Epazaazɨ 6

Kɨnɨdakaavɨnesɨ.

1Kaimɨraaya kwaigɨ, Naangerɨ wɨlamwaaihɨnya'na gɨmaamaangelyɨ gwaangesɨ sayorɨ dɨmɨdɨna! Sare' dare'nesɨ. Sabwi yɨja' yɨda'nanyasɨ. 2Dɨnɨke' “Gɨnnya gɨmaamaangelyɨ gwaangesɨ sayore yaya dɨmakɨla!” Kɨwɨnya sa', kɨwɨnya naange', yagaala yune naanga nebulya'na wɨja'ne' kɨnɨnnake' sɨnnawɨnya' dɨnɨkesɨra. 3Yagaala yune naanga nebula sa' dara dɨnɨ' “Sare'na gɨmɨnyɨna ‘Yuyangɨna tewaanna wima'nana! Kwaaka davakɨ saamɨnyagaa' mwaalana!’ daka gɨthɨwa'.”

4Kuvɨnɨmaangeigɨ, gɨmɨre kaimɨraayaraavɨ yaasɨwa'na karama'gɨzɨ yaasɨwa'na sɨnna tɨka nudavadɨka! Aawa, kayaa'na kyapɨjɨ Naangerebwi nayaa yawɨra'gɨzɨ nayaanna dɨrama! Nayaanna duthana! Naangerebwina duzɨwaakya!

Yaasɨwa'wawɨnyarajɨ maremwaaidɨvɨsarajɨ saraavɨnesɨ.

5Wɨdaayadɨnyaigɨ, gɨmɨnyɨ kɨlaakejɨkɨnei gɨmaremwaaidei sara kagɨthozɨ Gotɨyarɨna lɨka yadɨ nayaa sara dɨmɨdɨna! Gɨmɨre sɨmunya' gave pɨrɨ'na nayaa yawɨ'dɨ nayaa sara dɨmɨdɨna! Kɨraazɨtɨyarɨ duthaayɨdevaaibɨ' nayaa sara ja! 6Gavegaa' maremwaaidei tɨnna gwangadaawojɨ “Wawɨnya tewaanya'na yɨlaaya nyɨmaryana!” da'gɨzɨ gavegaa' nayaa yɨjɨwaala nyɨdɨka! Aawa. Yuyagaa' nayaa ja! Kɨraazɨtɨyare wɨdaayadɨnyaigɨ mwaaihɨnya'na Gotɨyare sɨmunya' gɨnnya kuryai nayaa yana! Sare' maremwaaiderɨna nayaa ja! 7Sareigɨ wɨdaayadɨnyaigɨ sɨmunyavɨ “Nɨmɨ tewaanna yɨma!” yawɨ'dɨ yɨlaaya'na nayaa ja! A'mwe gaveraavɨ duthaayɨdeigɨ mɨka! Aawa. Naangerɨjɨ duthaayɨdevaaibɨ' nayaa ja! 8Dara jawɨ'desɨ. Wawɨnya tewaanya'na Naangei gazai gazarɨna tewaanya ayɨna wɨjaavadelyɨ. Nɨgwɨwawɨnyarɨnajɨ yaasɨwa'wawɨnyarɨnajɨ wawɨnya' avaaina wɨjaavadelyɨ.

9Maremwaaidɨnyaigɨ, avaalyabaaibɨ' gɨnnya gɨthaayaderɨ nayaa ja! Maiyagaala kuna madɨnna! Nayaa dara yawɨ'mwaa. Sɨgunyavɨ Nemaremwaaide gavelyɨ. Gɨmɨjɨ gɨthaayadɨvɨsarajɨ saihɨrɨ avaaina yɨhɨmaremwaalɨkelyɨ. Sai a'mwerɨ sɨnnyasɨ yayasɨ yawɨsasɨ yawɨ'da myɨkelyɨ. Aawa. Yuyaraavɨna avaaina yɨkelyɨ. Sara yawɨ'mwaa. Sare'na nayaa ja!

Nemɨre kuryara mala bwa'nya'ne'bɨ' yovɨrawakya'nesɨ.

10Yagaala pɨnɨ yɨhɨthɨma! Naangerɨ kuna dɨragɨnna wɨlamwaaida'gɨzɨ gannya dɨragɨnya' gɨzaavada dɨragɨnnakeigɨ gɨmwaaihana! 11Kotɨya Maryadei yawɨ'na “Sai kayaa'nanya kuna yana!” yawɨ'na yojɨ kwaasɨya gyathehaa' dɨragɨnyaigɨ dɨmwaaide'na mwasaabya, pɨnɨ Gotɨyai gɨzaavade yuyajɨyaigɨ dɨragɨnna ja! 12A'mwera kɨlaa'nakera tawanakerajɨ mala mabwa'nyɨvanɨgo. Aawa. Kurya kayaa'nanyara maremwaaidɨvɨsarajɨ dɨragɨnyarajɨ jɨhɨnya dahaa' yɨmakera Kwaakeva' kayaa'nanyava' maremwaaidɨvɨsarajɨ saraavɨ sɨgunyavɨ kurya kayaa'nanyara mwaaidɨvɨsarajɨ sarajɨ mala bwa'nɨvanɨgo. 13Sarevɨ Gotɨyai saabya sasɨ gɨzaavade yuyajɨyaigɨ malya'na maarɨna ja! “Kayaa'nanyagaa' malyagaa' yɨma'nadehaa' yɨkamaangei kanyɨramojɨ dɨragɨnna daavɨma! Mala bwara'mujɨ aayagaa' dɨragɨnna dathɨwagɨma!” da'gɨzɨ maarɨna ja!

14Sarevɨdaa'nyɨ malya'na yovɨrawaka'gɨzɨ Romɨyai aawɨlasaibɨsaigɨ gaidaa'na ja! Munnaanya' Nebulya' dɨvadathɨvainana! Yɨda'maraangebwi kɨhɨsavɨ yuna dɨragɨnya'na dɨvaazɨ'ma'nana! 15Gotɨyare narya'na yagaala tewaanya' yarai wɨdadaanya' sɨvɨlyɨraarɨ dɨvaazɨ'ma'nana! 16Nabaai, Naangerɨ lɨmwadaanyabwi yuna saabya dɨragɨnya' dɨmaryɨvɨla! Yɨkamaangei mwasaagala dɨka nadaawojɨya padaawojɨ gɨmɨre saabya' gɨmarulyakedaavadesɨ. 17Naangei nevadaihasamaarakebwi mɨnyagɨnyavɨ dɨmwaaihɨ'nana! Gotɨyare yagaalya' Kuryai nejaavake' kwaari'masɨramɨnya' gurɨmaanga yuneba woinɨke' dɨlɨmwana! 18Yuya sanna Gotɨyarɨ wɨja ja! Kuryai gɨhaimwadaawojɨ yuyagaa' Gotɨyarɨ dɨragɨnna duthana! Jɨthaangana! Dameigɨ nayaa tɨnna wangadɨ yuyagaa' Naangerɨ yuyanna dɨragɨnna duthana! Yuyagaa' Gotɨyare tewaanyaraavɨna dɨragɨnna jɨthaangana! 19Nabaai nɨmɨnyɨna Gotɨyarɨ duthana! “Gotɨyaigɨ, ‘Polɨmɨna yagaalya' kujaava'mujɨ nayaa dɨragɨnna wɨdana! Sahwai lɨka mi yada yagaala tewaanya' yoimavajalɨkurakya' nayaa dɨragɨnna wɨjɨwaakana!’ da'gɨzɨ yanga duzaama!” Sara duthana nɨmɨnyɨna! 20Yagaala tewaanya'na Kingɨyai Kɨraazɨtɨyai nyɨdaasadere wawɨnya' yɨvanɨgeinyɨ. Kɨgaa' Kɨraazɨtɨyarɨna wɨdahe'na wɨla nyɨvwɨyeta kɨrɨ' Kingɨyare wawɨnya' yɨvanɨgeinyɨ. “Lɨka nyɨwɨdɨka! Nɨmɨre dɨwɨja' dɨragɨnna wɨdɨma!” dadɨ gɨthɨvanɨge. Sareinyɨna Gotɨyarɨ duthana!

Yagaala aaya'nesɨ.

21Tɨkikaazai neya'mwei sahwarɨna nevu'nadei tewaanyai Naangere wawɨnya' dɨragɨnna wɨdaayadelyɨ. Sarei nɨmɨnyɨna yuya yɨhɨthathelyɨ. “Sahwara nɨmɨnyɨnejɨ nɨmɨ yɨvanɨgejɨ yawɨpɨka!” dena sarɨmɨnyawɨnna wɨdasɨwaabe. 22“Sarɨmɨ nemɨnyɨnenna jawɨrila! Sara yawɨrapɨjɨ sarɨmɨre sɨmunya dɨragɨnya jɨvaimwannyɨla!” dena wɨdasɨwaabelyɨ.

23Gotɨyai Nenɨmaangelyɨ Naanga Jizaazai Kɨraazɨtɨyalyɨ sanɨdaai neya'mweihɨrɨ kɨrɨnnya kwaamu'nanyabwi yɨhɨmwaaihika! Kale yɨhyadevwi Naangerɨ lɨmwangebulyɨ dɨragɨnna yɨhɨzaayɨka! 24Nemɨre Naanga Jizaazai Kɨraazɨtɨyarɨna sarɨnnya tewaanya yɨhɨvu'nada, nabaai kuna dɨragɨnna sara yɨhyada, yɨ saihɨrɨ yanga tewaanna yɨhɨgaimwagika!

Polɨ

Currently Selected:

Epazaazɨ 6: byr

Highlight

Copy

Compare