Epazaazɨ 4

Kɨraazɨtɨyareina Kɨraazɨtɨyare kɨlaaka gavejɨ'na avaalyaina mwaaiho'nesɨ.

1Sarevɨdaa'nyɨ nɨmɨ Naangerɨ wɨdaayadɨnya'na kalavuzangevɨ nyɨmwaaihesainyɨ yɨhithaanganɨma! Gotɨyai kagɨthahɨlaka' jɨvwaramaata sareburɨ kaanya nayaa jamarya! 2Gɨnnya yaya' mamakɨlyadɨ kave yawɨkɨnyaigɨ kave yadɨ pwara kayaa'na gyadaapɨjɨ sɨnna tɨka yarai madayɨ gyada tewaanna dɨmwaala! Pwaraavɨna kale gyada kumɨre yagaala wɨ'nadɨ nayaa duhaimwana kale'na! 3Gotɨyai narya' wakɨnɨke'na kwaamu'nanyaburɨ Kɨraazɨtɨyarerajɨ je'mwannamwaala! Kuryai yuyaihɨrɨ yɨhye'mwannamwaaihake'na kɨlaaka gavejɨkɨyaihi dɨragɨnna kuna dɨmwaalyɨla! 4Kɨraazɨtɨyareina gamɨre kɨlaakejɨ' gave pɨjɨ'na mwaaiho. Gotɨyare Kurya gave pwai nemɨjɨyai mwaalɨ'. Nabaai, Gotɨyai yɨhɨthahɨlakake'na yɨhɨzɨvwaramaarakabaaibɨ' nawɨ'nyaba tewaanyaihi dɨmwaalyide' yemwaaimanɨgata gavebwi warɨ'. 5Naanga gave pwai mwaalɨ'. Naangerɨ lɨmwadaanya gavebwi warɨ'. Bavɨtaazɨyabwi gavebwi warɨ'. 6Gotɨyai a'mwe yuyainaavɨ Nenɨmaanga gave pwai mwaalɨ' Kɨraazɨtɨyareinaavɨna. Sai yuyainaavɨ munyaba mwaalɨkelyɨ. Sai yuyainaavɨ dɨragɨnyainaavɨ nemwaaihada gamɨre wawɨnya yɨvanɨgo sahwarɨnera. Sai yuyainaavɨre munyangɨ wɨlanemwaalɨkelyɨ.

7Gannya wawɨnya'na Kɨraazɨtɨyai yawɨ'na “A'mwerɨna sara wɨjaavɨma! Pwarɨna dara wɨjaavɨma!” yawɨ'na yada gazainyɨnazainyɨa yanga gaimwangeburɨne nejaawa'. 8Sarevɨ Gotɨyare bukuya' dara dɨnɨkesɨ.

Ke'mwewɨnna yɨlaawɨna yaka

Wɨla pwɨyɨnɨkeraavɨ makɨlaawa'.

A'mweraavɨna sɨhumale yanga wɨjaava'.

9Sara dɨnɨke' yagaala “Yɨlaawɨna yaka,” be yagaalyavaka? Dara dɨnɨ' “Sɨnnawɨ walaaba'. Kwaaka kewewɨnɨna walaaba',” sara dɨnɨkesɨ. 10Sai walaabakei avaalyai yɨlaawa'. Sai sɨgunyangɨna yɨlaawaka ke'mwewɨnna Sɨgunyavɨna yɨlaawaka “Yuya yuyangɨ wɨlamwaalɨma!” daka yɨlaawa'. 11Sahwai Kɨraazɨtɨyai “A'mweraavɨna sɨhumale yanga wɨjaavakelyɨ.” Sare'na gannya dɨragɨnya' wɨjaavada pwaraavɨ “Nɨmɨre yɨhɨthaasadɨnyaihi,” dahɨlakɨna. Pwaraavɨ “Gotɨyare wɨ'nawɨjɨwaakadɨvɨsaihi,” dahɨlakɨna. Pwaraavɨ “Yagaala tewaanya' mudɨkeraavɨ wɨdadɨvɨsaihi,” dahɨlakɨna. Pwaraavɨ “Sipɨzipɨya nɨmɨreraavɨ maremwaaina, wɨjɨwaakadɨvɨsaihi,” dahɨlakɨna yakerera. 12Kɨraazɨtɨyarera tewaanyara naanga yune nebulya'nanyara yɨma'nɨpɨ'de'na sara dahɨlakɨna. Wɨdaayabwina gaimwannɨpɨ'de'na sara dahɨlakɨna. Kɨraazɨtɨyare kɨlaakejɨkɨyaina gamɨreina dɨragɨnyaina sɨmunnakeina yɨma'naade'na sara dahɨlakɨna ya'. (Anga nayaa mannɨkabaaibɨsaine.) 13Nemɨnyɨne'na dahɨlakɨna yakera kunnya wawɨnya nayaa yadɨvɨ' kɨlaaka gavejɨkɨyaina yuyaina Gotɨyare Gawaalɨvɨ avaaina lɨmwagaraatheine. Gotɨyare Gawaalɨvɨ avaaizɨmunya yawɨraade'nanyɨ. Nemɨ a'mwe naanga yune nebulya'nanyaibɨsaina Kɨraazɨtɨyarɨna mwalaadeine gamɨ kwaibɨ'. Kɨraazɨtɨyai tewaanyai sɨmunnakei sahwai mwaalɨkabaaibɨ' a'mweina avaalyaina yɨnahu mwalaadehaa'nanyɨ. 14Sareinaavɨna “Kaimɨraayara kuna namwaaibɨthɨka!” daka negaimwadɨvɨsaraavɨ nejaava'. Kwaasɨyara kwaasɨ yagaala pɨnɨ yɨhusa' pina pina do'mwadevaaibɨ' nedadaapɨjɨ kaimɨraayaina namwalaadɨka! Kwaasɨyara kayaa'nanyabwi yawɨ'dɨvɨsara wabwiwayagaala dadɨvɨ' kwaasɨya gevwi gevwi wɨjɨwaakadɨvɨsare. 15Kaimɨraayaina kuna mamwalaanna! Aawa. Kale neyadaawojɨ nebulya' wɨdadaa tewaanna mwalaadeine! Kɨraazɨtɨyarɨ yuna wɨlamwalaajaina yuya tewaanyabwina gɨryaadeine. Nabaai, Kɨraazɨtɨyai sahwai nemɨre Mɨnyagɨnyalyɨ. 16Sai nemaremwaalɨkei nayaa nedada sara yaade'nanyɨ. Kɨraazɨtɨyare kɨlaake' yakabaaibɨ' sara yaade'nanyɨ. Sɨvɨla, ata, kɨhɨta, kadɨka saza mɨwɨ'nɨka, dahaala yuya ye'mwannɨka, yuya sa tewaanna yɨnɨkejɨkɨra. Kɨlaaka yuyajɨ' nayaa yɨna yada gɨrinɨkabaaibɨ' nemɨ gamɨre dɨragɨnya' ma'daa Kɨraazɨtɨyare pwaraavɨ wɨgaimwadaa “Dɨragɨnyara tewaanyara mwaaibɨka!” dadaa nayaa wɨjɨwakadaa Kɨraazɨtɨyare yuyaina kale neyada tewaanna mwalaade'nanyɨ.

Kɨraazɨtɨyarɨ wɨlamwaaiho mudɨkebwinesɨ.

17Sarevɨdaa'nyɨ Naangerɨ wɨlamwaaiheinyɨ Naangei dare nyɨdake'na dɨragɨnna dara yɨhɨzalɨkurakɨma! Nayaa kadɨka dɨnyu'nyɨla! Ajɨmya yuyangɨyaraavɨrebwina mwaaidɨvɨtabaaibɨ' kuna mamwaaibɨna! Sahwaraavɨre yawɨta waryaanya warɨ'. 18Kumɨre yawɨramaata jɨhɨnya'bɨ' warɨ'. Kumɨre sɨmunya mi'na sɨlaange wɨlarɨkevɨna kumɨnyɨ sɨdu'maayabwi wɨlarɨkevɨna Gotɨyai gaalyabwi wɨmwaaihadevurɨ menyaba mwaaihasare. 19Kumɨrebwina myawɨri “Kayaa'na yɨvanɨgeinyɨ. Sabwi myɨwɨneinyɨ.” Naangegaa' sara myawɨryadɨvɨsara wagɨla muvwa'nyadera ata lɨmwangebwi dɨragɨnna yɨna. Gɨrɨkita'nanyabwina mɨjɨke'bɨ' wiadere.

20Kɨraazɨtɨyarera sabwi myɨhɨzɨwaakesaihɨlyɨ. Kɨraazɨtɨyarɨ ma'mwaasaihi gevwi yɨpɨneihɨlyɨ. 21Sahwarɨna kadɨka mi'na wɨ'ne'. Sahwarɨ wɨlamwaaihasaihɨrɨ yɨhɨzɨwaake'. Jizaazarɨ nebulya' wɨwarɨkabaaibɨ' yɨhɨzɨwaakesaihɨlyɨ. 22Sareihi, ayabulyɨyaihi kɨgaa' sarɨnnya sɨmunya yawɨ'dɨvɨ' kayaa'na mwaalesabwi marasɨ'nɨpɨneihɨlyɨ. Sɨmunya sa kayaa'nanyanna kwaasɨ yawɨ'na “Wabahɨlaake'nesɨ. Tewaanyasɨ. Yɨlaaya'nesɨ,” kwaasɨ yawɨ'na yada kayaaka yɨhyɨgaidaasɨ sɨmunya sa marasɨ'nɨpɨneihɨlyɨ. 23Sarɨmɨre sɨmunyajɨ yawɨsajɨ kuryajɨ mudɨke yuna yɨhwakanneihɨlyɨ. 24Gotɨyai mudɨkeihɨrɨ yɨhɨmwaaihaka gamɨbɨsaihi sɨmunya nawɨ'nya' yawɨpɨneihɨlyɨ. Sɨmunya sara yawɨ'dɨvɨ' nebwina mwaaidɨvɨsavɨ nayaa yɨda'maraangebwi yɨna, gɨrɨ'maayabwi tewaanna yɨna yɨpɨneihɨlyɨ Kɨraazɨtɨyareihi.

25Sarevɨ kwaasɨ yagaala wɨja'nebwi dasɨ'nana! Wasɨ'na'gɨzɨ gazaigɨzaigɨ nebulya' ja'mwerɨ duthana! Yuyaina Kɨraazɨtɨyare kɨlaakejɨkɨyaina mwaaiho'na nebulya' duthana! 26Pwai kayaa'na kyojɨ gɨmɨre sɨnna tɨka kagɨthavojɨ kɨrɨ' sɨmunya nayaa maremwaala'gɨzɨ saigɨ kayaa'na myɨnna! Naangegaa' sɨnna tɨka magɨthavanna! Sɨnna tɨka kuna kagɨthavojɨ nyɨlyai gaai waidaawojɨyagaa' sare' kayaa'nanyasɨ. Sɨnna tɨka sabwi yarai dɨmarasɨ'nana! 27Naangegaa' sɨnna tɨka kagɨthavojɨ Saataanɨ gɨmɨre sɨmunyavɨ yawɨta kayaa'nanya nakadɨka! Sabwi myɨnnera!

28Kukei maarakei kuna mamaaranna! Aawa. Sai wawɨnya nayaa yana! “Wawɨnya tewaanya' asɨraalyɨ ya'mujɨ nɨgwɨmaayaraavɨ wɨjaapalyɨma!” dozɨ nayaa yana!

29Gɨnnya maangevɨ yagaala kayaa'nanya mudɨnna! “Pwara yagaala nawɨ'nya' nyu'napɨjɨ yanga gaimwangebwi maapɨka!” da'gɨzɨ yagaala sa duthana! Sara kuda'gɨzɨ yagaala sa' wɨgainɨkeraavɨ, kadɨka wɨ'nya'neraavɨ dɨragɨnna wivaimwagathe'nanyɨ. 30Pwaraavɨ kayaa'nanya kuda'gɨzɨ Gotɨyare Tewaanyai Kuryarɨ taanga nuyadɨka! Gotɨyai dɨna “Nɨnnya Kuryarɨ kujaava'mujɨ nɨmɨrera yɨma'nɨpɨka!” dɨna yaka gɨthahɨlaka'. Kuryarɨ wɨlamwaaihɨnya'na dɨragɨnna yawɨ'na “Sagaa' yuna neyaarojɨyagaa'na gamɨre yavɨkwajɨke' nejaava'.” Yawɨ'na yɨvanɨgɨnyaigɨ nayaa dɨmwaala!

31Jɨkurya myɨnna! “Pwara kayaa'nanyarera,” myawɨ'dɨnna! Sɨnna tɨka yaasɨwa'na magɨthavanna! Maanga, maiyagaala mudɨnna! Bɨrala mudɨnna! Yuya sabwi dɨmarasɨ'nana! Nabaai kayaa'nanyabwi myɨnna! 32Aawa. Ja'mwerɨ bwiwanna yɨna ja! Sarɨna kale gyana! Kɨraazɨtɨyai balake'na Gotɨyai gɨmɨre kayaa'nanyabwi marasɨ'nɨkabaaibɨ' pware kayaa'nanya gazaigɨzaigɨ mɨnya mamaa'dɨnna!

Currently Selected:

Epazaazɨ 4: byr

Highlight

Copy

Compare