Epazaazɨ 5

Baakeburɨ tewaanya mwaaiho'nesɨ.

1Gotɨyare kaimɨraayaigɨnyɨ yɨlaaya gɨvu'nadeigɨ mwaaihɨnyabaaibɨ' gamɨre mwaalyabwi ja! Gotɨyarɨ dɨmɨdɨna! 2Kɨraazɨtɨyarɨ nemɨnyɨneba kale wiakei nemɨnyɨna balakabaaibɨ' kale gyada dɨmwaaideigɨnyɨra. Juyaraavɨre Ne sɨnnawɨnyara sipɨzipɨyarɨ yanga wɨjaaya'ne' dɨka nasɨ'nadaasɨ Gotɨyai wabatɨrɨnya' winada yɨlaaya yakabaaibɨ' Kɨraazɨtɨyai tewaanyabwina yuna balake'na yɨlaaya yakelyɨ.

3Gotɨyare tewaanyaihi mwaaihatabaaibɨ' ata lɨmwangebulyɨ gɨrɨkita'nanya yuyabulyɨ wabarɨnnyabulyɨ sare sabwina yɨleyagaala madɨbɨna! Sarebwina pwara nyawɨpɨdɨka! “O, kayaa'na jɨvanɨga'.” 4Yagaala kayaa'nanyajɨ yɨmaka widɨvɨsaraavɨre yɨmakyagaalyajɨ kayaa'nanyabwina yɨpaa'nyɨ yagaalyajɨ madɨpɨna! Gotɨyareihi wɨja'ne sabwi madɨpɨneihɨlyɨ. Aawa. Gotɨyarɨ yɨlaaya'na “Su! Su!” wɨdɨpɨneihɨlyɨ. 5Sare' dare'nesɨ. Dɨragɨnna dara yawɨ'manɨgasasɨ. A'mwera ata lɨmwangebwi yadɨvɨsarajɨ gɨrɨkita'nanyabwi yadɨvɨsarajɨ pwaraavɨrengɨ wabarɨnnya yadɨvɨsarajɨ saraavɨ Kɨraazɨtɨyalyɨ Gotɨyalyɨ mamaremwaalyɨ yɨkadera. Kɨrɨmɨre yovɨrawakɨwaalya mamaari yɨpɨ'derera. Pwaraavɨrengɨ wabarɨnnyabwi sabwi a'mwa'mwe, nyɨlyai, yɨta naangera, sɨlaanga sazangɨna yɨlaaya yadɨvɨsabulyɨ. Sare avaalyabwi wabarɨnnyabwina pwaraavɨrengɨ yawɨ'dɨvɨsare. Gotɨyarɨ yɨlaaya myadɨvɨsare.

6Aane pwai kwai yaasɨwa'nanyanna wɨdɨna “Sara ya'gɨzɨ tewaanna dɨmwaaideigɨnyɨ,” kwaasɨ sara nagɨthathɨka! Sare' dare'nesɨ. Kayaa'nanya dazanna yadɨvɨ' Gotɨyarɨ galyekɨvaidɨvɨsaraavɨna Gotɨyarɨ sɨnna tɨka wɨda'da wɨramadelyɨ. 7Sarevɨdaa'nyɨ sara yadɨvɨsarajɨ myɨnnera! Saraayawɨdaasɨ jahalya'makwodeigɨnyɨ. 8Sare' dare'nesɨ. Kɨgaa' sahwaigɨ jɨhɨnyasɨyaigɨ kayaa'na mwaalagɨnya kɨrɨ' dahaa' Naangere baakesɨyaigɨ tewaanna mwaaihɨ. Sareigɨ baakesɨyara yɨgatabaaibɨ' kuna nayaa dɨmwaala! 9Sare' dare'nesɨ. Gamɨre baakebwina mwaaidɨ tewaanya yuyajɨ nayaa yɨda'maraanga yuyajɨ nebula yuyajɨ sangɨneigɨnyɨ gɨmwaaihatheigɨnyɨ. 10Naangei Baakei sabwi yɨlaaya wigaidevwi yawɨramaa'na ja! “Sai ‘Tewaanyabulyɨ,’ nyɨdathevwi yɨma!” sara yawɨra'gɨzɨ sara ja! 11Jɨhɨnyasɨya, yaasɨwa'nanya yadɨvɨsa sara mye'mwannayɨnna! Aawa. Baakebwi nayaa ya'gɨzɨ kumɨre kayaa'nanyabwi jɨvwarɨdaakwia! 12Sare' dare'nesɨ. Jɨhɨnyavɨ kayaa'nanya lɨka yulya'dɨvɨ' yadɨvɨsanna waginaka yagaala madɨpɨnengɨ. 13Baakevɨ yuya kyɨbwarɨdaakwa'gɨzɨ yuyara dara wangabɨ'de' “O, aaya kaavɨlya' sasare' daaka!” Sare' dare'nesɨ. Baake' pu'daawojɨ a'mwera sabwi yagalya'mavapɨjɨ yɨrɨkebwi yɨpɨnerera. 14Sarevɨ dɨnɨke'

“Se wakɨnyaigɨ dɨthɨkaaka!

Bainɨkeraayawɨ ayɨna dɨthɨkaaka!

Kɨraazɨtɨyare baake' gɨvuradesɨ.

Dɨkaava'gɨzɨyaigɨnyɨna sɨmunya gɨzaavadelyɨ.”

15Sarevɨdaa'nyɨ gɨnnya mwaalyabwi nayaa jawɨka! Sɨmumaayaigɨ mamwaaidɨnna! Aawa. Sɨmunnakeigɨ dɨmwaala! 16Yɨrɨka kayaa'nanyagasa warɨke'na “Dahaa' tewaanna yɨjɨhyɨwana?” da'gɨzɨ nayaa sara ja! Yɨrɨka sa yaasɨwa'na nabothɨka! 17Sarevɨ sɨdu'maayaigɨ mamwaaidɨnna! Aawa. Naangei gɨmɨnyɨna “Sai sare' yana!” kyawɨrojɨ sare' ja!

18Aalya waainɨya biyaaya'bɨta naanga manɨnna! Sare' yɨmaka nuyɨdɨka! Sarebwi ya'gɨzɨ kayaaka jɨhainade'nanyɨ. Saza manɨnna! Aawa. Kuryai gɨmɨre sɨmunyavɨ yuneba wɨlagɨmwaalana! (Sai sɨmunya' nayaa yuna gɨmaremwaalana!) 19Sareigɨ ja'mwerɨ Gotɨyare yagaaidaata, Gotɨyarɨna yɨledaata daata wɨja'nejɨ duthana! Gɨnnya sɨmunyavɨ Gotɨyarɨ yɨlaaya naanga yadɨ Naangerɨ daata, yɨledaata duthana! 20Yuyagaa' yuyanna Gotɨyarɨ Nenɨmaangerɨ “Su! Su!” duthana! Nemɨre Naanga Jizaazai Kɨraazɨtɨyarɨna yawɨra'gɨzɨ sara duthana!

Kɨyorɨnesɨ.

21Yuna wɨlagɨmwaalanneigɨ Kɨraazɨtɨyarɨna yawɨ'na “Naangelyɨ. Kave yawɨrɨma!” yawɨ'na yɨvanɨgɨnya'na ja'mweraavɨ kwaakewɨ dula'naka! “Dara yawɨ'mwa. Nɨmɨ maalɨkeinyɨ. Nya'mweraavɨ kadɨka wɨ'nɨma!” Sara dɨnneigɨnyɨ.

22Balaange'gɨ, nemɨ Naangerɨ mɨdɨnna yɨvanɨgovaaibɨ' gɨnnya kwalaangerɨ kwaakewɨ dula'naka! 23Kɨraazɨtɨyai gamɨre kusɨlaanyainaavɨ nemaremwaaide Mɨnyagɨnyai mwaalɨkabaaibɨ' kwalaangei gannya balaangevɨ wɨmaremwaaide Mɨnyagɨnyai mwaalɨ'. Kɨraazɨtɨyai sahwai kusɨlaanyainaavɨ nevadaihasamaarakelyɨ. Gamɨre kɨlaakejɨkɨyainera nemɨ. 24Sare'na kusɨlaanyaina Kɨraazɨtɨyarɨ kwaakeba walamwaaina yɨvanɨgovaaibɨ' balaange'gɨ yuyangɨ gɨnnya kwalaangerɨ kwaakewɨ wɨla'na'na jɨthe'gɨnyɨ.

25Kwalaangeigɨ, Kɨraazɨtɨyare kusɨlaanyainaavɨneba kale wiada gannya tawe' nemubya'nei wɨjaaya'nei balakabaaibɨ' gɨnnya balaangevɨna kale gyana! 26“Kumɨre kɨlaakengɨ aalya wiadɨnyabaaibɨ' Gotɨyare yagaalya' kumɨre sɨmunyangɨjɨ munyɨkaavɨjɨ kyavada'galojɨ Gotɨyarɨna tewaanyaraavɨ wɨmwaaihɨma!” daka Kɨraazɨtɨyai bala'. 27“Aayagaa' nɨmɨnyaba kusɨlaanyaraavɨ wɨmwaaihɨma! Sagaa' byaannakeraavɨ wɨmwaaihɨma! Kumɨre sɨmunyangɨ munyɨkaavɨ gɨrɨkita'nanya, nawɨ'nya mya'ne saza mwari yana! Aawa. Gotɨyarera tewaanyara, gɨrɨkita'nanya maayara mwaaibɨka!” daka balake'nanyɨ. 28Sare'na gɨnnya kɨlaakejɨkɨna kale gyada nayaa maremwaaidɨnyabaaibɨ' gɨnnya balaangevɨna kale gyana! A'mwei gannya balaangevɨna kale wiadei, yɨthaa, a'mwei gamɨ sarɨna kale wiadelyɨ. A'mwei balaangevɨna yawɨ'na “A'mwe sa' nɨnnya kɨlaakejɨkɨra.” 29-30Sare' dare'nesɨ. A'mwera kunnya kɨlaakejɨkaavɨna sɨnna tɨka mudayaderera. Aawa. Wapaaya nayaa wɨjaavadɨvɨ' yuyagaa' kave maremwaaidɨvɨsajɨkera. Kɨraazɨtɨyare kɨlaakejɨkɨyaina mwaaiho'na kusɨlaanyainaavɨ kave nemaremwaalɨkelyɨ avaalyabaaibɨ'. 31Sare'na dara dɨnɨke' “Sarevɨ a'mwei gamɨre ganɨmaangelyɨ ganaangesɨ sayorɨ yagalya'mavojɨ gannya balaangesɨ ye'mwannemwaaladelyɨ. Sara kyojɨ sawaai kɨlaaka pɨjɨ'nanyayoi yɨma'nyɨkadeyolyɨ.” 32Sara gave dɨnɨke' nebulya' naange' nemɨnyɨna dɨnɨkesɨ yoimavajalɨkurakya sa'. Sare' dara yawɨ'manɨge' “Yo, Kɨraazɨtɨyalyɨ kusɨlaanyainajɨ sara dɨnɨke' daaka!” 33Sara dɨnɨke' kɨrɨ' gɨmɨnyɨna dɨnɨkesɨ. Kwalaanga gazaigɨzaigɨnyɨna kale gyadevaaibɨ' gɨnnya balaangevɨna kale gyana! Balaanga gaza'gɨza'gɨ gɨnnya kwalaangerɨna yawɨ'na “Sai nɨmɨnyɨna a'mwe naangelyɨ,” yawɨ'na jɨthe'gɨnyɨ.

Currently Selected:

Epazaazɨ 5: byr

Highlight

Copy

Compare