Sahwai Yɨzɨpɨ maremwaaidei Peroyare garaavaanga savɨrelyɨra,’ nanyɨdɨpɨka! Peroyare dɨragɨnya' maarya'neinyɨ mɨka! ‘Aala!’ dɨwa.” Sara dakelyɨ. 25Gamɨ sai “Gotɨyarerajɨ taange' ye'mwannamaarɨma!” daka kayaa'nanya savɨre sabwi mɨdɨnya'ne maalɨkegaa'ne wabahɨlaaka bɨramaarya'na “Aala! Sara yɨwɨja' naangegaa' savɨre wagɨla nanyɨvwa'nadɨka!” da'. 26Sai sara yawɨraka nabaai sai Kɨraazɨtɨyarɨ bɨrala wɨdɨpɨ'devaaibɨ' wagɨla maarya'ne' daza' yɨ gɨlyɨvɨta nɨgwɨlalaaka Yɨzɨpɨ mwaalyaraavɨrengɨ nebulya'na wavɨla'desɨ. Sare' darevɨnyɨ. Yɨ Gotɨyai sahwarɨ wɨjaaya'ne tɨvɨkɨta nawɨ'nya' yuyagaa'ne' yawɨranganake'nanyɨ. 27Gotɨyarɨ dɨragɨnna lɨmwaga'devɨ yɨ sai dɨkaavaka Yɨzɨpɨ yagalya'mava'. Sai kingɨya dazare sɨnna tɨka wɨdavake'na lɨka myaka yagalya'mava'. Sare' darevɨnyɨ. A'mweina Gotɨyarɨ tɨnnyalyɨ wangadaanyaina mɨ'. Kɨrɨ' Mozɨzai Gotɨyarɨ tɨnna wanganya'bɨ' yakevɨna sai dɨragɨnna mwaalakelyɨ. 28Gotɨyarɨ dɨragɨnna lɨmwaga'devɨ Pari'ma'munne' yɨmavɨdaakwa'. Ejelɨya tamakadei Yɨzɨrelɨyainaavɨre sɨraangeraayaba gidɨkusabanna nabathɨkajɨ, Mozɨzare yagaala mɨdɨneva sipɨzipɨyare tawe' kaadihɨsavɨ yɨrɨkuresa'nanyɨ. 29Yɨzɨrelɨyara Gotɨyarɨ dɨragɨnna lɨmwadɨvɨsavɨ yɨ Saalaalya Wayaakevɨ kwaaka yaalɨkɨryavakɨ wɨlaawe'. Nabaai Yɨzɨpɨyara sahɨrɨvɨ yaamɨjɨ sara yesa' yɨ aalya' maramina kwia' mena balɨna ye'. 30Yɨzɨrelɨyara Gotɨyarɨ dɨragɨnna lɨmwadɨvɨsavɨ sikurɨka Jerikonyavɨ yɨrɨka ata purɨdaa'nyɨ pwaraalya gazarɨsarɨ' wavɨlavakegaa' kaanya gɨ'mave'. Yɨ sara kye' sikurɨke' wala'na yakesɨ. 31Rayaa' sɨnnawɨ yaasɨwa' yamaryade' Gotɨyarɨ dɨragɨnna lɨmwaga'devɨ a'mwe pwaraarɨ gaimwaga'. Saraai Yɨzɨrelɨyaraavɨne dameraai angeba Jerikona badi' kutɨnna byadaakɨlyɨyaraarɨ. Sarevɨ yɨ sa' a'mwe Gotɨyarɨ galazekɨvalesarajɨ kayaaka mye'mwannayɨnya'.

32Kɨrɨ' dahaa' nɨmɨ ayahi be yagaala je'mwagɨjɨwana? Aawa. Dahaa' yɨnɨgehaa' mɨ'. Sare' darevɨnyɨ. Nɨmɨ yagaaikɨwɨnya dɨwɨne' Gɨthɨyonɨnna, yɨ Baraakɨnajɨ yɨ Saamɨzonɨmɨnajɨ yɨ Jepɨtaazarɨnajɨ yɨ Devitɨjɨ Saamyɨwelɨjɨ saraarɨnajɨ yɨ Gotɨyarɨ wɨ'nawɨjɨwaakadɨvɨsaraavɨnajɨ. 33A'mwe dazara Gotɨyarɨ dɨragɨnna lɨmwaga'dɨvɨsare. Sarevɨdaa'nyɨ yɨ pwara malyavɨ wavɨla'dɨvɨ' kingɨya pwaraavɨre kwalaalyaraavɨ aamiyaraavɨ walamarakadɨvɨsare. Pwara tewaanya yɨda'maraangebwina yadɨvɨsare. Pwara Gotɨyai yune naanga nebulya'na dake maaresare. Pwara kavɨjɨlɨka laayonɨyaraavɨre maangengɨ galabu'mwanna ye'. 34Pwara dɨka naange' kyɨda' yɨgaapalesare. Pwara lɨkaanya wodɨvɨ' kwaari'masɨramɨnya maramakya'. Pwara arakɨjara mwaaleva yɨ dɨvidaa'nyɨ dɨragɨnya maare'. Pwara malyavɨ a'mwe dɨragɨnaangera nebulya'na yɨma'ne'. Yɨ sahwara menyaraavɨre aawɨlata naangeraavɨ mɨjamakwawe'. 35A'mwe Gotɨyarɨ dɨragɨnna lɨmwaga'dɨvɨsangɨ. Kumɨre mena bainɨkera ayɨna kidɨkaava' sahɨnɨ ayɨna maare'. Kɨrɨ' a'mwe pwara kalavuzavɨ mwaaidapi yɨkamaangera kumɨre kɨlaakejɨ' kayaaka nebulya'na yɨgalake' kumɨre yune balya'negaa'na. Sahwara Gotɨyarɨ bule'na wɨjaavɨpɨjɨ kwajɨ yɨ nabaai yɨkamaangera sahwaraavɨ makwaasɨna kyɨpɨdɨka! Kwipɨdɨka! Kɨrɨ' sahwara yɨkamaangeraavɨre yagaalya' mɨdɨnetara mɨ'. Aawa. Sahwara yawɨ'dɨvɨ' “Kavi'nɨnnyavɨ Gotɨyai neyɨdɨkaavadeinera. Yɨ gaala nawɨ'nyaange' yuyagaa'ne' maraadeinera,” dɨragɨnyara bale'. 36Pwara taanga maarɨna ye'. Yɨkamaangera sahwaraavɨ yagaaibɨraizɨka wiadaapi, mala dɨka wɨgɨda'dɨvɨ' senɨyabarajɨ wɨla galyɨrakadɨvɨ' yɨ kalavuzavɨ wɨmwaaihɨna yadɨvɨsare. 37Yɨkamaangera pwaraavɨ sɨlyajɨ lɨwakɨna. Pwaraavɨ kisɨkisɨlyasɨ yune woripu'na. Pwaraavɨ kwaari'masɨramɨnyasɨ dabaina kye' bale'. Pwaraavɨre kɨlaakejɨkɨne yuya sanna wɨmudaasakera kɨlaaka sipɨzipɨyangɨrejɨ memeyangɨrejɨ kumɨre kwaabɨhannya yɨra'ne'. Yeva kaanya yamarye'. Pwaraavɨ taanga wɨjaavesare. Pwaraavɨ wana kayaa'nanya wiadɨvɨsare. 38Sarevɨ yɨ kaanya yɨwɨnama'na kwaakevɨ a'mwera maayabajɨ mugunyangɨjɨ lɨka yulya'na yadɨvɨkɨ. Yɨ sɨlyangɨya lɨnnyangɨjɨ yɨ kwaakevɨ yɨrorɨlyangɨjɨ wɨlamwaale'. Sarera tewaanyarera. A'mwe dɨragɨnna lɨmwaga'dɨvɨta dazara sahwaraavɨ tɨnnyawɨ mwaalya'nera a'mwe Kwaakevakɨyara yɨnɨga wi'na yɨpɨnera mɨ'.

39A'mwe yuya dazara Gotɨyarɨ dɨragɨnna lɨmwaga'dɨvɨsaraavɨna Gotɨyai da' “Sahwara yɨ nawɨ'nyarera.” Kɨrɨ' nawɨ'nya daza' sɨnnawɨ Gotɨyai yune naanga nebulya'na dake maaretara mɨ'. 40Sare' dare'nanyɨ. Gotɨyai yawɨta pɨrɨ' yawɨta sɨnnawɨnyavɨ wavɨlavɨke' nemɨnyɨne' yovɨrawaka'. Sɨnnawɨnyara yɨbwaramakwaanya' nemɨnyɨ ya'nera yɨnɨga wi'na waanya'nera mɨ'. Aawa. Nemɨ sahwarajɨ yuyagaa'ne yune nebulya'nanyainaavɨ nebulya'na yavada'galanemwaaihadeinera.

Currently Selected:

Yɨvɨru 11: byr

Highlight

Copy

Compare