Galezɨya 3

Gotɨyai “Yɨda'maraangeihɨlyɨra,” nedathevwinesɨ.

1Galezɨya mwaalyaihi sɨdu'maayaihi! Sarɨmɨre sɨmunya gɨnyɨwange' gara yɨma'nɨwaka! Sareihɨrɨ Jizaazai Kɨraazɨtɨyai yɨsavɨ baimwake' nɨmɨ kave yɨhɨthe' sarɨmɨ dara desa' “O, sahwai baimanɨkerɨ tɨnna dangamanɨgo!” 2Gave pɨrɨ' yɨhu'nɨma! Kɨwɨnya dɨnɨke' sara yesa'na Gotɨyare Kuryarɨ maaresaihi daa! Aawa, yagaala tewaanya' kadɨka wɨ'neva Kɨraazɨtɨyarɨ lɨmwaga'dɨvɨ' gannya Kuryarɨ yɨhɨzaava'. 3Sare' sɨdu'maayaihi daaka! Sɨnnawɨ Gotɨyai gannya Kuryarɨ yanga kyɨhɨzaava' sarɨmɨ tewaanna mwaalesaihɨlyɨ. Dahaa' “Nɨnnya kɨlaakevɨ dɨragɨnyasɨ naanga yune nebulya'nanyainyɨ yɨma'nɨdeinyɨ,” dathɨvanɨga'! 4Taanga naanga yɨhyake' dɨragɨnna mwaalesa' yaasɨwa' jɨma'nɨwaka! “Aawa, yaasɨwa'na mɨka!” yawɨ'manɨge. 5Sarevɨdaa'nyɨ ayɨna yɨhɨthɨma! Kɨwɨnya dɨnɨkevɨne wawɨnyanna sara yesa'na Gotɨyai gannya Kuryarɨ wɨjaavaka sarɨmɨnyaba atɨka dɨragɨnya wɨ'narya'ne yakei daa! Aawa, Kɨraazɨtɨyarɨ lɨmwagasaburɨne wɨ'nya'na Gotɨyai sara ya'.

6Nabaai, Ne Evɨraamɨ avaalyabaaibɨ' Gotɨyarɨ lɨmwagyaakelyɨ. Da' dɨnɨke' “Sai yawɨ'na ‘Gotɨyai nebulya' nyɨdɨwa',’ yawɨ'na yaka Gotɨyai dɨna ‘Nɨmɨnyɨ nyɨlɨmwamwake'na a'mwe yɨda'maraangei wɨmwaaihɨwe'na dɨwana,’ dɨna ya'.” 7Sarevɨdaasɨ sarɨmɨ yawɨ'na “Ne Evɨraamɨ Gotɨyarɨ lɨmwagyaakeibɨsaina Gotɨyarɨ lɨmwagya'neina Ne Evɨraamɨmɨre gawaalɨvaangeina nebwina mwaaiho,” sarɨmɨ yawɨ'na yɨpɨneihɨlyɨ. 8Nabaai Gotɨyare bukuya' sɨnnawɨ sagaa' dɨnɨke' ajɨmya yuyangɨyara lɨmwabɨ'de'na “ ‘Yɨda'maraangeihɨlyɨ,’ wɨdɨdeinyɨ.” Sare'na sɨnnawɨ Gotɨyare bukuya' Evɨraamɨmɨ yagaala tewaanya' dɨnɨke' “Nyɨlɨmwamwaanya'na ajɨmya yuyangɨya yuyaraavɨna tewaanya naanga yanga wideinyɨ. Maarɨderera,” sara dɨnɨkesɨ. 9Sare' Evɨraamɨ Gotɨyarɨ lɨmwagyaakerɨjɨ nemɨ a'mwe Gotɨyarɨ avaaina lɨmwamwoinaavɨna Gotɨyai tewaanya naanga yanga nejaawakeinera.

10Sare' dare'nesɨ. Kɨwɨnyaburɨne wawɨnyangɨnera yɨ sahwara Dɨkevɨ marasɨ'nya'nevɨ dalaangewɨ mwaaiha'. Sare' dare'nesɨ. Dara dɨnɨ' “Gazaigɨzaigɨ yuyagaa' Kɨwɨnyavɨya bukuyavɨ dɨnɨka yuya sa kuna myadɨnyaigɨnyɨ Gotɨyai Dɨkevɨ gɨmarasɨ'nadelyɨ.” Sara dɨnɨke'na yuyara sara myadɨvɨ' Dɨkevɨnerera. 11Nabaai, Gotɨyare bukuya' dɨnɨke' “Pwai Gotɨyarɨ lɨmwade sarerɨna Gotɨyai ‘Yɨda'maraangelyɨ,’ dozɨyai yuyagaa' gaala mwaaladelyɨ.” Sara dɨnɨke'na nemɨ tɨnna dara dɨragɨnna wangamanɨgo' “O, Kɨwɨnya yɨvanɨke aane pwai kwarɨna Gotɨyai ‘Yɨda'maraangelyɨ,’ majɨ yɨvanɨkei daaka!” 12Kɨwɨnyabwi pɨbulyɨ. Lɨmwagasa'nebwi pɨbulyɨ. Avaalyaburaai mɨka. Aawa. Dɨnɨke' “Kɨwɨnya yuya ya'gɨzɨ gaala dɨmwaaide'nengɨra mubya'bɨ'.” 13Nemɨ Kɨwɨnya yuya myadaanya'na yuyainaavɨ Dɨkevɨ nemarasɨ'nya'neina mwaaiho. Sareinaavɨna Kɨraazɨtɨyai ayɨna nemuba'. Sare' dara dɨnɨke' “Gazaizarɨ yɨsavɨ maratamarɨmwɨdaakwɨpɨ'derɨ Gotɨyai Dɨkevɨ marasɨ'nadelyɨ.” Kɨraazɨtɨyarɨ yɨsavɨ nemɨnyɨneba kamaratamarɨmwɨdaakwe' Gotɨyai Dɨkevɨ marasɨta'neba sai yɨma'naabaka ayɨna nemaarakelyɨ. 14Gotɨyai “Ne Evɨraamɨmɨ tewaanya naanga yanga wiaanya' Jizaazai Kɨraazɨtɨyarɨna ajɨmya yuyangɨyaraavɨne' yɨma'nana!” daka, nabaai nemɨnyɨna “Sahwara, Kɨraazɨtɨyarɨ kalɨmwagapɨjɨ Kuryai Tewaanyarɨne yune naanga nebulya'na wɨde sarɨ maapɨka!” kada' Dɨkevɨ marasɨ'nya'nei yɨma'naka ayɨna nemubakelyɨ.

Kɨwɨnya' Gotɨyare yagaalyavɨ mwavɨlayɨ yannesɨ.

15Nya'mweihi, a'mweinaavɨrebwinanya' yɨhɨzɨwaakɨma! A'mwei yawɨraka wɨlɨmwagarɨke sare' yɨkwiavɨ yavɨkaryaka gannya yaya yavɨkaryake' pwara magalazekɨvalyɨ yɨpɨnere. Yagaala pɨnɨjɨ mye'mwagyɨ yɨpɨnere. 16Nemɨrebwi yɨgovaaibɨ' Gotɨyai yagaalya Evɨraamɨmɨjɨ gamɨre dɨviya'nei yɨsiwiarɨjɨ yune naanga nebulya'na wɨjaake kuna warɨ' tewaanya'na. Gotɨyare bukuya' majɨnyɨ' “Dɨviya'neraava.” Kwalaalyaraavɨna majɨnyɨkesɨ. Aawa. Dara dɨnɨ' “Dɨviya'nela,” gave pwarɨna dɨnɨkesɨ. Nabaai, Kɨraazɨtɨyarɨna dɨnɨkesɨ. 17Kuna warɨke' dara dɨvanɨge. Gotɨyai Evɨraamɨmɨ yagaalya' yune naanga nebulya'na wɨdaka wɨjaa' “Sara gɨthɨwe' sara yɨdeinyɨ.” Sɨnnawɨ sagaa' wɨlɨmwagarake sa' wɨdaka kwarame dɨviyajɨ kwarame naanga naanga (430) wavɨlayaakegaa' dɨvidaa'nyɨ Ne Mozɨzarɨ Kɨwɨnya' wɨjayaa'. Dɨvidaa'nya' sɨnnawɨnyavɨ magalazekɨvalyɨnɨkesɨ. Yaasɨwa'nanya' mwakyɨnɨkesɨ. Aawa. Sɨnnawɨnya' Gotɨyai Evɨraamɨmɨ yune naanga nebulya'na wɨjaake' kuna warɨkesɨ. 18Sare' dare'nesɨ. Evɨraamɨ Kɨwɨnya' yaakevɨdaa'nyɨ Gotɨyai wɨjaake' wɨjaavajɨ kwajɨ Gotɨyai yune naanga nebulya'na wɨjaakevɨdaa'nyɨ myɨma'nyɨ kyadɨka! Kɨrɨ' Gotɨyai Evɨraamɨmɨ yune naanga nebulya'na wɨjaake'na wɨjaavakesɨ.

19Gotɨyai yune naanga nebulya'na wɨjaake' kuna warɨkevɨdaa'nyɨ dɨvidaa'nyɨ Gotɨyai Kɨwɨnya' be'na wɨjayaa'? Da'na yɨnɨkesɨ. A'mwera kunnya kayaa'nanya wangadɨvɨ' dɨna “O, sareburɨ kayaaka galazekɨvaina yɨvanɨgoine. We'.” Sare'na Kɨwɨnya' wɨjayaake'nanyɨ. Evɨraamɨmɨre yɨsiwiai Jizaazarɨ yune naanga nebulya'na wɨjaakei bakegaa'nanyɨ. Nabaai, Gotɨyai dɨragɨnna wɨjaake' naangesɨ. Gotɨyare Kɨwɨnyabwi maalɨkesɨ. Kɨwɨnya sa' Gotɨyai ejelɨyaraavɨ kujayaa' a'mwe pwai Mozɨzai tɨnnyaba mwalyaakerɨ mamaayara kujayaa' sai a'mweraavɨna wɨjayaakesɨ. 20Tɨnnyabanyai gave pwarɨna mɨ'. Gotɨyai gave pwalyɨra. Yune naanga nebulya'na wɨjaake' Evɨraamɨmɨ Gotɨyai gavei wɨjaakesɨ. Tɨnnyabanyai mamwalyaakesɨ. Sare'na yune naanga nebulya'na wɨjaake' naangesɨ.

Kɨwɨnya'nesɨ.

21Sarevɨdaa'nyɨ Gotɨyai yune naanga nebulya'na wɨjaakengɨ Kɨwɨnya' kayaaka yɨgaimanɨke' daaka! Arɨkawɨ. Sare' dare'nesɨ. Gotɨyai yune naanga nebulya'na wɨjaake' gevɨnesɨ. Kɨwɨnya' gevɨnesɨ. A'mwera gaala mwaaibɨ'de'na kɨwɨnya wɨjaavajɨ kwajɨ kɨwɨnya sa kyaadɨke' Gotɨyai nemɨnyɨna “Yɨda'maraangeigɨnyɨ,” kanedathɨka! Sare' mɨ'. Kɨwɨnya sa mwarikengɨ. 22Aawa. Gotɨyare bukuya' dɨnɨ' “A'mwe yuya kwara kayaa'nanyaburɨ kwaakevɨ wɨla pwɨyɨnɨkerera.” Gotɨyai “Evɨraamɨmɨ yune naanga nebulya'na wɨjaanya' a'mwe Jizaazai Kɨraazɨtɨyarɨ lɨmwabɨzaraavɨna wɨjaavɨma! ‘Yɨda'maraangeihɨlyɨ,’ wɨdɨma!” daka kayaa'nanyaburɨ marulawaka'.

23Kɨraazɨtɨyarɨ lɨmwange'negaa' myɨma'nyakegaa' Kɨwɨnya' nevwɨyɨnɨke' Juyainaavɨ kalavuzavɨ nemaremwaala'. Kɨwɨnya' wothaayaibɨsa' nemaremwaaidɨsɨ Gotɨyai Kɨraazɨtɨyarɨ lɨmwagaaza' kaneyɨbwarɨdaakwa' sagaa' nemaremwaalake' mi'nanyɨ. 24Kɨraazɨtɨyai mabyahaa' Gotɨyai Kɨwɨnya' kanejaava' Kɨwɨnya' neyɨgɨvaangeibɨsa' dɨragɨnna nemaremwaalakesɨ. Gotɨyai yawɨ'na “Sahwara Kɨraazɨtɨyarɨ lɨmwabɨ'de'na ‘Yɨda'maraangeigɨnyɨ,’ wɨdɨma!” daka neyɨgɨvaangeibɨsa' wakakesɨ. 25Kɨraazɨtɨyarɨ lɨmwagaazahaa' mi'na kyɨma'na' neyɨgɨvaangeibɨsa' manemaremwaalyɨkesɨ. 26Sare' dare'nesɨ. Yuyaihi Kɨraazɨtɨyai Jizaazarɨ lɨmwamwaasavɨna Gotɨyare gawaalɨvaangeihi mwaaihasaihɨlyɨ. 27Sare' dare'nesɨ. Sareihɨrɨ Gotɨyai tewaanna yɨhyake'na Kɨraazɨtɨyarɨ bavɨtaazɨya wɨlayɨhɨmwaaihaka yuyaihi yɨ sahwaihi Kɨraazɨtɨyai kɨnɨnnakeihɨlyɨ. 28Kɨraazɨtɨyai Jizaazarɨ wɨlamwaaihasa'na Gotɨyai yuyaihɨrɨ avaaina yɨhɨmaara'. Gotɨyai myawɨri “Sai Juyai, sai Gɨrikɨyalyɨ. Sai yaasɨwa'wawɨnyai, sai maremwaainadelyɨ. Sai kwalyai, sa' balyasɨ.” Sare' dare'nesɨ. Dazaraavɨna myawɨri yada yawɨ'na “Kɨraazɨtɨyai Jizaazarɨna sai nɨmɨrei yɨma'nana!” yuya saihi gave pwaihɨlyɨ. 29Sare'na Kɨraazɨtɨyareihi mwaaihasavɨdaa'nyɨ Evɨraamɨmɨ gawaalɨvaangeihi, yɨsiwiaihi mwaaiha'. Sare'na Gotɨyai Evɨraamɨmɨ yune naanga nebulya'na wɨjaake' yɨhɨzaavadelyɨ.

Currently Selected:

Galezɨya 3: byr

Highlight

Copy

Compare