Galezɨya 4

1Yagaalya' yɨhɨthɨwe da'na yɨhɨthɨvanɨge. Kaimale pwai ganɨmaangere gɨlyɨvɨta yuya maaradelyɨ. Gamɨre yuya wa'dɨ'nyɨ kɨrɨ' kaimalei kuna mwaalɨke'na mamaaryɨvanɨkelyɨ. Sare'na kaimalegaa' yaasɨwa'wawɨnyaibɨsai mamaremwaalyɨkelyɨ. 2Kaimalei mwaaidɨ'nyɨ ganɨmaangei sara wɨdake'na pwara gamɨnyɨ maremwaaina yadapɨjɨ nabaai, pwara gɨlyɨvɨsangɨ maremwaaiha'. Dɨvi ganɨmaangei wɨdakegaa' yɨma'nadehaa'na sagaa' gawaalɨvaangei sahwai maremwaaladelyɨ. 3Sabaaibɨ' mwaalosɨra. Kaimaleina mwaalogaa' Kwaakevakɨyabwina mwaidaa “Sa' kɨmaakesɨra. Da' minna! Sa' minna!” yawɨ'daa sana sana yadaa saburaavɨ yaasɨwa'wawɨnyainera. 4Gotɨyai dahɨlakyaakegaa' yuna yɨma'nakegaa' Kwaakevakɨna gannya gawaalɨvaangerɨ wɨdasaabɨna. Wɨdasaabɨna kya' a'mwe' maarakei yɨma'nakelyɨ. Nabaai, Gotɨyare Kɨwɨnyavɨ dalaangewɨ marulavemwaaidei yɨma'nakelyɨ. 5Kɨwɨnya' yaamɨjɨ mɨdɨdɨvɨsara “Gotɨyai nɨmɨnyɨna yawɨrana! ‘Sai yɨda'maraangelyɨ.’ Yawɨrade'na Kɨwɨnyabwi yɨma!” dadɨvɨsaraavɨnesɨ. Yɨ nemɨnyɨna “Nɨmɨ maryaavɨma! Nɨmɨre nyɨbwaalɨvaangera yɨma'nɨpɨka!” daka Kɨwɨnyavɨ dalaangewɨnyaraavɨna “Nyɨbwaalɨvaangei ayɨna wɨmubana!” kada' sahwai Kɨwɨnyavɨ dalaangewɨnyai yɨma'nakelyɨ. 6Yɨ sarɨmɨ gawaalɨvaangeihi mwaaihasa'na Gotɨyai Gawaalɨvaangere Kuryai Tewaanyarɨ nemɨre sɨmunyangɨ wɨdasaaba'. Kurya sai wɨlanemwaalaka nejɨwɨryadaa'nyɨ Gotɨyarɨ dɨragɨnna wɨdɨvanɨgo “Tataai! Nɨmwai!” 7Sare' yaasɨwa'wawɨnyaigɨ kuna mamwaalyɨgɨ. Aawa. Gawaalɨvaangeigɨ mwaaihɨ. Gotɨyai sara yake'na gawaalɨvaangeigɨ mwaaidɨ Gotɨyai gawaalɨvaangeraavɨ wɨjaaya'ne dɨmaa'deigɨnyɨ.

Polɨ Galezɨya mwaalyaraavɨna sɨmunya kwalaalya yawɨrake'nesɨ.

8Kɨgaa' Gotɨyarɨ myawɨryesa'na kwaasɨ dɨragɨnyara (kwaasɨgotɨyara) mamwaalyesara wɨla yɨhɨvwɨyadɨvɨ' yaasɨwa'wawɨnyaihi wɨdaayadɨvɨsaihɨrɨ yɨhɨmaremwaalesaihɨlyɨ. 9Kɨrɨ' dahaa' Gotɨyarɨ yawɨrangamanɨgasa'na, nabaai, dɨwɨja' pɨrɨ', dahaa' Gotɨyai yɨhyawɨrangamanɨke'na Gotɨyarɨ be'na yagalya'ma'manɨga'! Sara yɨvanɨgasa' “Yɨmakera ayɨna nemaremwaaibɨka! Kwaakevakɨyabwi yaana!” dɨmanɨgatabaaibɨsasɨ. Sahwara dɨragɨnya maayarera. Waryaanyarera. “Sahwaraavɨre yaasɨwa'wawɨnyaina ayɨna yɨma'naana!” be'na dɨmanɨga'! 10Sareihi ayabaaibɨ' yawɨ'na “Gotɨyai nɨmɨnyɨna yawɨ'na ‘Yɨda'maraangelyɨ,’ yawɨrade'na Kɨwɨnya' yɨma!” yawɨ'na yadɨvɨ' yɨrɨkengɨjɨ lawengɨjɨ kwaramengɨjɨ kɨmaaka mwaaimanɨgasaihɨlyɨ. Sɨmunya dazabwi nawɨ'nyabwi mɨka! 11Sareihɨrɨna sɨmunya kwalaalya yawɨ'manɨge. Mi'na yage'na tewaanyaihi mwaalɨna yesaihɨlyɨ. Nɨmɨ yuya sarɨmɨnyɨna yage yaasɨwa'na nyɨma'nadɨka!

12Nya'mweihi, dɨragɨnna yɨhɨthɨvanɨge. Kɨwɨnya'na nɨmɨbɨsaihi yɨma'nɨpɨneihɨlyɨ. Kɨwɨnya' majesaihibɨsainyɨ yɨma'neinyɨna yɨhɨthɨvanɨge. Kɨgaa' aane pɨrɨ' kɨrɨ' kayaa'na manyesaihɨlyɨ. 13Nabalɨnakeinyɨ mwaale'na sɨnnawɨ sagaa' sarɨmɨnyawɨnna wawena yagaala tewaanya' yɨhɨthe yawɨ'mwaa'. 14Dara wanganesa' “Akai, Polɨmɨre kɨlaakejɨkɨ nalaaya naanga wivanɨkei daaka!” Sara deva kɨrɨ' nɨmɨnyɨna majɨ “Waryaanyalyɨ,” majɨ yadɨvɨ' nabaai, bule'na manyɨjaaye'. Aawa. Sarɨmɨnyawɨnna ejelɨyai bazarɨ tewaanna wipɨnebaaibɨ' tewaanna nyesaihɨlyɨ. Nabaai, Kɨraazɨtɨyai Jizaazai bazarɨ tewaanna wipɨnebaaibɨ' tewaanna nyesaihɨlyɨ. 15Sarevɨdaa'nyɨ nɨmɨnyɨna yɨlaaya naanga ye'. Dahaa' yɨlaaya sa' gava warɨkavaka! Sare' dare'nesɨ. Sarɨmɨnyɨna dara jalɨkurakɨvanɨge. Ai, sahwara nɨmɨnyɨna yuya yɨpɨjara daa! “Wɨgaimwange'na nennya tɨnnyangɨ jɨwa'mwanna yawaajɨ Polɨmɨna wɨjavaajainaava,” sabaaibɨ' yawɨreva. 16Nebulyabwi yɨhɨthɨwe'na jawɨ'manɨga'! “Polɨ nemɨre yɨkamaangei mwaalɨ'.” (Yawɨta sasare sa' “Aala!” dɨwa.)

17Pwara yɨlaaya yɨhɨmarivanɨgasara tewaanya'na myɨhɨzɨvanɨga'. Wabwiwayagaala yɨhɨthɨvanɨga'. Sahwara yawɨ'na “Nemɨnyɨ yɨlaaya neyɨpɨka! Polɨmɨre yagaala mu'nɨpɨnera!” deva sara yɨwaasa'na wabwiwayagaala yɨhɨthɨvanɨga'. 18Tewaanya'na a'mwera yɨlaaya wɨmaryadɨvɨsa' yuyagaa' tewaanyasɨ. Sarɨmɨ yɨlaaya nyesa' tewaanyasɨ. Dahaa' sarɨmɨnyawɨ mamwaalyɨgehaa' yɨlaaya nyɨpɨja' tewaanyasɨ. 19Nɨmɨre kaimɨraayaihi, a'mwe' bwaranyarɨ maa'dehaa' daanga naanga wɨvɨdevaaibɨ' sarɨmɨnyɨna ayɨna daanga naanga nyɨvɨmanɨ'. Sarɨmɨre sɨmunyangɨ sarɨmɨre munyangɨ Kɨraazɨtɨyai yunebanna wɨlayɨhɨmwaaladehaa'na taanga sa' mi'na mwi nyadesɨ. 20Sarɨmɨnyaba mwaaimujainyɨ! Pɨkarya myavɨkarya'na nɨmɨre maanguraaya' yɨhɨthɨde'na sarɨmɨnyaba mwaaimujainyɨ. “Gara wɨdɨjɨwana!” yawɨ'dɨ taanga nyɨvanɨkeinyɨ.

Ehaavɨnajɨ Seraavɨnajɨ wɨdake'nesɨ.

21Dɨnyɨjɨla! Sahwaihi dɨna “Kɨwɨnya' nemaremwaalana!” dɨna yɨvanɨgasaihi dɨnyɨjɨla! “Kɨwɨnya sa' dɨnɨke' mu'nyɨwaasaihi daa!” 22Sare' dare'nesɨ. Dara dɨnɨke'. Evɨraamɨ gawaalɨvaangeraai kɨnɨnnakelyɨ. Pwai Yɨzɨmelɨ, pwai Aazakɨ. Wɨdaayade' Ehaa' Yɨzɨmelɨmɨ maryaa'. Gamɨre balaange' Seraa' Aazakɨmɨ maryaa'. Seraa' wɨdaayade' mɨ'. 23Kɨrɨ' a'mweinaavɨreburɨne wɨdaayade' Yɨzɨmelɨmɨ maryaa'. Gamɨre balaange', a'mwe ne' mwaaidɨ'nyɨ Gotɨyai Evɨraamɨmɨ yune naanga nebulya'na kujaa' Evɨraamɨ Gotɨyarɨ lɨmwagyaake'na Aazakɨmɨ maryaa'. 24Yagaala sa' ke'ba'na dɨnɨkesɨ. Sare' dare'nesɨ. A'mwe sawaai yagaala wɨlɨmwagarɨkewaalyɨ. Ehaa' Mugunya Saainaayavɨ Gotɨyai Kɨwɨnya' wɨjayaake' sahɨrɨsɨ. Ehaa' wɨdaayade' yaasɨwa'wawɨnya'bɨsa' mwalyaake'na savɨrera yaasɨwa'wawɨnyara mwalyaasarera. Nabaai, Mugunya Saainaayavɨya Kɨwɨnya' a'mweraavɨ pwɨyɨnɨkera yaasɨwa'wawɨnyara mwaaihasarera. 25Mugunya Saainaaya sa' Kwaaka Arevɨya warɨke' yɨ Ehaa'. Nabaai, Ehaa' Anga Jeruzaalemɨ dahaa' mannɨke' sahɨrɨsɨ. Sare' dare'nesɨ. Juyara dɨnyɨna “Jeruzaalemɨ nemɨre anga naangebera,” dɨnyɨna yɨvanɨgasara Kɨwɨnya' mɨdɨdɨvɨsa'na Kɨwɨnya sa' pwɨyɨnɨkesɨ. Davakɨ Jeruzaalemɨjɨyara yaasɨwa'wawɨnyarera. 26Sarera dɨragɨnna mamwaalyɨga'. Aawa. Jeruzaalemɨ munyaba Gotɨyarebanyaina Kɨraazɨtɨyareina dɨragɨnna mwaaiho. Sabajɨyaina yaasɨwa'wawɨnyaina mɨ'. Aawa. Nenaange' Seraavɨreinera. Gotɨyai nemɨnyɨna yune naanga nebulya'na dɨnɨkeina Aazakɨbɨsaina mwaaiho. Nemɨ Kɨraazɨtɨyarɨ lɨmwadaanyaina tewaanna mwaaiho Jeruzaalemɨ munyabajɨyaina. 27Sare' dare'nesɨ. Jeruzaalemɨ sabanyaaina ke'ba'na dɨnɨkesɨ. Jeruzaalemɨ munyabanya'na dɨnɨke'

“Kaimɨraaya maaya'gɨ yɨlaaya ja!

Jakajɨ jɨkajɨ ‘Su!’ dɨnyɨdangana!

Mamaaryadɨnya'gɨ yɨlaaya naanga ja!

Gɨthaasake'gɨre kaimɨraaya naanga mwaaibɨ'dera.”

Gotɨyarɨna munyabajɨyaina tewaanya dɨragɨnna mwaaiho'na dɨnɨke'nesɨ. Jeruzaalemɨ davakɨya'na dɨnɨke'

“A'mwanakevɨre pwai pwai mwaaibɨ'demɨlɨkera.”

Sara dɨnɨkesɨ.

28Nya'mweihi, Kɨraazɨtɨyarɨ lɨmwadɨvɨsaihi Aazakɨbɨsaihɨlyɨ. Gotɨyai Evɨraamɨmɨ yune naanga nebulya'na wɨjaakei yɨma'nyaakabaaibɨ' yune naanga nebulya'na wɨjaaka sa' maa'dɨvɨ' Gotɨyai dɨna “Yɨda'maraangeihɨlyɨ. Nɨmɨreihɨlyɨ,” dɨna yakeihɨlyɨ. 29Ehaa' kɨlaa'naka a'mweinaavɨrebwina maryaakei Yɨzɨmelɨ Aazakɨmɨ kayaa'na yɨna yaa'. Yɨ Gotɨyare Kuryai sara yaake'na maryaakerɨ kayaa'na yɨna yaa'. Sabaaibɨ' Kɨwɨnyabwi yɨvanɨgasara Kɨraazɨtɨyarɨ lɨmwadaanyainaavɨ kayaa'na neyɨvanɨga'. 30Kɨrɨ' Gotɨyare bukuya' berɨ' dɨnɨ'? Dara dɨnɨke' “Wɨdaayadesɨ gawaalɨvaangelyɨ sanaarɨ duthaaso! Sare' dare'nesɨ. Ganɨmaangere yuyangɨ wɨdaayadevɨrei mamaarannera! Arɨkewɨ. Gamɨre balaangevɨrei gavei maarade'na duthaaso!” sara dɨnɨkesɨ. 31Sarevɨ, nya'mweihi, yaasɨwa'wawɨnyavɨreina mɨ'. Aawa. Balaangevɨreinera. Gotɨyai nemɨnyɨna “Kɨraazɨtɨyarɨ lɨmwamwaasara nɨmɨrere. Nɨmɨre tewaanya yuya maapɨ'dere,” dɨnɨkeinera.

Currently Selected:

Galezɨya 4: byr

Highlight

Copy

Compare